FM98.0 radio

23/03/2026

ຫ້ອງການອຸດສາຫະກຳ ແລະ ການຄ້າເມືອງນາກາຍ ແຂວງຄໍາມ່ວນ ໄດ້ຈັດ ພິທີ ທຳລາຍສິນຄ້າໝົດອາຍຸ,
ສິນຄ້າປອມແປງ ແລະ ສິນຄ້າທີ່ນໍາເຂົ້າແບບບໍ່ຖືກຕ້ອງຕໍ່ລະບຽບກົດໝາຍ.
-----------------------------------------------------
ໃນຕອນບ່າຍຂອງວັນທີ່ 19 ມີນາ 2026 ຜ່ານມານີ້ ຫ້ອງການອຸດສາຫະກໍາ ແລະ ການຄ້າເມືອງ ນາກາຍ ແຂວງ ຄໍາມ່ວນ ໄດ້ຈັດພິທີທຳລາຍ ສິນຄ້າໝົດອາຍຸ, ສິນຄ້າປອມແປງ ແລະ ສິນຄ້າທີ່ນໍາເຂົ້າແບບບໍ່ຖືກລະບຽບກົດ ໝາຍຂຶ້ນຢ່າງເປັນທາງການໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ຕຽງຄຳ ມູນໂນລາດ ຄະນະປະຈຳພັກເມືອງ ຮອງຄະນະປະທານຄະນະກຳມະການປົກຄອງເມືອງນາກາຍ ທ່ານ ວັນນະພາ ໄຊຍະວົງ ກຳມະການພັກເມືອງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ ພ້ອມບັນດາທ່ານທີ່ຕາງໜ້າໃຫ້ແກ່ຫ້ອງການອ້ອມຂ້າງເມືອງ ເຂົ້າຮ່ວມທັງໝົດ 20 ທ່ານ ຍິງ 02 ທ່ານ.
ໃນພິທີ ໄດ້ຮັບຟັງການຜ່ານຂໍ້ຕົກລົງຂອງປະທານຄະນະກຳມະການປົກຄອງເມືອງນາກາຍ ວ່າດ້ວຍການອານຸມັດໃຫ້ພາກສ່ວນທີ່ກ່ຽວຂ້ອງຈັດພິທີ ທໍາລາຍ ສິນຄ້າທີ່ເຈົ້າໜ້າທີ່ກວດກາການຄ້າເມືອງນາກາຍ ຢຶດມາໄດ້ ທີ່ເຫັນວ່າເປັນປະເພດສິນຄ້າທີ່ໝົດອາຍຸ, ສິນຄ້າເຊື່ອມຄຸນນະພາບ, ສິນຄ້າລອກຮຽນແບບ, ສິນຄ້ານອກລະບົບ ແລະ ສິນຄ້າທີ່ນໍາເຂົ້າແບບຜິດລະບຽບກົດໝາຍ.
ໃນໄລຍະ ປີ 2025 ຜ່ານມາ ເຈົ້າໜ້າທີ່ກວດກາການຄ້າເມືອງນາກາຍໄດ້ເຄື່ອນໄຫວກວດກາສິນຄ້າໝົດອາຍຸ ແລະ ສິນຄ້າເຊືື່ອມຄຸນນະພາບ ຢູ່ຕາມຫ້າງຮ້ານໃນເທດສະບານເມືອງໄດ້ທັງໝົດ 12 ຄັ້ງ ລວມມີ 29 ຮ້ານ ພົບເຫັນສິນຄ້າທີ່ໝົດອາຍຸ ແລະ ເຊື່ອມຄຸນນະພາບ 13 ຮ້ານ ຈໍານວນ 15 ລາຍການ ເຊິ່ງມີມູນຄ່າລວມທັງໝົດ 8,887,000 ກີບ. ນອກນັ້ນ ເຈົ້າໜ້າທີ່ກວດກາກາານຄ້າເມືອງນາກາຍ ໂດຍສົມທົບເຈົ້າໜ້າທີ່ກວດກາການຄ້າແຂວງຄໍາມ່ວນ ໄດ້ພ້ອມກັນເຄື່ອນໄຫວຕິດຕາມກວດກາປະເພດສິນຄ້າທີ່ນໍາເຂົ້າແບບບໍ່ຖືກລະບຽບກົດໝາຍ ໄດ້ທັງໝົດ 7 ຄັ້ງ ໃນຈໍານວນ 15 ຫ້າງຮ້ານທີ່ເປັນເປົ້າໝາຍ ແລະ ສາມາດກວດພົບສິນຄ້າທີ່ນໍາເຂົ້າແບບບໍ່ຖືກລະບຽບກົດໝາຍ ໃນຈໍານວນ 8 ຫ້າງຮ້ານ ແລະ ຢູ່ທ່າເຮືອຂົນສົ່ງ-ໂດຍສານອີກ 1 ແຫ່ງ. ສິນຄ້າທີ່ນໍາເຂົ້າແບບບໍ່ຖືກຕ້ອງຕາມລະບຽບກົດໝາຍເປັນປະເພດ (ເບຍສະຕິ້ນ ) ລວມທັງໝົດ 335 ແກັດ ລວມມູນຄ່າ 44,500,000 ກີບ. ( ລວມມູນຄ່າຂອງສິນຄ້າທີ່ຖືກທໍາລາຍໃນເທື່ອນີ້ ທັງສິນຄ້າໝົດອາຍຸ ແລະ ສິນຄ້າທີ່ນໍາເຂົ້າຜິດລະບຽບກົດໝາຍ ມີທັງໝົດ 53,387,000 ກີບ )
ໃນພິທີທຳລາຍສິນຄ້າໝົດອາຍຸ, ສິນຄ້າປອມແປງ ແລະ ສິນຄ້າທີ່ນໍາເຂົ້າແບບບໍ່ຖືກລະບຽບກົດໝາຍ ໃນເທື່ອນີ້ສະແດງໃຫ້ເຫັນເຖິງຄວາມເອົາໃຈໃສ່ຂອງເຈົ້າໜ້າທີ່ກວດກາການຄ້າທັງຂັ້ນແຂວງ ແລະ ຂັ້ນເມືອງ ທີ່ໄດ້ມີການເຄື່ອນ ໄຫວຢ່າງເຂັ້ມງວດ ຈົນສາມາດພົບເຫັນ ແລະ ຢຶດສິນຄ້າປະເພດເຄື່ອງອຸປະໂພກ-ບໍລິໂພກ ທີ່ເຫັນວ່າເປັນຜົນຮ້າຍຕໍ່ຜູ້ບໍລິໂພກພາຍໃນເມືອງນາກາຍ ເພື່ອນໍາມາທຳລາຍຖິ້ມໃນເທື່ອນີ້ ໃນຕອນທ້າຍ ທ່ານ ຕຽງຄໍາ ມູນໂນລາດ ໃນນາມຜູ້ຊີ້ນໍາຂົງເຂດວຽກງານເສດຖະກິດຂອງເມືອງນາກາຍ ໄດ້ມີທັດສະນະ ເບື້ອງຕົ້ນ ທ່ານ ສະແດງຄວາມຍ້ອງຍໍຊົມເຊີຍເຈົ້າໜ້າທີ່ກວດກາການຄ້າທຸກຂັ້ນທີ່ເອົາໃຈໃສ່ຢ່າງໜັກແໜ້ນຕໍ່ວຽກງານ ນອກນັ້ນ ທ່ານຍັງຮຽກຮ້ອງເຈົ້າໜ້າທີ່ ທີ່ກ່ຽວຂ້ອງຈົ່ງໄດ້ສືບຕໍ່ຈັດຕັ້ງປະຕິບັດວຽກງານດັ່ງກ່າວຢ່າງເຂັ້ມງວດ ເພື່ອຮັບປະກັນຄວາມປອດໄພຂອງຜູ້ບໍລິໂພກພາຍໃນເມືອງນາກາຍ ທັງຮັບປະກັນການປະຕິບັດລະບຽບການນໍາເຂົ້າສິນຄ້າ ຂອງພໍ່ຄ້າ-ຊາວຂາຍ ໃຫ້ຖືກຕ້ອງຕາມລະບຽບຫຼັກການຢ່າງເຂັ້ມງວດ.
ພາບ-ຂ່າວ : ບຸ້ຍ ອານັນຕະທັດ 98720988
ກວດ-ແກ້ : ຈັນໄທ ແກ້ວວິເສດ 22177601

