https://www.facebook.com/820252928137835/

Khmer Angkor News, Phnom Penh (2025)

21/01/2025

🇰🇭អរុណសួស្ដីពីរខេត្តព្រះសីហនុ🌹រដូវផ្កាឥន្ទនេល រីកស្រស់ស្អាតតាមដងវិថីក្នុងក្រុងព្រះសីហនុ ដែលនាំមកជួយលើកសម្រស់សោភ័ណភាពទីក្រុងមានភាពទាក់ទាញនិងស្រស់ស្អាត នេះ ក្រោមការយកចិត្តទុកដាក់ពីរដ្ឋបាលខេត្ត ក្រុង នឹងការចូលរួមថែទាំពីមន្ទីរកសិកម្ម រុក្ខាប្រមាញ់ និងនេសាទ ក៏ដូចជាការចូលរួមចំណែកពីប្រជាពលរដ្ឋទូទៅផងដែរ។(បរិស្ថានល្អសុខភាពល្អកើតចេញពីយើងគ្រប់ៗរូប)ថ្ងៃទី 21 មករា ឆ្នាំ 2025។

01/06/2024

ទូរសព្ទសុទ្ធតែនាំចូលពីបរទេសតាម ព្រលានយន្តហោះ ច្រកផ្លូវគោក ផ្លូវទឹក តើហេតុអ្វីគយមិនប្រមូលពន្ធពីឈ្មួញនាំចូល បែរជាមកចាំចាប់ពីអ្នកលក់រាយទៅវិញ?
គយអ្នកបង្កើតរឿងទងអស់ ប្រជាជនជាអ្នករងគ្រោះ៕

31/05/2024

ចុះចាប់ទូរសព្ទតាមផ្ទះ ចោទថាមិនបង់ពន្ធ! ចុះហេតុអ្វីបើកឱ្យនាំចូលម្ដេចគយដើមទីម្ដេចមិនទារពន្ធពីមេឈ្មួញនាំចូល
ឱ្យហើយ?

29/05/2024

តុលាការសម្រេច លើកពេលសវនាការសំណុំរឿងសកម្មជនមាតាធម្មជាតិចំនួន៦នាក់ ទៅបន្តនៅថ្ងៃ០៥ មិថុនា ២០២៤

(ភ្នំពេញ)៖ ក្រោយសវនាការសួរដេញដោលលើក្រុមជនត្រូវចោទ អស់ពេញមួយព្រឹក នាថ្ងៃទី២៩ ខែឧសភា ឆ្នាំ២០២៤នេះ លោកស្រីចៅក្រម អ៊ុក រ៉េតគន្ធា ដែលជាប្រធានក្រុមប្រឹក្សារចៅក្រមជំនុំជម្រះ លោក សេង ហៀង ជាតំណាងអយ្យការ បានសម្រេចលើកយកសំណុំរឿងេខាងលើ ទៅបន្តសវនាការនៅថ្ងៃ០៥ មិថុនា ២០២៤ ខាងមុខ។

សូមបញ្ជាក់ថា កាលពីឆ្នាំ២០២១ កន្លងទៅ តុលាការបានសម្រេចឃុំខ្លួន សកម្មជនចលនាមាតាធម្មជាតិ៣នាក់ នៅពន្ធនាគារព្រៃសជាបណ្តោះអាសន្ន ក្រោមការចោទប្រកាន់ពីបទ ប្រមាថចំពោះអង្គព្រះមហាក្សត្រ និងបទរួមគំនិតក្បត់។

ក្រៅពីការចោទប្រកាន់លើ សកម្មជនចលនាមាតាធម្មជាតិទាំង៣រូបនេះ តុលាការក៏បានចោទប្រកាន់ចំពោះ លោកអាឡិចសង់ដ្រូ ហ្គន់ស្សាឡេស ឌីវិសុន ( Alejandro Gonzalez Davidson) ជាជនជាតិអេស្បាញ ពីបទប្រមាថចំពោះអង្គព្រះមហាក្សត្រ និងបទរួមគំនិតក្បត់ផងដែរ។

