ប៉ាកា-Paka News

03/05/2025

ក្រោយធ្វើបច្ចុប្បន្នភាព, គិតត្រឹមត្រីមាសទី១ ឆ្នាំ២០២៥ ក្រសួងព័ត៌មានបានចុះបញ្ជីចំនួនសារព័ត៌មានជាតិ-បរទេស ដែលកំពុងដំណើរការផ្សាយសរុបចំនួន១ ៦២០ អង្គភាព រួមមាន៖
ក. ប្រព័ន្ធផ្សព្វផ្សាយទំនើប
- គេហទំព័រសារព័ត៌មានអនឡាញចំនួន៨៣៩ អង្គភាព
- ទូរទស្សន៍ឌីជីថលចំនួន១២ស្ថានីយ
- ទូរទស្សន៍អនឡាញចំនួន៩ អង្គភាព
- ទូរទស្សន៍ប្រភេទ OTT (Over-The-Top media service) ចំនួន១២ ស្ថានីយ
- ទូរទស្សន៍ផ្កាយរណបចំនួន៣ ស្ថានីយ
ខ. ប្រព័ន្ធផ្សព្វផ្សាយប្រពៃណី
- កាសែតចំនួន១២៥ អង្គភាព
- សមាគមសារព័ត៌មានចំនួន២៦ អង្គភាព
- ទស្សនាវដ្តីចំនួន៦ អង្គភាព
- ព្រឹត្តិបត្រចំនួន១២ អង្គភាព
- ទីភ្នាក់ងារសារព័ត៌មានបរទេស និងការិយាល័យតំណាងអចិន្ត្រៃយ៍ចំនួន១៨ អង្គភាព
- រោងពុម្ពចំនួន៨៩
- សៀវភៅចំនួន២២ អង្គភាព
- ភ្នាក់ងារផ្សាយពាណិជ្ជកម្មចំនួន៣ ក្រុមហ៊ុន
- វិទ្យុអ៊ែហ្វអ៊ឹមចំនួន២៨០ ស្ថានីយ និងវិទ្យុអាអ៊ឹមចំនួន១ ស្ថានីយ
- ទូរទស្សន៍អាណាឡូកផ្សាយផ្ទាល់មាន១៦ ស្ថានីយ
- ទូរទស្សន៍ផ្សាយបន្តចំនួន១០១ ស្ថានីយ
- ទូរទស្សន៍ខ្សែកាបចំនួន៤៦ ស្ថានីយ។

08/04/2025

05/03/2025

អាជ្ញាធរកម្ពុជា ច្រានចោលការចោទប្រកាន់ដែលបានផ្សព្វផ្សាយដោយគណនីបណ្តាញសង្គម Weibo មួយរបស់ប្រទេសចិនឈ្មោះ Tie Xiao Jun។

(KEHAKTOMPOR PAKA NEWS)៖​ គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ នៃក្រសួងមហាផ្ទៃ បានចេញសេចក្តីប្រកាសព័ត៌មាន ដើម្បីច្រានចោលការចោទប្រកាន់ដែលបានផ្សព្វផ្សាយដោយគណនីបណ្តាញសង្គម Weibo មួយរបស់ប្រទេសចិនឈ្មោះ Tie Xiao Jun។

ការចោទប្រកាន់ដូចបានផ្សព្វផ្សាយ បានអះអាងថា ស្ថាប័ននគរបាលជាតិកម្ពុជា មានការចូលរួមលក់ព័ត៌មានទៅក្រុមឧក្រិដ្ឋជនឆបោកតាមប្រព័ន្ធអនឡាញ ដែលធ្វើទារុណកម្មលើពលរដ្ឋចិន។ ដោយផ្អែកលើទិន្នន័យជាក់ស្តែង គណៈបញ្ជាការដឹកនាំបានបញ្ជាក់ថា ព័ត៌មាននេះគឺមិនពិត និងផ្ទុយពីការពិតទាំងស្រុង។

