https://epsatozupdate.com/, https://epsnepal.gov.np/, https://www.eps.go.kr/, https://epstopik.hrdkorea.or.kr/, https://

EPS A to Z Update, Seoul (2026)

22/08/2026

कोरियामा महिला खेलाडीमाथि बढ्दो यौनिक दृष्टि, सामाजिक सञ्जालदेखि एआईसम्म चुनौती

दक्षिण कोरियामा महिला खेलाडीको खेल प्रदर्शनभन्दा उनीहरूको शरीर र बाहिरी स्वरूपलाई केन्द्रमा राखेर सामग्री बनाउने प्रवृत्ति बढ्दै गएको भन्दै चिन्ता व्यक्त गरिएको छ । सामाजिक सञ्जालमा महिला खेलाडीका शरीरका निश्चित अंगलाई नजिकबाट खिचिएका छोटा भिडियोहरू फैलिने क्रम बढेको छ । खेलसँग प्रत्यक्ष सम्बन्ध नराख्ने यस्ता सामग्रीले खेलाडीलाई यौनिक रूपमा प्रस्तुत गर्ने र उनीहरूको सम्मान तथा अधिकारमा असर पार्ने जोखिम बढाएको बताइएको छ ।

विशेषगरी दौड, जिम्न्यास्टिक, समुद्री भलिबल र डाइभिङजस्ता खेलका महिला खेलाडी यस्ता सामग्रीको बढी निशाना बन्ने गरेका छन् । कतिपय भिडियोमा खेलाडीको अनुहार, शरीर र खेल पोसाकलाई मात्र केन्द्रित गरेर दृश्य तयार पार्ने गरिएको छ । यस्ता सामग्रीमा आपत्तिजनक टिप्पणीसमेत आउने गरेका छन् भने केही खाताले यस्ता भिडियोलाई सदस्यता वा अन्य माध्यमबाट आम्दानीको स्रोत बनाउने गरेको पाइएको छ ।

समस्या सामाजिक सञ्जालमा मात्र सीमित छैन । कृत्रिम बुद्धिमत्ताको प्रयोग गरी वास्तविक खेलाडी नभएका कम उमेरका महिला खेलाडीका काल्पनिक भिडियो तयार गरेर यौनिक उद्देश्यले फैलाउने गतिविधिसमेत देखिएको छ । सार्वजनिक खेलमैदानमा खिचिएका भिडियोमा यौनिक उद्देश्य प्रमाणित गर्न कठिन हुने भएकाले यस्ता सामग्रीमाथि कानुनी कारबाही गर्न चुनौती रहेको विज्ञहरूको भनाइ छ ।

युरोपमा भने महिला खेलाडीको सम्मानजनक प्रसारणका लागि स्पष्ट मापदण्ड बनाउने प्रयास अघि बढेको छ । खेलाडीको शरीरका निश्चित अंगलाई अनावश्यक रूपमा नजिकबाट खिच्ने, अर्थहीन रूपमा ढिलो गतिमा देखाउने वा खेल प्रदर्शनभन्दा शरीरलाई प्राथमिकता दिने दृश्यबाट बच्न सुझाव दिइएको छ । कोरियामा पनि खेल संघ, सञ्चारमाध्यम, सामाजिक सञ्जाल कम्पनी र सरकारी निकायबीच समन्वय गरी प्रभावकारी मापदण्ड तथा कानुनी व्यवस्था बनाउनुपर्ने आवाज उठेको छ । विज्ञहरूले महिला खेलाडीको शरीरलाई मनोरञ्जन वा आम्दानीको साधन बनाउने प्रवृत्तिको अन्त्य गर्दै उनीहरूको क्षमता, प्रदर्शन र उपलब्धतालाई प्राथमिकता दिनुपर्ने बताएका छन् ।

21/08/2026

🇰🇷 कोरियाली पाइलटको ज्यान बचाउने दुई श्रीलङ्काली श्रमिकलाई दीर्घकालीन बसोबासको अनुमति