អង្គការមាតាធម្មជាតិ ដែលទីស្នាក់ការកណ្តាលតាំងនៅវត្តចំការឈូក ភូមិពោធិ៍មាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ដែលបង្កើតឡើង និងដឹកនាំដោយ លោក អាឡិច ត្រូវបានក្រសួងមហាផ្ទៃ ចេញសេចក្តីប្រកាស សម្រេចលុបចោលកាលពីថ្ងៃទី១៥ ខែកញ្ញា ឆ្នាំ២០១៧ បន្ទាប់ពីបានបណ្តេញ លោក អាឡិច ចេញពីប្រទេសកម្ពុជា។

លោក អាឡិច ត្រូវបានក្រសួងមហាផ្ទៃ បណ្តេញចេញកាលពីអំឡុងខែកុម្ភៈ ឆ្នាំ២០១៥ បន្ទាប់ពីបានធ្វើសកម្មភាពប្រឆាំងមួយចំនួន នៅតំបន់អារ៉ែង និងប្រឆាំង ការបូមខ្សាច់នៅក្នុង ខេត្តកោះកុង ដែលអាជ្ញាធរអះអាងល្មើសច្បាប់នៅកម្ពុជា។ បន្ទាប់ពីបណ្តេញចេញ ជននេះក៏ត្រូវបានវ៉ៃត្រាក្រហម ហាមចូលប្រទេសកម្ពុជារហូតផងដែរ។

ក្រោយការសួរដេញដោលមិនទាន់ត្រូវបានបញ្ចប់ ចៅក្រមជំនុំជម្រះបានសម្រេច លើកយកទៅបន្តជំនុំជម្រះ នៅថ្ងៃ០៥ មិថុនា ២០២៤៕

29/05/2024

លុបអាជ្ញាប័ណ្ណទូកទេសចរណ៍មួយ ដែលដឹកសំរាមកាកសំណល់ទៅបោះចោលនៅកណ្ដាលទន្លេ

(ភ្នំពេញ)៖ ទូកទេសចរណ៍មួយឈ្មោះ (កាណូតបុប្ផាអង្គរ ទេសចរណ៍) ត្រូវបានអាជ្ញាធរខណ្ឌដូនពេញ សម្រេចលុបអាជ្ញាប័ណ្ណបញ្ឈប់ការធ្វើអាជីវកម្មនៅថ្ងៃនេះ ក្រោយម្ចាស់ទូកទេសចរណ៍មួយនេះធ្វើសកម្មភាពដឹកសំរាមកាកសំណល់ទៅបោះចោលនៅកណ្ដាលទន្លេ ដែលប៉ះពាល់យ៉ាងធ្ងន់ធ្ងរដល់បរិស្ថាន និងរងនូវការរិះគន់ពេញបណ្ដាញសង្គម។

ការលុបអាជ្ញាប័ណ្ណទូកទេសចរណ៍មួយនេះ ក្រោយអ្នកប្រើប្រាស់បណ្ដាញសង្គមបានមើលឃើញ និងថតបានអំពីសកម្មភាពរបស់ទូកទេសចរណ៍ កាណូតបុប្ផាអង្គរ ទេសចរណ៍ ពេលកំពុងដឹកសំរាមយកទៅបោះចោលកណ្ដាលទន្លេ រួចបើកមកច្រាំងវិញ។

បន្ទាប់ពីឃើញសកម្មភាពនេះ អាជ្ញាធរខណ្ឌដូនពេញ បានកោះហៅម្ចាស់អាជីវកម្មមកធ្វើការសួរនាំនៅរដ្ឋបាលខណ្ឌ និងបានធ្វើកំណត់ហេតុលុបអាជីវកម្ម ព្រមទាំងផាកពិន័យប្រាក់ចំនួន២០ម៉ឺនរៀល។ បន្ថែមពីនេះ អាជ្ញាធរក៏បានធ្វើការអប់រំណែនាំ និងពន្យល់ដល់ម្ចាស់អាជីវកម្មឲ្យបានយល់អំពីច្បាប់បរិស្ថានផងដែរ៕

29/05/2024

គ្មានលុយទិញថ្នាំញៀនស្លៀកស្បង់ចីពរបន្លំជាជាព្រះសង្ឃដើរបិណ្ឌបាត្រត្

(ខេត្តកណ្ដាល)៖ ជនសង្ស័យ៣នាក់ជាមុខសញ្ញាប្រើប្រាស់គ្រឿងញៀន ដោយរកលុយទិញថ្នាំញៀនមិនបាន បែកគំនិតស្លៀកស្បង់ចីពរបន្លំជាព្រះសង្ឃដើរបិណ្ឌបាត្រ ត្រូវបាននគរបាលស្រុកអង្គស្នួលចាប់ខ្លួន នៅថ្ងៃទី២៨ ខែឧសភា ឆ្នាំ២០២៤ វេលាម៉ោង០៧ និង៣០នាទី នៅចំណុចផ្លូវបេតុងភូមិមនោរម្យ ឃុំបែកចាន ស្រុកអង្គស្នួល ខេត្តកណ្តាល។

