14/03/2025
ကျွန်တော်နှင့် ရန်ကုန်ရောက် နှင်းပုလဲ ထမင်းပေါင်း
…………………………။။။။။။။………………………………
ရန်ကုန်မြို့ပေါ် လျှောက်သွားရင် တစ်နေရာ အရောက်တော့ ငယ်ငယ်က အမှတ်တရတွေကို ပြန်
မြင်ယောင်နေမိတယ် ။
“ လွမ်းမိတယ် အမေ “
လို့ နှုတ်က ရေရွတ်မိလိုက်တယ် ။ အမေက ကုန်သည်တစ်ယောက်မို့ ကျွန်တော်ငယ်ငယ်က
အမေရထားနဲ့ ကုန်ပို့ဖို့ သွားရင် ကျွန်တော်က
အမေ့နာမှာ တောက်တဲ့လ်ုမျိုး အမြဲပါသွားလေ့ ရှိတယ်။ ရထားပေါ်မှာက သိတဲ့အတိုင်းပဲ ဘူတာတစ်ဘူတာကို ဆိုက်ရောက်တိုင် ရထားဘေးနှစ်ဖက်မှာ စျေးသည်တွေအပြည့် အဲတာအပြင် ရထားပေါ်မှာလည်း ခဏလေရတဲ့အချိန်ကို အလုအယက် တက်လာပြီး ရောင်းတဲ့ စျေးသည်တွေက ရှိသေး။ ဘယ်လောက်ပဲ အိပ်ပျော်နေပါစေ ၊ မနိုးတဲ့သူ မရှိသလောက်ပါပဲ။
“ ကွမ်းယာတွေ ဆေးလိပ်တွေ ယူကြမလား ၊ အကိုတို့ အမတို့ရေ ဘာများသုံးဆောင်မလဲ လိုတာ အကုန်ရမယ်နော် “ စျေးသည်တွေရဲ့ အသံက ရထားအတွဲထဲမှာ ပဲ့တင်ထပ်နေပါတယ်။
ကျွန်တော်က ခလေးသဘာဝမို့ ရောက်တဲ့ ဘူတာတိုင် ဗိုက်ကဆာနေမိတာ အမှန်ပဲ ။ အမေကလည်း
သူ့သား အငယ်ဆုံးမို့ ချစ်ရှာပါတယ် တစ်လမ်းလုံး ဝယ်ကျွေးနေကြ။ အဲဒီထဲမှာမှ မမေ့နိုင်တာ တစ်ခုက
ဘယ်လောက်ပဲ ဗိုက်ပြည့်အောင် စားထားပါစေ ..
နှင်းပုလဲရောက်လို့ နှင်းပုလဲထမင်းပေါင်းသည် ရထားပေါ်တက်လာရင် ထမင်း ဟင်း အနံ့နဲ့တင်
ဗိုက်က တဂျွီးဂျွီး နဲ့ အော်နေပြီး။
မစားချင်ဘဲနေမလား ထမင်းရောင်းတဲ့ အဒေါ်ကြီးကသီးစုံပဲကုလားဟင်း အုပ်ထားတဲ့ အိုးအဖုံးကို ခဏ ခဏ လှမ်းဖွင့်ပြီး မဆလာအုပ်ထားတဲ့ ဟင်းရနံ့နဲ့ ရထားတစ်တွဲလုံးကို သူက မြူဆွယ်နေလေရဲ့ ဒါကလည်း စျေးရောင်းနည်ဗျူဟာတစ်ခုပဲဆိုတာ ကြီးလာမှ သိခဲ့ရတယ်။
ထမင်းကို လက်ဆေးပြီး အားရပါးရ နယ်စားခဲ့တဲ့ အမှတ်တရပါပဲ ။ကျွန်တော့်ရဲ့ ထူးခြားချက်က
ဘယ်ခရီးသွားသွား ၊ ဘယ်အိမ်မှာမဆို ဧည့်သည်သွားလုပ်ရင် ထမင်းက အမြဲ စားလို့ မြိန်တယ်😀
ရန်ကုန်ရောက် နှင်းပုလဲထမင်းပေါင်းကတော့ ဗိုလ်
နည်းနည်းဆန်သွားပြီး ဆိုင်ရှင်က “ သားဘာနဲ့စားမလဲ ဇွန်နဲ့လား ပန်းကန်နဲ့လား “ တဲ့ “ ဒီထမင်း ဟင်းကို
ပိုက်ဆံရှိရင် ဘယ်မှာ စားစား စားလို့ရတယ် အန်တီလို့ နှင်းပုလဲထမင်းပေါင်းရဲ့ vibeက အဓိကမို့ လက်အိတ်နဲ့ ငှက်ပျောဖက်ထုပ်ပြီးပဲ ပေးပါ ” လို့ တောင်းဆိုလိုက်တယ် ။လက်အိတ်စွပ်ပြီး အားရပါးရ ကျွန်တော်စားခဲ့ပါတယ်။
