08/07/2025
⚡️Трамптың тарифтік ультиматумы Ақорданың хат-қоржынына түсті: Қазақстан қалай жауап береді?
Ақ үй басшысы Дональд Трамп президент Тоқаевқа хат жолдап, 2025 жылдың 1 тамызынан бастап қазақстандық тауарларға қосымша 25 пайыздық баж салығын енгізетінін хабарлады.
Бұл туралы Трамптың Truth Social платформасында жарияланған ресми хатында айтылған, деп хабарлайды Ertenmedia.
«2025 жылдың 1 тамызынан бастап, Қазақстаннан АҚШ-қа жеткізілетін барлық тауарларға қолданыстағы тарифтерден бөлек қосымша 25% баж салығы салынады. Осы тарифтерді айналып өтіп, басқа елдер арқылы жеткізілетін тауарларға да жоғары салық қолданылады», – делінген Трамптың хатында.
Сонымен қатар, АҚШ президенті жаңа тарифтердің енгізілетінін Жапония, Оңтүстік Корея, Малайзия, Лаос, Оңтүстік Африка Республикасы және Мьянма басшыларына да ресми түрде хабарлаған.
Хатта Трамп Қазақстан мен АҚШ арасындағы сауда қатынастарын «өзара тиімді емес» деп бағалап, 25% тарифтің өзі екі ел арасындағы «сауда дисбалансын жою үшін жеткіліксіз» екенін атап өткен.
Дегенмен, АҚШ басшысы қазақстандық компаниялар тауарды Америка аумағында өндірген жағдайда мұндай баж салығының салынбайтынын да ескертіп отыр.
«Егер Қазақстан қарсы шара қабылдайтын болса, Уашингтон тарифті одан әрі арттыруға дайын», – дейді Трамп.
Айта кетейік, биылғы 2 сәуірде АҚШ бірқатар елдерден келетін тауарларға жаңа баж салығын енгізген. Сол тізімге Қазақстан да ілігіп, 27 пайыздық тариф белгіленген еді. Ал барлық мемлекеттер үшін ең төменгі базалық тариф ретінде 10 пайыздық мөлшерлеме 5 сәуірден бастап күшіне енген. Кейін АҚШ тарапы тарифтерді көтеруге 90 күндік мораторий жариялаған еді.
7 шілдеде Трамп БРИКС-тің «антиамерикалық саясатын» қолдайтын мемлекеттерге тағы қосымша 10 пайыздық тариф енгізілетінін ескерткен.
Бұл жайлы әлі де айтамыз. Бізге тіркелуді ұмытпаңыз👇
https://t.me/askerenews/4400