មន្ត្រីនគរបាលស្រុកអង្គស្នួលបានឱ្យដឹងថា ជជនសង្ស័យ៣នាក ដែលបានឃាត់ខ្លួន ទី១-ឈ្មោះ ហង្ស ទូច ភេទប្រុស អាយុ៥៣ឆ្នាំ ជនជាតិខ្មែរ មុខរបរមិនពិតប្រាកដ បច្ចប្បន្នរស់នៅភូមិខ្សាយ ឃុំត្រពាំងសុក្រំ ស្រុកដងទង់ ខេត្តកំពត(ឃាត់ខ្លួន មានសារធាតុញៀនក្នុងទឹកនោម, ទី២-ឈ្មោះ ទ្រី វិចិត្រ ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ បច្ចប្បន្នរស់នៅភូមិត្រពាំងលើក ឃុំក្រាំងស្បូវ ស្រុកឈូក ខេត្តកំពត (ឃាត់ខ្លួន មានសារធាតុញៀនក្នុងទឹកនោម និងទី៣-ឈ្មោះ ម៉េង ទិត្យ ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលភូមិត្រពាំងឃ្លាំង ឃុំត្រពាំងឃ្លាំង ស្រុកឈូក ខេត្តកំពត(ឃាត់ខ្លួន មានសារធាតុញៀនក្នុងទឹកនោម។

វត្ថុតាងចាប់យករួមមាន៖ ១-បាត្រចំនួន០៣, ២-ថង់យាមចំនួន០៣, ៣-ស្បង់ចីពរគ្រងដណ្តប់ក្លែងជាព្រះសង្ឃចំនួន០៣ឈុត ៤-ប្រាក់រៀលចំនួន៨៩.៥០០៛។

សមត្ថកិច្ចបានឲ្យដឹងថា នៅថ្ងៃខែឆ្នាំវេលាម៉ោងកើតហេតុខាងលើ សមាជិកក្រុមប្រឹក្សាឃុំបែកចាននិងប្រជាការពារឃុំបានប្រទះឃើញលោកសង្ឃចំនួន០៣អង្គនិមន្តបិណ្ឌបាត្រនៅចំណុចកើតហេតុខាងលើ ។ ដោយមានការសង្ស័យទើបសមាជិកក្រុមប្រឹក្សាឃុំបែកចាននិងប្រជាការពារឃុំបាននិមន្តលោកសង្ឃទាំង០៣អង្គខាងលើទៅវត្តភូមិថ្មី ឃុំបែកចាន ស្រុកអង្គស្នួល ខេត្តកណ្ដាល ដេីម្បីសាកសួរព័ត៌មាន ។

ក្រោយមកក៏តេទូរស័ព្ទមកសាលាអនុគណស្រុកអង្គស្នួល ភ្លាមនោះជំនួយការព្រះអនុគណស្រុកចុះទៅធ្វើការត្រួតពិនិត្យឃើញថា លោកសង្ឃទាំង០៣អង្គនោះគ្មានសង្ឃដីកា(គ្មានឯកសារសម្គាល់ខ្លួនជាសង្ឃ) រួចបាននាំទៅសាលាអនុគណស្រុកអង្គស្នួល ស្ថិតនៅវត្តអង្គពពាយ ឃុំក្រាំងម្កាក់ ស្រុកអង្គស្នួល ខេត្តកណ្តាល ធ្វើការដោះស្បង់ចីពរពីលោកសង្ឃទាំង០៣អង្គនោះ និងបានរាយការណ៍មកកម្លាំងសមត្ថកិច្ចផ្នែកជំនាញនគរបាលយុត្តិធម៌ស្រុក។

ក្រោយពីទទួលព័ត៌មាន ក៏បានសហការជាមួយកម្លាំងផ្នែកប្រយុទ្ធប្រឆាំងគ្រឿងញៀន និងប៉ុស្តិ៍ក្រាំងម្កាក់ បានចុះទៅដល់សាលាអនុគណស្រុក ហើយបានធ្វើការប្រគល់-ទទួល ជនសង្ស័យរួមទាំងវត្ថុតាងខាងលើដើម្បីសាកសួរនាំបន្តតាមនិតិវិធីច្បាប់។