21/03/2026

ຫ້ອງການສຶກສາທິການ ແລະ ກິລາ ເມືອງນາກາຍ ແຂວງຄໍາມ່ວນ ຈັດກອງປະຊຸມວາງແຜນຄົ້ນຄວ້າ ປຶກສາ
ຫາລື ຮ່ວມກັບອົງການປົກຄອງເມືອງ ເພື່ອສົ່ງເສີມການເຂົ້າຮຽນ, ແກ້ໄຂບັນຫາການຂາດຮຽນ ແລະ ປະລະການຮຽນຂອງນັກຮຽນ
___________________________
ວັນທີ 18-19 ມີນາ 2026 ຜ່ານມານີ້ ຫ້ອງການສຶກສາທິການ ແລະ ກິລາ ເມືອງນາກາຍ ແຂວງຄໍາມ່ວນ ໄດ້ເປີດກອງປະຊຸມ ວາງແຜນຄົ້ນຄວ້າ ປຶກສາຫາລື ຮ່ວມກັບອົງການປົກຄອງເມືອງ ເພື່ອສົ່ງເສີມການເຂົ້າຮຽນ, ແກ້ໄຂບັນຫາການຂາດຮຽນ ແລະ ປະລະການຮຽນ ຢູ່ທີ່ສະໂມສອນໃຫຍ່ຂອງເມືອງ ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ຄໍາຫວ່າງ ກິໄລວັນ ກຳມະການພັກເມືອງ ຮອງປະທານຄະນະກຳມະການປົກຄອງເມືອງ ຜູ້ຊີ້ນໍາຂົງເຂດວຽກງານວັດທະນະທໍາ - ສັງຄົມ, ທ່ານ ອຸດຕະມະ ຈັນນີຍາວົງ ຮອງຫົວໜ້າພະແນກສຶກສາທິການ ແລະ ກິລາ ແຂວງຄໍາມ່ວນ, ທ່ານ ຕຽງຄໍາ ໄຊຍະສັກ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ. ມີຫົວໜ້າ,ຄະນະຫ້ອງການອ້ອມຂ້າງເມືອງ, ຕາງໜ້າການຈັດຕັ້ງບ້ານ ຕະຫຼອດຮອດຄູ - ອາຈານໃນທົ່ວເມືອງ ເຂົ້າຮ່ວມທັງໝົດ 121 ທ່ານ, ຍິງ 52 ທ່ານ.
ກອງປະຊຸມໄດ້ຮັບຟັງການນຳສະເໜີຕົວຊີ້ບອກ ແລະ ຄາດໝາຍຂອງແຜນພັດທະນາການສຶກສາ ແລະ ກິລາ ຄັ້ງທີ X ( 2026-2030 ) ຮັບຟັງການນໍາສະເໜີສະພາບລວມ ແລະ ຕົວເລກສະຖິຕິນັກຮຽນ ອອກຈາກລະບົບການສຶກສາ ໃນຊັ້ນປະຖົມ ແລະ ມັດທະຍົມ, ຮັບຟັງການວິເຄາະ - ວິໄຈ ບັນຫາ, ສາເຫດ ແລະ ວິທີແກ້ໄຂບັນຫານັກຮຽນປະລະການຮຽນ, ກອງປະຊຸມໄດ້ພ້ອມກັນຄົ້ນຄວ້າວິທີລະດົມນັກຮຽນທີ່ອອກໂຮງຮຽນ ໃຫ້ເຂົ້າຮຽນໃນການສຶກສານອກໂຮງຮຽນ ນອກນັ້ນ ທີ່ປະຊຸມຍັງໄດ້ພ້ອມກັນແລກປ່ຽນຄໍາຄິດຄໍາເຫັນຢ່າງກົງໄປກົງມາ ໂດຍມີເນື້ອໃນລະອຽດດັ່ງນີ້:
​ບັນຫາປະລະການຮຽນຂອງນັກຮຽນແມ່ນເປັນສິ່ງທ້າທາຍ ເຊິ່ງສົ່ງຜົນກະທົບໂດຍກົງຕໍ່ການພັດທະນາຊັບພະ ຍາກອນມະນຸດ ແລະ ການພັດທະນາເສດຖະກິດ - ສັງຄົມໃນປະຈຸບັນ. ຈາກຜົນການວິເຄາະ - ວິໄຈ ຂອງໜ່ວຍງານການສຶກສາກ່ອນໄວຮຽນ, ສາມັນ ແລະ ວິທະຍາສາດ ເຫັນວ່າສາເຫດຫຼັກໆທີ່ກະທົບຕໍ່ການແກ້ໄຂບັນຫາປະລະການຮຽນຫຼາຍທີ່ສຸດແມ່ນມາຈາກຫຼາຍພາກສ່ວນ ເປັນຕົ້ນແມ່ນ: ສະພາບຄອບຄົວ ແລະ ນັກຮຽນ ເຊິ່ງກວມອັດຕາສ່ວນເຖິງ 45 ສ່ວນຮ້ອຍ, ພາກສ່ວນໂຮງຮຽນ ແລະ ຄູສອນ ມີອັດຕາສ່ວນກວມເຖິງ 25 ສ່ວນຮ້ອຍ, ພາກສ່ວນຕາແສງ ແລະ ບ້ານ ມີອັດຕາສ່ວນກວມເຖິງ 15 ສ່ວນຮ້ອຍ, ພາກສ່ວນຫ້ອງການສຶກສາທິການ ແລະ ກິລາເມືອງ 10 ສ່ວນຮ້ອຍ ແລະ ອີກ 5 ສ່ວນຮ້ອຍ ແມ່ນມາຈາກພາກສ່ວນພະແນກສຶກສາທິການ ແລະ ກິລາແຂວງ ໃນການວາງນະໂຍບາຍ ແລະ ສະໜັບສະໜູນ ການແກ້ໄຂບັນຫາປະລະການຮຽນ.
