https://t.me/kpteconomy, https://www.kampucheathmey.com/

KPT Economy, #03, Street 134, Sangkat Mittapheap, Khan 7 Makara, Phnom Penh (2026)

27/08/2026

ស្ថិតនៅមិនឆ្ងាយប៉ុន្មានពីប្រាសាទឯកភ្នំ បឹងធម្មជាតិចំនួន ២ កំពុងទាក់ទាញភ្ញៀវទេសចរទៅកម្សាន្ត។ បឹងទាំង ២ នេះស្ថិតក្នុងភូមិតាគម ឃុំពាមឯក ស្រុកឯកភ្នំ ខេត្តបាត់ដំបង កំពុងទាក់ទាញភ្ញៀវទេសចរ។

មន្ទីរទេសចរណ៍ខេត្តបាត់ដំបងបានឲ្យដឹងថា បឹងតាគមមានទំហំ ១០ ហិកតា មានអាយុកាលប្រមាណ ១ ០០០ ឆ្នាំ មានទីតាំងស្ថិតនៅទិសពាយព្យនៃប្រាសាទឯកភ្នំ និងបឹងរលួស មានទីតាំងនៅទិសនិរតីនៃប្រាសាទឯកភ្នំ នៅក្នុងភូមិ ឃុំតែមួយ។

សព្វថ្ងៃបឹងរលួសបានក្លាយជាគោលដៅកំពុងទាក់ទាញភ្ញៀវទេសចរ ដែលចូលចិត្តអង្គុយលំហែតាមមាត់បឹង ស្រូយកខ្យល់អាកាសបរិសុទ្ធ និងស្ទូចត្រី ទទួលទានអាហារជុំមិត្តភ័ក្រ ឬជាគ្រួសារ ជាដើម។

លោក ហម អរុណ អនុប្រធាននៃមន្ទីរទេសចរណ៍ខេត្តបាត់ដំបងបានឲ្យដឹងថា មន្ទីរគ្រោងចុះរៀបចំឲ្យមានសណ្តាប់ធ្នាប់ និងអនាម័យល្អ ខណះបច្ចុប្បន្នមានអ្នកភូមិស្រុកនាំគ្នាលក់ដូរ ដើម្បីរកចំណូលទ្រទ្រង់ជីវភាពគ្រួសារ។

លោក ជួង សុភា នាយខ័ណ្ឌរដ្ឋបាលជលផលខេត្តបានឲ្យដឹងថា បឹងរលួស(អាលួស)និងបឹងតាគម គឹជាបឹងធម្មជាតិ ដែលមានអាយុកាលរាប់រយឆ្នាំមកហើយ។

លោកបន្តថា បឹងរលួសលោក បានភ្ញាស់កូនត្រីឆ្ពិនប្រមាណ៦មុឺនក្បាល តាំងពី៦ឆ្នាំមុន សម្រាប់ជាប្រយោជន៍ដល់ប្រជាពលរដ្ឋរស់នៅក្នុងមូលដ្ឋាន៕
---------------
©KPT Economy

27/08/2026

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម បានជំរុញឱ្យក្រុមហ៊ុន-សហគ្រាសកម្ពុជាពង្រឹងស្តង់ដាផលិតផល ការរចនាសំបកវេចខ្ចប់ វិញ្ញាបនបត្រគុណភាព និងការចាប់យកទីផ្សារឌីជីថល។

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម បានលើកឡើងក្នុងពេលចូលរួមពិធីសម្ពោធ «ស៊េរីពិព័រណ៍កម្ពុជា ឆ្នាំ២០២៦» នៅមជ្ឈមណ្ឌលសន្និបាត និងពិព័រណ៍កោះពេជ្រ នៅព្រឹកថ្ងៃទី ២៦ ខែសីហា ២០២៦។

រដ្ឋលេខាធិការបញ្ជាក់ថា ការបន្តរៀបចំព្រឹត្តិការណ៍នេះ ឆ្លុះបញ្ចាំងយ៉ាងច្បាស់ពីទំនុកចិត្តរបស់វិស័យឯកជនលើសក្តានុពល និងកាលានុវត្តភាពសេដ្ឋកិច្ច ពាណិជ្ជកម្ម និងវិនិយោគនៅកម្ពុជា។

ស៊េរីពិព័រណ៍កម្ពុជា ឆ្នាំ២០២៦ គ្របដណ្ដប់លើវិស័យដែលមានសក្តានុពលជាច្រើន រួមមាន៖ កសិកម្ម បសុសត្វ វារីវប្បកម្ម អាហារ និងភេសជ្ជៈ សត្វចិញ្ចឹម ឱសថ បរិក្ខារវេជ្ជសាស្ត្រ មន្ទីរពិសោធន៍ គ្រឿងសម្អាង និងផលិតផលប្រើប្រាស់ទូទៅ។

ព្រឹត្តិការណ៍នេះ មិនត្រឹមតែជាកន្លែងតាំងបង្ហាញផលិតផល និងសេវាកម្មប៉ុណ្ណោះទេ ប៉ុន្តែគឺជាវេទិកាដ៏សំខាន់សម្រាប់ភ្ជាប់ទំនាក់ទំនងរវាងវិនិយោគិន ធុរជន អ្នកបញ្ជាទិញសក្តានុពល និងអ្នកប្រើប្រាស់ទាំងក្នុង និងក្រៅប្រទេស ព្រមទាំងបង្កើតឱកាសផ្គូផ្គងធុរកិច្ច និងពង្រីកទំនាក់ទំនងពាណិជ្ជកម្មអន្តរជាតិ។

លោករដ្ឋលេខាធិការ ក៏បានអំពាវនាវដល់អ្នកចូលរួមទាំងអស់ឱ្យសម្លឹងមើលកម្ពុជា មិនត្រឹមតែជាទីផ្សារសម្រាប់ផលិតផល និងសេវាកម្មប៉ុណ្ណោះទេ ប៉ុន្តែគឺជាដៃគូសម្រាប់ការផលិត ការវិនិយោគ និងការចែកចាយ ព្រមទាំងជាច្រកចូលទៅកាន់ទីផ្សារតំបន់ដ៏ធំទូលាយ ដោយរួមគ្នា «ប្រែក្លាយទំនាក់ទំនងឱ្យទៅជាឱកាស ប្រែក្លាយឱកាសឱ្យទៅជាការវិនិយោគ និងពាណិជ្ជកម្ម និងប្រែក្លាយការវិនិយោគ និងពាណិជ្ជកម្មឱ្យទៅជាវិបុលភាពប្រកបដោយចីរភាព»៕
---------------
©KPT Economy