សមត្ថកិច្ចកម្ពុជាព្យាយាមបំផុតក្នុងការបង្ក្រាបឧក្រិដ្ឋកម្មអនឡាញ

ក្នុងឆ្នាំ ២០២៤ និងដើមឆ្នាំ ២០២៥ កម្លាំងសន្តិសុខបានអន្តរាគមន៍ស្រាវជ្រាវលើ ១,៧៨៣ សំណេីដែលក្នុងនោះសម្ថកិច្ចស្វែករកជនបរទេសចំនួន ៣,៣០៤ នាក់។ ទន្ទឹមនឹងនេះ សំណើជាច្រើនក៏ត្រូវបានរកឃើញថា ជាករណីប្រឌិតដើម្បីរួចផុតពីកិច្ចសន្យាការងារ ឬជនបរទេសចូលមកប្រទេសកម្ពុជាដោយខុសច្បាប់។

អ្វីដែលច្បាស់លាស់គឺថា នគរបាលកម្ពុជា បានចាត់វិធានការបង្ក្រាបទីតាំងអនឡាញខុសច្បាប់ចំនួន ១៨ កន្លែងនិងបានបណ្តេញចេញពីប្រទេសកម្ពុជាចំនួន ៣,៧២៤ នាក់។

Tie Xiao Jun ជាអ្នកណា?

សំណួរដែលត្រូវគិតគូរគឺ តើ Tie Xiao Jun អាចដើរប្រមូលព័ត៌មានដោយផ្ទាល់នៅទីតាំងអនឡាញខុសច្បាប់បានយ៉ាងដូចម្តេច?​ បើបុគ្គលនេះអះអាងថា មានការធ្វើទារុណកម្មលើពលរដ្ឋចិន តើហេតុអ្វីពួកគេមិនបានធ្វើការស្នើសុំអន្តរាគមន៍តាមអាជ្ញាធរកម្ពុជា ដែលបានបើកទូលំទូលាយដល់សំណើរបស់ជនរងគ្រោះ?

ការច្រានចោល និងការស្នើរសុំឲ្យអាជ្ញាធរចិនអន្តរាគមន៍

ក្នុងអត្ថបទនេះ គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ បានប្រកាសច្បាស់លាស់ថា ការផ្សព្វផ្សាយរបស់ Tie Xiao Jun គឺអំពើបំភាន់ព័ត៌មាន ដែលប៉ះពាល់យ៉ាងធ្ងន់ធ្ងរដល់កិត្តិយសនៃស្ថាប័នសន្តិសុខកម្ពុជា។

ដូច្នេះ សមត្ថកិច្ចកម្ពុជាបានស្នើសុំឲ្យអាជ្ញាធរចិនធ្វើការស្រាវជ្រាវ និងចាត់វិធានការចំពោះបុគ្គលនេះ។

អំពាវនាវដល់សាធារណជន

នៅចុងសេចក្តីប្រកាសនេះ គណៈបញ្ជាការបានអំពាវនាវឲ្យប្រជាពលរដ្ឋ ប្រុងប្រយ័ត្នចំពោះព័ត៌មានក្លែងក្លាយនិងមិនចូលរួមចែករំលែកព័ត៌មានដែលអាចប៉ះពាល់ដល់សុវត្ថិភាពជាតិ។ ផ្ទុយទៅវិញ សមត្ថកិច្ចរីករាយទទួលព័ត៌មានពិតប្រាកដពីសាធារណជន ដើម្បីអាចអន្តរាគមន៍ជួយសង្គ្រោះបានទាន់ពេលវេលា។

04/03/2025

សមត្ថកិច្ចកំពុងស្រាវជ្រាវករណីជនជាតិចិន បាញ់សត្វគោប្រជាពលរដ្ឋ

ស្នងការដ្ឋាននគរបាលខេត្តក្រចេះ បានបញ្ជាក់ថា កំពុងធ្វើការស្រាវជ្រាវ និងបន្តនីតិវិធីច្បាប់ ទាក់ទងនឹងករណីជនជាតិចិនសង្ស័យបាញ់សត្វគោរបស់ប្រជាពលរដ្ឋ ក្នុងតំបន់ក្រុមហ៊ុនចិន ហ្គ្រីន អាយ លែន ស្រុកអូរគ្រឿងសែនជ័យ។

