International gojri Zubaan Live chanel

03/09/2026

تفسیر ریاض القرآن
چھبیووں سپارو حم
ترجمو
سورۃ ق آیت نمبر (11,12,13,14,15)

بنداں نا روزی دیؤن واسطے تے ہم نے بنجر زمی نا آباد کیو تے اسے طرح ہوے کو نکل کے کھلنو (11)
انکار کیو ہے انھاں تیں پہلاں قوم نوح نے تے کھو آلاں نے تے ثمود نے (12)
تے قوم عاد تے فرعون تے لوط کا پہائ (13)
تے بن کا رہؤن آلاں نے تے طبع کی قوم نے انھاں ساراں نے رسولاں کو انکار کیو تے میرو ڈرانو اچھو تھو (14)
تے کے ہم پہلی وار پیدا کرکے تنگ ہوگیا ہاں کائے گل نیہ یہ تھوکھا مانھ ہیں دوجی واری زندہ کرن تیں (15)

تفسیر

اللہ تعالیٰ ارشاد فرماویں کے جس طرح بارش برسا کے بنجر زمی زرخیز کی ہے اسی طرح قیامت مانھ اللہ تعالیٰ فر زندو کرے کو تے انھاں لوکاں تیں پہلاں قوم نوح تے عاد تے کھو آلاں نے تے قوم ثمود تے فرعون تے قوم لوط تے قوم شعیب تے تبع کی قوم نے وی رسولاں نا کو انکار کیو تھو یہ لوک صرف قیامت کے دیہاڑے زندہ ھؤن کو انکار کریں ہور کج نیہ ۔
۔۔۔۔ جاری ہے ۔۔۔۔۔
۔۔۔۔ فداء الرحمن سیال ۔۔۔۔

03/09/2026

02/09/2026

تفسیر ریاض القرآن
چھبیووں سپارو حم
ترجمو
سورۃ ق آیت نمبر (6,7,8,9,10)

تے کے وے اپنے اپر آسمان نا نیہ دیکھتا ہم نے کس طرح بنائیو ہے تے اس نا رونق دتی تے اس مانھ کوئی مورو نیہ (6)
تے ذمی نا ڈائیو تے اس مانھ پہاڑ جمایا تے اس تیں پیدا کی ہر رونق کی چیز (7)
دیکھن واسطے تے نصیحت اس آدمی واسطے جہڑو رجوع کرے (8)
تے آسمان تیں پانی برہائیو تے اس تیں پیدا کیا باغ تے اناج تے فصل جہڑی کپی جائے (9)
تے خجور جس کا گچھ لماں تے تلے اپر ہیں (10)

تفسیر

اللہ تعالیٰ ارشاد فرماویں کے یہ لوک آسمان تے زمی کی تخلیق مانھ غور وفکر کیوں نیہ کرتا کے کس طرح انھاں کے اپر آسمان بنائیو ہے جس مانھ کوئ مورو نیہ تے زمی نا دیکھیں کس طرح ڈائی وی ہے تے اس مانھ پہاڑ پیدا کیا فر آسمان تیں بارش برسا کے زمی تیں مختلف قسم کا آناج تے غلو پیدا کیو یہ خجور کا لماں لماں بوٹا جنھاں کا کہنا گچھ ہیں یو سارو نظام انسان نا دعوت فکر دیہے کے اس سارا کج نا کوئی پیدا کرن آلو ہے تے وہ ہی تیرو خالق تے مالک و مختار تے رزاق تے معبود ہے ۔
۔۔۔۔۔ جاری ہے ۔۔۔۔
۔۔۔۔ فداء الرحمن سیال ۔۔۔

01/09/2026

تفسیر ریاض القرآن
چھبیووں سپارو حم
ترجمو
سورۃ ق آیت نمبر (1,2,3,4,5)
ق قسم ہے قرآن مجید کی (1)
انھاں نا تعجب ہؤو کے آئیو انھاں کول ڈراؤن آلو تے ہے وی انھاں ہی بچوں منکر کہں یاہ تعجب کی گل ہے (2)
تے کے جد ہم مر کے مٹی ہوجاں کا تے فر مڑنو مچ دور کی گل ہے (3)
ہم نا پتو ہے جتنو زمی کٹہاوے انھاں تیں تے ہمارے کول کتاب ہے جس مانھ سارو کج محفوظ ہے (4)
کائے گل نیہ سچا دین کو انکار کریں جد انھاں نا پہچیو تے یقیناً وے بدھیں لگوا بنکی وی گل مانھ (5)

تفسیر

ق حرف مقطعات بچوں ہے تے اللہ تعالیٰ قرآن مجید کی قسم چا کے فرماویں کے یہ لوک اس تعجب مانھ ہیں کے کس طرح انھاں ہی بچوں آ گیو تے اس گل پر وی کے مر کے کس طرح فر زندو کیو جائے کو اللہ تعالیٰ ارشاد فرماویں کے ہمارے کول لوح محفوظ مانھ سب کج محفوظ ہے تے یہ لوک صرف دین حق کو انکار کریں ہور کائے گل نیہ ۔