27/08/2026

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានជំរុញឱ្យវិស័យឯកជន និងធុរជន ចូលរួមឱ្យបានសកម្មក្នុងក្រុមការងារទាំង ១៦ របស់សភាពាណិជ្ជកម្មកម្ពុជា ដើម្បីប្រមូលនិងលើកយកបញ្ហាប្រឈម ព្រមទាំងសំណើជាក់ស្តែងពីវិស័យធុរកិច្ច ទៅពិភាក្សា និងស្វែងរកដំណោះស្រាយជាមួយរាជរដ្ឋាភិបាលតាមផ្លូវការឱ្យមានប្រសិទ្ធភាព។

នៅក្នុងវេទិកាធុរកិច្ចនិងនវានុវត្តន៍ ២០២៦ ដែលមានការចូលរូមពីវិស័យឯកជន និងវត្តមាន លោក ហ៊ឺ បាវី ប្រធានអគ្គនាយកកំពង់ផែស្វយ័តភ្នំពេញកាលពីម្សិលមិញនេះ អ្នកឧកញ៉ា គិត ម៉េង បានបញ្ជាក់ថា ក្រុមការងាររបស់សភាពាណិជ្ជកម្មកម្ពុជា គឺជាវេទិកាសំខាន់មួយសម្រាប់ភ្ជាប់រវាងវិស័យឯកជន និងរដ្ឋាភិបាល។

លោកបានលើកឡើងក្នុងន័យថា វិស័យឯកជនមិនគួរត្រឹមតែបង្ហាញការមិនពេញចិត្ត ឬត្អូញត្អែរអំពីបញ្ហាប្រឈមនៅតាមតុហាងកាហ្វេ ឬបង្ហោះតាមបណ្ដាញសង្គម Facebook ប៉ុណ្ណោះទេ ព្រោះការលើកឡើងបែបនេះអាចមិននាំទៅរកដំណោះស្រាយជាក់ស្តែងបានឡើយ។ ផ្ទុយទៅវិញ បញ្ហាគួរត្រូវបានប្រមូល ចងក្រង និងដាក់ចូលក្នុងយន្តការផ្លូវការ ដើម្បីឱ្យមានការពិភាក្សាជាមួយភាគីពាក់ព័ន្ធ និងស្វែងរកដំណោះស្រាយរួម។

តាមរយៈការចូលរួមយ៉ាងសកម្មរបស់ធុរជន និងការសហការជាមួយរដ្ឋាភិបាល បញ្ហាប្រឈមនានាអាចត្រូវបានលើកយកមកពិភាក្សាដោយផ្ទាល់ និងឈានទៅរកដំណោះស្រាយដែលផ្តល់ផលប្រយោជន៍ដល់ទាំងអាជីវកម្ម និងសេដ្ឋកិច្ចជាតិ។

ជាមួយគ្នានេះ ប្រធានសភាពាណិជ្ជកម្មកម្ពុជា ក៏អំពាវនាវដល់ធុរជន និងតំណាងវិស័យឯកជន ឱ្យប្រើប្រាស់យន្តការនេះឱ្យបានពេញលេញ ដោយផ្តល់ព័ត៌មាន និងបញ្ហាជាក់ស្តែងដែលកំពុងជួបប្រទះក្នុងការប្រកបអាជីវកម្ម។ បញ្ហាដែលត្រូវបានប្រមូល និងរៀបចំយ៉ាងច្បាស់លាស់ អាចក្លាយជាមូលដ្ឋានសម្រាប់ការពិភាក្សាជាមួយស្ថាប័នរដ្ឋ និងឈានទៅរកការកែលម្អគោលនយោបាយ ឬនីតិវិធីដែលពាក់ព័ន្ធនឹងវិស័យឯកជន៕
---------------
©KPT Economy

27/08/2026

លោក អិល ឈិញ ប្រធានសមាគមកសិករដំឡូងមីខ្មែរ បានប្រាប់កម្ពុជាថ្មីកាលពីថ្ងៃពុធ ទី ២៦ សីហាម្សិលមិញថា តម្លៃទីផ្សារដំឡូងមីស្រស់បន្តកើនឡើង ដោយលក់បានចន្លោះពី ៣៩០-៤៨០ រៀល ក្នុងមួយគីឡូក្រាម ខណៈផ្ទៃដីដាំដុះនៅឆ្នាំនេះបានថយចុះពី ៣០% ទៅ ៤០%។

ប្រធានសមាគមដំឡូងមីបញ្ជាក់ថា តម្លៃដំឡូងមីកើនឡើង ដោយសារតម្រូវការសកល។ លោកបញ្ជាក់ថា នៅក្នុងឆ្នាំ ២០២៦ កសិករភាគច្រើនធ្វើដំឡូងមីស្ងួត ដែលទទួលបានតម្លៃខ្ពស់ រហូតដល់ជាង ៦០០ រៀល ក្នុងមួយគីឡូក្រាម។ ទីផ្សារនាំចេញដំឡូងមីរបស់កម្ពុជា មានប្រទេសវៀតណាម ចិន និងប្រើប្រាស់ក្នុងស្រុក។

រាជរដ្ឋាភិបាលបានខិតខំជំរុញ និងពង្រីកទីផ្សារនាំចេញដំឡូងមីរហូតដល់ប្រមាណ ១០ លានតោន ទៅកាន់ទីផ្សារអន្តរជាតិនៅក្នុងឆ្នាំ ២០២៥។