តាមព័ត៌មានដែលបានផ្តល់ដោយស្នងការដ្ឋាននគរបាលខេត្តក្រចេះ ករណីនេះបានកើតឡើងនៅថ្ងៃទី ២៨ ខែកុម្ភៈ ឆ្នាំ ២០២៥។ ពលរដ្ឋឈ្មោះ ស៊ុន លាង​ បានប្តឹងថា មានជនជាតិចិនចំនួន ៣ នាក់ ជិះរថយន្តពណ៌ស បានបាញ់សត្វគោរបស់គាត់ បណ្តាលឲ្យងាប់ ១ ក្បាល នៅភូមិស្រែស្បូវ ឃុំក្បាលដំរី ស្រុកអូរគ្រឿងសែនជ័យ។

ក្រោយពេលទទួលបានបណ្ដឹង សមត្ថកិច្ចជំនាញបានចុះស្រាវជ្រាវ និងបញ្ជាក់ថា ពិតជាមានសត្វគោ ១ ក្បាលងាប់ ក្នុងតំបន់ក្រុមហ៊ុន ដោយមានស្នាមបាញ់ច្បាស់លាស់។

បច្ចុប្បន្ន សមត្ថកិច្ចកំពុងបន្តការស៊ើបអង្កេត ដើម្បីរកមូលហេតុពិត និងអនុវត្តនីតិវិធីច្បាប់។

សម្រាប់ព័ត៌មានបន្ថែម សូមបន្តតាមដាន KEHAKTOMPOR PAKA NEWS។

03/03/2025

អយ្យការអមសាលាដំបូងខេត្តកំពង់ចាម ចេញចំណាត់ការផ្លូវច្បាប់លើករណីមេក្លោងចោរប្លន់ ឯម នាង ហៅ ប្រេស៊ីល

ភ្នំពេញ​ ៖ អយ្យការអមសាលាដំបូងខេត្តកំពង់ចាម បានសម្រេចចោទប្រកាន់ជនសង្ស័យ និងចំណាត់ការផ្លូវច្បាប់លើករណីឧក្រិដ្ឋកម្ម ពាក់ព័ន្ធនឹងឯម នាង ហៅ ប្រេស៊ីល ដែលបានប្រព្រឹត្តអំពើចោរកម្ម និងប្រើអាវុធបាញ់ប្រហារសមត្ថកិច្ច។

ករណីឧក្រិដ្ឋកម្ម និងការស្រាវជ្រាវរបស់សមត្ថកិច្ច

តាមសេចក្តីប្រកាសព័ត៌មានរបស់អយ្យការអមសាលាដំបូងខេត្តកំពង់ចាម​ កាលពីថ្ងៃទី២១ ខែកុម្ភៈ ឆ្នាំ២០២៥ ជនសង្ស័យ ឯម នាង ហៅ ប្រេស៊ីល និងបក្ខពួកបានធ្វើសកម្មភាពប្លន់ម៉ូតូនៅស្រុកកំពង់សៀម ខេត្តកំពង់ចាម។ បន្ទាប់មកបានលក់ម៉ូតូនេះទៅឈ្មោះ សំ បញ្ញាស័ក្ត។

ក្រោយការស្រាវជ្រាវរហូតដល់ថ្ងៃទី២៥ ខែកុម្ភៈ ឆ្នាំ២០២៥ សមត្ថកិច្ចបានចុះបង្ក្រាប និងឃាត់ខ្លួនជនសង្ស័យ៤នាក់នៅក្នុងផ្ទះលេខ៤៣៤ ស្ថិតនៅក្រុងកំពង់ចាម។ ដោយឡែក, ឯម នាង បានប្រើអាវុធបាញ់ប្រហារមកលើសមត្ថកិច្ច បណ្តាលឲ្យមន្រ្តីរងរបួស។ ទោះបីជាយ៉ាងណា សមត្ថកិច្ចក៏បានបាញ់តប រហូតដល់ជនសង្ស័យព្រមប្រគល់ខ្លួន។