दक्षिण कोरियाको न्याय मन्त्रालयले समुद्रमा दुर्घटनामा परेको वायुसेनाको लडाकु विमानका पाइलटको ज्यान बचाउने दुई श्रीलङ्काली श्रमिकलाई दक्ष कामदारको हैसियत प्रदान गर्दै दीर्घकालीन बसोबासको बाटो खुला गरिदिएको छ । उनीहरूलाई दक्ष कामदार वर्गको ई-७-४ भिसा प्रदान गरिएको मन्त्रालयले जनाएको छ ।

सन् २०२२ अगस्ट १२ मा ह्वासङनजिकै एफ-४ई फ्यान्टम लडाकु विमान समुद्रमा खसेको थियो । विमानमा रहेका दुई पाइलटले दुर्घटनाअघि नै आकस्मिक रूपमा विमानबाट बाहिर निस्किएर समुद्रमा खसेका थिए । त्यतिबेला नजिकै रहेको सानो माछा मार्ने डुङ्गामा कार्यरत दुई श्रीलङ्काली श्रमिकले प्यारासुटबाट तल झर्दै गरेका व्यक्तिलाई देखेपछि तत्काल डुङ्गाको दिशा परिवर्तन गरी उद्धार गरेका थिए ।

उनीहरू सन् २०२२ अप्रिलमा गैरव्यावसायिक रोजगारी प्रणालीअन्तर्गत कोरिया आएका थिए । अस्थायी श्रम भिसामा रहेका विदेशी श्रमिकका लागि लामो समयसम्म कोरियामा बस्न कठिन हुने भए पनि उनीहरूको असाधारण योगदानलाई ध्यानमा राख्दै सरकारले विशेष निर्णय गरेको हो । उनीहरूलाई यसअघि पनि बहादुरीका लागि वायुसेनाका प्रमुखले प्रशंसापत्र प्रदान गरेका थिए ।

कोरियामा विदेशी नागरिकले जोखिम मोलेर मानिसको ज्यान बचाएको घटनामा दीर्घकालीन बसोबासको अनुमति दिइएको यो पहिलो उदाहरण भने होइन । सन् २०२० मा पनि आगलागीका क्रममा एक वृद्ध कोरियाली महिलाको ज्यान बचाउने श्रीलङ्काली श्रमिकलाई स्थायी बसोबासको अनुमति दिइएको थियो । न्याय मन्त्रालयले यस्ता असाधारण योगदान गर्ने विदेशी श्रमिकलाई सम्मान गर्दै उनीहरूलाई कोरियामा स्थिर जीवन बिताउन सहयोग गर्ने जनाएको छ ।

21/08/2026

कोरिया आएको ३ दिनमै लाओसको मौसमी कामदारको मृत्यु, पर्याप्त तालिम र निगरानी नभएको आरोप

दक्षिण कोरियामा कृषि क्षेत्रमा काम गर्न आएकी लाओसकी एक मौसमी कामदारको कोरिया आएको तीन दिनमै मृत्यु भएको घटनाले विदेशी श्रमिकको सुरक्षा र मौसमी श्रमिक व्यवस्थापन प्रणालीमाथि गम्भीर प्रश्न उठाएको छ । ३० वर्ष उमेर आसपासकी ती महिला अगस्ट ५ मा कोरिया आएकी थिइन् र सोही दिन योजु नगरमा आवश्यक दर्ता, स्वास्थ्य परीक्षण पूरा गरेपछि करिब तीन घण्टाको अभिमुखीकरण लिएकी थिइन् ।

