12/04/2026
សង្ក្រាន្តខេត្តកណ្ដាល៖
ព្រឹកថ្ងៃទី១២ ខែមេសា ឆ្នាំ២០២៦ លោក ជី ស៊ីវុត្ថា នាយករដ្ឋបាលសាលាខេត្ត និងជាអនុប្រធានគណៈកម្មាការល្បែងប្រជាប្រិយ និងការប្រគំុតន្ត្រី បានដឹកនាំយុវជនហាត់សមត្រៀមចូលរួមលេងល្បែងប្រជាប្រិយ និងបានចុះពិនិត្យទីតាំងកន្លែងរៀបចំភូមិល្បែងប្រជាប្រិយ សម្រាប់ឱ្យបងប្អូនប្រជាពលរដ្ឋ ភ្ញៀវជាតិ និងអន្តរជាតិ អញ្ជើញចូលរួមលេងកម្សាន្តសប្បាយទាំងអស់គ្នា ដែលមានទីតាំងនៅសួនច្បារមាត់ទន្លេបាសាក់ក្រុងតាខ្មៅ ចាប់ពីថ្ងៃទី១៤-១៥-១៦ ខែមេសាខាងមុខនេះ។
ជម្រាបជូនផងដែរថា ល្បែងប្រជាប្រិយ សង្ក្រាន្តឆ្នាំថ្មី ២០២៦រួមមាន៖ ល្បែងចោលឈូង ល្បែងបោះអង្គុញ ល្បែងទាញព្រ័ត ល្បែងលោតបាវ ល្បែងលោតអន្ទាក់ខ្សែ ល្បែងដណ្ដើមស្លឹកឈើ ល្បែងវាយក្អម ល្បែងទូលក្អម និងល្បែងគោះអង្រែ។