ការចោទប្រកាន់តាមផ្លូវច្បាប់

បន្ទាប់ពីការស៊ើបអង្កេត និងផ្ទៀងផ្ទាត់ភស្តុតាង តំណាងអយ្យការបានសម្រេចចោទប្រកាន់ជនសង្ស័យតាមច្បាប់៖

1. សំណុំរឿងទី១ (លេខ ២០៧/២០២៥)– ចោទប្រកាន់ ឯម នាង និង គិត គីមហុង ពីបទ លួចមានស្ថានទម្ងន់ទោសដោយសារការប្រព្រឹត្តអំពើហិង្សានិង សំ បញ្ញាស័ក្ត ពីបទ ទទួលផលចោរកម្ម។
2. សំណុំរឿងទី២ (លេខ ២០៨/២០២៥)– ចោទប្រកាន់ ឯម នាង ពីបទ ប៉ុនប៉ងឃាតកម្មប្រឆាំងសមត្ថកិច្ច និងប្រើអាវុធដោយខុសច្បាប់។
3. សំណុំរឿងទី៣ (លេខ ២០៩/២០២៥) – ចោទប្រកាន់ ឯម នាង និង គិត គីមហុង ពីបទ រក្សាទុកដោយខុសច្បាប់នូវសារធាតុញៀន និង ពេជ្រ ពីបទ ជួញដូរដោយខុសច្បាប់នូវសារធាតុញៀន។

បន្ថែមពីនេះ តំណាងអយ្យការបានស្នើសុំឲ្យចៅក្រមស៊ើបសួរសម្រេចឃុំខ្លួនជនសង្ស័យទាំងអស់តាមនីតិវិធីច្បាប់៕

01/03/2025

ក្រសួងព័ត៌មានណែនាំអ្នកផលិតមាតិកាផ្សព្វផ្សាយតាមបណ្តាញសង្គម ឲ្យគោរពក្រមសីលធម៌

ភ្នំពេញ៖​ ក្រសួងព័ត៌មានបានចេញសេចក្តីណែនាំទៅដល់អ្នកផលិតមាតិកា និងអ្នកប្រើប្រាស់បណ្តាញទំនាក់ទំនងសង្គម ដើម្បីលើកកម្ពស់សីលធម៌សង្គម និងការចែករំលែកព័ត៌មានដោយមានទំនួលខុសត្រូវ។

ក្រសួងបានកត់សម្គាល់ថា មានអ្នកផលិតមាតិកាមួយចំនួន បានប្រើប្រាស់វិធីសាស្ត្រមិនស្មោះត្រង់ ដូចជា ការផលិតមាតិកាបែបលេងសើច (Prank) ដែលអាចប៉ះពាល់ដល់សិទ្ធិ កិត្តិយស និងសេចក្តីថ្លៃថ្នូររបស់អ្នកដទៃ។ មួយចំនួនទៀតបានប្រើប្រាស់ពាក្យអសុរោះ ឬចែករំលែកព័ត៌មានដែលអាចបំពានលើប្រពៃណី ទំនៀមទម្លាប់ និងវប្បធម៌ជាតិ។

ដើម្បីទប់ស្កាត់អំពើទាំងនេះ ក្រសួងព័ត៌មានបានស្នើឱ្យអ្នកផលិតមាតិកា និងអ្នកប្រើប្រាស់បណ្តាញសង្គម បញ្ឈប់ភ្លាមនូវការផលិត និងចែករំលែកមាតិកាដែលមិនគោរពសីលធម៌សង្គម។ ក្រសួងបានលើកឡើងថា ការផលិតមាតិកាបែបលេងសើច ដោយមិនគិតគូរលទ្ធផលអាក្រក់ ទៅលើអ្នកដទៃ អាចបង្កការយល់ច្រឡំ និងប៉ះពាល់យ៉ាងធ្ងន់ធ្ងរទៅលើសង្គម។

