17/11/2025
ភាពខុសគ្នារវាងពាក្យ ខូអិលធីឌី(Co.,Ltd.)ឬពាក្យ ឯ.ក និង ភីអិលស៊ី(PLC.)ឬពាក្យ ម.ក
នៅប្រទេសកម្ពុជាយើង ពាណិជ្ជករភាគច្រើនតែងតែនិយមបង្កើតក្រុមហ៊ុនប្រភេទនេះ។ ដោយយោងតាមប្រកាសស្ដីពីការដាក់ពាក្យសម្គាល់ទ្រង់ទ្រាយក្រុមហ៊ុន និងយោងតាមច្បាប់ស្ដីពីសហគ្រាសពាណិជ្ជកម្មមាត្រា៨៥ ក្រុមហ៊ុនមូលធនមាន២ គឺ
១. ក្រុមហ៊ុនឯកជនទទួសខុសត្រូវមានកម្រិត
២. ក្រុមហ៊ុនមហាជនទទួលខុសត្រូវមានកម្រិត
ការកំណត់នាមករណ៍របស់ក្រុមហ៊ុនឯកជនទទួលខុសត្រូវមានកម្រិត ត្រូវដាក់នូវពាក្យថា “ក្រុមហ៊ុនឯកជនទទួលខុសត្រូវមានកម្រិត” ឬសរសេរអក្សរកាត់នៅខាងចុង ឬនៅខាងក្រោមនាមករណ៍របស់ក្រុមហ៊ុន។ ដូចគ្នាផងដែរច្បាប់ដដែលនេះក៏បានចែងផងដែរទាក់ទងនិងនាមករណ៍របស់ក្រុមហ៊ុនមហាជនទទួលខុសត្រូវមានកម្រិត ត្រូវដាក់នូវពាក្យថា “ក្រុមហ៊ុនមហាជនទទួលខុសត្រូវមានកម្រិត” ឬសរសេរអក្សរកាត់ដាក់ខាងចុង ឬនៅខាងក្រោមនាមករណ៍របស់ក្រុមហ៊ុន។
ជាក់ស្ដែងណាស់នៅក្នុងការអនុវត្តជាក់ស្ដែង ក្រុមហ៊ុនពាណិជ្ជកម្មភាគច្រើនតែងតែសរសេរនូវអក្សរកាត់នៅខាងចុងនៃនាមករណ៍ក្រុមហ៊ុនរបស់ខ្លួន ដោយហេតុថាការសរសេរបែបនេះធ្វើឲ្យក្រុមហ៊ុនរបស់ពួកគេនៅសល់ចន្លោះទំនេរច្រើនសម្រាប់សរសេរអ្វីបន្ថែមទៀតបាន។ ពាក្យថា “ខូអិលធីឌី ឬ Co.,Ltd.”គឺជាអក្សរកាត់មកពីពាក្យថា ក្រុមហ៊ុនឯកជនទទួលខុសត្រូវមានកម្រិត ឬ Private Limited Company. បន្ថែមពីនេះផងដែរ មានក្រុមហ៊ុនខ្លះសរសេរអក្សរកាត់ ឯ.ក ឬ លីមីតធីត ឬ ចំកាត់(Limted)ជាអាទិ៍ ដែលអក្សរកាត់ទាំងអស់នេះ គឺមានន័យដូចពាក្យថា “ខូអិលធីឌី ឬ Co., Ltd.”
ឧទាហរណ៍
- ក្រុមហ៊ុនHRINC(CAMBODIA)Co.,Ltd. -ក្រុមហ៊ុនUNILEVER(CAMBODIA)Co.,Ltd. ជាអាទិ៍។
ដោយឡែកបើយើងក្រឡេកទៅមើលប្រភេទក្រុមហ៊ុនមួយទៀត ដែលជាក្រុមហ៊ុនមហាជនទទួលខុសត្រូវមានកម្រិតវិញ គឺពាក្យអក្សរកាត់“ភីអិលស៊ី(PLC.)ឬ ម.ក” ឬ Public Limited Company យើងអាចសង្កេតឃើញផ្នែកខាងចុងនៃនាមករណ៍របស់ក្រុមហ៊ុន ធនាគារ និងគ្រឹះស្ថានហិរញ្ញវត្ថុភាគច្រើននៅកម្ពុជា បានសរសេរអក្សរកាត់“ភីអិលស៊ី(PLC.)ឬ ម.ក”។
ឧទាហរណ៍
- ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៉ីហ្សិត ម.ក
- ធនាគារ ព្រីនស៍ ម.ក PRINCE BANK PLC.
- ធនាគារអេស៊ីលីដា ភីអិលស៊ី(ACLEDA Bank Plc.)
- គ្រឹះស្ថានមីក្រូហិរញ្ញវត្ថុ លី ហួរ ភីអិលស៊ី(LY HOUR MICROFINANCE INSTITUTION Plc.) ជាអាទិ៍។
ដោយសង្ខេប សូមអរគុណ
