20/08/2026
सउलले अविवाहित युवायुवतीका लागि ‘डेटिङ’ कार्यक्रम विस्तार गर्दै, सहभागीलाई डेट खर्चसमेत उपलब्ध गराउने😍🇰🇷
दक्षिण कोरियाको राजधानी सउल महानगरपालिकाले अविवाहित युवायुवतीलाई सुरक्षित र प्राकृतिक वातावरणमा भेटघाट तथा सम्बन्ध विस्तारको अवसर दिने ‘서울팅 2.0’ कार्यक्रम सुरु गर्ने भएको छ।
सउल महानगरपालिकाका अनुसार यसअघि सञ्चालन गरिएको ‘서울팅’ कार्यक्रममार्फत भेटिएका एक जोडी अहिले विवाहको तयारीमा छन्। सन् २०२४ नोभेम्बरमा सुरु भएको यो कार्यक्रममा हालसम्म पाँच पटक आयोजना भइसकेको छ।
प्रत्येक कार्यक्रममा १०० जनाका लागि आवेदन खुलाउँदा कुल १३ हजार ८५४ जनाले आवेदन दिएका थिए भने १२६ जोडीको मिलान भएको महानगरपालिकाले जनाएको छ।
अब सञ्चालन हुने ‘서울팅 2.0’ मा एकपटकको भेटघाटमा मात्र सीमित नराखी सहभागीहरूबीच निरन्तर सम्बन्ध कायम गर्न अनलाइन कम्युनिटी सञ्चालन गरिनेछ। मिलान भएका जोडीलाई थप भेटघाटका लागि स्थानीय पसल तथा व्यवसायमा प्रयोग गर्न मिल्ने ‘설렘 데이트 카드’ समेत प्रदान गरिनेछ।
‘서울팅 2.0’ को पहिलो कार्यक्रम ‘설렘 in 서울, 한강버스편’ आगामी सेप्टेम्बर १९ मा तुक्सोम हान नदी बसमा आयोजना हुनेछ। कार्यक्रममा हान नदीको दृश्यावलोकन, डुंगा यात्रा, एक–एक जनाबीच डेटिङ तथा विभिन्न मनोरञ्जनात्मक गतिविधि समावेश गरिनेछ।
कार्यक्रममा सउलमा बसोबास गर्ने २५ देखि ४५ वर्षसम्मका ५० जना पुरुष र ५० जना महिला गरी १०० जना सहभागी हुनेछन्। सहभागीहरू कर्मचारी, व्यवसायी वा फ्रिलान्सरजस्ता आर्थिक गतिविधिमा संलग्न भएको हुनुपर्नेछ।
आवेदन अगस्ट १८ देखि सेप्टेम्बर ४ सम्म ‘탄생육아몽땅정보통’ मार्फत दिन सकिनेछ। योग्य आवेदकमध्येबाट चिठ्ठामार्फत सहभागी छनोट गरिनेछ र छनोटको नतिजा सेप्टेम्बर ११ मा व्यक्तिगत रूपमा जानकारी गराइनेछ।
सउल महानगरपालिकाले युवायुवतीलाई सुरक्षित वातावरणमा नयाँ सम्बन्ध निर्माण गर्ने अवसर प्रदान गर्नुका साथै विवाह तथा परिवार निर्माणमा सहयोग पुर्याउने उद्देश्यले कार्यक्रमलाई थप विस्तार गरिएको जनाएको छ।