ក្រសួងព័ត៌មានបានអំពាវនាវដល់សាធារណជន មិនឱ្យចែករំលែកមាតិកាដែលបំពានលើសិទ្ធិ និងសេចក្តីថ្លៃថ្នូររបស់អ្នកដទៃ ហើយសហការរួមគ្នាទប់ស្កាត់ព័ត៌មានក្លែងក្លាយ និងមាតិកាបែបបំពុលសង្គម។ លើសពីនេះ ក្រសួងបានបញ្ជាក់ថា អ្នកណាដែលបន្តប្រព្រឹត្តអំពើទាំងនេះ នឹងត្រូវរងវិធានការតាមផ្លូវច្បាប់។

ជាបន្ថែម ក្រសួងព័ត៌មានក៏បានកោតសរសើរដល់អ្នកផលិតមាតិកាជាច្រើន ដែលបានគោរពក្រមសីលធម៌ និងផ្តល់ព័ត៌មានដែលពិតប្រាកដ និងមានប្រយោជន៍ចំពោះសាធារណជន៕

24/02/2025

👉សម្ដេចធិបតី​ ហ៊ុន​ ម៉ាណែត​ ជាប្រធានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE SCAMS)។

24/02/2025

ឯកអគ្គរដ្ឋទូតបារាំងប្រចាំកម្ពុជា ជួបជាមួយអគ្គស្នងការរងនគរបាលជាតិ ពិភាក្សាអំពីការស៊ើបអង្កេតឃាតកម្មលើពលរដ្ឋបារាំង

ភ្នំពេញ: លោក Jacques Pellet ឯកអគ្គរដ្ឋទូតបារាំងប្រចាំកម្ពុជា បានជួបពិភាក្សាជាមួយលោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ ដើម្បីពិភាក្សាអំពីវិធានការស៊ើបអង្កេតរបស់អាជ្ញាធរកម្ពុជា ក្នុងក្របខ័ណ្ឌនៃការស៊ើបអង្កេតរបស់ប្រទេសថៃ ដែលទាក់ទងនឹងឃាតកម្មលើពលរដ្ឋបារាំង លោក លឹម គឹមយ៉ា​ និងជាអតីតអ្នកតំណាងរាស្ត្របក្សប្រឆាំងកម្ពុជា​ ដែលត្រូវបានខ្មាន់កាំភ្លេីងបាញ់សម្លាប់កណ្ដាលទីក្រុងបាងកក​ ប្រទេសថៃ​ នាដេីមខែ​ មករា​ ឆ្នាំ២០២៥​ កន្លងទៅ។

ប្រទេសបារាំងកំពុងតាមដានការស៊ើបអង្កេតរបស់ប្រទេសថៃយ៉ាងយកចិត្តទុកដាក់ ដើម្បីស្វែងរកការពិតចំពោះករណីនេះ។ ការជួបនេះ បង្ហាញពីកិច្ចសហការរវាងប្រទេសទាំងពីរ ដើម្បីធានាថាការស៊ើបអង្កេតប្រកបដោយប្រសិទ្ធភាព និងតាមស្តង់ដារសាកល។

24/02/2025

សមត្ថកិច្ចកម្ពុជាបង្ក្រាបប្រតិបត្តិការអនឡាញខុសច្បាប់ រកឃើញជនបរទេសចំនួន ២៣០នាក់

ភ្នំពេញ៖​ គណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ នៃក្រសួងមហាផ្ទៃ បានបង្ក្រាបប្រតិបត្តិការអនឡាញខុសច្បាប់នៅទីតាំងចំនួន ០២ ក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ នៅថ្ងៃទី ២២ និង ២៣ ខែកុម្ភៈ ឆ្នាំ ២០២៥។

ការបង្ក្រាបនេះ បានធ្វើឡើងក្រោយពីការស្រាវជ្រាវស៊ើបអង្កេតលើទីតាំងខាងលើរយៈពេលជាងបីខែកន្លងមក។