តាមចម្លើយសារភាពរបស់ជនសង្ស័យ និងបក្ខពួកពិតជាបានគ្រងស្បង់ចីពរដោយពុំបានបួសត្រឹមត្រូវហើយដើរបិណ្ឌបាត្រពិតប្រាកដមែន ដោយក្នុង០១ថ្ងៃបានប្រាក់ចំនួន៧០០០០៛(ប្រាំពីរមុឺនរៀល) ហើយចូលលុយគ្នាទិញថ្នាំញៀនដើម្បីប្រើប្រាស់ជាមួយគ្នា ។ ពួកខ្លួនបានប្រើប្រាស់ថ្នាំញៀនអស់រយៈពេល០៥ទៅ០៦ខែមកហើយ ។ ករណីនេះកម្លាំងផ្នែកជំនាញកំពុងកសាងសំណុំរឿងបន្តចាត់ការតាមនីតិវិធីច្បាប់៕

29/05/2024

ឃាត់ខ្លួនជនសង្ស័យចំនួន ២០នាក់ ក្នុងនោះប្រើប្រាស់គ្រឿងញៀនមានចំនួន ០៩នាក់

(ភ្នំពេញ) ៖ នាថ្ងៃទី២៩ ខែឧសភា ឆ្នាំ២០២៤នេះ កម្លាំងអាជ្ញាធរខណ្ឌ៧មករា បានបន្តការចុះធ្វើរដ្ឋបាលត្រួតពិនិត្យ នៅតំបន់ដែលមានភាពស្មុគស្មាញ ក្នុងភូមិសាស្ត្ររបស់ខ្លួន ដើម្បីបង្ការទប់ស្កាត់នូវរាល់បញ្ហាអសន្តិសុខ ដែលអាចកើតមានឡើងបង្កភាពភ័យខ្លាចដល់ពលរដ្ឋ ។

លោក ថេង សុថុល អភិបាល នៃគណៈអភិបាលខណ្ឌ ៧មករា ,លោក ណុប ផា អភិបាលរង និង លោក វរសេនីយ៍ទោ ជុន ប៊ុនណាន អធិការនគរបាលខណ្ឌ ៧មករា បានបន្តការចុះធ្វើរដ្ឋបាលនៅតំបន់អាគារបុរីកីឡា ស្ថិតក្នុងសង្កាត់វាលវង់ ខណ្ឌ៧មករា ដើម្បីបង្ការទប់ស្កាត់បទល្មើស ព្រមទាំងឃាត់ខ្លួនជនសង្ស័យចំនួន ២០ នាក់។

ក្នុងនោះជនសង្ស័យដែលប្រើប្រាស់គ្រឿងញៀនមានចំនួន ០៩ នាក់ និង ជនសង្ស័យដែលជាមុខសញ្ញាក្មេងទំនើងមានចំនួន ១១នាក់ ( មានសារធាតុញៀនក្នុងខ្លួន ០៦ នាក់) ។ជាមួយគ្នានោះបានដកហូតកាំបិត ១ដើម និង ម៉ូតូចំនួន ៤គ្រឿង ដើម្បីបន្តស៊ើបអង្កេតតាមនិតិវិធីច្បាប់ ៕

21/05/2024

គេចចេញពីការសេពគ្រឿងញៀនជាការលំបាកឬ? ហេតុអ្វីដាក់ខ្លួនលើកកម្ពស់ជីវភាពមេខ្លោងជួញដូរគ្រឿងញៀន?

04/05/2024

ឧបនាយករដ្ឋមន្ត្រី ស៊ុន ចាន់ថុល ពន្យល់ពីគុណប្រយោជន៍ព្រែកជីកហ្វូណន-តេជោ ក្នុងការជួយបញ្ជៀសទឹកជំនន់ពីប៉ែកខាងត្បូងរាជធានីភ្នំពេញ ភូមិសាស្ត្រស្ទឹងព្រែកត្នោត និងខេត្តផ្សេងទៀត