۔۔۔۔ جاری ہے ۔۔۔۔۔
۔۔۔۔ فداء الرحمن سیال ۔۔۔۔

31/08/2026

تفسیر ریاض القرآن
چھبیووں سپارو حم
تعارف سورۃ ق

سورۃ ق قرآن مجید کی ترتیب مانھ پنجاہ تے نزول مانھ چونتیواں نمبر پر ہے اس کی پنتالی آیت تے تیرے رکوع ہیں تے یاہ مکی سورۃ ہے چھبیواں سپارہ مانھ ہے
اس سورۃ کو آغاز حرف مقطعات بچوں ق تیں ہوے اسے نسبت نال اس کو نام ق ہے
اس سورۃ کو مرکزی موضوع قیامت تے موت تیں بعد کی زندگی تے حساب وکتاب یعنی جزا وسزا کو بیان ہے
اس سورۃ کا مضامین کج اس طرح ہیں
کفار موت تیں بعد کی زندگی کا منکر تھا اس سورۃ مانھ اس کو ثبوت تے انھاں کا انکار کو جواب دتو گیو ہے تے توحید باری تعالیٰ تے آخرت پر دلائل دتا گیا ہیں فر اس جہاں مانھ کھنڈی وی قدرت کی نشانی بیان کیں تانجے لوگ انھاں مانھ غور وفکر کریں تے اسے طرح دسیو کے اللہ تعالیٰ نے ہر انسان کے نال دو فرشتہ رکھیا ہیں جہڑا اس انسان کی ہر چنگی مندی گل تے کم نا لکھیں لگوا تے قیامت کے دیہاڑے سب کج اس انسان کے سامنے پیش کیو جائے کو
اسے طرح فرمائیو کے دوزخ قیامت مانھ پچھے کی کے ہور وی ہیں تے جنت نیکاں واسطے بنائی گئی ہے تے یو قرآن نصیحت ہے جہڑو اس تیں نصیحت حاصل کرے کو اس نا فائدو ہوے کو تے اس سورۃ کو پہلی سورۃ نال تعلق توحید تے قیامت کا مضامین کی وجہ تیں ہے ۔
۔۔۔۔ جاری ہے ۔۔۔۔۔
۔۔۔۔ فداء الرحمن سیال ۔۔۔۔

29/08/2026

تفسیر ریاض القرآن
چھبیووں سپارو حم
ترجمو
سورۃ حجرات آیت نمبر (14,15,16,17,18)

دیہاتی کہں کے ہم ایمان لے آیا تے تو کہو تم نے ایمان نیہ قبولیو بلکے تم کہو ہم مسلمان ہوا اجاں ایمان تھارا دلاں مانھ نیہ پھسیو تے کدے تم اللہ تے اس کا رسول کا حکماں پر چلیا تے وہ ضائع نیہ کرسے کو تے اللہ بخشن آلو تے مہربان ہے (14)
ایمان آلا تے وے لوک ہیں جہڑا ایمان لے آیا اللہ پر تے اس کا رسول پر فر شک مانھ ناہ پیا تے اللہ کی راہ مانھ جہاد کرتا رہیا اپنا مال تے جان نال تے وے ہی لوک سچا ہیں (15)
تو انھاں نا کہو تے کے تم اپنی دینداری اللہ پر جتلاو تے اللہ نا پتو ہے جو کج آسماناں مانھ ہے تے جو کج زمی مانھ ہے تے اللہ ہر چیز کو پتو ہے (16)
تیرے پر احسان کریں کے وے مسلمان ہوا تو کہو میرا پر اپنا اسلام کو احسان ناہ کرو بلکے اللہ کو احسان ہے تھارے پر کے اس نے تم نا ھدایت دتی کدے تم سچا ہو (17)
بے شک اللہ غیب جانے آسمان تے زمی کو تے اللہ دیکھے جو کج تم کرو لگوا (18)

تفسیر
دیہاتی لوک نبی کریم صلی اللہ علیہ وسلم کے کول آ کے کہں تھا ہم ایمان لے آیا انھاں لوکاں پر اس کو کج اثر نیہ ہوے تھو کیونجے جد انسان ایمان لے آوے تے وہ غیبت تے ٹھٹھو تے لوکاں کی جاسوسی نیہ کرتو اس واسطے فرمائیو کے تم یاہ گل ناہ کرو کے ہم ایمان لے آیا بلکے تم یاہ گل کہو کے ظاہری طور پر ہم نے گل من لی ہے تے یاد رکھیو کدے تم سچی تابعداری اللہ تعالیٰ تے اس کا رسول کی کرو کا تے اللہ تعالیٰ وی تھارا عملاں نا ضائع نیہ کرسے کو وہ مچ بڑو مہربان تے بخشن آلو ہے تے دیکھو سچو مسلمان تے وہ ہے جہڑو اللہ تعالیٰ کی راہ مانھ اپنی جان تے مال سب کج قربان کر چھوڑے اسا لوک ہی سچا ہویں تے یاد رکھیو تم یاہ گل کر کے اللہ تعالیٰ پر تے اس کا رسول پر احسان نیہ کرتا کے ہم مسلمان ہاں بلکے یو احسان تے اللہ تعالیٰ کو ہے جس نے ھدایت دتی تے سدھا راہ پر چلائیو اللہ تعالیٰ نا سب کج کی خبر ہے وہ آسمان تے زمی کا سارا غیباں تیں واقف ہے اس تیں کج وی چھپییو وو نیہ ۔
۔۔۔۔۔ سورۃ حجرات مکمل ہو گئی ہے ۔۔۔۔۔
۔۔۔۔۔ جاری ہے ۔۔۔۔۔۔
۔۔۔۔ فداء الرحمن سیال ۔۔۔۔