14/10/2025
ជំនួយជាគំនិតខ្លះៗ ប្រសិនបើអ្នកជាជនរងគ្រោះដោយ " Deepfake P**n" 📝💡
នៅសម័យបច្ចេកវិទ្យាឌីជីថល ដែលបច្ចេកវិទ្យា AI កំពុងរីកចម្រើនយ៉ាងលឿន បញ្ហា “Deepfake P**n” បានក្លាយជាបញ្ហាសង្គមដ៏គួរឲ្យកង្វល់។ វាជាបច្ចេកវិទ្យាដែលប្រើ AI ដើម្បីបង្កើតរូបភាព ឬវីដេអូអាសអាភាសដោយប្រើមុខ ឬរូបស្ត្រីពិត ដោយមិនមានការយល់ព្រមពីម្ចាស់រូបឡើយ។ ទោះបីជារូបភាពទាំងនេះមិនពិតក្តី វាក៏អាចបណ្តាលឲ្យមានការខូចខាតយ៉ាងធ្ងន់ធ្ងរទៅលើកិត្តិយស អារម្មណ៍ និងជីវិតសង្គមរបស់ស្ត្រីជាច្រើន។
តាមរបាយការណ៍អន្តរជាតិឆ្នាំ ២០២៤ ប្រហែលជា ៩៩% នៃអ្នករងគ្រោះក្នុងវីដេអូ Deepfake P**n គឺជាស្ត្រី ហើយប្រហែល ៩៨% នៃវីដេអូ Deepfake ទាំងអស់នៅលើអ៊ីនធឺណិតជារូបអាសអាភាស។ នៅកូរ៉េខាងត្បូង ប្រទេសដែលមានករណីបែបនេះច្រើនជាងគេក្នុងពិភពលោក មានរហូតដល់ ៥៣% នៃមាតិកា Deepfake P**n ពិភពលោក មានមុខស្ត្រីកូរ៉េ។ ត្រឹមពីរបីឆ្នាំចុងក្រោយនេះ មានករណីស៊ើបអង្កេតជាង ៨០០ ករណី ទាក់ទងនឹង deepfake s*x crime ដែលកើនឡើងយ៉ាងខ្លាំងប្រៀបធៀបនឹងប្រមាណ ១៥៦ ករណីនៅឆ្នាំ ២០២១។ បច្ចុប្បន្នរដ្ឋាភិបាលកូរ៉េខាងត្បូងបានអនុម័តច្បាប់ថ្មី ដែលហាមឃាត់ទាំងការបង្កើត ការទស្សនា និងការកាន់កាប់វីដេអូអាសអាភាសបែបនេះ។
ការសិក្សាអន្តរជាតិផ្សេងទៀតបានបង្ហាញថា ប្រហែល 2.2% នៃប្រជាជនទូទាំងពិភពលោក បានជួបប្រទះបទពិសោធន៍ជាអ្នករងគ្រោះដោយ deepfake porn។ នៅអូស្ត្រាលី មានប្រហែល 3.7%, នៅកូរ៉េខាងត្បូង 3.1%, និងនៅម៉ិចស៊ិកូ 2.9% ដែលជាប្រទេសមានអត្រាខ្ពស់បំផុត។
នៅកម្ពុជា ករណីបែបនេះក៏កំពុងកើតឡើងកាន់តែច្រើន តាមរយៈបណ្តាញសង្គមដូចជា Telegram TikTok និងគេហទំព័រអាសអាភាសមួយចំនួន។ ស្ត្រីជាច្រើនត្រូវបានគេប្រើរូបភាពពីគណនីបុគ្គល ដើម្បីបង្កើតរូបភាព ឬវីដេអូអាសអាភាស បន្ទាប់មកចែកចាយដោយគ្មានការអនុញ្ញាត ចំពោះរឿងនេះ ធ្វើឲ្យស្ត្រីរងគ្រោះមិនត្រឹមតែរងទុក្ខផ្លូវចិត្តទេ ប៉ុន្តែអាចបាត់បង់ការងារ និងទំនុកចិត្តពីសង្គម និងគ្រួសារផងដែរ។
បច្ចុប្បន្ន ដូចមិនទាន់មានច្បាប់ឬបទប្បញ្ញត្តិជាក់លាក់សម្រាប់ការបង្កើតរូបភាពអាសអាភាសតាមបច្ចេកវិទ្យា AI ទេ។ ច្បាប់ភាគច្រើនផ្តោតលើការចែកចាយ ឬការផ្សព្វផ្សាយ ប៉ុន្តែមិនគ្របដណ្តប់លើ “ការបង្កើត” ដែលជាជំហានដំបូងនៃឧក្រិដ្ឋកម្មនេះ។ ដូច្នេះ គួរតែពិចារណាបន្ថែមច្បាប់ ឬកែសម្រួលច្បាប់ឌីជីថល ដើម្បីហាមឃាត់ការបង្កើត និងការចែកចាយរូបភាពបែបនេះដោយគ្មានការយល់ព្រមគ្រប់រូបភាព។
