05/06/2026
ឃាត់ខ្លួនមនុស្ស ៣នាក់ ក្រោយប្រើត្រាក់ទ័រឈូសបុកបំផ្លាញផ្ទះ និងរោងចម្ការប្រជាពលរដ្ឋ នៅស្រុកសំឡូត
បាត់ដំបង៖ កម្លាំងនគរបាលស្រុកសំឡូត ខេត្តបាត់ដំបង បានឃាត់ខ្លួនជនសង្ស័យចំនួន ៣នាក់ ក្រោយធ្វើសកម្មភាពប្រើត្រាក់ទ័រឈូសបុកបំផ្លាញផ្ទះ និងរោងចម្ការរបស់ប្រជាពលរដ្ឋ បណ្តាលឱ្យរងការខូចខាតយ៉ាងធ្ងន់ធ្ងរ។
ហេតុការណ៍នេះបានកើតឡើងនៅវេលាម៉ោងប្រមាណ ៤និង៣០នាទីរសៀល ថ្ងៃទី៣ ខែមិថុនា ឆ្នាំ២០២៦ ស្ថិតនៅចំណុចវាលធ្មា ភូមិចម្លងរមាំងក្រោម ឃុំអូរសំរិល ស្រុកសំឡូត ខេត្តបាត់ដំបង។
តាមសមត្ថកិច្ចបានឱ្យដឹងថា ក្រោយទទួលបានព័ត៌មានពីប្រជាពលរដ្ឋ កម្លាំងជំនាញនៃអធិការដ្ឋាននគរបាលស្រុកសំឡូត សហការជាមួយប៉ុស្តិ៍នគរបាលរដ្ឋបាលអូរសំរិល ក្រោមការដឹកនាំរបស់លោកវរសេនីយ៍ទោ ម៉ែន រីម អធិការនគរបាលស្រុកសំឡូត បានចុះទៅពិនិត្យកន្លែងកើតហេតុ និងបើកការស៊ើបអង្កេតភ្លាមៗ។ ជាលទ្ធផល សមត្ថកិច្ចបានឈានដល់ការឃាត់ខ្លួនជនសង្ស័យទាំង ៣នាក់ នៅវេលាម៉ោង ៩និង១០នាទីយប់ ថ្ងៃដដែល ដើម្បីនាំយកមកសាកសួរនៅអធិការដ្ឋាននគរបាលស្រុកសំឡូត។
ជនសង្ស័យទាំង ៣នាក់ រួមមាន ឈ្មោះ អេង ណាវី ភេទប្រុស អាយុ ៤៥ឆ្នាំ មុខរបរមេការ , ឈ្មោះ វ័រ វូ ភេទប្រុស អាយុ ១៨ឆ្នាំ ជាតៃកុងត្រាក់ទ័រ , ឈ្មោះ កែវ បូរី ភេទប្រុស អាយុ ២៦ឆ្នាំ ជាតៃកុងត្រាក់ទ័រអ្នកទាំងបីរស់នៅក្នុងភូមិ និងឃុំកើតហេតុខាងលើ។ ចំណែកជនរងគ្រោះមានឈ្មោះ ប៉ិ វ៉ាន់ ភេទប្រុស អាយុ ៦១ឆ្នាំ រស់នៅភូមិ និងឃុំដូចគ្នា។
ក្រោយការសាកសួរ ជនសង្ស័យបានសារភាពថា ពួកខ្លួនពិតជាបានប្រើត្រាក់ទ័រឈូសបុកផ្ទះ និងរោងចម្ការរបស់ជនរងគ្រោះមែន ដោយអះអាងថា បានអនុវត្តតាមការបញ្ជារបស់ស្ត្រីម្នាក់ឈ្មោះ សន រ៉ាណែត អាយុ ៤៤ឆ្នាំ រស់នៅឃុំតាក្រី ស្រុកកំរៀង ខេត្តបាត់ដំបង។
សមត្ថកិច្ចបានបញ្ជាក់ថា ភាគីពាក់ព័ន្ធធ្លាប់មានទំនាស់ដីធ្លីជាមួយគ្នាអស់រយៈពេលជាច្រើនឆ្នាំមកហើយ ដែលអាចជាមូលហេតុនាំឱ្យកើតមានអំពើហិង្សាខាងលើ។
បច្ចុប្បន្ន ជនសង្ស័យទាំង ៣នាក់ ត្រូវបានសមត្ថកិច្ចកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តបាត់ដំបង ដើម្បីចាត់ការបន្តតាមនីតិវិធីច្បាប់ ខណៈការស្រាវជ្រាវលើអ្នកពាក់ព័ន្ធផ្សេងទៀតកំពុងបន្ត៕
#ព័ត៌មានថ្មីៗ #កម្ពុជា #ដំណឹង #ព័ត៌មានទាន់ហេតុការណ៍ ゚viralシfypシ゚
