28/11/2025
ҚР Ұлттық банкінің Ақша-кредит саясаты комитеті базалық мөлшерлемені +/-1 пайыздық тар дәлізімен жылдық 18% деңгейінде сақтау жөнінде шешім қабылдады.
– Бұл шешім болжамдық талдау нәтижелеріне, негізгі макроэкономикалық көрсеткіштердің жаңартылған бағаларына және инфляциялық тәуекелдердің жалпы балансына сүйенеді. Қазанда жылдық инфляция 12,6% болды (қыркүйекте – 12,9%). Азық-түлік өнімдерінің бағасы 13,5%-ға (12,7%) өсіп, азық-түлікке жатпайтын тауарлар 11%-ға (10,8%) қымбаттады. Қызмет көрсету секторындағы баға өсімі реттелетін коммуналдық қызметтердің арзандауына байланысты 12,9%-ға (15,3%) дейін төмендеді. Инфляцияның жоғары деңгейі сұраныстың ұсыныстан тұрақты түрде асып түсуі аясында қалыптасып отыр, – деп хабарлады Ұлттық банк.
Ұлттық банк атап өткендей, бірқатар тауар нарықтарындағы теңгерімсіздік, тұрақты сұраныс, импорттың қымбаттауы және шығындардың артуы инфляцияға әсіресе азық-түлік бағасының айтарлықтай үлес қосуына себеп болуда. Қызмет көрсету саласындағы инфляция үлесі азайғанымен, баға өсімінің қарқыны әлі де жоғары. Азық-түлікке жатпайтын инфляцияда жанармай мен дәрі-дәрмек бағасының қымбаттауы байқалады.
Қазан айында айлық инфляция 0,5%-ға дейін бәсеңдеді, алайда базалық инфляция 1% деңгейінде қалып, жоғары болып отыр. Бұл жылдық есепте 12,2%-ға тең. Сонымен бірге тұтыну себетінің шамамен 80%-ын құрайтын тауарлар мен қызметтер 5% мақсатты деңгейден жоғары қарқынмен қымбаттап жатыр. Мұның бәрі инфляциялық қысымның кең таралғанын және тұрақтылығын көрсетеді. Бұл үрдісті фискалдық және квазифискалдық ынталандыру, сондай-ақ тұтынушылық сұраныстың өсуі күшейтіп отыр.
Сонымен қатар, 2025 және 2026 жылдарға арналған инфляция болжамы қайта қаралды. 2025 жылы инфляция 12–13% деңгейінде, 2026 жылы 9,5–12,5% аралығында болады деп күтілуде. 2027 жылдың соңында көрсеткіш 5,5–7,5%-ға дейін төмендейді деп жоспарланып отыр.