យោងតាមក្រសួងពាណិជ្ជកម្ម កម្ពុជារកចំណូលបានជាង ៣៧៦ លានដុល្លារ ពីការនាំចេញដំឡូងមី នៅក្នុងត្រីមាសទី១ ឆ្នាំ ២០២៦ (មករា-មីនា) ២០២៦ កើនឡើង ១៦,២៦% ធៀបនឹងរយៈពេលដូចគ្នានៅឆ្នាំ ២០២៥ ខណៈកម្ពុជាបានបង្កើនការកែច្នៃលើកកម្ពស់គុណភាពដំឡូងមីស្របតាមតម្រូវការទីផ្សារ។

នៅក្នុងឆ្នាំ ២០២៥ កម្ពុជារកចំណូលបាន ៦៤៦ លានដុល្លារ ពីការនាំចេញដំឡូងមី ធ្លាក់ចុះ ១៤,៤៨% ប្រៀបធៀបនឹងឆ្នាំ ២០២៤។

បរិមាណនាំចេញដំឡូងមីស្រស់មានចំនួន ៣ ១០៥ ៥០០ តោន ធ្លាក់ចុះ ៩,៨២% នៅក្នុងឆ្នាំ ២០២៥ រីឯចំណិតដំឡូងមីក្រៀមបានកើនឡើង ៦២,២២% ដែលមានចំនួន ១ ៥៦៥ ៩៤០ តោន៕
---------------
©KPT Economy

27/08/2026

ការដឹកជញ្ជូនទំនិញតាមផ្លូវទឹកអាចកាត់បន្ថយថ្លៃដឹកជញ្ជូនប្រមាណ ៣០% ទៅ ៤០% បើប្រៀបធៀបនឹងការដឹកជញ្ជូនតាមផ្លូវគោក ខណៈការដឹកជញ្ជូនតាមផ្លូវទឹកក៏អាចដឹកទំនិញក្នុងបរិមាណច្រើនក្នុងពេលតែមួយ។

លោក ហ៊ឺ បាវី ប្រធានអគ្គនាយកកំពង់ផែស្វយ័តភ្នំពេញបានឱ្យដឹងថា ការដឹកជញ្ជូនតាមផ្លូវទឹកមានតម្លៃទាបជាងផ្លូវគោក ដោយកប៉ាល់មួយអាចដឹកកុងតឺន័របានចន្លោះពី ២០០ ទៅ ៣៦០ កុងតឺន័រក្នុងពេលតែមួយ ខណៈការដឹកជញ្ជូនតាមរថយន្តភាគច្រើន អាចដឹកបានតែមួយកុងតឺន័រក្នុងមួយជើង។

កំពង់ផែស្វយ័តភ្នំពេញបានចាប់ផ្តើមប្រតិបត្តិការរបស់ខ្លួនតាំងពីឆ្នាំ២០០០ ដោយផ្តោតលើការផ្តល់សេវាដឹកជញ្ជូនប្រកបដោយប្រសិទ្ធភាព តម្លៃសមរម្យ និងកាត់បន្ថយការខូចខាតទំនិញ។

សមត្ថភាពផ្ទុក និងចាត់ចែងទំនិញរបស់កំពង់ផែបានកើនឡើងយ៉ាងខ្លាំង ពីប្រមាណ ៦ ម៉ឺនកុងតឺន័រក្នុងឆ្នាំ ២០១២ ដល់ប្រមាណ ៦០ ម៉ឺនកុងតឺន័រនាពេលបច្ចុប្បន្ន។

លោក ហ៊ី ប៉ាវី បានបញ្ជាក់ថា ទោះបីការដឹកជញ្ជូនតាមផ្លូវទឹកមានតម្លៃថោកជាងក៏ដោយ ក៏ការដឹកជញ្ជូនតាមផ្លូវគោកនៅតែមានតួនាទីសំខាន់សម្រាប់ទំនិញ ដែលត្រូវការដឹកជញ្ជូនជាបន្ទាន់ ព្រោះមានល្បឿនលឿនជាងការដឹកជញ្ជូនតាមផ្លូវទឹក។

ដើម្បីបង្កើនសមត្ថភាពបន្ថែម លោក ហ៊ី ប៉ាវី បានបញ្ជាក់ថា កំពង់ផែស្វយ័តភ្នំពេញកំពុងពង្រីកសាខាទី ៤ និងផែស្ងួតទី ២ ព្រមទាំងមានគម្រោងបង្កើតផែចម្បងចំនួន ២ បន្ថែមទៀត។

កំពង់ផែបានបង្កើនរយៈពេលស្តុកទំនិញដោយឥតគិតថ្លៃពី ៧ថ្ងៃ ដល់ ១២ថ្ងៃ ដើម្បីសម្រួលដល់អតិថិជន ខណៈប្រតិបត្តិការកំពង់ផែដំណើរការ ២៤ ម៉ោងលើ២៤ម៉ោង ចែកជា៣វេន និងមិនឈប់សម្រាកនៅថ្ងៃសៅរ៍ អាទិត្យ ឬថ្ងៃឈប់សម្រាកឡើយ។

«កប៉ាល់ដែលមកដល់កំពង់ផែនៅម៉ោង ១០ យប់ ក៏អាចចាប់ផ្តើមរើទំនិញចុះបានភ្លាមៗ ហើយការងារនេះអាចចំណាយពេលប្រមាណ ៣ ម៉ោងប៉ុណ្ណោះ»។

លោក ហាក់ លាងហ៊ ប្រធានសមាគមភស្តុភារកម្មកម្ពុជា បានលើកឡើងថា ក្នុងចំណោមប្រព័ន្ធដឹកជញ្ជូនសំខាន់ៗ ការដឹកជញ្ជូនតាមផ្លូវទឹកមានតម្លៃទាបជាងគេ បន្ទាប់មកគឺផ្លូវដែក ផ្លូវគោក និងផ្លូវអាកាសដែលមានតម្លៃខ្ពស់ជាងគេ។

លោកបន្តថា តម្លៃសេវាឡូជីស្ទីកមិនអាស្រ័យលើភាគីណាមួយតែម្នាក់ឡើយ ប៉ុន្តែពាក់ព័ន្ធនឹងភាគីជាច្រើន ដូចជា កំពង់ផែ ភ្នាក់ងារដឹកជញ្ជូន និងក្រុមហ៊ុនកុងតឺន័រជាដើម។ ដូច្នេះ ការកាត់បន្ថយថ្លៃដឹកជញ្ជូនត្រូវការកិច្ចសហការពីគ្រប់ភាគីពាក់ព័ន្ធ។

