08/07/2025
សម្ដេចតេជោ ៖ ការទើបតែបើកប្រតិបត្តិការបង្ក្រាបបទល្មើសអនឡាញរបស់អាជ្ញាធរថៃ នៅពេលនេះ ដូចជាការលើកដំថ្មទម្លាក់លើជើងខ្លួនឯង
សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រកាស អបអរសាទរ ចំពោះប្រទេសថៃ ដែលបានបើកប្រតិបត្តិការកំទេចបទល្មើសអនឡាញ ព្រោះជាការជួយទប់ស្កាត់មិនឱ្យហូរចូលមកកម្ពុជា។ ទោះជាយ៉ាងណា សម្តេចតេជោ ចាត់ទុកថា សកម្មភាពភាពនេះ ប្រៀបដូចជា ថៃកំពុងលើកដុំថ្មទម្លាក់លើជើងខ្លួនឯង ព្រោះបទល្មើសអនឡាញ ដែលមាននៅពាសពេញទឹកដីរបស់ថៃនេះ គួរតែត្រូវបានធ្វើតាំងពីយូរមកហើយ។ ខណ:វាបានបង្កជាបញ្ហាយ៉ាងច្រើនដល់កម្ពុជា នូវលំហូបទល្មើស ដែលកើតចេញពីទឹកដីថៃ ជាពិសេសនៅព្រំដែន។
ជុំវិញព័ត៌មាន ដែលលើកឡើងថា ការបង្រ្កាប និងស៊ើបអង្កេតលើលោក កុក អាន គឺព្រោះជាមនុស្សជិតសិទ្ធជាមួយ សម្តេចនោះ សម្តេចតេជោ យល់ថាតុលាការថៃ គួរបើកការស៊ើបអង្កេតលើលោក ថាក់ស៊ីន ដែរ ព្រោះអ្នកណាៗក៏ដឹងថា លោកថាក់ ស៊ីន គឺជាមនុស្សសិទ្ធបំផុតជាមួយសម្តេច រហូតមានបន្ទប់ ស្នាក់នៅនៅផ្ទះរបស់ទៀតផង។
តាមរយៈបណ្ដាញសង្គម នាល្ងាចថ្ងៃទី០៨ ខែកក្កដា ឆ្នាំ២០២៥ នេះ សម្តេចអគ្គមហាសេនាបតីតេជោ ហ៊ុន សែន បានលើកឡើងថា ៖ «ថៃលើកដុំថ្មទម្លាក់លើជើងខ្លួនឯង ! ខ្ញុំពិតជាសូមចូលរួមអបអរសាទរចំពោះអាជ្ញាធរ និងប៉ូលីសថៃ ដែលបានបើកប្រតិបត្តិជួយកំទេចបទល្មើសអនឡាញ នៅលើទឹកដីរបស់ខ្លួន ដែលជាការចូលរួមចំណែកដើម្បីកាត់បន្ថយបទល្មើសអនឡាញហូរចូលទឹកដីកម្ពុជា ដែលបទល្មើសទាំងនោះ នៅពាសពេញទឹកដីរបស់ខ្លួន។
ការបំផ្លាញសំបុកបទល្មើសអនឡាញនេះ គួរណាស់ធ្វើយូរហើយមិនមែនទុករហូតដល់ពេលនេះទើបធ្វើនោះទេ កន្លងមកវាបានបង្កជាបញ្ហាយ៉ាងច្រើនដល់កម្ពុជា នូវលំហូបទល្មើសដែលកើតចេញពីចេញពីទឹកដីថៃ ជាពិសេសនៅព្រំដែនរបស់ថៃតែម្តង។
ចំពោះមតិលើកឡើងមានទាំងអាជ្ញាធរ សារព័ត៌មាន និងមហាជនថៃ និយាយថា ការបង្រ្កាប និងស៊ើបអង្កេតលើលោក កុក អាន គឺដោយសារជាមនុស្ស ជិតសិទ្ធជាមួយ ហ៊ុន សែន ដូច្នេះតុលាការគួរបើកការស៊ើបអង្កេតលើលោក ថាក់ស៊ីន ដែរ ព្រោះអ្នកណាៗក៏ដឹងដែរថាថាក់ ស៊ីន គឺជាមនុស្សសិទ្ធបំផុតជាមួយខ្ញុំ ជិតសិទ្ធរហូតមានបន្ទប់ដេកនៅផ្ទះរបស់ខ្ញុំទៀតផង។
ចាំមើលតើតុលាការថៃ ហ៊ានបើកការស៊ើបអង្កេតលើ ថាក់ ស៊ីន ឬទេ?»