💡 តើត្រូវធ្វើដូចម្តេច ប្រសិនបើអ្នកក្លាយជាអ្នករងគ្រោះដោយ “Deepfake P**n”? បើអ្នករកឃើញថា រូបភាព ឬវីដេអូរបស់អ្នកត្រូវបានប្រើប្រាស់ដោយគ្មានការយល់ព្រម ក្នុងមាតិកាអាសអាភាស ឬបង្កើតឡើងដោយបច្ចេកវិទ្យា AI អ្នកមិនមែននៅម្នាក់ឯងទេ។ មានជំហានមួយចំនួនដែលអ្នកអាចធ្វើដើម្បីការពារ និងទាមទារសិទ្ធិរបស់អ្នកវិញ។
១. រក្សាភាពស្ងប់ស្ងាត់ និងប្រមូលភស្តុតាង ថតអេក្រង់ (screenshot) ឬថតវីដេអូផ្ទាល់នៃមាតិកាដែលបង្កបញ្ហា។
+ រក្សាទុកតំណ (URL) ឬសារដែលពាក់ព័ន្ធ។
+ កុំឆ្លើយតប ឬទាក់ទងផ្ទាល់ជាមួយអ្នកបង្ក។
២. រាយការណ៍ និងស្នើសុំឲ្យលុបចេញពីបណ្តាញសង្គម (Facebook, TikTok, Telegram...) ដោយជ្រើសជម្រើស “Non-consensual intimate image” ឬ “Fake s*xual content.” ឬអាចស្នើសុំ Google ដើម្បីលុបមាតិកាដែលមានរូបអ្នក៖
👉 Google’s Removal Tool: https://support.google.com/webmasters/answer/9689846?hl=en
៣. ទាក់ទងអាជ្ញាធរ៖
+ នាយកដ្ឋានប្រឆាំងបទល្មើសបច្ចេកវិទ្យា (ក្រសួងមហាផ្ទៃ)
+ អាជ្ញាធរទទួលខុសត្រូវទំនាក់ទំនងទូរគមនាគមន៍ (TRC) ពេលទៅរាយការណ៍ សូមយកភស្តុតាងទាំងអស់ (screenshot, URL, ប្រវត្តិសារ) ទៅជាមួយ។
៤. ស្វែងរកជំនួយផ្លូវច្បាប់ និងផ្លូវចិត្ត៖
+ មជ្ឈមណ្ឌលសិទ្ធិមនុស្សកម្ពុជា (CCHR)
+ មជ្ឈមណ្ឌលព័ត៌មានស្ត្រីកម្ពុជា (WMC)
+ អង្គការទាំងនេះអាចជួយផ្តល់ជំនួយផ្លូវច្បាប់ និងការពារសិទ្ធិរបស់អ្នក។ កុំភ្លេចស្វែងរកជំនួយផ្លូវចិត្ត ព្រោះការរងគ្រោះពីការរំលោភឯកជនភាពអាចបង្កអារម្មណ៍ខ្លាំងដូចជាការបញ្ហាផ្លូវចិត្ត ឬអស់ទំនុកចិត្តលើខ្លួនឯង។
ក្រៅពីច្បាប់ យើងក៏ត្រូវរួមចំណែកបង្កើនការយល់ដឹងអំពីសុវត្ថិភាពឌីជីថល និងការគោរពសិទ្ធិឯកជនភាព។ ត្រូវមានការអប់រំដល់យុវជនអំពីផលប៉ះពាល់នៃការប្រើប្រាស់ AI ដោយគ្មានការទទួលខុសត្រូវ ហើយត្រូវបង្កើតប្រព័ន្ធជួយស្ត្រីដែលជារងគ្រោះ ដូចជាការផ្តល់ជំនួយផ្លូវចិត្ត និងការជួយផ្នែកច្បាប់។
✨ បច្ចេកវិទ្យាគួរត្រូវបានប្រើសម្រាប់ការរីកចម្រើនរបស់សង្គម និងមនុស្ស មិនមែនសម្រាប់ការរំលោភលើភាពជាមនុស្សរបស់អ្នកដទៃទេ។ “Deepfake P**n” គឺជាប្រភេទអំពើហឹង្សាឌីជីថល មិនមែនជារឿងអាម៉ាស់របស់អ្នករងគ្រោះទេ។ ការរិះគន់អ្នករងគ្រោះ គឺជាការការពារជនល្មើស។ យើងត្រូវការច្បាប់ដើម្បី ផ្តន្ទាទោសអ្នកបង្កើត និងចែកចាយ។ យើងគ្រប់គ្នាគួររួមគ្នាបង្កើតសង្គមឌីជីថលដែលមានសុវត្ថិភាព និងគោរពសិទ្ធិនារី។
__________