លោក ហាក់ លាងហ៊ ប្រៀបធៀបថ្លៃដឹកជញ្ជូនរបស់កម្ពុជាជាមួយប្រទេសជិតខាងនៅតែមានភាពលំបាក ដោយសារកំពង់ផែរបស់កម្ពុជាមានទំហំតូចជាងកំពង់ផែធំៗក្នុងតំបន់។

បច្ចុប្បន្ន កម្ពុជានៅតែត្រូវពឹងផ្អែកលើកប៉ាល់តូចៗ ដើម្បីដឹកទំនិញទៅចូលកំពង់ផែធំៗ ដូចជា កំពង់ផែនៅសិង្ហបុរីជាដើម។ ទោះជាយ៉ាងនេះក្តី រដ្ឋាភិបាលកំពុងខិតខំពង្រីកហេដ្ឋារចនាសម្ព័ន្ធកំពង់ផែ ដើម្បីអាចទទួលកប៉ាល់ធំៗឱ្យចូលចតដោយផ្ទាល់នៅកម្ពុជានាពេលអនាគត ដែលនឹងជួយកាត់បន្ថយថ្លៃដឹកជញ្ជូនបានកាន់តែច្រើន។

ពាក់ព័ន្ធការកែលម្អវិស័យដឹកជញ្ជូន និងការនាំចេញនាំចូលនៅកម្ពុជា វិស័យឯកជនស្នើឲ្យមានការកាត់បន្ថយនីតិវិធី ដើម្បីបង្កើនសេវាដឹកជញ្ជូនឲ្យកាន់តែមានប្រសិទ្ធភាព។

អ្នកឧកញ៉ា សួរ វីរៈ ប្រធាននាយកប្រតិបត្តិនៃក្រុមហ៊ុន វិរៈ ប៊ុនថាំ អេចប្រេស បានលើកឡើងថា ការកាត់បន្ថយការប្រើប្រាស់ឯកសារក្រដាស ដោយប្តូរមកប្រើប្រាស់ប្រព័ន្ធឌីជីថល កាត់បន្ថយពេលវេលា ព្រោះក្នុងវិស័យឡូជីស្ទីកពេលវេលាគឺជាលុយ។

លោកថា ការរត់ឯកសារផ្ទាល់នាំឱ្យខាតបង់ពេលវេលា និងបង្កើតទម្លាប់ចំណាយក្រៅផ្លូវការ ដែលពិបាកកាត់ផ្ដាច់។

ដើម្បីកាត់បន្ថយការប៉ះពាល់ផ្ទាល់ជាមួយមន្ត្រី អ្នកជំនួញប្រឡូកក្នុងវិស័យដឹកជញ្ជូនរូបនេះ ស្នើឲ្យគ្រប់ក្រសួងស្ថាប័នពាក់ព័ន្ធត្រូវភ្ជាប់ប្រព័ន្ធឌីជីថលតែមួយ ដើម្បីឱ្យការអនុម័តឯកសារមានតម្លាភាព និងលឿនរហ័ស។

ថ្លែងក្នុងវេទិកាធុរកិច្ច និងនវានុវត្តន៍កាលពីម្សិលមិញ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជាបានលើកឡើងថា ការប្រែប្រួលនៃស្ថានការណ៍ពិភពលោក ទាមទារឱ្យវិស័យដឹកជញ្ជូន និងឡូជីស្ទីកកែទម្រង់ និងផ្លាស់ប្តូរវិធីសាស្ត្រធ្វើការឱ្យសមស្របនឹងការវិវត្តនៃវិបត្តិសកល។

លោកថា សង្គ្រាមរវាងរុស្ស៊ី និងអ៊ុយក្រែន ព្រមទាំងជម្លោះនៅតំបន់មជ្ឈិមបូព៌ា បានជះឥទ្ធិពលដល់ការដឹកជញ្ជូនអន្តរជាតិ ដែលធ្វើឱ្យខ្សែសង្វាក់ផ្គត់ផ្គង់កាន់តែស្មុគស្មាញ និងបង្កើនថ្លៃដើមដឹកជញ្ជូន ដែលតម្រូវឱ្យមានការគិតគូរ និងស្វែងរកដំណោះស្រាយថ្មីៗ៕
---------------
©KPT Economy

27/08/2026

ប្រធានសមាគមត្រចៀកកាំកម្ពុជា បានឱ្យដឹងថា សំបុកត្រចៀកកាំក្នុងស្រុកនឹងមានតម្លៃប្រសើរជាងមុន ខណៈបច្ចុប្បន្នមានក្រុមហ៊ុនចិនបានកំពុងពន្លឿនការនាំចេញសំបុកត្រចៀកកាំពីកម្ពុជាទៅកាន់ទីផ្សារប្រទេសចិន។

ថ្លែងប្រាប់ កម្ពុជាថ្មី នៅទី២៦ ខែសីហានេះ លោក ស៊ុយ កុកធាន បានគូសបញ្ជាក់ថា បច្ចុប្បន្នមានក្រុមហ៊ុនចិនចំនួនមួយបាននាំចេញសំបុកត្រចៀកកាំពីប្រទេសកម្ពុជាទៅកាន់ទីផ្សារប្រទេសចិន។ ដោយឡែកមានក្រុមហ៊ុនចំនួន ៦ទៀតដែលកំពុងសិក្សា និងបំពេញបែបបទគយ មុននឹងធ្វើការនាំចេញផងដែរ។

ប្រធានសមគមរូបនេះ បញ្ជាក់បន្ថែមថា «នៅពេលមានក្រុមហ៊ុនច្រើនធ្វើការនាំចេញទៅកាន់ទីផ្សារប្រទេសចិន ច្បាស់ណាស់សំបុកត្រចៀកកាំនឹងមានតម្លៃប្រសើរជាងមុន ចំណែកអ្នកចិញ្ចឹមត្រចៀកកាំដែលបានធ្វើការចុះបញ្ជើជាមួយក្រុមហ៊ុននឹងមានក្ដីសង្ឃឹមឡើងវិញផងដែរ»។