(ភ្នំពេញ)៖ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានថ្លែងថា គម្រោងព្រែកជីកហ្វូណនតេជោ ជាគម្រោងដឹកជញ្ជូនផ្លូវទឹកតភ្ជាប់រវាងទន្លេ និងសមុទ្រកម្ពុជា ដែលមានគុណប្រយោជន៍មហាសាលពាក់ព័ន្ធការធ្វើពាណិជ្ជកម្មរបស់កម្ពុជានេះ ក៏បានចូលរួមចំណែកយ៉ាងសំខាន់ក្នុងជួយបញ្ជៀសទឹកជំនន់ពីប៉ែកខាងត្បូងរាជធានីភ្នំពេញ ភូមិសាស្ត្រស្ទឹងព្រែកត្នោត ជួយឱ្យរាជធានីភ្នំពេញ និងខេត្តកណ្តាលលែងលិចលង់ដោយសារជំនន់ទឹកភ្លៀងផងដែរ។

ការបញ្ជាក់បែបនេះធ្វើឡើងក្នុងសន្និសីទសារព័ត៌មានមួយ នៅក្រោយកិច្ចប្រជុំរវាងលោកឧបនាយករដ្ឋមន្ត្រី ស៊ុន ចាន់ថុល ជាមួយឯកអគ្គរដ្ឋទូត ឯកអគ្គរាជទូត ក៏ដូចជាមន្ត្រីតំណាងស្ថានទូតនានាប្រចាំនៅកម្ពុជា រួមមានវៀតណាមផងដែរ ក្នុងគោលបំណងពន្យល់ និងបង្ហាញព័ត៌មាននានាពាក់ព័ន្ធនឹងគម្រោងព្រែកជីកហ្វូណន-តេជោ នៅព្រឹកថ្ងៃទី៣ ខែឧសភា ឆ្នាំ២០២៤។

លោកឧបនាយករដ្ឋមន្ត្រី ស៊ុន ចាន់ថុល បានឱ្យដឹងថា ក្រោយការធ្វើព្រែកជីកហ្វូណនតេជោនេះរួចរាល់ យើងនឹងអាចបញ្ជៀសទឹកពីស្ទឹងព្រែកត្នោតចូលព្រែកជីក ហើយនឹងជួយឱ្យរាជធានីភ្នំពេញ និងខេត្តកណ្តាលលែងលិចលងទៀតហើយ តាមរយៈការបញ្ជៀសទឹកចូលទៅក្នុងព្រែកជីក ហើយបើសិនយើងមិនត្រូវការទឹកទាំងនោះ យើងអាចបើកឱ្យហូរចូលសមុទ្របាន។ ព្រែកជីកនេះមិនត្រឹមតែជួយដល់កម្ពុជាមិនឱ្យលិចលង់ទេ ថែមទាំងជួយដល់វៀមណាមកុំឱ្យលិចលង់ដូចគ្នាដោយសារទឹកជំនន់ធ្លាក់ពីកម្ពុជាទៅផងដែរ។

លោកឧបនាយករដ្ឋមន្ត្រី ស៊ុន ចាន់ថុល បានថ្លែងយ៉ាងដូច្នេះថា «ខ្ញុំបានទទួលព័ត៌មានពីឯកឧត្តមរដ្ឋមន្ត្រីក្រសួងធនធានទឹក លោកបានប្រាប់ហើយថា ទឹកលិចនៅភ្នំពេញនេះ គឺមកពីស្ទឹងព្រែកត្នោតដែរ ហើយឯកឧត្តមបានរៀបចំគម្រោងហើយដែរ ដើម្បីបញ្ជៀសទឹកពីស្ទឹងព្រែកត្នោតចូលព្រែកជីកហ្វូណនតេជោនេះ អីចឹងភ្នំពេញក៏លែងលិចលង់ ខេត្តកណ្តាលក៏លែងលិចដែរ»។

ពាក់ព័ន្ធនឹងគម្រោងព្រែកជីកហ្វូណនតេជោនេះ លោកឧបនាយករដ្ឋមន្ត្រី ស៊ុន ចាន់ ថុល បានថ្លែងទៀតថា គម្រោងនេះអត់មានផលប៉ះពាល់នៅកម្ពុជា ក៏អត់ប៉ះពាល់ដល់វៀតណាមដែរ ផ្ទុយទៅវិញគម្រោងនេះនឹងជួយបង្កើតជម្រកថ្មីសម្រាប់ជីវចម្រុះ មានត្រី បក្សី វារីសត្វ វារីរុក្ខជាតិ និងសត្វល្មូន ជួយរក្សានិរន្តភាពបរិស្ថាន រំហូរទឹក ចំណីធម្មជាតិ កាត់បន្ថយគ្រោះទឹកជំនន់ និងរាំងស្ងួត គឺមានទឹកពេញរហូតផងដែរ។