ក្នុងអំឡុងការប្រតិបត្តិការចូលពិនិត្យ សមត្ថកិច្ចបានរកឃើញជនបរទេសសរុបចំនួន ២៣០នាក់ ដែលក្នុងនោះមានស្ត្រីចំនួន ៦៨នាក់។ ជនបរទេសទាំងនេះរួមមានជនជាតិថៃចំនួន ១២៣នាក់ (ស្ត្រី ៥៩នាក់) ដែលកំពុងសំងំ លាក់ខ្លួន ដើម្បីធ្វើប្រតិបត្តិការអនឡាញខុសច្បាប់។ បើតាមការស៊ើបអង្កេតជាបឋម ជនទាំងនេះស្ថិតនៅក្រោមការគ្រប់គ្រងរបស់មេក្លោងជាជនជាតិចិន។

នគរបាលជាតិកម្ពុជានឹងស្នើសុំកិច្ចសហការជាមួយនគរបាលភូមិន្ទថៃ ដើម្បីចាត់វិធានការចំពោះជនជាតិថៃ ១២៣នាក់ និងសហការចំពោះការកំណត់មុខសញ្ញាមេក្លោងសំខាន់ផ្សេងទៀត។ ចំពោះជនបរទេសផ្សេងៗទៀត សមត្ថកិច្ចកំពុងបន្តធ្វើការសាកសួរ និងចាត់វិធានតាមច្បាប់របស់ព្រះរាជាណាចក្រកម្ពុជា។

17/02/2025

ក្រសួងបរិស្ថាន បញ្ជាក់អំពីព័ត៌មានមិនពិតស្តីពីករណីភ្លើងឆេះព្រៃនៅកម្ពុជា

ភ្នំពេញ៖​ ក្រសួងបរិស្ថាន បានចេញសេចក្ដីប្រកាសព័ត៌មានបញ្ជាក់អំពីការផ្សព្វផ្សាយព័ត៌មានមិនត្រឹមត្រូវ ស្តីពីករណីភ្លើងឆេះ (Hotspot) នៅក្នុងប្រទេសកម្ពុជា។

ក្នុងរយៈពេលប៉ុន្មានថ្ងៃចុងក្រោយនេះ មានវេបសាយឧតុនិយមមួយចំនួន និងបណ្តាញសង្គម បានចែករំលែកព័ត៌មានដោយប្រើផែនទីមាត្រដ្ឋានតូច ដែលមិនអាចបញ្ជាក់ទីតាំងជាក់លាក់បាន។ រូបភាពទាំងនេះត្រូវបានចម្លងតគ្នា និងធ្វើឱ្យមានការភាន់ច្រឡំនូវការពិត ដែលបង្ហាញឃើញហាក់បីដូចជាព្រះរាជាណាចក្រកម្ពុជាទាំងមូលកំពុងត្រូវភ្លើងឆេះ។

ជាការពិតណាស់ ក្រសួងបរិស្ថាន តាមរយៈអគ្គនាយកដ្ឋានតំបន់ការពារធម្មជាតិ ដែលជាអង្គភាពជំនាញ បានតាមដានករណីភ្លើងឆេះនេះយ៉ាងប្រុងប្រយ័ត្ន និងបានសហការជាមួយស្ថាប័នជំនាញក្នុងតំបន់ ពិសេសមជ្ឈមណ្ឌលជំនាញឧតុនិយមអាស៊ាន (ASMC)។ លទ្ធផលការត្រួតពិនិត្យបានបញ្ជាក់ថា នៅថ្ងៃទី ១៤ ខែកុម្ភៈ ឆ្នាំ ២០២៥ មានចំណុចសង្ស័យអំពីភ្លើងឆេះចំនួន ១០១ ចំណុចប៉ុណ្ណោះ។ ប៉ុន្តែភ្លើងឆេះដែលកើតមាននៅកម្ពុជាមិនមែនជាករណីធ្ងន់ធ្ងរឡើយ ប៉ុន្តែភាគច្រើនជាការឆេះស្មៅ សំរាម ស្បូវ និងជញ្ជាំងស្រូវ។