​ໃນ 10 ຄາດໝາຍຕົວຊີ້ບອກທີ່ທາງກະຊວງສຶກສາທິການ ແລະ ກິລາ ວາງອອກ ໃນປີ 2026 ນີ້ ຫ້ອງການສຶກສາທິການ ແລະ ກິລາເມືອງນາກາຍ ສາມາດຈັດຕັ້ງປະຕິບັດ ( ບັນລຸ ) ແລ້ວ 6 ຕົວຊີ້ບອກ ແລະ ຍັງອີກ 4 ຕົວຊີ້ບອກທີ່ຍັງບໍ່ສາມາດບັນລຸໄດ້ ເປັນຕົ້ນແມ່ນ: (1) ອັດຕາເຂົ້າຮຽນຂອງເດັກ 5 ປີ ບໍ່ບັນລຸຍ້ອນ: ການຂະຫຍາຍໂຮງຮຽນອານຸບານໄປຫາເຂດຫ່າງໄກສອກຫຼີກຍັງບໍ່ທັນທົ່ວເຖິງ (2) ອັດຕາປະລະຊັ້ນປະຖົມ ບໍ່ບັນລຸຍ້ອນ: ປັດໄຈພາຍໃນໂຮງ ຮຽນ ແລະ ປັດໄຈພາຍນອກເຊັ່ນ: ສະພາບເສດຖະກິດຄອບຄົວຂອງນັກຮຽນ (3) ອັດຕາປະລະຊັ້ນມັດທະຍົມ ບໍ່ບັນລຸ ຍ້ອນ ນັກຮຽນຈໍານວນໜຶ່ງຢາກອອກໄປຊອກວຽກເຮັດງານທໍາເພື່ອສ້າງເສດຖະກິດຄອບຄົວ, ບາງບ້ານມີຄ່ານິຍົມໃນການສ້າງຄອບຄົວແຕ່ອາຍຸຍັງນ້ອຍ (4) ຈໍານວນນັກຮຽນທີ່ຈົບອາຊີວະສຶກສາ ແລະ ອົບຮົມວິຊາຊີບຕາມຫຼັກສູດທາງການ ບໍ່ບັນລຸ ຍ້ອນນັກຮຽນທີ່ຈົບແລ້ວບໍ່ຢາກໄປຮຽນຕໍ່ພວກເຂົາຢ້ານເສຍໂອກາດໃນການສ້າງເສດຖະກິດຄອບຄົວ. ຄາດວ່າປີ 2026 ຫ້ອງການສຶກສາທິການ ແລະ ກິລາເມືອງ ຈະສູ້ຊົນໃຫ້ບັນລຸ ຕາມແຜນທີ່ທາງກະຊວງສຶກສາທິການ ແລະ ກິລາວາງອອກ.
​ໃນຕອນທ້າຍ ທ່ານຮອງຫົວໜ້າພະແນກສຶກສາ ແລະ ກິລາແຂວງຄໍາມ່ວນ ໄດ້ມີທັດສະນະຄໍາຄິດຄໍາເຫັນໂອ້ລົມໃນບາງບັນຫາເພື່ອເປັນທິດທາງໃນການແກ້ໄຂບັນຫາປະລະການຮຽນ ໂດຍທ່ານໄດ້ເນັ້ນໜັກຄື: ຄູ - ອາຈານ ຕ້ອງເພີ່ມທະວີຄວາມເປັນເຈົ້າການໃນການນໍາພາຊີ້ນໍາວຽກງານການສຶກສາຢ່າງໜັກແໜ້ນ, ຕ້ອງໄດ້ມີການປູກຈິດສໍານຶກໃນການເຊື່ອມຊຶມທາງດ້ານແນວຄິດໃນໝູ່ນ້ອງໆນັກຮຽນໃຫ້ຫຼາຍ. ທ່ານໄດ້ສະເໜີທຸກພາກສ່ວນຂອງເມືອງຕ້ອງໄດ້ເຂົ້າມາຊ່ວຍຊຸກຍູ້ລະບົບການສຶກສາເພື່ອແກ້ບັນຫາຕ່າງໆກ່ຽວກັບບັນຫາຄຸນນະພາບຂອງການຮຽນຂອງລູກຫຼານ. ໃຫ້ສືບຕໍ່ວຽກງານໂຄສະນາເຜີຍແຜ່ວຽກງານການສຶກສາໃຫ້ຫຼາຍໂດຍໃຫ້ລົງເລິກເຖິງຖອງຄອບຄົວພໍ່ແມ່ນັກຮຽນ. ຄູ - ອາຈານ ແລະ ການຈັດຕັ້ງບ້ານ ຕ້ອງໄດ້ສາມັກຄີກັນຢ່າງໜັກແໜ້ນກົມກຽວ ສັງຄົມຕ້ອງໄດ້ຊຸກຍູ້ຊ່ວຍເຫຼືອຕື່ມໃນການລະດົມນ້ອງໆນັກຮຽນໃຫ້ກັບມາສົນໃຈໃນການຮຽນໃຫ້ຫຼາຍ ພາຍໃຕ້ໂຄງການ ນໍານ້ອງຄືນສູ້ໂຮງຮຽນ ແລະ ສືບຕໍ່ຮຽນຈົນຈົບ.
​ພາບ-ຂ່າວ : ສຸກສາຄອນ ບຸນເຮືອງສັກ​020 9797 1505
​ກວດແກ້ : ຈັນໄທ ແກ້ວວິເສດ​ ​020 2217 7601

