17/07/2025
អំពីពិធីកាត់ព្រ័ត្រ បិទបញ្ចប់ពិធីបុណ្យអុំទូក
ពិធីកាត់ព្រ័ត្យ ប្រារព្ធឡើងនាថ្ងៃចុងក្រោយ នៃពិធីបុណ្យអុំទូក ជាពេលដែលទូកប្រណាំងទាំងអស់បានស្វែងរកឃើញម្ចាស់ជ័យលាភីលេខ១ ដែលត្រូវបានអង្គព្រះមហាក្សត្រនៃកម្ពុជា ប្រសិទ្ធីនាមថាជា "ស្ដេចទូក" ។ មុននិងធ្វើពិធីកាត់ព្រ័ត្យ គេត្រូវធ្វើពីធីអញ្ជើញព្រះខ័នជ័យជាមុនសិន ដោយ ព្រះព្រហ្មជ័យ ជាឆ្មាំយាម ព្រះខ័នជ័យ ត្រូវយកព្រះខ័នជ័យ មកវេទិកាដំណាក់ផែ ព្រះខ័នជ័យ អាចយាងចេញពីព្រះបរមរាជវាំង បានតែម្ដងគត់ ក្នុងការចូលរួមពិធីបុណ្យអុំទូក នៃកិច្ចពិធីកាត់ព្រ័ត្យ។ ព្រះព្រហ្មរាជ និងប្រកាសថា សូមអញ្ជើញ «កាំបិតព្រះស្ដេច» រួចយកទៅថ្វាយជាដាវអាជ្ញាសឹក ទៅអង្គព្រះមហាក្សត្រ ដើម្បីលើកជាកិច្ចកាត់ជ័យព្រ័ត្រ ក្នុងព្រះនិមិត្តសញ្ញានេះត្រូវបានហៅថា «ព្រះខ័នជ័យស្រុក របស់ព្រះរាជា នៃព្រះនគរ» (The Victorous Sword of The Vassal King of Preah Nokor) ព្រះព្រហ្មរាជ និងប្រកាសដល់បារមីទេវតា និង ពួកនាគទាំងឡាយ នៃព្រះនគរ (ទូកប្រណាំងទាំងអស់ ដែលតំណាងជាសត្វនាគ) ចូលអុំកាត់ព្រ័ត្យ បិទបញ្ចប់ពិធីបុណអុំទូក ម្ចាស់ជ័យលាភីលេខ ១ ដែលជាស្ដេចទូក ដែលអុំនៅខាងមុខគេ ដំរៀបជាក្បួនកងទ័ពជើងទឹក ត្រូវពាំនាំយកព្រះខ័នរាជជាតំណាងយកទៅកាត់ទីជ័យព្រ័ត្យ ដើម្បីបិទបញ្ចប់ពិធីបុណ្យអុំទូក ។
គណៈកម្មាធិការបុណ្យជាតិ និងអន្តរជាតិបានឲ្យដឹងថា ពិធីកាត់ព្រ័ត្រគឺជាពិធីមួយបង្ហាញពីលទ្ធផលនៃរាជពិធីប្រណាំងទូកបន្ទាប់ពីបានប្រព្រឹត្តទៅរយៈពេល៣ថ្ងៃនោះ។ ពិធីនេះជានិម្មិតសញ្ញានៃឆន្ទៈដ៏មុតស្រួតរបស់កងកម្លាំងដ៏ក្លៀវក្លាពោរពេញដោយថាមពលរបស់អ្នកអុំទូកដែលជាតំណាងកងទ័ពជើងទឹកដែលបានធ្វើសមយុទ្ធតាមជំនាញក្នុងយុទ្ធវិធីការពារបូរណភាពទឹកដីប្រកបដោយភាពជោគជ័យក្នុងសមរភូមិ។ពិធីកាត់ព្រ័ត្រនេះក៏ជាសិល្បៈនៃកីឡាករ-កីឡាការិនីអុំទូកខ្មែរបូរាណមួយបែប ដែលមានន័យថា អត្តប្បដិរូបភ្ជាប់ទៅនឹងយុទ្ធវិធីគ្រប់គ្រងដឹកនាំ ដែរក្សាការពារអាយុជីវិត ការពារបូរណភាពទឹកដី បេតិកភ័ណ្ឌជាតិ សម្បត្តិវប្បធម៌ ប្រពៃណី ទំនៀមទម្លាប់ អត្តសញ្ញាណជាតិ និងបង្ហាញពីមហិច្ឆតារបស់ពួកខ្មាំងសត្រូវ ដែលមានបំណងអាក្រក់ ដើម្បីឈ្លានពាន និងដណ្តើមយកទឹកដី អច្ឆរិយៈរបស់យើងតាមរយៈល្បែងចាប់កូនខ្លែង”។ ខ្សែព្រ័ត្រដែលចងលាតសន្ធឹងយ៉ាងវែងភ្ជាប់ពីទូកមួយទៅទូកទៀត នៅកណ្តាលទន្លេស្ថិតនៅចំព្រះភ័ក្រព្រះមហាក្សត្រ និងមន្ត្រីអ្នកមុខអ្នកការនាព្រះពន្លាជ័យត្រូវបានកាត់ផ្តាច់ដោយព្រះខ័នរាជដែលជាគ្រឿងសាស្ត្រាវុធដ៏ពិសិដ្ឋ ដែលបញ្ជាដឹកនាំដោយទូកក្រុមអាចារ្យ-បាគូ និងទូកមួយទៀតជាតំណាងនៃមេទ័ពខ្មែរដែលប្រដាប់ដោយសំលៀកបំពាក់សក្តិសមជាមេទ័ពដ៏មានមហិទ្ធិរិទ្ធិ ។