त्यसै साँझ रोजगारदाताले उनलाई खेतमा लगेका थिए । पर्याप्त अनुकूलन समय वा छुट्टै सुरक्षा तालिमको व्यवस्था नगरी भोलिपल्ट बिहान ६ बजेदेखि नै उनलाई शारीरिक रूपमा कठिन कृषि काममा लगाइएको बताइएको छ । अगस्ट ७ मा काम गरेको दोस्रो दिन उनी अत्यधिक गर्मीका कारण असहज महसुस गरिरहेकी थिइन् । त्यस दिन योजुमा तापक्रम ३६.७ डिग्री सेल्सियस पुगेको थियो र अत्यधिक गर्मीसम्बन्धी आपतकालीन चेतावनीसमेत जारी थियो ।

काम गरिरहेको अवस्थामा उनी हराएपछि खोजी सुरु गरिएको थियो । भोलिपल्ट नजिकैको झाडीमा उनको शव फेला परेको थियो । घटनापछि श्रमिक अधिकारकर्मीहरूले मौसमी श्रमिकलाई पर्याप्त सुरक्षा तालिम र कार्यस्थलमा अनुकूल हुने समय नदिई तत्काल काममा पठाउने प्रवृत्तिमाथि प्रश्न उठाएका छन् ।

योजुमा करिब १ हजार ९ सय मौसमी श्रमिक कार्यरत रहे पनि उनीहरूको निगरानीका लागि चार जना अधिकारी मात्र जिम्मेवार रहेको बताइएको छ । श्रमिक अधिकारकर्मीहरूका अनुसार विदेशी श्रमिकलाई उनीहरूले बुझ्ने भाषामा प्रभावकारी सुरक्षा प्रशिक्षण दिनुपर्ने र असुरक्षित अवस्थामा काम गर्न बाध्य नहुने व्यवस्था सुनिश्चित गर्नुपर्ने आवश्यकता छ । योजु नगरले पनि यस्ता घटना दोहोरिन नदिन नयाँ सुरक्षा निर्देशिका बनाउने विषयमा छलफल भइरहेको जनाएको छ ।

21/08/2026

नवलपुर सांगीतिक सौगात - भाग–१ सेप्टेम्बर २५ मा दक्षिण कोरियामा आयोजना हुँदै

नवलपुर समाज दक्षिण कोरियाको आयोजनामा आपतकालीन राहत कोष स्थापनार्थ विशेष सांगीतिक कार्यक्रम “नवलपुर सांगीतिक सौगात - भाग–१” आयोजना हुने भएको छ । कार्यक्रम आगामी सेप्टेम्बर २५, २०२६ मा दक्षिण कोरियाको सोलस्थित एचडब्लु सम्मेलन केन्द्रमा आयोजना हुने आयोजकले जनाएको छ ।

कार्यक्रममा लोकप्रिय गायिका तृष्णा गुरुङ र द कोल्याब ब्याण्डको प्रत्यक्ष सांगीतिक प्रस्तुति रहनेछ । यस्तै, लोकप्रिय लोकदोहोरी गायक अर्जुन सापकोटाको विशेष प्रस्तुति रहने आयोजकले जनाएको छ ।

कार्यक्रममा सुदूरपश्चिमको पहिचान बोकेको देउडा गीतसहित स्थानीय कलाकारहरूको समेत विशेष प्रस्तुति रहनेछ । नेपाली संगीतको मिठाससँगै कोरियामा रहेका नेपालीबीच आत्मीय भेटघाट र मनोरञ्जन प्रदान गर्ने उद्देश्यले कार्यक्रम आयोजना गर्न लागिएको हो ।

नवलपुर समाज दक्षिण कोरियाले कार्यक्रममार्फत आपतकालीन राहत कोष स्थापना गर्ने अभियानलाई समेत अघि बढाउने जनाएको छ । आयोजकले सम्पूर्ण नेपाली समुदायलाई कार्यक्रममा सहभागी भई कार्यक्रमलाई भव्य रूपमा सफल बनाउन तथा सामाजिक सेवाको अभियानमा हातेमालो गर्न आह्वान गरेको छ । कार्यक्रमको समन्वय नेपाली सम्पर्क समिति, गण्डकी प्रदेश समाज र नवलपुर समाज दक्षिण कोरियाले गर्ने जनाइएको छ ।