20/03/2026

ຫ້ອງການ ກາແດງເມືອງນາກາຍ ຈັດພິທີຮັບບໍລິຈາກເລືອດຢູ່ເມືອງນາກາຍ ແຂວງຄໍາມ່ວນ
ໃນຕອນເຊົ້າວັນທີ 19 ມີນາ 2026 ຢູ່ທີ່ສະໂມສອນຫ້ອງວ່າການເມືອງ ຫ້ອງການກາແດງເມືອງນາກາຍ ຈັດພິທີ ຮັບບໍລິຈາກເລືອດຂຶ້ນພາຍໃຕ້ການເປັນປະທານຂອງທ່ານ ຄໍາຫວ່າງ ກິໄລວັນ ກໍາມະການພັກເມືອງ ຮອງປະທານກໍາມະການປົກຄອງເມືອງນາກາຍ ໂດຍມີການເຂົ້າຮ່ວມຂອງອົງການກາແດງ ແຂວງຄໍາມ່ວນ ພະນັກງານຈາກຫ້ອງການອ້ອມຂ້າງເມືອງ ເຂົ້າຮ່ວມທັງໝົດ 53 ທ່ານ, ຍິງ 28 ທ່ານ; ພິທີດັ່ງກ່າວໄດ້ຮັບຟັງການໂອ້ລົມຂອງປະທານກອງປະຊຸມ ກ່ຽວກັບການປຸກລະດົມຈິດໃຈຂອງພະນັກງານໃຫ້ຮູ້ໄດ້ກ່ຽວກັບຄວາມສໍາຄັນໃນການບໍລິຈາກເລືອດ ເຊິ່ງເລືອດຂອງຄົນເຮົາມີຄວາມໝາຍຄວາມສໍາຄັນຕໍ່ຊີວິດ, ການບໍລິຈາກເລືອດແມ່ນຈັດຂຶ້ນເພື່ອຊ່ວຍເຫຼືອສັງຄົມດ້ວຍຄວາມສະໝັກໃຈຂອງຜູ້ບໍລິຈາກເລືອດ ໂດຍບໍ່ຮຽກຮ້ອງຄ່າຕອບແທນ ເພື່ອນໍາໄປຊ່ວຍເຫຼືອສັງຄົມກໍ່ຄືເພື່ອນມະນຸດທີ່ມີຄວາມຕ້ອງການເລືອດ ເພາະວ່າຄວາມຕ້ອງການເລືອດໃນປະຈຸບັນແມ່ນມີສູງເນື່ອງເກີດຈາກການເກີດອຸບັດຕິເຫດ ແລະ ພະຍາດ ນັບມື້ເພີ່ມທະວີຂຶ້ນ ພ້ອມນີ້ ທ່ານຍັງໄດ້ຮຽກ ຮ້ອງໃຫ້ຜູ້ເຂົ້າຮ່ວມບໍລິຈາກເລືອດເພື່ອຊ່ວຍເຫຼືອເພື່ອນມະນຸດດ້ວຍກັນ ການບໍລິຈາກເລືອດໃນຄັ້ງນີ້ມີຜູ້ບໍລິຈາກເລືອກທັງໝົດ 12 ທ່ານ, ຍິງ 07 ທ່ານ ນອກຈາກການບໍລິຈາກເລືອດແລ້ວຍັງໄດ້ມີການມອບເຄື່ອງບໍາລຸງຮ່າງການຄື: ເສື້ອ, ນົມ, ເຂົ້າໜົມ, ນໍ້າດື່ມ ແລະ ຢາບໍາລຸງເລືອດ ໃຫ້ແກ່ຜູ້ບໍລິຈາກເລືອດອີກດ້ວຍ.