ទូកអុំ ទូកចែវទាំងឡាយដែលហែរហមតាមក្រោយបានលើកច្រវ៉ារឡើងព្រមៗគ្នា ស្រែកហ៊ោរកញ្ច្រៀវកងរំពង និងបញ្ចេញសម្រែកជ័យឃោសដោយទឹកចិត្តសប្បាយរីករាយ ហាក់បីដូចជាសម្រែកស្រែកសន្ធាប់បំបាក់ស្មារតីពួកខ្មាំងសត្រូវដែលមានបំណងយារយីទឹកដីរបស់យើង។ សម្រែកដ៏សន្ធាប់ដោយលាយឡំនឹងជ័យឃោសនេះ ធ្វើឲ្យខ្មាំងសត្រូវបាក់បបខ្លបខ្លាចអំណាចចេស្តារនៃកម្លាំងមហាសាមគ្គីរបស់យើង ។
ចំពោះការចាប់កូនខ្លែងវិញ វាជាល្បែងប្រជាប្រិយខ្មែរមួយបែប ដែលចាស់បុរាណរបស់យើងរៀបចំឡើងសម្រាប់កម្សាន្តសប្បាយនៅពិធីបុណ្យចូលឆ្នាំ តែលេងនៅលើគោក ។ ល្បែងនេះវាបង្ហាញពីវិធីការពារកូនទ័ព(កូនមាន់)ពីសំណាក់មេទ័ព(មេមាន់)។ ល្បែងចាប់កូនខ្លែងមានបុរសម្នាក់ដើរតួជាសត្វខ្លែងនារីម្នាក់ដើរតួជាមេមាន់ និងបុរស-នារីជាច្រើននាក់ទៀតដើរតួជាកូនមាន់។ ខ្លែងជាប្រភេទសត្វដែលមានមហិច្ឆិតាចង់ចាប់កូនមាន់ធ្វើជាចំណីរបស់វា។ សត្វខ្លែងប្រើគ្រប់កលល្បិចដោយហើរសំកាំងដើម្បីឆក់ឱកាសឆាបយកកូនមាន់ធ្វើជាចំណី។ រីឯមេមាន់ស្ថិតនៅចំពោះមុខគ្រោះថ្នាក់បែបនេះបានប្រុងប្រយ័ត្នជានិច្ច ដើម្បីការពារកូនរបស់ខ្លួនកុំឲ្យបាត់បង់ឬគ្រោះថ្នាក់ដោយសារសត្វខ្លែង។ មេមាន់បង្ហាញនូវជំហរលះបង់ខ្ពស់ ត្រៀមប្រយុទ្ធជាមួយខ្លែង និងបង្ហាញពីព្រហ្មវិហារធម៌ចំពោះកូនដោយស្មារតីប្រុងប្រយ័ត្ន។ កូនមាន់ដែលធ្វើតាមការណែនាំរបស់មេនោះមិនជួបភ័យន្តរាយឡើយ។ ខ្លែងដែលមានបំណងបំផ្លាញសេចក្តីសុខរបស់មាន់នោះ បែរជាមិនអាចសម្រេចនូវមហិច្ឆិតារបស់ខ្លួនបាន។ ល្បែងប្រជាប្រិយខ្មែរចាប់កូនខ្លែងនេះប្រៀបបានទៅនឹងយុទ្ធសាស្ត្ររវាងមេទ័ព និងកម្លាំងទ័ពដែលមានយុទ្ធវិធី និងមានសិល្បៈខ្ពស់ក្នុងការបង្កើនស្មារតីប្រុងប្រយ័ត្ន និងភាពស្ទាត់ជំនាញរបស់មេកោយ ដែលចេះដឹកនាំបញ្ជាគ្រប់គ្រងល្អ អាចការពារកូនចៅរបស់ខ្លួនប្រកបដោយជោគជ័យ។ ទាំងនោះគឺដោយសារស្មារតីសាមគ្គីធម៌របស់កងកម្លាំងដែលស្តាប់បទបញ្ជារបស់មេកោយប្រកបដោយភាពមានវិន័យ និងមិនប្រមាទមើលស្រាលគូសត្រូវ។ ដោយហេតុល្បែងចាប់កូនខ្លែងមានន័យទាក់ទងនឹងការគ្រប់គ្រងដឹកនាំផ្នែកកម្លាំងប្រយុទ្ធបែបនេះហើយ ទើបបុរាណខ្មែរយើងលើកយកល្បែងចាប់កូនខ្លែងនេះមកភ្ជាប់ជាមួយព្រះរាជពិធីកាត់ព្រ័ត្រក្នុងពេលបញ្ចប់បុណ្យអុំទូក ។
ពិតមែនតែល្បែងចាប់កូនខ្លែងគេលេងលើគោក តែដោយរាជពិធីបុណ្យអុំទូកមានចរិតលក្ខណៈសមយុទ្ធរបស់កងទ័ពជើងទឹក ដែលមានទូកក្តារជាមធ្យោបាយ ទើបចាស់បុរាណលើកយកល្បែងនេះ មកប្រារព្ធក្នុងពិធីកាត់ព្រ័ត្រទុកដូចជាការសម្តែងមនោសញ្ចេតនាសប្បាយរីករាយ ក្នុងពិធីបុណ្យដ៏មានប្រជាប្រិយនេះ៕
#បុណ្យអុំទូក #អកអំបុក #សំពះព្រះខែ #ទូកងកូនខ្មែរ