សូមបញ្ជាក់ដែរថា គម្រោងព្រែកជីកហ្វូណន-តេជោ គឺជាគម្រោងតភ្ជាប់ផ្លូវទឹករវាងទន្លេទៅកាន់សមុទ្ររបស់កម្ពុជា ដោយឆ្លងកាត់ខេត្តកណ្តាល តាកែវ កំពត និងកែប ប្រវែងប្រមាណ១៨០គីឡូម៉ែត្រ។ គម្រោងនេះគ្រោងចាយទុនប្រមាណ១,៧០០លានដុល្លារអាមេរិក ហើយត្រូវបានសិក្សាគម្រោងល្អិតល្អន់រួចហើយ ដោយប្រើរយៈពេលប្រមាណ២៦ខែ។ គម្រោងនេះមានជម្រៅទឹកត្រឹមតែ៥.៤ម៉ែត្រប៉ុណ្ណោះ។

ព្រែកជីកហ្វូណន-តេជោ ត្រូវបានសម្តេចតេជោ ហ៊ុន សែន ប្រធានព្រឹទ្ធសភាកម្ពុជា គូសបញ្ជាក់ថា មានផលប្រយោជន៍យ៉ាងហោចណាស់ចំនួន៤ រួមមាន៖

ទី១៖ បង្កើតបណ្តាញដឹកជញ្ជូនតាមផ្លូវទឹកប្រទាក់ក្រឡាគ្នាពីទន្លេទៅសមុទ្រ ដោយមិនបាច់ឆ្លងកាត់បៀតណាម មិនបាច់បង់ថ្លៃបន្ថែម ឬមិនខកដំណើរពេលវៀតណាម មិនសប្បាយចិត្ត។
ទី២៖ បង្កើតប្រភពទឹកសម្រាប់ការស្រោចស្រពនៃទិសនិរតីនៃប្រទេសកម្ពុជា។ បង្កើនលទ្ធភាពបង្កបង្កើនផលច្រើនដង និងដោះស្រាយបញ្ហាគ្រោះរាំងស្ងួត។
ទី៣៖ ជួយរំដោះទឹកជំនន់នៅតាមខេត្តទិសនិរតីនៃប្រទេសកម្ពុជា។
ទី៤៖ បង្កើតប្រភពត្រីក្នុងព្រែក និងបម្រើដល់វារីវប្បកម្ម (ការចិញ្ចឹមសត្វក្នុងទឹកដូចជាចិញ្ចឹមត្រីជាដើម)៕

28/03/2024

ស្លាប់៤នាក់ និងរបួស១នាក់ ក្នុងគ្រោះថ្នាក់ចរាចរណ៍ទូទាំងប្រទេសថ្ងៃទី២៧ ខែមីនា ឆ្នំា២០២៤

(ភ្នំពេញ)៖ យោងតាមរបាយការណ៍ របស់អគ្គស្នងការដ្ឋាននគរបាលជាតិឲ្យដឹងថា នៅថ្ងៃទី២៧ ខែមីនា ឆ្នាំ២០២៤ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន៣លើក បណ្ដាលឲ្យមនុស្សស្លាប់៤នាក់ និងរបួសធ្ងន់ស្រាលម្នាក់។

ប្រភពព័ត៌មានដដែលបញ្ជាក់ថា មូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍រួមមាន៖ ល្បឿន, មិនគោរពសិទិ្ធ ប្រជែងគ្រោះថ្នាក់ និងស្រវឹង៕

28/03/2024

អភិសន្តិបណ្ឌិត ស សុខា ដឹកនាំគណៈប្រតិភូ ចេញទៅបំពេញទស្សនកិច្ចការងារនៅសាធារណរដ្ឋសង្គមនិយមវៀតណាម ដែលមានសមភាគីឡាវផងដែរ