13/03/2026

ສະຫະພັນແມ່ຍິງເມືອງນາກາຍ ແຂວງຄໍາມ່ວນ ຈັດພິທີ ສະເຫຼີມສະຫຼອງວັນແມ່ຍິງສາກົນ ຄົບຮອບ 116 ປີ
__________________________
ໃນຕອນເຊົ້າຂອງວັນທີ 12 ມີນາ 2026 ຜ່ານມານີ້ ສະຫະພັນແມ່ຍິງເມືອງນາກາຍ ແຂວງຄໍາມ່ວນ ໄດ້ຈັດພິທີສະເຫຼີມສະຫຼອງປາຖະກະຖາວັນແມ່ຍິງສາກົນ 08 ມີນາ ຄົບຮອບ 116 ປີ ( 08 ມີນາ 1910 – 08 ມີນາ 2026 ) ພາຍໃຕ້ຄໍາຂັວນ: ສິດທິ, ຄວາມຍຸດຕິທໍາ, ການລົງມືປະຕິບັດ ເພື່ອແມ່ຍິງ ແລະ ເດັກຍິງ ຢູ່ທີສະໂມສອນເມືອງນາກາຍ ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ນາງ ບົວກາ ແກ້ວມະນີ ກຳມະການພັກແຂວງ ເລຂາພັກເມືອງ ພ້ອມດ້ວຍບັນດາທ່ານການນໍາເມືອງນາກາຍ ທ່ານຫົວໜ້າ,ຄະນະຫ້ອງການ ຕະຫຼອດຮອດສະມາຊິກສະຫະພັນແມ່ຍິງເຂົ້າຮ່ວມທັງໝົດ:126 ຄົນ. ກ່ອນຈະເຂົ້າສູ້ພິທີສະເຫຼີມສະຫຼອງນັ້ນ ທີ່ປະຊຸມໄດ້ພ້ອມກັນຮັບຊົມການສະແດງບົດຟ້ອນສິລະປະວັນນະຄະດີຂອງນ້ອງໆນັກຮຽນ ຍິງ-ຊາຍ ທີ່ມາຈາກໂຮງຮຽນ ມັດທະຍົມຕອນຕົ້ນອຸດົມສຸກ ແລະ ຕອນປາຍນາກາຍ.
ໃນພິທີສະເຫຼີມສະຫຼອງວັນແມ່ຍິງສາກົນໃນປີນີ້ ຍັງໄດ້ຮັບຟັງ ການຜ່ານປະຫວັດຄວາມເປັນມາຂອງວັນທີ 8 ມີນາ ວັນແມ່ຍິງສາກົນຄົບຮອບ 116 ປີ. ຈາກ ທ່ານ ນາງ ພຸ້ມພວງ ຄຳພິລະວົງ ຮອງປະທານສະຫະພັນແມ່ຍິງເມືອງນາກາຍ
ວັນແມ່ຍິງສາກົນກໍາເນີດຂື້ນໃນທ່າມກາງສະພາບເສດຖະກິດຂອງພວກສັກດີນາ ແລະ ນາຍທຶນຂະຫຍາຍຕົວ ເມື່ອໂຮງຈັກ,ໂຮງງານອຸດສາຫະກໍາຂອງນາຍທຶນຂະຫຍາຍຕົວ ມັນສ້າງຄວາມຮັ່ງມີໃຫ້ແກ່ພວກນາຍທຶນ ແຕ່ຊໍ້າພັດຍີ່ງເພີ່ມຄວາມທຸກຍາກລໍາບາກໃຫ້ແກ່ຊາວຜູ້ອອກເເຮງງານໂດຍສະເພາະແມ່ນກໍາມະກອນທີ່ເປັນເພດຍິງ ຢູ່ພາຍໃຕ້ລະບອບສັກດີນານາຍທຶນ,ແມ່ຍິງຖືກກົດຂີ່ຂູດຮີດຢ່າງໜັກໜ່ວງເຮັດວຽກຫຼາຍຊົ່ວໂມງແຕ່ໄດ້ຮັບຄ່າຈ້າງແຮງງານດ້ວຍລາຄາຖືກ ເຮັດວຽກບໍ່ມີການຮັບປະກັນ ບໍ່ມີລະບອບປົກປັກຮັກສາ ສຸຂະພາບຂອງແມ່ຍິງ ແລະ ເດັກນ້ອຍ ນອກຈາກນັ້ນແມ່ຍິງຍັງຖືກໝິ່ນປະໜາດ ຖືເປັນຄືສິນຄ້າ,ເປັນເຄື່ອງຫຼິ້ນ,ຖືກເຕະຕີ ຖືກຂົ່ມຂືນທໍາຊໍາເລົາ ແລະ ຖືກໄລ່ອອກຈາກວຽກ ໃນເວລາຖືພາ,ເວລາເກີດລູກ ຫຼື ເວລາເຈັບເປັນບໍ່ໄດ້ຮັບການປິ່ນປົວ ໂດຍທົ່ວໄປແລ້ວ ແມ່ຍິງຊາວຜູ້ອອກແຮງງານໃນທົ່ວໂລກ ລ້ວນແລ້ວແຕ່ເປັນຜູ້ດຸໝັ້ນຂະຫຍັນພຽນໃນການຜະລິດເຂົ້າປາອາຫານ ແລະ ອື່ນໆ ເພື່ອລ້ຽງດູຄອບຄົວ ແລະ ສັງຄົມ, ແຕ່ບໍ່ໄດ້ຮັບການເອົາໃຈໃສ່ ເບີ່ງແຍງດູແລ ຈາກສັງຄົມ ຕໍ່ໜ້າສະພາບການ ແລະ ຄວາມທຸກທໍລະມານດັ່ງກ່າວ ກໍາມະກອນແມ່ຍິງຮູ້ສຶກຄຽດແຄ້ນ:ຈື່ງໄດ້ສາມາຄີກັນລຸກຂື້ນຕໍ່ສູ້ ທວງໃຫ້ພວກນາຍທຶນຊຶ່ງແມ່ນເຈົ້າຂອງໂຮງຈັກ,ໂຮງງານຕ້ອງແກ້ໄຂຊີວິດການເປັນຢູ່ໃຫ້ເຂົາເຈົ້າ ຈົນມາເຖິງປີ 1910 ຂະບວນການຕໍ່ສູ້ຂອງແມ່ຍິງໄດ້ແຜ່ຂະຫຍາຍກວ້າງອອກໄປສູ້ປະເທດນາຍທຶນ ຢູ່ທະວີບເອີຣົບ ແລະ ໃນປີນັ້ນເອງ ກອງປະຊຸມສາກົນກ່ຽວກັບບັນຫາແມ່ຍິງຄັ້ງທໍາອິດໄດ້ຈັດຂື້ນຢູ່ ໂກເປນຮາກ ນະຄອນຫຼວງຂອງປະເທດເດນມາກ ມີຜູ້ແທນ 100 ກ່ວາຄົນຈາກ 17 ປະເທດເຂົ້າຮ່ວມ ກອງປະຊຸມດັ່ງກ່າວໄດ້ຮັບຮອງ ແລະ ຕົກລົງເອົາ ວັນ 08 ມີນາ ຂອງທຸກໆປີ ເປັນອັນພື້ນຖານຂອງຂະບວນການແມ່ຍິງສາກົນໃນການຕໍ່ສູ້ທວງເອົາສິດຜົນປະໂຫຍດອັນຊອບທໍາຂອງແມ່ຍິງຊາວຜູ້ອອກແຮງໃນທົ່ວໂລກ ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕ ຄືກັນກັບເພດຊາຍ.
​ໃນຕອນທ້າຍ ທ່ານ ນາງ ບົວກາ ແກ້ວມະນີ ກຳມະການພັກແຂວງ ເລຂາພັກເມືອງ ໃນນາມປະທານກອງປະຊຸມ ໄດ້ມີທັດສະນະຄໍາຄິດຄໍາເຫັນໂອ້ລົມຕໍ່ເອື້ອຍນ້ອງແມ່ຍິງທີ່ເຂົ້າຮ່ວມສະເຫຼີມສະຫຼອງວັນແມ່ຍິງສາກົນ ໂດຍທ່ານໄດ້ເນັ້ນໜັກເຖິງເອື້ອຍນ້ອງແມ່ຍິງຍົກສູງບົດບາດ ປົກປ້ອງຮັກສາກຽດສັກສີຂອງແມ່ຍິງ ພ້ອມກັນສ້າງເສດຖະກິດຄອບຄົວ ເອົາໃຈໃສ່ເບິ່ງແຍງຄອບຄົວ ຊຸກຍູ້ສົ່ງເສີມລູກເຕົ້າໃຫ້ໄດ້ເຂົ້າຮຽນຕາມເກນອາຍຸ ນອກຈາກການເຂົ້າຮ່ວມຮັບຟັງການເລົ່າປະຫວັດຄວາມເປັນມາຂອງວັນແມ່ຍິງສາກົນແລ້ວ ໃນການສະເຫຼີມສະຫຼອງຍັງໄດ້ມີກິດຈະກຳການແຂ່ງຂັນກິລາປະ ເພດຕ່າງໆ ໂດຍສະເພາະເປຕັງ ແລະ ກິລາບານເຕະຍິງ ເພື່ອເປັນການສ້າງສັນຄວາມສາມັກຄີຮັກແພງໃນໝູ່ເອື້ອຍນ້ອງແມ່ຍິງ
ພາບ-ຂ່າວ: ໃໜ່ສະກຸນ ວໍລະລຸນ 99222616
ກວດ-ແກ້: ຈັນໄທ ແກ້ວວິເສດ 22177601

