12/06/2026
សម្តេចតេជោ ហ៊ុន សែន អញ្ជើញជួបសំណេះសំណាលជាមួយក្រុមប្រឹក្សា ថ្នាក់ដឹកនាំមន្ទីរ អង្គភាពក្នុងខេត្តបាត់ដំបង និងប៉ៃលិន
(បាត់ដំបង)៖ នៅព្រឹកថ្ងៃសុក្រ ទី១២ ខែមិថុនា ឆ្នាំ២០២៦នេះ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រ និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ អញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តបាត់ដំបង និងខេត្តប៉ៃលិន។
ពិធីសំណេះសំណាលនេះ មានការអញ្ជើញចូលរួមពីសមាជិកព្រឹទ្ធសភា រដ្ឋសភា ប្រធាន អនុប្រធានក្រុមការងារថ្នាក់ជាតិចុះជួយខេត្ត សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ អង្គភាពនានាជុំវិញខេត្តទាំងពីរ។
សម្តេចតេជោ ហ៊ុន សែន បានហៅការអញ្ជើញចុះជួបសំណេះសំណាលជាមួយ ក្រុម ប្រឹក្សា រាជធានី ខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានានេះ ជាដំណើរឆ្ពោះទៅកាន់មូលដ្ឋាន។ ដំណើរឆ្ពោះទៅកាន់មូលដ្ឋាន បានចាប់ផ្តើមកាលពីថ្ងៃ ទី២៥ ខែមេសា ឆ្នាំ២០២៦។ រាជធានី ខេត្តចំនួន១៦រួចមកហើយ ដែលសម្តេចតេជោ ហ៊ុន សែន បានអញ្ជើញជួបសំណេះសំណាលរួមមាន៖ ខេត្តកំពង់ចាម ត្បូងឃ្មុំ កំពង់ស្ពឺ តាកែវ កំពត កែប ស្វាយរៀង ព្រៃវែង រាជធានីភ្នំពេញ កំពង់ឆ្នាំង ពោធិ៍សាត់ កំពង់ធំ កណ្តាល សៀមរាប និងឧត្តរមានជ័យ។
កម្មវិធីជួបសំណេះសំណាលនេះ គឺជាវេលាដ៏មានសារៈសំខាន់មួយសម្រាប់សម្តេចតេជោ ហ៊ុន សែន ក្នុងការក្រើនរំលឹក និងជំរុញដល់មន្ត្រីនៅមូលដ្ឋានឱ្យបង្កើនការយកចិត្តទុកដាក់ទៅលើកិច្ចការជាដែនសមត្ថកិច្ចរបស់ខ្លួន ជាពិសេសការផ្តល់សេវាទាំងឡាយជូន ដល់ប្រជាពលរដ្ឋ ក៏ដូចជាការដោះស្រាយបញ្ហាទាំងឡាយដែលជាក្តីកង្វល់របស់ប្រជាពលរដ្ឋ។
ក្រៅពីការជំរុញយកចិត្តទុកដាក់លើការផ្តល់សេវាហើយនោះ សម្តេចតេជោ ហ៊ុន សែន ក៏លើកឡើងពីបញ្ហាសន្តិសុខសណ្តាប់ធ្នាប់ ការប្រយុទ្ធប្រឆាំងបទល្មើសនានា កិច្ចការពារធនធានធម្មជាតិ និងការងារគ្រប់គ្រងរដ្ឋបាលនៅមូលដ្ឋាន។
