21/04/2024
ឥណ្ឌូនេស៊ីជម្លៀសមនុស្សរាប់ពាន់នាក់ក្រោយផ្ទុះភ្នំភ្លើងបង្កការគំរាមកំហែងរលកយក្សស៊ូណាមិ
18-04-2024
ក្រុមអ្នកជួយសង្គ្រោះឥណ្ឌូនេស៊ីប្រញាប់ប្រញាល់ ជម្លៀសមនុស្សរាប់ពាន់នាក់ នៅថ្ងៃព្រហស្បតិ៍ ទី ១៨ ខែមេសាឆ្នាំ២០២៤ បន្ទាប់ពីភ្នំភ្លើងRuangបានផ្ទុះឡើងចំនួន ៥ ដង ដោយបង្ខំឱ្យអាជ្ញាធរបិទព្រលានយន្តហោះនៅក្បែរនោះបណ្តោះអាសន្ន និងចេញការព្រមានអំពីកំទេចកំទីដែលបានធ្លាក់ចុះអាចបណ្តាលឱ្យមានរលកយក្សស៊ូណាមិ។ អាជ្ញាធរនិយាយថា ពួកគេកំពុងប្រញាប់ប្រញាល់ជម្លៀសអ្នកស្រុកចំនួន ១១,០០០ នាក់ពីតំបន់ក្បែរនោះ ដែលរាប់បញ្ចូលទាំងកោះដាច់ស្រយាលនៃ Tagulandang ដែលមានប្រជាជនប្រហែល ២០,០០០នាក់។ ជាមួយគ្នានោះ អ្នកទេសចរ និងអ្នកស្រុក ត្រូវបានព្រមានឱ្យនៅក្រៅតំបន់ហាមឃាត់ចម្ងាយ ៦ គីឡូម៉ែត្រ។
ភ្នំភ្លើងនេះចាប់ផ្តើមផ្ទុះដំបូងនៅល្ងាចថ្ងៃអង្គារទី១៦ខែមេសា ហើយមនុស្ស៨០០នាក់បានជម្លៀសចេញ មុនវាផ្ទុះ៤ដងទៀតនៅថ្ងៃពុធទី១៧ខែមសា បញ្ចេញកម្អែលយ៉ាងក្រហមឆ្ពិនឆ្ពៅ អមដោយផ្សែងខ្មួលខ្មាញ់បាញ់ទៅលើអាកាស បង្ខំឱ្យអាជ្ញាធរបង្កើនកម្រិតប្រកាសអាសន្នរបស់ខ្លួនដល់កម្រិតខ្ពស់បំផុតនៃប្រព័ន្ធ៤ថ្នាក់។ នៅថ្ងៃព្រហស្បតិ៍នេះ ភ្នំភ្លើងនៅតែបញ្ចេញផ្សែងហុយទ្រលោម ដោយជំរុញឱ្យអាជ្ញាធរបិទអាកាសយានដ្ឋានអន្តរជាតិ ដែលនៅជិតបំផុតក្នុងទីក្រុង Manado លើកោះ Sulawesi រយៈពេល ២៤ ម៉ោង ដោយសារតែការបាចសាចនៃផេះភ្នំភ្លើង ដែលអាចបង្កគ្រោះថ្នាក់ដល់សុវត្ថិភាពនៃការហោះហើរ។ អាកាសយានដ្ឋាននេះ មានក្រុមហ៊ុនអាកាសចរណ៍ ដែលហោះហើរទៅកាន់ប្រទេសសិង្ហបុរី និងទីក្រុងនានាក្នុងប្រទេសកូរ៉េខាងត្បូង និងប្រទេសចិន។
ជាមួយគ្នានោះ អាជ្ញាធរក៏បានព្រមានអំពីរលកយក្សស៊ូណាមិ ដែលអាចកើតឡើងដែលជាលទ្ធផលនៃការផ្ទុះជាប់គ្នាជាច្រើនដង។ ប្រធានទីភ្នាក់ងារភ្នំភ្លើងរបស់ប្រទេសឥណ្ឌូនេស៊ីនិយាយនៅក្នុងសេចក្តីថ្លែងការណ៍នៅថ្ងៃពុធថា សហគមន៍នៅកោះ Tagulandang ជាពិសេសអ្នកដែលរស់នៅក្បែរឆ្នេរ ត្រូវការប្រុងប្រយ័ត្នចំពោះការព្រួសចេញនៃថ្មក្តៅ និងរលកយក្សស៊ូណាមិ ដែលបណ្តាលមកពីការដួលរលំនៃរាងកាយរបស់ភ្នំភ្លើងចូលទៅក្នុងសមុទ្រ។
ការព្រមាននេះ ដោយសារតែឥណ្ឌូនេស៊ីធ្លាប់ជួបប្រទះព្រឹត្តិការណ៍ក្នុងឆ្នាំ២០១៨ នៅពេលដែលរណ្ដៅភ្នំភ្លើង Anak Krakatoa រវាងកោះ Java និងកោះ Sumatra បានដួលរលំមួយផ្នែក អំឡុងពេលមានការផ្ទុះដ៏ធំ បានបញ្ជូនដុំភ្នំភ្លើងដ៏ធំសម្បើម រំកិលចូលទៅក្នុងមហាសមុទ្រ បង្កជារលកយក្សស៊ូណាមិ ដោយបានសម្លាប់មនុស្សជាង ៤០០ នាក់ និងរបួសរាប់ពាន់នាក់។ ដូច្នេះ ដើម្បីចៀសវាងមហន្តរាយដដែលៗ ទើបអាជ្ញាធរបញ្ជាឱ្យជម្លៀសមនុស្សចេញយ៉ាងប្រញាប់ប្រញាល់៕