10/03/2026

ຄະນະໂຄສະນາອົບຮົມເມືອງນາກາຍ ແຂວງຄໍາມ່ວນ ຈັດພິທີອົບຮົມມະຫາຊົນຜູ້ທີ່ມີຄວາມກ້າວໜ້າເພື່ອ
ຂະຫຍາຍເຂົ້າເປັນສະມາຊິກພັກ ໃນຊຸດທີ I ງວດທີ 01 ປະຈໍາປີ 2026.
___________________________

ໃນຕອນບ່າຍຂອງວັນທີ 06 ມີນາ 2026 ຜ່ານມານີ້ ຢູ່ທີ່ສະໂມສອນເມືອງນາກາຍ ໄດ້ມີພິທີເປີດອົບຮົມມະຫາຊົນຜູ້ມີຄວາມກ້າວໜ້າທີ່ຈະຂະຫຍາຍເຂົ້າເປັນສະມາຊິກ ພັກປະຊາຊົນປະຕິວັດລາວ ຊຸດທີ I ງວດທີ 01 ປີ 2026 ປະຈໍາເມືອງນາກາຍ ໂດຍການໃຫ້ກຽດເປັນປະທານຂອງ ສະຫາຍ ບົວແຊງ ແກ່ນຊະນີ ຄະນະປະຈໍາພັກເມືອງ ປະທານກວດກາພັກ - ລັດ ເມືອງນາກາຍ
ພິທີອົບຮົມເທື່ອນີ້ມີມະຫາຊົນຜູ້ທີ່ມີຄວາມກ້າວໜ້າທີ່ມາຈາກ 05 ຄະນະພັກຮາກຖານ, 07 ໜ່ວຍພັກອ້ອມຂ້າງເມືອງ ແລະ 07 ໜ່ວຍພັກບ້ານ ເຂດຕາແສງນາກາຍ ເຊິ່ງມີມະຫາຊົນເຂົ້າອົບຮົມທັງໝົດ 41 ສະຫາຍ, ຍິງ 17 ສະຫາຍ. ໃນພິທີດັ່ງກ່າວໄດ້ນໍາເອົາ 01 ເນື້ອໃນເອກະສານທີ່ສໍາຄັນມາເຜີຍແຜ່ເຊື່ອມຊືມເປັນຕົ້ນເອກະສານ: ອົບຮົມມະຫາຊົນຜູ້ທີ່ມີຄວາມກ້າວໜ້າເພື່ອກະກຽມຂະຫຍາຍເຂົ້າເປັນສະມາຊິກ ພັກປະຊາຊົນປະຕິວັດລາວ ຕາມຫຼັກສູດຂອງຄະນະໂຄສະນາອົບຮົມສູນກາງພັກ ໃນ13 ຄໍາຖາມ - ຄໍາຕອບ ສະບັບເລກທີ 16/ຄອສພ. ລົງວັນທີ 07/07/2021.
ໃນພິທີ ສະຫາຍ ບົວແຊງ ແກ່ນຊະນີ ຄະນະປະຈໍາພັກເມືອງ ປະທານກວດກາພັກ - ລັດ ເມືອງນາກາຍ, ໄດ້ໃຫ້ກຽດຂຶ້ນມອບໃບຢັ້ງຢືນໃຫ້ແກ່ມະຫາຊົນຜູ້ທີ່ເຂົ້າຮ່ວມອົບຮົມໃນເທື່ອນີ້, ພ້ອມທັງມີຄໍາເຫັນໃຫ້ທິດຊີ້ນຳ ແລະ ເນັ້ນໜັກບາງບັນຫາໃຫ້ມະຫາຊົນຜູ້ທີ່ເຂົ້າຮ່ວມອົບຮົມເພື່ອໃຫ້ເຂົາເຈົ້ານໍາໄປເປັນທິດທາງໃນການຝຶກຝົນຫຼໍ່ຫຼອມຕົນເອງເພື່ອໃຫ້ມີຜົນງານດີເດັ່ນ, ໄດ້ຮັບຄວາມເຊື່ອຖື, ໄວ້ວາງໃຈຈາກການຈັດຕັ້ງພັກ ແລະ ມະຫາຊົນຈົນກາຍເປັນບຸກຄົນທີ່ດີເດັ່ນ ເພື່ອກະກຽມຂະຫຍາຍເຂົ້າເປັນສະມາຊິກພັກປະຊາຊົນປະຕິວັດລາວຕາມລະບຽບຫຼັກການຂອງພັກວາງອອກໃນແຕ່ລະໄລຍະ.
ພາບ-ຂ່າວ : ສຸກສາຄອນ ບຸນເຮືອງສັກ ​97971505
ກວດແກ້ : ຈັນໄທ ແກ້ວວິເສດ ​​22177601