21/08/2026

कोरियामा शिक्षिकाको कम्प्युटरबाट २ लाखभन्दा बढी फाइल चोरी गरी ‘डीपफेक’ बनाउने कर्मचारीलाई ३ वर्ष जेल

दक्षिण कोरियाको बुसानमा विद्यालयका महिला शिक्षकलगायत कर्मचारीको कम्प्युटरबाट व्यक्तिगत तस्बिर तथा भिडियो चोरी गरी अश्लील ‘डीपफेक’ भिडियो बनाउने एक सूचना प्रविधि उपकरण व्यवस्थापन कम्पनीका कर्मचारीलाई अदालतले ३ वर्षको जेल सजाय सुनाएको छ ।

बुसान जिल्ला अदालतले ३० वर्षीय पुरुषलाई सूचना सञ्जालसम्बन्धी कानुन र यौन अपराधसम्बन्धी कानुन उल्लंघनसहित ९ वटा अभियोगमा दोषी ठहर गर्दै ३ वर्ष जेल सजाय सुनाएको हो । अदालतले उनलाई ४० घण्टाको यौन अपराध उपचारसम्बन्धी कार्यक्रम पूरा गर्न र बालबालिका, किशोरकिशोरी तथा अपाङ्गता भएका व्यक्तिसँग सम्बन्धित संस्थामा १० वर्षसम्म काम गर्न प्रतिबन्ध लगाउने आदेशसमेत दिएको छ ।

अदालतका अनुसार उनले सन् २०२१ को जुलाईदेखि २०२५ को सेप्टेम्बरसम्म बुसानका १९ वटा विद्यालयमा कार्यरत १९४ जनाको कम्प्युटरबाट व्यक्तिगत तस्बिर तथा भिडियोसहित २ लाख २१ हजार ९२१ वटा फाइल आफ्नो भण्डारण उपकरणमा सारेर चोरी गरेका थिए । ती सामग्री प्रयोग गरी उनले २० वटा डीपफेक भिडियो बनाएको अभियोग थियो । साथै, उनले महिला कर्मचारीको कपडाभित्रको दृश्यसमेत ४५ पटक अवैध रूपमा खिचेको र बालबालिका तथा किशोरकिशोरीको यौन शोषणसम्बन्धी सामग्री तथा अन्य अ'वैध रूपमा खिचिएका भिडियोसमेत डाउनलोड गरी राखेको पाइएको थियो ।

उनको साथबाट डीपफेकसहित कुल ५३३ वटा समस्याजनक भिडियो फेला परेका थिए, जसको कुल भण्डारण क्षमता करिब ४०५ गिगाबाइट थियो । अदालतले पीडितहरूमा गम्भीर मानसिक तनाव परेको हुनसक्ने भन्दै अपराधको प्रकृति अत्यन्त गम्भीर रहेको बताएको छ । यद्यपि, अभियुक्तले सबै अपराध स्वीकार गरेको र यसअघि कुनै आपराधिक इतिहास नभएको पहिलोपटक अपराध गर्ने व्यक्ति भएकाले सजाय निर्धारण गर्दा यी पक्षलाई समेत ध्यान दिइएको अदालतले जनाएको छ ।

21/08/2026

कोरियाले कस्मेटिक्स उद्योगलाई नयाँ उचाइमा पुर्‍याउने ऐतिहासिक कानुन पारित, ११.४ अर्ब डलरको उद्योगलाई विशेष सरकारी सहयोग

दक्षिण कोरियाको राष्ट्रिय सभाले तीव्र रूपमा विस्तार भइरहेको सौन्दर्य तथा कस्मेटिक्स उद्योगलाई व्यवस्थित रूपमा प्रवर्द्धन गर्ने उद्देश्यले ऐतिहासिक कानुन पारित गरेको छ । नयाँ कानुनले कस्मेटिक्स उद्योगको विकासका लागि देशमै पहिलोपटक छुट्टै कानुनी आधार तयार गरेको हो ।