ក្រសួងបរិស្ថាន សូមអំពាវនាវដល់ប្រជាពលរដ្ឋឲ្យមានការប្រុងប្រយ័ត្ន និងបញ្ឈប់ការដុតសំរាម ស្មៅ និងជញ្ជាំងស្រូវ ដែលអាចបណ្តាលឲ្យមានការឆេះកើតឡើងដោយអចេតនា។ ក្នុងនោះដែរ ក្រសួងសូមស្នើសុំឲ្យអាជ្ញាធរមូលដ្ឋាន និងស្ថាប័នពាក់ព័ន្ធ ចូលរួមអប់រំ និងលើកកម្ពស់ការយល់ដឹងសាធារណៈ ពីហានិភ័យនៃការដុតសំរាម និងការឆេះដោយមិនមានការគ្រប់គ្រង។

17/02/2025

[សេចក្តីជូនដំណឹង]-ស្តីពីការផ្សព្វផ្សាយពាណិជ្ជកម្មផលិតផលគ្រឿងស្រវឹងដោយគ្មានការអនុញ្ញាត

ភ្នំពេញ៖​ ក្រុមប្រឹក្សាគ្រឿងស្រវឹង (ក.គ.ផ.ស.) សូមជម្រាបជូន អ្នកឧកញ៉ា ឧកញ៉ា លោក លោកស្រី ម្ចាស់ក្រុមហ៊ុនផលិត នាំចូល ចែកចាយ និងភ្នាក់ងារផ្សព្វផ្សាយពាណិជ្ជកម្មផលិតផលគ្រឿងស្រវឹងទាំងអស់ឱ្យបានជ្រាបថា ក្នុងពេលថ្មីៗនេះ ក.គ.ផ.ស. បានសង្កេតឃើញមានក្រុមហ៊ុន និងភ្នាក់ងារផ្សាយពាណិជ្ជកម្មមួយចំនួន បានធ្វើការផ្សាយពាណិជ្ជកម្មផលិតផលគ្រឿងស្រវឹង តាមអាហ្វីស ប៉ាណូ ប៉ាណូអេឡិចត្រូនិក និងប្រព័ន្ធផ្សព្វផ្សាយសោតទស្សន៍ ដោយគ្មានការអនុញ្ញាតពី ក.គ.ផ.ស.។

អង្គភាពនេះសូមរំលឹកឱ្យដឹងថា ការផ្សាយពាណិជ្ជកម្មដោយគ្មានការអនុញ្ញាតនោះ បំពានច្បាប់ និងលិខិតបទដ្ឋានគតិយុត្តជាធរមាន ព្រមទាំងគោលការណ៍ ១៧ ចំណុច ស្តីពីការផ្សាយពាណិជ្ជកម្មផលិតផលគ្រឿងស្រវឹង។ ការធ្វើការផ្សាយពាណិជ្ជកម្មបែបនេះអាចបង្កផលប៉ះពាល់ដល់សណ្តាប់ធ្នាប់សង្គម សុខភាពសាធារណៈ និងការប្រកួតប្រជែងមិនសុចរិត។

ក្នុងន័យនេះ ក.គ.ផ.ស. សូមណែនាំដល់ម្ចាស់ក្រុមហ៊ុនផលិត, នាំចូល, ចែកចាយ, ភ្នាក់ងារផ្សព្វផ្សាយពាណិជ្ជកម្ម និងអ្នកពាក់ព័ន្ធទាំងអស់ ត្រូវមកបំពេញសំណុំបែបបទស្នើសុំការអនុញ្ញាតផ្សាយពាណិជ្ជកម្មផលិតផលគ្រឿងស្រវឹង នៅលេខាធិការដ្ឋាននៃ ក.គ.ផ.ស.។

អាសយដ្ឋាន៖ អគារលេខ ៦២ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ (ស្ថិតនៅក្នុងបរិវេណក្រសួងព័ត៌មាន)។
កាលបរិច្ឆេទ៖ ចាប់ពីថ្ងៃចេញសេចក្តីជូនដំណឹងនេះ រហូតដល់ថ្ងៃទី ១៥ ខែមីនា ឆ្នាំ ២០២៥។