06/03/2026

ຫ້ອງການກາແດງເມືອງນາກາຍ ແຂວງຄໍາມ່ວນ ເປີດກອງປະຊຸມປຶກສາຫາລືວຽກງານປຸກລະດົມການບໍລິຈາກ
​ເລືອດ-ສົ່ງເລືອດຂັ້ນເມືອງປະຈໍາປີ 2026
​__________________________________
​ຕອນບ່າຍ ວັນທີ 5 ມີນາ 2026 ຜ່ານມານີ້ ຫ້ອງການກາແດງ ເມືອງນາກາຍ ໄດ້ເປີດກອງປະຊຸມປຶກສາຫາລືວຽກງານບໍລິຈາກເລືອດຂັ້ນເມືອງ ຂື້ນ ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ຄໍາຫ່ວາງ ກິໄລວັນ ກຳມະການພັກເມືອງ ຮອງປະທານຄະນະກຳມະການປົກຄອງເມືອງ ຜູ້ຊີ້ນໍາຂົງເຂດວຽກງານວັດທະນະທໍາ-ສັງຄົມ ພ້ອມດ້ວຍທ່ານ ຫົວໜ້າຫ້ອງການກາແດງເມືອງ, ບັນດາທ່ານທີ່ຕາງໜ້າໃຫ້ແກ່ຫ້ອງການທີ່ກ່ຽວຂ້ອງຂອງເມືອງເຂົ້າຮ່ວມຢ່າງພ້ອມພຽງ.
​ເມືອງນາກາຍ ໄດ້ຮັບການແບ່ງປັນຕົວເລກການຮັບບໍລິຈາກເລືອດ ຈາກອົງການກາແດງແຂວງຄໍາມ່ວນ ເປັນຈໍານວນ 150 ຖົງ ໃນປີ 2026 ເພື່ອໃຫ້ບັນລຸຕາມເປົ້າໝາຍທີ່ທາງອົງການກາແດງມອບໝາຍໃຫ້ນັ້ນ ຫ້ອງການກາແດງເມືອງນາກາຍໄດ້ພ້ອມກັນປຶກສາຫາລືກັບພາກສ່ວນທີ່ກ່ຽວຂ້ອງຂອງເມືອງ ໂດຍໄດ້ມອບໃຫ້ຄະນະກໍາມະການປຸກລະດົມຂົນຂວາຍເລືອດຂັ້ນເມືອງ ມີການວາງແຜນການເຄື່ອນໄຫວລົງໂຄສະນາປຸກລະດົມໃນແຕ່ລະຈຸດ ຈາກນັ້ນໃຫ້ປະສານຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດ ຂັ້ນແຂວງ ເພື່ອພ້ອມກັນເຄື່ອນໄຫວຮັບບໍລິຈາກເລືອດຕາມຈຸດທີ່ກຳນົດໄວ້ໃນທົ່ວເມືອງ.
​ໃນຕອນທ້າຍ ທ່ານປະທານກອງປະຊຸມ ໄດ້ມີທັດສະນາເນັ້ນໜັກເຖິງຄະນະກຳມະການຮັບຜິດຊອບ ຕ້ອງໄດ້ເອົາໃຈໃສ່ຈັດຕັ້ງປະຕິບັດຢ່າງຕັ້ງໜ້າ ການປຸກລະດົມຂົນຂວາຍແມ່ນໃຫ້ທົ່ວເຖິງເປົ້າໝາຍ ໃນທົ່ວເມືອງ ເພື່ອເຮັດໃຫ້ການແບ່ງຄວາມຮັບຜິດຊອບຈໍານວນເລືອດຈາກອົງການກາແດງແຂວງ ແບ່ງປັນໃຫ້ ໃຫ້ບັນລຸຕາມເປົ້າໝາຍທີ່ວາງໄວ້. ນອກນັ້ນ ຕ້ອງໄດ້ເອົາໃຈໃສ່ຕິດຕາມເປັນກໍລະນີພິເສດ ຕໍ່ຜູ້ທີ່ມີຄວາມສະມັກໃຈແບ່ງປັນເລືອດ ( ເອົາເລືອດອອກ ) ໂດຍລວມໄປເຖິງການນະໂຍບາຍຕ່າງໆທີ່ເຫັນວ່າມີຄວາມເໝາະສົມ.
​ພາບ-ຂ່າວ : ​ໃໝ່ສະກຸນ ວໍລະລຸນ 99222616
​ກວດແກ້​ : ​ຈັນໄທ ແກ້ວວິເສດ 22177601

05/03/2026

ຫ້ອງການກະສິກຳ ແລະ ສິ່ງແວດລ້ອມເມືອງນາກາຍ ແຂວງຄໍາມ່ວນ ຈັດກອງປະຊຸມເຜີຍແຜ່ນິຕິກຳກ່ຽວກັບ
ການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປ່າໄມ້
________________________________
ວັນທີ 4 ມີນາ 2026 ຜ່ານມານີ້ ຫ້ອງການກະສິກຳ ແລະ ສິ່ງແວດລ້ອມ ເມືອງນາກາຍ ໄດ້ຈັດກອງປະຊຸມເຜີຍແຜ່ນິຕິກຳກ່ຽວກັບການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນ ການບຸກລຸກທໍາລາຍປ່າໄມ້, ທີ່ດິນປ່າໄມ້ ແລະ ໄຟໃໝ່ລາມປ່າ ປະຈໍາປີ 2026 ຂື້ນຢູ່ທີ່ສະໂມສອນຂອງເມືອງ ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ຕຽງຄໍາ ມູນໂນລາດ ຄະນະປະຈໍາພັກເມືອງ ຮອງປະທານຄະນະກຳມະການປົກຄອງເມືອງ ທັງເປັນຜູ້ຊີ້ນໍາຂົງເຂດວຽກງານເສດຖະກິດຂອງເມືອງ, ທ່ານ ສີລາ ຈັນທະລາວົງ ຮອງພະແນກກະສິກຳ ແລະ ສິ່ງແວດລ້ອມ ແຂວງຄໍາມ່ວນ ພ້ອມບັນດາທ່ານການນໍາຂອງເມືອງ, ບັນດາທ່ານທີ່ຕາງໜ້າຈາກຂະແໜງການທີ່ກ່ຽວຂ້ອງຂອງແຂວງ, ສະມາຊິກພັກ, ພະນັກງານ-ລັດຖະກອນ ອ້ອມຂ້າງເມືອງ ຕະຫຼອດຮອດອໍານາດການປົກຄອງບ້ານໃນ 16 ຄຸ້ມບ້ານ ເຂດຕາແສງນາກາຍ ເຂົ້າຮ່ວມຢ່າງພ້ອມພຽງ.
ທ່ານ ບຸນຖົມ ວັນນະລາດ ຫົວໜ້າຫ້ອງການກະສິກຳ ແລະ ສິ່ງແວດລ້ອມເມືອງນາກາຍ ໄດ້ລາຍງານກ່ຽວກັບການຈັດຕັ້ງ ແລະ ເຄື່ອນໄຫວປະຕິບັດ ຄໍາສັ່ງເລກທີ 11/ນຍ, ລົງວັນທີ 21 ກໍລະກົດ 2023 ຕິດພັນກັບຄໍາສັ່ງເລກທີ 15/ນຍ ແລະ ໄຟຟ້າໃໝ່ລາມປ່າໃນໄລຍະຜ່ານມາ, ທ່ານ ສີລາ ຈັນທະລາວົງ ຮອງພະແນກກະສິກຳ ແລະ ສິ່ງແວດລ້ອມແຂວງຄໍາມ່ວນ ໃຫ້ກຽດເຜີຍແຜ່ຄໍາສັ່ງເລກທີ 11/ນຍ ແລະ ຄໍາສັ່ງເລກທີ 15/ນຍ.
ທີ່ປະຊຸມຍັງໄດ້ຮັບຟັງການຜ່ານຂໍ້ຕົກລົງ ສະບັບເລກທີ 365/ນຍ ລົງວັນທີ 21 ສິງຫາ 2024 ຈາກຂະແໜງກວດກາຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ຮັບຟັງເນື້ອໃນແຈ້ງການສະບັບເລກທີ 258/ກສຂ ຈາກຂະແໜງຄຸ້ມຄອງປ່າສະຫງວນ ແລະ ປ່າປ້ອງກັນຂອງແຂວງ. ຈາກນັ້ນ ທີ່ປະຊຸມໄດ້ມີການສົນທະນາແລກປ່ຽນຖອດຖອນບົດຮຽນເຊິ່ງກັນ ແລະ ກັນ.
ໃນຕອນທ້າຍ ທ່ານ ສີລາ ຈັນທະລາວົງ ຮອງພະແນກ ກະສິກຳ ແລະ ສິ່ງແວດລ້ອມແຂວງຄໍາມ່ວນ ໄດ້ມອບງົບປະມານ ຈໍານວນ 20,000,000 ກີບ ເພື່ອໃຫ້ຫ້ອງການກະສິກຳ ແລະ ສິ່ງແວດລ້ອມເມືອງນາກາຍ ນໍາໄປໝູນໃຊ້ເຂົ້າໃນການເຄື່ອນໄຫວເຜີຍແຜ່ບັນດານິຕິກຳທີ່ກ່ຽວຂ້ອງ ກັບການປົກປັກຮັກສາປ່າໄມ້ ແລະ ການສະກັດກັ້ນໄຟໃໝ່ລາມປ່າ ໃຫ້ທົ່ວເຖິງ ແລະ ເລິກເຊິ່ງ ໃນທົ່ວເມືອງນາກາຍ.
ພາບ-ຂ່າວ : ໃໝ່ສະກຸນ ວໍລະລຸນ​99222616
ກວດແກ້ : ຈັນໄທ ແກ້ວວິເສດ​22177601