सन् २०२५ मा दक्षिण कोरियाबाट कस्मेटिक्स निर्यात ११.४ अर्ब अमेरिकी डलर पुगेको थियो । यससँगै कोरिया फ्रान्ससँगै विश्वका प्रमुख दुई सौन्दर्य सामग्री निर्यातक मुलुकमध्ये परेको छ । कस्मेटिक्स घरेलु साना तथा मझौला उद्यमका लागि सबैभन्दा ठूलो निर्यात क्षेत्रसमेत बनेको छ ।

नयाँ कानुनअन्तर्गत सरकारले प्रत्येक पाँच वर्षमा कस्मेटिक्स उद्योग विकासका लागि दीर्घकालीन रणनीति तयार गर्नेछ । अनुसन्धान तथा विकासमा उल्लेख्य लगानी र निर्यात क्षमता भएका कम्पनीलाई ‘नवीन कस्मेटिक्स कम्पनी’का रूपमा प्रमाणित गरी सरकारी अनुसन्धान अनुदान, लगानी कोष र क्षेत्रीय पूर्वाधार कार्यक्रममा प्राथमिकता दिइनेछ ।

यसका साथै कृत्रिम बुद्धिमत्ता(Ai)को प्रयोगबाट व्यक्तिगत आवश्यकताअनुसार उत्पादन विकास, डिजिटल आपूर्ति प्रणाली, दक्ष जनशक्ति प्रशिक्षण तथा अन्तर्राष्ट्रिय बजारका नियामक मापदण्ड पूरा गर्न आवश्यक सहयोग विस्तार गरिनेछ । विशेषगरी साना तथा मझौला उद्यमलाई प्राथमिकता दिइने सरकारले जनाएको छ । कानुन औपचारिक रूपमा जारी भएको एक वर्षपछि लागू हुनेछ ।

21/08/2026

कम्पनी पार्टीमा जबर्जस्ती मदिरा सेवनप्रति युवा असन्तुष्ट, बदलिँदै कोरियाली संस्कृति

दक्षिण कोरियामा कम्पनीका पार्टी तथा जमघटमा जबर्जस्ती मदिरा सेवन गराउने पुरानो संस्कृतिप्रति युवापुस्ताको असन्तुष्टि बढ्दै गएको छ । पछिल्लो समय २० र ३० वर्ष उमेर समूहका कोरियालीले मदिरा सेवन कम गर्न थालेपछि कम्पनी पार्टीको परम्परागत शैलीसमेत परिवर्तन हुँदै गएको हो । विशेषगरी कठिन रोजगारी बजारको सामना गरिरहेका युवा कर्मचारीका लागि कम्पनी पार्टीमा मदिरा पिउन दबाब दिनु थप तनावको कारण बन्न थालेको छ ।

दक्षिण कोरियाको रोग नियन्त्रण तथा रोकथाम निकायले सार्वजनिक गरेको सन् २०२५ को सामुदायिक स्वास्थ्य सर्वेक्षणअनुसार पछिल्ला ६ वर्षमा ६० र ७० वर्ष उमेर समूहका पुरुषमा अत्यधिक मदिरा सेवन गर्ने दर बढेको छ । महिलामा भने ३० वर्ष र त्यसभन्दा माथिका सबै उमेर समूहमा यस्तो दर बढेको पाइएको छ । आर्थिक सहयोग तथा विकास संगठनका २७ सदस्य राष्ट्रमध्ये दक्षिण कोरियाको मासिक अत्यधिक मदिरा सेवन दर पाँचौँ उच्च रहेको तथ्यांकले देखाएको छ ।