ផុតកំណត់ខាងលើនេះទៅ ក.គ.ផ.ស. នឹងសហការជាមួយក្រសួង ស្ថាប័ន និងអាជ្ញាធរមានសមត្ថកិច្ច ដើម្បីចុះអនុវត្តវិធានការច្បាប់ ដោយរុះរើអាហ្វីស ប៉ាណូផ្សាយពាណិជ្ជកម្មល្មើសច្បាប់។ ក.គ.ផ.ស. នឹងមិនទទួលខុសត្រូវចំពោះការខូចខាតនានានោះឡើយ។ លើសពីនេះម្ចាស់ក្រុមហ៊ុន, ភ្នាក់ងារផ្សាយពាណិជ្ជកម្ម និងអ្នកពាក់ព័ន្ធទាំងអស់ ត្រូវទទួលខុសត្រូវចំពោះការចំណាយសំណងការរុះរើ និងអាចប្រឈមនឹងវិធានការច្បាប់។

សំខាន់៖ ការស្នើសុំអនុញ្ញាតនេះ គ្មានការគិតកម្រៃ។

17/02/2025

អគ្គនាយកដ្ឋានពន្ធដារ៖ សហគ្រាស "វិថី ហិរញ្ញវត្ថុ" មានវិញ្ញាបនបត្រចុះបញ្ជីពន្ធដារក្លែងក្លាយ

ភ្នំពេញ៖​ អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ បានចេញសេចក្ដីជូនព័ត៌មានស្តីពីសហគ្រាសមួយ ដែលមានសង្ស័យចំពោះសកម្មភាពឆបោកតាមរយៈការផ្តល់កម្ចីអនឡាញ។

តាមការផ្ទៀងផ្ទាត់ពីសាខាពន្ធដារខេត្តមណ្ឌលគិរី លទ្ធផលបង្ហាញថា សហគ្រាសដែលមានឈ្មោះ "វិថី ហិរញ្ញវត្ថុ" (Financial Street)​ លេខអត្តសញ្ញាណកម្មសារពើពន្ធ (អ.ត.ប)៖ E120-2400000990​ មានអាសយដ្ឋានស្ថិតនៅ ក្បាលដីលេខ ៦១៨ ភូមិកណ្តាល សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី​ និងមានម្ចាស់ឈ្មោះ តែ គីមសៀង​ បែរជាមានការចុះបញ្ជីពន្ធដារដោយប្រើវិញ្ញាបនបត្រក្លែងក្លាយ។

អគ្គនាយកដ្ឋានពន្ធដារបានបញ្ជាក់ថា លេខអត្តសញ្ញាណកម្មសារពើពន្ធ (អ.ត.ប) E120-2400000990​ ដែលសហគ្រាសនេះប្រើប្រាស់ ជាទូទៅជារបស់សហគ្រាសមួយផ្សេងទៀត ដែលមានអាសយដ្ឋាននៅខេត្តតាកែវ ហើយសហគ្រាសនោះបានបិទជាស្ថាពររួចហើយ។

ដោយឡែក អគ្គនាយកដ្ឋានពន្ធដារ ពុំទទួលស្គាល់វិញ្ញាបនបត្រចុះបញ្ជីពន្ធដារ​ (អាករលើតម្លៃបន្ថែម) របស់សហគ្រាស "វិថី ហិរញ្ញវត្ថុ"នេះឡើយ។ ដូច្នេះ សាធារណជនត្រូវមានការប្រុងប្រយ័ត្ន ចំពោះការធ្វើអាជីវកម្ម ឬប្រើប្រាស់សេវាកម្មដែលពាក់ព័ន្ធជាមួយសហគ្រាសនេះ ដើម្បីជៀសវាងការប៉ះពាល់ផ្នែកហិរញ្ញវត្ថុ។

អគ្គនាយកដ្ឋានពន្ធដារ អំពាវនាវដល់ប្រជាពលរដ្ឋ និងសហគ្រាសពាណិជ្ជកម្មឱ្យ សាកសួរ និងផ្ទៀងផ្ទាត់ព័ត៌មានអំពីសហគ្រាស មុនពេលចូលរួមសហការជាមួយ ដោយអាចទាក់ទងតាមរយៈគេហទំព័រផ្លូវការរបស់អគ្គនាយកដ្ឋានពន្ធដារ ឬស្ថាប័នពាក់ព័ន្ធ។