05/06/2026
ជីវិតកើតមកជាកូនកំព្រា គ្មានឪពុកម្ដាយថែរក្សាតាំងពីតូចរហូតដល់ធំ។ ខ្ញុំធំឡើងជាមួយនឹងភាពឯកោ ការតស៊ូ និងទឹកភ្នែកជាច្រើនដែលគ្មានអ្នកណាបានឃើញ។ មនុស្សខ្លះមើលមកខ្ញុំ ហើយគិតថាខ្ញុំរឹងមាំ តែគេមិនដឹងទេថា ខ្ញុំធ្លាប់ឆ្លងកាត់យប់ជាច្រើនដែលគេងទាំងបារម្ភ ឆ្លងកាត់ថ្ងៃជាច្រើនដែលរស់ដោយគ្មានទីពឹង និងគ្មានអ្នកណាចាំជួយលើកទឹកចិត្ត។
អ្នកអាចសើចចំអកជីវិតខ្ញុំបាន អាចមើលងាយខ្ញុំបាន ប៉ុន្តែអ្នកមិនអាចដឹងថា ខ្ញុំបានជួបរឿងអ្វីខ្លះនោះទេ។ បើអ្នកស្ថិតក្នុងស្ថានភាពដូចខ្ញុំ ជីវិតគ្មានអ្នកការពារ គ្មានខ្នងបង្អែក រសាត់អណ្ដែតដូចស្មៅលើផ្ទៃទឹក រកកោះត្រើយមិនឃើញ នោះទើបអ្នកយល់ថា ការរស់រានមានជីវិតមកដល់ថ្ងៃនេះ មិនមែនជារឿងងាយស្រួលឡើយ។
ទោះបីថ្ងៃនេះខ្ញុំមិនទាន់មានទ្រព្យសម្បត្តិ មិនទាន់មានអ្វីៗគ្រប់យ៉ាងដូចអ្នកដទៃក៏ដោយ ប៉ុន្តែខ្ញុំមានមោទនភាពចំពោះខ្លួនឯង ព្រោះខ្ញុំបានរស់មកដល់ទីនេះដោយកម្លាំងញើសឈាមរបស់ខ្លួនឯង។ ខ្ញុំមិនធ្លាប់គិតអាក្រក់លើអ្នកណា មិនធ្លាប់សើចចំអក ឬមើលងាយជីវិតអ្នកណាម្នាក់ទេ ព្រោះខ្ញុំដឹងច្បាស់ថា ការឈឺចាប់មានរសជាតិបែបណា។
ជីវិតខ្ញុំប្រហែលមិនអស្ចារ្យដូចគេ ប៉ុន្តែខ្ញុំនៅតែដើរទៅមុខ មិនចុះចាញ់នឹងវាសនា។ ថ្ងៃណាមួយ ភាពលំបាកទាំងនេះនឹងក្លាយជារឿងរ៉ាវដែលបញ្ជាក់ថា ខ្ញុំជាមនុស្សម្នាក់ដែលមិនបោះបង់ខ្លួនឯង ទោះជាពិភពលោកទាំងមូលបោះបង់ខ្ញុំក៏ដោយ។ ❤️🥀