तर युवापुस्तामा मदिरा सेवनको अवस्था फरक देखिएको छ । सन् २०२४ को राष्ट्रिय स्वास्थ्य तथ्यांकअनुसार २० वर्ष उमेर समूहले मदिराजन्य पेय पदार्थबाट दैनिक औसत ६४ दशमलव ८ ग्राम मदिरा सेवन गरेका थिए भने ६० वर्ष उमेर समूहमा यो मात्रा ६६ दशमलव ८ ग्राम थियो । त्यस्तै, १९ देखि २९ वर्ष उमेर समूहका ५६ प्रतिशत व्यक्ति मदिरा नपिउने वा महिनामा बढीमा एकपटक मात्र मदिरा सेवन गर्ने गरेको पाइएको छ ।

युवामा मदिरा सेवन घट्नुका पछाडि स्वास्थ्यप्रतिको बढ्दो सचेतना, व्यायाम र स्वस्थ जीवनशैलीप्रतिको रुचि तथा आर्थिक दबाबलाई प्रमुख कारण मानिएको छ । विश्व स्वास्थ्य संगठनअन्तर्गतको अन्तर्राष्ट्रिय क्यान्सर अनुसन्धान निकायले मदिराजन्य पेय पदार्थलाई क्यान्सर गराउने पदार्थको समूहमा राखेको छ । मदिराको सट्टा दौडलगायतका व्यायाममा आकर्षित हुने युवाको संख्या बढिरहेको छ । यससँगै ‘पहिलो चरणमा सोझु र दोस्रो चरणमा बियर’ खाने परम्परागत कम्पनी भोजको शैली पनि क्रमशः कमजोर बन्दै गएको छ । कोरियाली युवाका लागि अनिवार्य मदिरापान अब सामाजिक रमाइलोभन्दा पनि स्वास्थ्य, खर्च र मानसिक दबाबसँग जोडिएको विषय बन्न थालेको देखिएको छ । यसले दक्षिण कोरियाको कम्पनी पार्टी संस्कृतिमा पुस्तागत परिवर्तन तीव्र भइरहेको संकेत गरेको छ ।

21/08/2026

इलामेली समाज दक्षिण कोरियाको छैटौँ अधिवेशन अगस्ट २३ मा हुँदै

कोरियावासी इलामेलीहरूको साझा संस्था इलामेली समाज दक्षिण कोरियाको छैटौँ अधिवेशन आगामी अगस्ट २३ तारिख आइतबार सउलमा हुने भएको छ । “कोरियावासी इलामेली एक हौँ, सुख-दुःखमा हातेमालो गरौँ” भन्ने मूल नाराका साथ अधिवेशन आयोजना गर्न लागिएको हो ।

अधिवेशन सउलको दोङ्देमुनस्थित पूर्वी नेपाल समाजको सभाहलमा बिहान ११ बजेदेखि सुरु हुनेछ । आयोजकले कोरियामा रहेका सम्पूर्ण नेपालीजनलाई अधिवेशनमा उपस्थित भई सफल बनाउन हार्दिक निमन्त्रणा गरेको छ ।

इलामेली समाजले कोरियामा रहेका इलामेलीबीच आपसी एकता, सहकार्य र सहयोगलाई प्राथमिकता दिँदै सामाजिक कार्यमा सक्रिय रहँदै आएको जनाएको छ । अधिवेशनमार्फत संस्थाको आगामी कार्यदिशा तथा सामाजिक गतिविधिलाई थप प्रभावकारी बनाउने अपेक्षा गरिएको छ ।

“सूर्योदय र हरियाली इलामको पहिचान, पर्यटन प्रवर्द्धन र समाजसेवा, हाम्रो अभियान” भन्ने नारासहित आयोजना हुने अधिवेशनमा कोरियामा रहेका इलामेली तथा नेपाली समुदायको उल्लेख्य सहभागिता रहने अपेक्षा गरिएको छ ।