លោក ញ៉ែម ប៊ុនថា ម្ចាស់ផ្ទះអភិរក្សសត្វច្រៀកកាំ ប្រាប់ កម្ពុជាថ្មី ថា ប្រសិនបើមានការនាំចេញសំបុកត្រចៀកកាំទៅកាន់ទីផ្សារប្រទេសចិន លោកជាកសិករពិតជាមានទឹកចិត្តក្នុងការធ្វើការងារនេះបន្តទៅទៀត ដ្បិតបច្ចុប្បន្នសំបុកត្រចៀកកាំដែលផលិតបានភាគច្រើនត្រឹមយកមកកែច្នៃ និងលក់សំបុកក្នុងចំនួនតិចតួចសម្រាប់ក្របខណ្ឌទីផ្សារក្នុងស្រុកតែប៉ុណ្ណោះ។

ទោះយ៉ាងណា កសិកររូបនេះ ថា តាមរយៈដំណឹងខាងលើលោកពិតជាសប្បាយចិត្ត នឹងរំពឹងថា សំបុកត្រចៀកកាំនឹងមានតម្លៃប្រសើរជាងមុន ហើយអ្នកចិញ្ចឹមត្រចៀកកាំនៅកម្ពុជាទាំងអស់ក៏នឹងមានក្ដីសង្ឃឹមឡើងវិញផងដែរ។

គួរឱ្យដឹងថា ចិនបានសម្រេចអនុញ្ញាតឱ្យកម្ពុជានាំចូលសំបុកត្រចៀកកាំដោយផ្ទាល់ ក្នុងដំណើរទស្សនកិច្ចរបស់លោកប្រធានាធិបតី ស៊ី ជិនពីង កាលពីខែមេសា ឆ្នាំ ២០២៥។

តម្លៃទីផ្សារសំបុកត្រចៀកកាំកម្ពុជាបច្ចុប្បន្ន កើនឡើងបន្តិចប្រមាណ ៣០០ ដុល្លារ ក្នុងមួយគីឡូក្រាម ហើយសំបុកល្អលេខ ១ ប្រមាណ ៥០០ ដុល្លារ ក្នុងមួយគីឡូក្រាម។

ផលិតកម្មសំបុកត្រចៀកកាំផលិតនៅកម្ពុជា ភាគច្រើនផលិតនៅខេត្តជាប់មាត់សមុទ្រ ដូចជា ខេត្តកំពត កោះកុង ប៉ុន្តែសក្ដានុពលសម្រាប់ការវិនិយោគបន្ត បច្ចុប្បន្ន បានប្ដូរមកខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញបឹងទន្លេសាប ខេត្តស្ទឹងត្រែង និងព្រះវិហារវិញ ដោយសារខេត្តជាប់មាត់សមុទ្រ មានការសាងសង់ច្រើនលើសលប់។

តាមការប៉ាន់ស្មាន កម្ពុជាមានសមត្ថភាពផលិតសំបុកត្រចៀកកាំប្រមាណ ១០០ តោន ក្នុងមួយឆ្នាំ៕
---------------
©KPT Economy

26/08/2026

ក្រុមហ៊ុនអាកាសចរណ៍ជាតិកម្ពុជា (Air Cambodia) នៅថ្ងៃទី ២៤ សីហា ២០២៦ បានសម្ពោធដាក់ឱ្យប្រើប្រាស់នូវ «មជ្ឈមណ្ឌលត្រួតពិនិត្យ និងគ្រប់គ្រងប្រតិបត្តិការអាកាសចរណ៍(AOC)» ថ្មី ដែលជាសមិទ្ធផលសំខាន់មួយក្នុងយុទ្ធសាស្ត្រការធ្វើទំនើបកម្មប្រតិបត្តិការ។

មជ្ឈមណ្ឌល AOC ថ្មីនេះ នឹងពង្រឹងសមត្ថភាពរបស់ក្រុមហ៊ុនអាកាសចរណ៍ ក្នុងការសម្រួលប្រតិបត្តិការហោះហើរដែលមានភាពស្មុគស្មាញ ស្របពេលដែលក្រុមហ៊ុនកំពុងធ្វើទំនើបកម្ម និងធ្វើពិពិធកម្មប្រភេទយន្តហោះ ព្រមទាំងពង្រីកបណ្តាញហោះហើរក្នុងស្រុក និងអន្តរជាតិ។

ពិធីសម្ពោធនេះ បានបង្ហាញពីការបន្តផ្លាស់ប្តូរ និងអភិវឌ្ឍរបស់ក្រុមហ៊ុនអាកាសចរណ៍ជាតិ ព្រមទាំងការរួមចំណែករបស់របស់ខ្លួនដល់ការពង្រឹងការតភ្ជាប់ ទេសចរណ៍ ពាណិជ្ជកម្ម និងការអភិវឌ្ឍវិស័យអាកាសចរណ៍កម្ពុជា។

ការដាក់ឱ្យដំណើរការមជ្ឈមណ្ឌល AOC ថ្មីនេះ គឺជាសមិទ្ធផលដ៏សំខាន់មួយ ដែលបង្ហាញពី ការប្តេជ្ញាចិត្តជាបន្តបន្ទាប់របស់ក្រុមហ៊ុន Air Cambodia ក្នុងការលើកកម្ពស់ សុវត្ថិភាព ប្រតិបត្តិការ ប្រសិទ្ធភាព និងគុណភាពសេវាកម្ម។

មជ្ឈមណ្ឌល AOC ថ្មីនេះ មានតួនាទីសម្របសម្រួលប្រតិបត្តិការរបស់ក្រុមហ៊ុន Air Cambodia ដោយរួមបញ្ចូលការរៀបចំ និងត្រួតពិនិត្យជើងហោះហើរតាមពេលវេលាជាក់ស្តែង ការសម្របសម្រួលយន្តហោះ និងអាកាសយានិក ការគាំទ្រផ្នែកថែទាំយន្តហោះ ប្រតិបត្តិការលើដី និងការសម្របសម្រួលសេវាកម្មអ្នកដំណើរ។