យោងតាម Fresh AI បានឱ្យដឹងថា ខេត្តបាត់ដំបង ស្ថិតនៅភូមិភាគពាយព្យនៃប្រទេសកម្ពុជា មានផ្ទៃដីសរុប ១១ ៦៣១,២១គីឡូម៉ែត្រក្រឡា ចែកចេញជា១៤ក្រុង ស្រុក មាន១០៣ឃុំ សង្កាត់ ស្មើនឹង ៨៤២ភូមិ។ ប្រជាជនសរុបមានចំនួន ៣០៤ ៣៥៤គ្រួសារ ស្មើនឹង ១ ៣៤៤ ៣២៣នាក់ ក្នុងនោះស្ត្រីមានចំនួន ៦៨៣ ២៩២នាក់។
ពាក់ព័ន្ធសេដ្ឋកិច្ចវិញ នៅឆ្នាំ២០២៥ ខេត្តបាត់ដំបង មានទំហំសេដ្ឋកិច្ចប្រមាណ ១៤ ៥១៦ ៧៤៣,១លានរៀល ស្មើនឹង ៣ ៦១៨,៣លានដុល្លារ។ ក្នុងនោះវិស័យកសិកម្មគ្របដណ្តប់ខ្ពស់ជាងគេ គឺមាន ៦២,៣២ភាគរយ វិស័យសេវាកម្ម មានទំហំ ២២,២៦ភាគរយ និងវិស័យឧស្សាហកម្មមានទំហំ ១៥,៤២ភាគរយ។ ចំណូលជាមធ្យមសម្រាប់មនុស្សម្នាក់ៗក្នុងមួយឆ្នាំមាន ២ ៥៦៣ដុល្លារ។
ខេត្តបាត់ដំបង មានព្រំប្រទល់ខាងជើងជាប់ខេត្តបន្ទាយមានជ័យ ខាងត្បូងជាប់ខេត្តពោធិ៍សាត់ ខាងកើតជាប់ខេត្តសៀមរាប និងបឹងទន្លេសាប និងខាងលិចជាប់ខេត្តប៉ៃលិន និងប្រទេសថៃ ប្រវែង ១៤៤,៨គីឡូម៉ែត្រ (ជាប់ខេត្តត្រាត ខេត្តច័ន្ទបុរី និងខេត្តស្រះកែវ) មានបង្គោលសីមាចំនួន ១៣បង្គោល (បង្គោលលេខ៥២-៦២ និង៦៩, ៧០)។
ខេត្តបាត់ដំបង មានច្រកទ្វារព្រំដែនចំនួន៥ច្រក គឺច្រកទ្វារព្រំដែនអន្តរជាតិចំនួន២ និងមានច្រកទ្វារតំបន់ព្រំដែនចំនួន៣ច្រក។
ដោយឡែកខេត្តប៉ៃលិន ជាខេត្តមួយទើបទទួលបានសន្តិភាពពេញលេញក្រោយគេ នៅឆ្នាំ១៩៩៨ ស្ថិតនៅភាគពាយព្យនៃប្រទេសកម្ពុជា មានចម្ងាយ ៣៧៥គីឡូម៉ែត្រ ពីរាជធានីភ្នំពេញ មានព្រំប្រទល់ខាងកើត ខាងជើង និងខាងត្បូងជាប់នឹងខេត្តបាត់ដំបង និងខាងលិចជាប់នឹងប្រទេសថៃ
ដែលមានខ្សែបន្ទាត់ព្រំដែនប្រវែង ៥៣,២គីឡូម៉ែត្រ ចាប់ពីបង្គោលឡាក់លេខ៦២ ដល់លេខ៦៨។
ខេត្តប៉ៃលិន មានផ្ទៃដីសរុបចំនួន ១ ១៩៥,១៨គីឡូម៉ែត្រក្រឡា ចែកចេញជាក្រុង១ និងស្រុក១ មាន ៨ឃុំ-សង្កាត់ និង ៩៣ភូមិ។ មានផ្លូវជាតិសដ្ឋកិច្ចចំនួន ២ខ្សែ គឺផ្លូវជាតិលេខ៥៧ និងលេខ៥៩ និងមានស្ទឹងចំនួន៣ គឺស្ទឹងភ្នំដំបង ស្ទឹងប៉ៃលិន និងស្ទឹងកុយ។ ប្រជាពលរដ្ឋ រស់នៅសរុបចំនួន ២០ ០៣៧គ្រួសារ ស្មើនឹង ៨៤ ៦២៣នាក់ ស្រី ៤២ ៣១៥នាក់៕