📅 मिति: २०२६ अगस्ट २३, आइतबार
📍 स्थान: पूर्वी नेपाल समाजको सभाहल, सउल, दोङ्देमुन
🏢 ठेगाना: 서울시 종로구 창신 4 나길 6-15
⏰ समय: बिहान ११ बजे

20/08/2026

जापानमा नेपाली विद्यार्थीको रहस्यमय मृत्यु, ह'त्या आशङ्कामा ७० जनाको अनुसन्धान टोली परिचालन

जापानको फुकुओका सहरको तेन्जिन क्षेत्रमा रहेको नाकागावा नदीमा फेला परेको युवतीको शव तीन वर्षअघि जापान आएकी २५ वर्षीया नेपाली विद्यार्थी लक्ष्मी राजवंशीको भएको पुष्टि भएको छ । भोकेशनल कलेजमा अध्ययनरत लक्ष्मीको टाउको र अनुहारमा धेरै चोटपटक देखिनुका साथै उनी बस्ने कोठामा निशान र रगतका धब्बा भेटिएपछि प्रहरीले घटनालाई ह'त्याको रूपमा अनुसन्धान अघि बढाएको छ ।

लक्ष्मीको शव बिहीबार बिहान नदीको पानीमा घोप्टो परेको अवस्थामा फेला परेको थियो । घटनास्थलमै उनको मृत्यु भइसकेको पुष्टि भएको थियो । पोस्टमार्टमबाट मृत्युको स्पष्ट कारण अझै खुल्न नसके पनि टाउको र अनुहारमा धारिलो वा गह्रौँ वस्तुले प्रहार गरेजस्ता धेरै चोटहरू देखिएको प्रहरीले जनाएको छ । घटनास्थल र उनको कोठाको अवस्थालाई आधार बनाएर प्रहरीले ह'त्या भएको आशङ्का गरेको हो ।

प्रहरीका अनुसार लक्ष्मी अगस्ट १८ तारिख राति करिब १०ः३० बजे आफू काम गर्ने रेस्टुरेन्टबाट बाहिरिएकी थिइन् । काम सकेपछि उनी एक्लै साइकल चढेर घरतर्फ लागेको पुष्टि भएको छ । तर, राति करिब ३ बजे उनकी एक महिला साथीले लक्ष्मी सम्पर्कविहीन भएको भन्दै प्रहरीको आपत्कालीन नम्बरमा फोन गरेकी थिइन् । पोस्टमार्टमको प्रारम्भिक अनुमानअनुसार उनको मृत्यु मध्यरातपछि बिहानपख भएको हुन सक्ने प्रहरीले जनाएको छ ।

घटनालाई गम्भीर रूपमा लिँदै फुकुओका प्रहरीले ७० जना अनुसन्धानकर्ता सम्मिलित विशेष अनुसन्धान टोली गठन गरेको छ । प्रहरीले लक्ष्मीको अन्तिम गतिविधि, घर फर्किने क्रममा उनको आवतजावत, घटनास्थल आसपासका गतिविधि तथा सम्भावित व्यक्तिहरूबारे अनुसन्धान तीव्र पारेको छ । लक्ष्मीलाई केही दिनअघि भेटेका एक साथीले उनी दयालु स्वभावकी रहेको बताउँदै आफूले उनलाई फेरि भेट्न चाहेको बताएका छन् । घटनापछि स्थानीय बासिन्दामा समेत त्रास फैलिएको बताइएको छ ।

20/08/2026

२०८३ भाद्र १६ गते (September 01, 2026) मा कोरिया जाने रेगुलर (Manu र Agri) श्रमिकहरुको सूची ।

EPS A to Z Update

22/08/2026

21/08/2026

21/08/2026

21/08/2026

21/08/2026

21/08/2026

21/08/2026

21/08/2026

20/08/2026

20/08/2026

Address

Telephone

Website

Alerts

Contact The Business

Shortcuts

Share

Category

Listing takedown request