មជ្ឈមណ្ឌលនេះ ត្រូវបានរៀបចំឡើងដើម្បីពង្រឹង សុវត្ថិភាពប្រតិបត្តិការ ប្រសិទ្ធភាព ភាពជឿជាក់ និងសមត្ថភាពគ្រប់គ្រងចំពោះភាពមិនប្រក្រតីនៃប្រតិបត្តិការ។ មជ្ឈមណ្ឌល AOC នេះក៏ជាមូលដ្ឋានប្រតិបត្តិការដ៏សំខាន់សម្រាប់គាំទ្រដល់អាទិភាពយុទ្ធសាស្ត្រសំខាន់ៗចំនួនពីរ៖

១. ការធ្វើទំនើបកម្ម និងធ្វើពិពិធកម្មប្រភេទយន្តហោះ

– ប្រភេទយន្តហោះ Boeing៖ ផែនការទទួលយកយន្តហោះ Boeing របស់ក្រុមហ៊ុន Air Cambodia មានគោលបំណងគាំទ្រដល់ការរីកចម្រើននៃបណ្តាញជើងហោះហើរ និងការពង្រីក ការតភ្ជាប់អន្តរជាតិនាពេលអនាគត។

ការដាក់ឱ្យប្រតិបត្តិការជាផ្លូវការត្រូវបានគ្រោងចាប់ពីឆ្នាំ២០៣១ ខណៈសមត្ថភាព យន្តហោះ Boeing 737 MAX បណ្តោះអាសន្ន ត្រូវបានរំពឹងថានឹងចាប់ផ្តើមចាប់ពីឆ្នាំ២០២៩ ដោយអាស្រ័យលើផែនការអនុវត្ត និងកាលវិភាគប្រគល់យន្តហោះរបស់ក្រុមហ៊ុន។

– ប្រភេទយន្តហោះតំបន់ COMAC C909៖ ក្រុមហ៊ុន Air Cambodia មានផែនការដាក់ឱ្យប្រើប្រាស់យន្តហោះតំបន់ប្រភេទ C909 ដើម្បីពង្រឹងការតភ្ជាប់ជើងហោះហើរក្នុងស្រុក និងជើងហោះហើរតំបន់ចម្ងាយខ្លី។ កម្មវិធីបច្ចុប្បន្នគ្រោងទទួលយន្តហោះរហូតដល់ ២០គ្រឿង ដោយការប្រគល់យន្តហោះដំបូង ត្រូវបានរំពឹងថានឹងចាប់ផ្តើមនៅចុងឆ្នាំ២០២៦ អាស្រ័យលើកាលវិភាគប្រគល់ដែលបានព្រមព្រៀងគ្នា។

២. ការពង្រីកបណ្តាញជើងហោះហើរ និងការពង្រឹងប្រតិបត្តិការលើដី

– ការពង្រឹងការតភ្ជាប់ក្នុងស្រុក៖ ក្រុមហ៊ុនអាកាសចរណ៍កំពុងខិតខំកែលម្អភាពងាយស្រួល របស់អ្នកដំណើរ និងភាពបត់បែននៃកាលវិភាគជើងហោះហើរក្នុងស្រុក ដែលតភ្ជាប់រវាង សៀមរាប ភ្នំពេញ និងព្រះសីហនុ។

– ការសម្របសម្រួលប្រតិបត្តិការតភ្ជាប់នៅសៀមរាប៖ ដោយសហការជាមួយអាកាសយានដ្ឋានអន្តរជាតិសៀមរាបអង្គរ(SAI) ព្រមទាំងអាជ្ញាធរ និងអ្នកផ្តល់សេវាពាក់ព័ន្ធក្រុមហ៊ុន Air Cambodia មានគោលបំណងកែលម្អដំណើរការ ផ្ទេរអ្នកដំណើរ រួមមាននីតិវិធីអន្តោប្រវេសន៍ សន្តិសុខ ការគ្រប់គ្រងឥវ៉ាន់ និងវិធានការសម្របសម្រួលអ្នកដំណើរផ្សេងៗទៀត ដើម្បីគាំទ្រដល់ការតភ្ជាប់ជើងហោះហើរក្នុងស្រុក និងអន្តរជាតិ៕
---------------
©KPT Economy

26/08/2026

គណៈប្រតិភូក្រុមប្រឹក្សាជំរុញពាណិជ្ជកម្មអន្តរជាតិចិនខេត្តហ៊ូណាន នៅថ្ងៃទី ២៥ ខែសីហា ២០២៦ បានអញ្ជើញមកបំពេញទស្សកិច្ចនៅកម្ពុជា ដើម្បីសិក្សា និងស្វែងរកឱកាសវិនិយោគបន្ថែមនៅកម្ពុជា។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា កាលពីថ្ងៃអង្គារម្សិលមិញ បានទទួលជួបពិភាក្សាការងារជាមួយ គណៈប្រតិភូក្រុមប្រឹក្សាជំរុញពាណិជ្ជកម្មអន្តរជាតិចិនខេត្តហ៊ូណាន (CCPIT Hunan Sub-Council) ដឹកនាំដោយ លោក តេង លួវស៊ីង (Deng Luoxing) មន្ត្រីត្រួតពិនិត្យថ្នាក់ទី១។

លោក តេង លួវស៊ីង (Deng Luoxing) បានថ្លែងថា ធុរជនខេត្តហ៊ូណាន មានបំណងចង់បើកទីផ្សារថ្មី ព្រមទាំងស្វែងយល់ និងស្វែងរកឱកាសវិនិយោគបន្ថែមនៅកម្ពុជា ខណៈដែលសមាជិកមួយចំនួននៃគណៈប្រតិភូកំពុងមានវត្តមាន និងសិក្សាស្រាវជ្រាវបរិបទទីផ្សារកម្ពុជានាពេលបច្ចុប្បន្ន។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានបញ្ជាក់ពីចំណងមិត្តភាពរវាងប្រទេសទាំងពីរដែលត្រូវបានពង្រឹងដោយថ្នាក់ដឹកនាំកម្ពុជាគ្រប់ជំនាន់។

