04/06/2026
World Boxing әлемдік рейтиңін жаңартты: Қазақстанның 15 боксшысы үздіктер қатарында
World Boxing ұйымы бокстан әлемдік рейтиңнің жаңартылған нұсқасын жариялады. Жаңа тізімде Қазақстан құрамасының ерлер және әйелдер арасындағы бірқатар боксшылары өз салмақ дәрежелерінде жоғары орындарға ие болды.
Ерлер арасында 50 келі салмақта Санжар Ташкенбай 1378,5 ұпаймен рейтиңнің бірінші орнына жайғасты. 55 келідегі Махмуд Сабырхан да 1537,5 ұпаймен көш бастап тұр. 60 келі салмақтағы Оразбек Асылқұлов 800 ұпаймен үшінші орынға ие болды.
70 келі салмақта Төрехан Сабырхан 1625 ұпай жинап, өз салмақ дәрежесінде бірінші орынға көтерілсе, 75 келідегі Сабыржан Аққалықов 912,5 ұпаймен үшінші сатыдан көрінді. 80 келі салмақта Нұрбек Оралбай 950 ұпаймен екінші орынға жайғасты. Ал +90 келіде Айбек Оралбай 2287,5 ұпаймен рейтиң көшін бастап тұр.
Әйелдер арасында 48 келі салмақта Назым Қызайбай 1262 ұпаймен екінші орынға ие болды. 51 келідегі Алуа Балқыбекова 1275 ұпай жинап, үшінші орынға тұрақтады. 60 келі салмақта Виктория Графеева 712,5 ұпаймен төртінші орыннан көрінді.
65 келідегі Аида Әбікеева 1281,25 ұпаймен екінші орынға көтерілсе, 70 келі салмақта Наталья Богданова 1237,5 ұпаймен бірінші орынға жайғасты. Осы салмақтағы тағы бір қазақстандық боксшы Бақыт Сейдіш 500 ұпаймен бесінші орында тұр.
80 келі салмақта Надежда Рябец 800 ұпаймен үшінші орынға ие болса, 80 келіден жоғары салмақта Дина Исламбекова да 800 ұпай жинап, үздік үштікті түйіндеді.
Осылайша, жаңартылған World Boxing рейтиңінде Қазақстан құрамасының бес боксшысы өз салмақ дәрежелерінде бірінші орынға көтерілді. Сонымен қатар үш спортшы екінші, бес боксшы үшінші орынға ие болып, қазақстандық бокс мектебінің әлемдік деңгейдегі бәсекеге қабілеттілігін тағы бір мәрте дәлелдеді.