04/03/2026

ໂຮງຮຽນມັດທະຍົມສົມບູນນາກາຍ ຈັດກິດຈະກໍາຖາມ-ຕອບ ຄວາມຮູ້ທາງດ້ານວິທະຍາສາດ.
---------------------------------------------------------------
ວັນທີ 3 ມີນາ 2026 ຜ່ານມານີ້ ທີ່ໂຮງຮຽນມັດທະຍົມ ສົມບູນນາກາຍ ໄດ້ຈັດກິດຈະກຳ ຖາມ-ຕອບ ຄວາມຮູ້ທາງດ້ານວິທະຍາສາດເພື່ອເຮັດໃຫ້ຂະບວນການຮຽນດຳເນີນໄປຕາມ 3 ລັກສະນະ 5 ຫຼັກມູນ ຂອງການສຶກສາເມືອງນາກາຍ. ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ລໍາພອນ ພົນສຸລິ ກຳມະການພັກເມືອງ ຫົວໜ້າຫ້ອງວ່າການເມືອງນາກາຍ, ທ່ານ ຮອງອຳນວຍການ ໂຮງຮຽນ ມັດທະຍົມສົມບູນນາກາຍ. ພ້ອມດ້ວຍບັນດາທ່ານທີ່ຕາງໜ້າຫ້ອງການອ້ອມຂ້າງເມືອງ, ຄູ-ອາຈານ ຕະຫຼອດຮອດນ້ອງໆນັກຮຽນເຂົ້າຮ່ວມທັງໝົດ 281 ຄົນ, ຍິງ 124 ຄົນ.
ການຈັດກິດຈະກຳ ຖາມ-ຕອບ ຄວາມຮູ້ທາງດ້ານວິທະຍາສາດໃນເທື່ອນີ້ມີນ້ອງໆນັກຮຽນແຕ່ຊັ້ນມໍ1 ຫາ ມໍ7. ເຂົ້າຮ່ວມຢ່າງເປັນຂະບວນຟົດຟື້ນ ທັງນີ້ກໍ່ເປັນການ ຖາມ-ຕອບ ແຂ່ງຂັນການສອນດີຂອງຄູ - ອາຈານ ແລະ ການເກັ່ງຂອງນ້ອງໆນັກຮຽນໃນແຕ່ລະຊັ້ນຮຽນ ພ້ອມເປັນການສົ່ງທັກສະ ຄວາມຮູ້-ຄວາມສາມາດໃຫ້ແກ່ນ້ອງໆນັກຮຽນອີກດ້ວຍ.
ໃນຕອນທ້າຍຂອງກິດຈະກໍາ ທ່ານຫົວໜ້າຫ້ອງວ່າການເມືອງນາກາຍໃນນາມຜູ້ເຂົ້າຮ່ວມເປັນປະທານ ໂດຍທ່ານໄດ້ມີທັດສະນະເນັ້ນໜັກເຖິງການຮຽນ-ການສອນ ຂອງຄູ-ອາຈານ ແລະ ນ້ອງໆນັກຮຽນໃຫ້ພ້ອມກັນເອົາໃຈໃສ່ຄົ້ນ
ຄ້ວາຍາດແຍ່ງ ທາງດ້ານ ຄວາມຮູ້ຄວາມສາມາດ ໃຫ້ຫຼາຍ ໂດຍໃຫ້ປະຕິບັດຕາມຫຼັກສູດ ການຮຽນ-ການສອນ ທີ່ທາງກະຊວງສຶກສາທິການ ແລະ ກິລາວາງອອກເພື່ອໃຫ້ໄດ້ຮັບຜົນດີເທົ່າທີ່ຄວນ.
ພາບ-ຂ່າວ: ບຸ້ຍ 98720988
ກວດ-ແກ້: ຈັນໄທ 22177601

04/03/2026

04/03/2026

#ຍັງແຈກຄືເກົ່າເດີ້ເສື້ອງາມກະເປົາງາມໆຕິດຕາມ
#ລາຍການຄວາມປອດໄພທາງນຳໄດ້ທຸກໆວັນພຸດເວລາ14-15ໂມງມື້ນີ້ກະແຈກເດີ້ຍໍ້ຳ2.ໂທເບີໜ້າໄມ0305647492.

09/12/2025

09/12/2025