អ្នកឧកញ៉ាបានបន្ថែមថា វិនិយោគិនចិនដែលបានមកវិនិយោគនៅកម្ពុជានាពេលកន្លងមក សុទ្ធសឹងតែទទួលបានជោគជ័យ ហើយធុរជនទាំងអស់នោះជាតឹកតាង និងជាកត្តាទាក់ទាញដ៏សំខាន់ក្នុងការជំរុញគណៈប្រតិភូ និងវិនិយោគិនថ្មីៗបន្ថែមទៀត មកស្វែងរកឱកាសវិនិយោគនៅកម្ពុជា។

ភាគីទាំងពីរប្តេជ្ញាបន្តពង្រឹងកិច្ចសហប្រតិបត្តិការបន្ថែមទៀតនាពេលអនាគត ព្រមទាំងការផ្លាស់ប្តូរទស្សនកិច្ចគណៈប្រតិភូទៅវិញទៅមក ដើម្បីជំរុញកំណើនសេដ្ឋកិច្ច នៃប្រទេសទាំងពីរឱ្យកាន់តែរីកចម្រើនបន្ថែមទៀត។

យោងតាមក្រសួងពាណិជ្ជកម្ម នៅក្នុងរយៈពេល ៧ ខែ ២០២៦ ការដោះដូរទំនិញទ្វេភាគីកម្ពុជា-ចិន សម្រេចបាននូវទំហំទឹកប្រាក់ជាង ១៣,៦ ពាន់លានដុល្លារ កើនឡើង ២៣,៩% ធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជានាំចេញទៅចិន មានតម្លៃជាង ១ ពាន់លានដុល្លារ កើនឡើង ២៤,២% ចំណែកចិននាំចូលមកវិញមាតម្លៃ ១២,៥ ពាន់លានដុល្លារកើន ២៣,៨%។

ប្រភេទទំនិញកម្ពុជានាំចេញទៅប្រទេសចិនភាគច្រើន គឺជាផលិតផលកសិកម្ម គ្រឿងសង្ហារឹម គ្រឿងអលង្ការ និងផលិតផលវាយនភណ្ឌ។ ចំណែកទំនិញនាំចូលមកវិញដូចជា វត្ថុធាតុដើមសម្រាប់រោងចក្រ សហគ្រាស ផលិតផលប្រើប្រាស់ប្រចាំថ្ងៃ អាហារ ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ គ្រឿងអគ្គិសនី អេឡិចត្រូនិក។

នៅឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-ចិន សម្រេចបាននូវទំហំទឹកប្រាក់ជាង ១៩,៧ ពាន់លានដុល្លារ ក្នុងនោះកម្ពុជានាំចេញទៅចិនមានតម្លៃជាង ១,៦ ពាន់លានដុល្លារ ធ្លាក់ចុះ ៣,៦៤% ចំណែកឯចិននាំចូលមកវិញ មានតម្លៃ ១៨ ពាន់លានដុល្លារ កើនឡើង ៣៤,២៩%៕
---------------
©KPT Economy

26/08/2026

ក្រុងហូជីមិញ ដែលជាមជ្ឈមណ្ឌលពាណិជ្ជកម្មដ៏សំខាន់របស់វៀតណាម គ្រោងចាប់ផ្តើមរឹតបន្តឹងការធ្វើចរាចរណ៍យានយន្តស៊ីសាំង និងម៉ាស៊ូតនៅតំបន់កណ្ដាលក្រុង ចាប់ពីខែកក្កដា ឆ្នាំ២០២៧ ទៅ ដើម្បីកាត់បន្ថយការបំពុលខ្យល់។ នេះបើតាមការចុះផ្សាយកាសែតរដ្ឋ Thanh Nien ថ្មីៗនេះ។

តាមសេចក្តីព្រាងផែនការ ក្រុងហូជីមិញនឹងសាកល្បងបង្កើត តំបន់បញ្ចេញការបំពុលទាប (L*Z) នៅតំបន់កណ្ដាលក្រុង និងតំបន់ទីក្រុងថ្មី Thu Thiem ដែលមានផ្ទៃប្រមាណ ៩៣០ ហិកតា។ បន្ទាប់ពីសាកល្បងរយៈពេល ២ឆ្នាំ តំបន់នេះនឹងត្រូវពង្រីកទៅតំបន់ក្នុងផ្លូវខ្សែក្រវ៉ាត់ក្រុងទី២ ចាប់ពីដើមឆ្នាំ២០២៩។

យ៉ាងណាមិញ យានយន្តនឹងត្រូវអនុវត្តតាមលំដាប់ មិនមែនហាមឃាត់ទាំងអស់ភ្លាមៗទេ។ ចាប់ពីឆ្នាំ២០២៧ ឡានក្រុង និងយានយន្តប្រមូលសំរាមមួយចំនួនដែលចូលក្នុង L*Z នឹងត្រូវប្រើអគ្គិសនី ឬថាមពលស្អាត។ ចាប់ពីឆ្នាំ២០២៨ ម៉ូតូដឹកអ្នកដំណើរ និងម៉ូតូដឹកជញ្ជូនទំនិញ នឹងត្រូវប្តូរទៅប្រើថាមពលស្អាតដូចគ្នា ខណៈតាក់ស៊ី និងយានយន្តប្រភេទផ្សេងទៀត នឹងមានពេលវេលាផ្លាស់ប្តូរបន្តបន្ទាប់។

តាមផែនការរយៈពេលវែង ដល់ឆ្នាំ ២០៣៥ យានយន្តភាគច្រើនដែលធ្វើដំណើរក្នុងតំបន់ L*Z នឹងត្រូវប្រើអគ្គិសនី ឬថាមពលស្អាត ខណៈក្រុងហូជីមិញមានគោលដៅបញ្ចប់ការផ្លាស់ប្តូរពីយានយន្តស៊ីសាំងទៅយានយន្តប្រើថាមពលស្អាតទូទាំងក្រុងនៅឆ្នាំ២០៤០។