(ភ្នំពេញ)៖ នៅនារសៀលថ្ងៃទី២៨ ខែមីនា ឆ្នាំ២០២៤នេះ អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញដឹកនាំគណៈប្រតិភូជាន់ខ្ពស់ក្រសួងមហាផ្ទៃ បំពេញទស្សនកិច្ចការងារ នៅទីក្រុងដាណាំង សាធារណរដ្ឋសង្គមនិយមវៀតណាម តបតាមការអញ្ជើញរបស់ឧត្តមសេនីយ៍ឯក តូ ឡឹម សមាជិកការិយាល័យនយោបាយ និងជារដ្ឋមន្ត្រីក្រសួងនគរបាល នៃសាធារណរដ្ឋសង្គមនិយមវៀតណាម។ នេះជាដំណើរទស្សនកិច្ចការងារនៅក្រៅប្រទេសលើកដំបូងរបស់អភិសន្តិបណ្ឌិត គិតចាប់ពេលចូលកាន់មុខតំណែង ជាឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៃរាជរដ្ឋាភិបាល នីតិកាលទី៧ នៃរដ្ឋសភា កាលថ្ងៃទី២២ ខែសីហា ឆ្នាំ២០២៣។

ទស្សនកិច្ចនេះ នឹងប្រព្រឹត្តទៅចាប់ពីថ្ងៃទី២៨ ដល់ថ្ងៃទី៣០ ខែមីនា ឆ្នាំ២០២៤។ អភិសន្តិបណ្ឌិត ស សុខា នឹងអញ្ជើញចូលរួមក្នុងកិច្ចប្រជុំថ្នាក់រដ្ឋមន្ត្រី ត្រីភាគី រវាងក្រសួងមហាផ្ទៃកម្ពុជា ក្រសួងសន្តិសុខសាធារណៈឡាវ និងក្រសួងនគរបាលវៀតណាម ក្នុងគោលបំណងដើម្បីបន្តពង្រឹង និងពង្រីកទំនាក់ទំនង និងកិច្ចសហការលើវិស័យសន្តិសុខ រវាងកងកម្លាំងអនុវត្តច្បាប់នៃ ប្រទេសទាំងបី កម្ពុជា-ឡាវ-វៀតណាម។ ថ្នាក់ដឹកនាំក្រសួងទាំង៣ នឹងអញ្ជើញទស្សនាសមយុទ្ធកម្លាំងពន្លត់អគ្គិភ័យ និងសង្គ្រោះ ដែលមានការចូលរួមពីកម្លាំងជំនាញរបស់វៀតណាម មកពីប្រទេសកម្ពុជា និងឡាវ ផងដែរ។

ដំណើរទស្សនកិច្ចនេះ គឺជាការបន្តអនុវត្តយន្តការសហប្រតិបត្តិការត្រីភាគីដែលក្រសួងទាំង៣ បានអនុវត្តចំនួន៣លើក រួចមកហើយ។ ប្រមុខក្រសួងនគរបាលវៀតណាម និងក្រសួងសន្តិសុខសាធារណៈឡាវ ទើបតែបានមកបំពេញទស្សនកិច្ចចូលរួមកិច្ចប្រជុំទ្វេភាគីជាមួយអភិសន្តិបណ្ឌិត កាលពីខែមករា និងក្នុងខែមីនា ឆ្នាំ២០២៤៕

02/03/2024

ស្លាប់៨នាក់ និងរបួស១៧នាក់ ក្នុងគ្រោះថ្នាក់ចរាចរណ៍ទូទាំងប្រទេសថ្ងៃទី០១ ខែមីនា ឆ្នំា២០២៤

(ភ្នំពេញ)៖ យោងតាមរបាយការណ៍ របស់អគ្គស្នងការដ្ឋាននគរបាលជាតិឲ្យដឹងថា នៅថ្ងៃទី០១ ខែមីនា ឆ្នាំ២០២៤ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន១២លើក បណ្ដាលឲ្យមនុស្សស្លាប់៨នាក់ និងរបួសធ្ងន់ស្រាល១៧នាក់។

ប្រភពព័ត៌មានដដែលបញ្ជាក់ថា មូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍រួមមាន៖ ល្បឿន, មិនគោរពសិទិ្ធ ប្រជែងគ្រោះថ្នាក់ និងស្រវឹង៕

Khmer Angkor News

21/01/2025

01/06/2024

31/05/2024

29/05/2024

29/05/2024

29/05/2024

29/05/2024

21/05/2024

04/05/2024

28/03/2024

28/03/2024

02/03/2024

Address

Telephone

Website

Alerts

Contact The Business

Shortcuts

Share

Category