12/12/2025
អភិបាលខេត្តកំពង់ចាម ប្រគល់អំណោយជូនដល់វីរកងទ័ពជួរមុខ ដែលកំពុងការពារទឹកដីពីការឈ្លានពានរបស់ថៃ
កំពង់ចាម៖ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម នាព្រឹកថ្ងៃទី១២ ខែធ្នូ ឆ្នាំ២០២៥ បានរៀបចំពិធីប្រគល់ អំណោយជាជំហានដំបូងរបស់រដ្ឋបាលខេត្ត ដើម្បីបញ្ជូនទៅឧបត្ថម្ភនាយទាហាន ពលទាហាន យោធភូមិភាគទី២ ប្រចាំការពារព្រំដែនកម្ពុជា-ថៃ ដើម្បីត្រៀមប្រយុទ្ធការពារបូរណភាពទឹកដី ពីការឈ្លានពានរបស់យោធាថៃ។
ពិធីនេះត្រូវបានធ្វើឡើងនៅ សាលាខេត្តកំពង់ចាម ពោរពេញដោយស្មារតី ជាតិនិយម និងការគាំទ្រដល់កងទ័ព ក្នុងគោលបំណងបង្ហាញនូវការ ដឹងគុណយ៉ាងជ្រាលជ្រៅ ចំពោះការលះបង់ដ៏ធំធេងរបស់វីរកងទ័ពកម្ពុជា។
ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងការកោតសរសើរ ចំពោះស្មារតីវីរភាព កងទ័ពដែលបានបង្ហាញនូវភាពក្លាហាន និងការលះបង់ខ្ពស់បំផុត ក្នុងការការពារទឹកដីដែលជាកេរដំណែលដូនតា។ ឯកឧត្តមបានគូសបញ្ជាក់ថា ការប្រយុទ្ធរបស់កងទ័ព គឺជាការបំពេញភារកិច្ចដ៏ថ្លៃថ្លាបំផុត ក្នុងនាមជាកូនខ្មែរ ហើយរដ្ឋបាលខេត្តកំពង់ចាមតែងតែនៅជាមួយ និងគាំទ្រកងទ័ពជានិច្ច។
ឯកឧត្តម អភិបាលខេត្ត បានជំរុញឱ្យកងទ័ពបន្តរក្សា សាមគ្គីភាព វិន័យ និងប្រុងប្រយ័ត្នខ្ពស់ ដើម្បីទប់ទល់នឹងសត្រូវ និងការពារបាននូវទឹកដីគ្រប់ចំណុច និងវាយតម្លៃខ្ពស់ចំពោះ ការលះបង់របស់វីរកងទ័ពគ្រប់រូប ដែលបានខិតខំប្រឹងប្រែងការពារ បូរណភាពទឹកដី ។
អំណោយដែលបានប្រគល់ជូនតំណាងកងទ័ពរួមមាន៖ អំបុកស្រូវថ្មីខ្មែរចំនួន ១.៥០០ កញ្ចប់ , ឆៃពៅចំនួន ១០០ គីឡូក្រាម, ត្រសក់ចាវចំនួន ១២០ គីឡូក្រាម, ត្រីខកំប៉ុង, ខ្ទឹមសរ, ត្រីប្រឡាក់, ប្រេងឆារ, ស្ករសរ, អំបិល, ប៊ីចេង ,អង្ករចំនួន ១០ តោន, មី ៣០០កេស,បន្លែ ផ្លែឈើ និងសាច់ស្រស់មួយចំនួនធំ, និងអំពូលសូឡាចំនួន ៥០ ឈុត, ថវិកាសរុបចំនួន ៤០លានរៀល៕