គួរគូសបញ្ជាក់ថា ផែនការថ្មីនេះត្រូវបានពន្យារពេលពីសំណើមុន ដែលគ្រោងចាប់ផ្តើមអនុវត្តតាំងពីឆ្នាំ២០២៦ ដើម្បីទុកពេលឱ្យប្រជាជន និងអាជីវកម្មត្រៀមប្តូរយានយន្ត ព្រមទាំងរង់ចាំការរៀបចំហេដ្ឋារចនាសម្ព័ន្ធដឹកជញ្ជូនបៃតង។ ផែនការនេះនៅតែត្រូវឆ្លងកាត់ការពិនិត្យ និងអនុម័តជាផ្លូវការនៅឡើយ។

វាក៏ស្របនឹងនិន្នាការរបស់វៀតណាមក្នុងការកាត់បន្ថយយានយន្តប្រើប្រាស់ឥន្ធនៈហ្វូស៊ីលនៅទីក្រុងធំៗផងដែរ។ ដោយឡែក ទីក្រុងហាណូយឯនោះវិញ កាលពីខែមិថុនា បានប្រកាសពីផែនការកាត់បន្ថយម៉ូតូស៊ីសាំងសម្រាប់សេវាដឹកជញ្ជូនទំនិញ នៅក្នុងតំបន់បញ្ចេញការបំពុលទាបជាបណ្ដើរៗ ចាប់ពីខែមករា ឆ្នាំ២០២៧ តទៅ៕
---------------
©KPT Economy

26/08/2026

គិតត្រឹម ព្រឹកថ្ងៃពុធទី ២៦ ខែសីហា ២០២៦ តម្លៃហាងឆេងមាស នៅតាមបណ្ដាហាងនានាក្នុងរាជធានីភ្នំពេញលក់ចេញ ៥៥៣ ដុល្លារ ក្នុងមួយជីប្រហាក់ប្រហែលនឹងថ្ងៃម្សិលមិញ។

ឧកញ៉ា ចិន សំណាង ម្ចាស់ហាងលក់គ្រឿងអលង្ការ និងពេជ្រ CSNJ មានប្រសាសន៍នៅថ្ងៃពុធ ទី ២៦ សីហា ២០២៦ថា តម្លៃមាសបានកើនវិញឡើងដោយសារភាពតានតឹងភូមិសាស្ត្រនយោបាយនៅលើពិភពលោក និងស្ថានភាពសេដ្ឋកិច្ចមិនទាន់ល្អ ខណៈសហរដ្ឋអាមេរិកជាប់បំណុលច្រើន ដែលធ្វើឱ្យតម្លៃលុយដុល្លារចុះខ្សោយ ធ្វើឱ្យមាសកើនឡើង។

ឧកញ៉ា ចិន សំណាង យល់ឃើញថា៖ «តម្លៃហាងឆេងមាសនឹងបន្តកើនឡើងរហូតដល់ខែកញ្ញា ទី១ដោយសារធនាគារកណ្ដាលសហរដ្ឋអាមេរិកនឹងរក្សាអត្រាការប្រាក់ ឬក៏កាត់អត្រាការប្រាក់ ទី២ រដ្ឋាភិបាលសហរដ្ឋអាមេរិកខ្ចីលុយ ៤០ ទ្រីលាន ដើម្បីឱ្យសេដ្ឋកិច្ចអាមេរិកមានការងើបឡើងវិញ ដែលជំរុញឱ្យតម្លៃមាសហក់ឡើង ទី៣ ស្ថានភាពភូមិសាស្ត្រនយោបាយរវាងសហរដ្ឋអាមេរិក និងអ៊ីរ៉ង់ ដែលអាមេរិកនឹងដាក់ទណ្ឌកម្មសេដ្ឋកិច្ចប្រទេសដែលគាំទ្រអ៊ីរ៉ង់ ដែលធ្វើឱ្យសហរដ្ឋអាមេរិកមាសម្ពាធជាមួយចិន»។

លោក ឡុង សំណាង នាយកអភិវឌ្ឍអាជីវកម្មនៃក្រុមហ៊ុន PP Link securities យល់ឃើញថា មាសគឺជាទ្រព្យដែលមានសុវត្ថិភាពក្នុងការជួញដូរ ពេលដែលសង្គ្រាមរវាងអាមេរិក-អ៊ីរ៉ង់ ចាប់ផ្ដើមដំបូងលុយដុល្លារល្អ ប៉ុន្តែបើបន្តសង្គ្រាមបន្តទៅមុខទៀត នឹងធ្វើឱ្យសេដ្ឋកិច្ចអាមេរិក និងសេដ្ឋកិច្ចពិភពលោកក៏អន់ថយ ហើយមាសនៅតែបន្តកើនឡើង។

អាជីវករលក់មាសផ្សារធំថ្មី នៅរាជធានីភ្នំពេញ បានប្រាប់ថា តម្លៃហាងឆេងមាសបានហក់ឡើងវិញដល់ជាង ៥៥៣ ដុល្លារ ខណៈអតិថិជនភាគច្រើនបានយកមាសមកលក់ច្រើនជាងការទិញចូល។

អតិថិជនមួយចំនួនយល់ថា នេះជាឱកាសល្អក្នុងការលក់យកប្រាក់ចំណេញ ខណៈការទិញមាសសម្រាប់ប្រើប្រាស់ ឬវិនិយោគថ្មី ហាក់មានតិចតួចនៅក្នុងរយៈពេលចុងក្រោយនេះ។

អ្នកជំនាញហិរញ្ញវត្ថុយល់ឃើញថា បើអតិថិជនមានមាសកំពុងកាន់ក្នុងដៃ គួរបន្តរង់ចាំដល់ពាក់កណ្ដាលខែកញ្ញា ២០២៦ ចាំលក់ចេញនៅចំពេលដែលតម្លៃមាសកំពុងហក់ឡើង៕
---------------
©KPT Economy

KPT Economy

27/08/2026

27/08/2026

27/08/2026

27/08/2026

27/08/2026

27/08/2026

26/08/2026

26/08/2026

26/08/2026

26/08/2026

Address

Website

Alerts

Shortcuts

Share

Category

Listing takedown request