06/08/2025
"កម្ពុជាបដិសេធចោលទាំងស្រុង ចំពោះការផ្សព្វផ្សាយរបស់សារព័ត៌មានថៃមួយចំនួន ដោយបានផ្សាយគ្មានមូលដ្ឋាន បំភ្លៃ បង្កើតសាច់រឿងក្នុងចេតនាមូលបង្កាច់លើកម្ពុជា ចោទប្រកាន់បុគ្គលម្នាក់ថាជាទាហានរបស់កម្ពុជា ហើយបម្រើការងារនៅបញ្ជាការដ្ឋានអង្គរក្ស ដោយនៅព្រឹកថ្ងៃទី០៦ ខែសីហា ឆ្នាំ២០២៥នេះ ប្រព័ន្ធផ្សព្វផ្សាយថៃ បានផ្សាយព័ត៌មានមិនពិត ដោយប្រឌិតលើកឡើងថា ប៉ូលីសខេត្តបុរីរ៉ាំ បានចាប់ខ្លួនទាហានខ្មែរម្នាក់ មកពីបញ្ជាការដ្ឋានអង្គរក្ស (BHQ) និងត្រូវបានសង្ស័យថាលាក់ខ្លួននៅទីនោះ ដើម្បីបញ្ជូនព័ត៌មានចលនាយោធាថៃមកកម្ពុជា។
កម្ពុជាមិនអនុញ្ញាតជាដាច់ខាតឱ្យយោធិនគ្រប់រូបដែលមានស្នាមសាក់លើដងខ្លួន ដូចដែលភាគីថៃបានបង្ហាញរូបនោះ ចូលបម្រើការងារក្នុងក្របខណ្ឌណាមួយរបស់កងកម្លាំងរបស់កម្ពុជាជាដាច់ខាត។
ខ្ញុំស្នើឱ្យភាគីថៃ សូមបញ្ឈប់ជាបន្ទាន់នូវការផ្សព្វផ្សាយព័ត៌មានមិនពិត ប្រឌិត និងគ្មានមូលដ្ឋានច្បាស់លាស់ ដែលនេះបង្ហាញពីភាពគ្មានវិជ្ជាជីវៈក្នុងស្ថាប័នសារព័ត៌មាន"។
(ប្រសាសន៍របស់លោកជំទាវអ្នកនាំពាក្យក្រសួងការពារជាតិ ថ្ងៃទី០៦ ខែសីហា ឆ្នាំ២០២៥)
