23/04/2025
ສົມເດັດ ພະກະນິດຖາທິຣາດເຈົ້າ ກົມສົມເດັດພະເທບ ພະຣັດຣາດສຸດາ ສະຫຍາມບໍຣົມມະຣາດຊະກຸມາຣີແຫ່ງ ຣາຊະອານາຈັກໄທ ຢ້ຽມຢາມໂຮງຮຽນວັດທະນະທໍາປ້ອງກັນຄວາມສະຫງົບລາວ
*************************
ຕອນບ່າຍວັນທີ 23 ເມສາ 2025 ນີ້, ສົມເດັດ ພະກະນິດຖາທິຣາດເຈົ້າ ກົມສົມເດັດພະເທບ ພະຣັດຣາດສຸດາ ສະຫຍາມບໍຣົມມະຣາດຊະກຸມາຣີ ແຫ່ງ ຣາຊະອານາຈັກໄທ ໄດ້ເຄື່ອນຢ້ຽມຢາມໂຮງຮຽນວັດທະນະທໍາປ້ອງກັນຄວາມສະຫງົບ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ເຂົ້າຮ່ວມພິທີເປີດນໍາໃຊ້ອາຄານຫຼັງໃໝ່, ໃນໂອກາດເດີນທາງມາຢ້ຽມຢາມ ສປປ ລາວ ໃນລະຫວ່າງວັນທີ 21-24 ເມສາ 2025, ໃຫ້ກຽດຕ້ອນຮັບໂດຍ ພົນໂທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປລາວ, ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ ພ້ອມດ້ວຍຄະນະ, ມີອໍານວຍການ, ຄູ-ອາຈານ ນັກຮຽນໂຮງຮຽນວັດທະນະທໍາປ້ອງກັນຄວາມສະຫງົບ ແລະ ພາກສ່ວນທີ່ກ່ຽວຂ້ອງໃຫ້ການຕ້ອນຮັບຢ່າງສົມກຽດ.
ໂອກາດນີ້, ພົນໂທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປລາວ ຕາງໜ້າ ຄູ-ອາຈານ ແລະ ນັກຮຽນ ໄດ້ລາຍງານໂດຍຫຍໍ້ກ່ຽວກັບການເຄື່ອນໄຫວຕ່າງໆ ແລະ ແຜນການພັດທະນາຂອງໂຮງຮຽນວັດທະນະທໍາປ້ອງກັນຄວາມສະຫງົບ ພາຍໃຕ້ການສະໜັບສະໜູນຊ່ວຍເຫຼືອໃນໂຄງການພະຣາດຊະດໍາຣິ ຂອງສົມເດັດ ພະກະນິດຖາທິຣາດເຈົ້າ ກົມສົມເດັດພະເທບພະຣັດຣາດສຸດາ ສະຫຍາມບໍຣົມມະຣາດຊະກຸມາຣີ ໃຫ້ຮູ້ວ່າ: ໃນຕະຫຼອດໄລຍະ 33 ປີຜ່ານມາ; ນັບແຕ່ປີ 1992 ເຖິງ ປັດຈຸບັນ, ໂຮງຮຽນແຫ່ງນີ້ ໄດ້ຮັບທຶນການສະໜັບສະໜູນຊ່ວຍເຫຼືອພາຍໃຕ້ໂຄງການພະຣາດຊະດໍາຣິ ຂອງ ກົມສົມເດັດພະເທບ; ນັບແຕ່ມື້ນັ້ນຈົນມາເຖິງປັດຈຸບັນ ໂຮງຮຽນແຫ່ງນີ້ ໄດ້ມີການພັດທະນາ ແລະ ມີໃບໜ້າອັນໃໝ່ໃນຫຼາຍໆດ້ານ ເປັນຕົ້ນແມ່ນ: ມີຫໍພັກສິຣິນທອນ 4 ຫຼັງ, ອາຄານຮຽນສີຣິນທອນ 1 ຫຼັງ, ເຮືອນຄົວນັກຮຽນ 1 ຫຼັງ, ອາຄານຮຽນຄອມພິວເຕີ 2 ຫຼັງ ຄື: ເຮືອນຮຽນຮູ້ສິຣິນທອນ, ເຮືອນຮຽນຮູ້ເລີດມິດ, ອາຄານທົດລອງ ດ້ານວິທະຍາສາດ ແລະ ອຸປະກອນທົດລອງ ຄົບຊຸດ ມີຊື່ວ່າ: ອາຄານໝັ້ນມິດ, ຕິດຕັ້ງເຄືອຄ່າຍສັນຍານອິນເຕີເນັດ, ວາຍຟາຍ, ມີໜອງປາ 8 ໜອງ ແລະ ອື່ນໆ.
ໃນໂອກາດທີ່ ກົມສົມເດັດພະເທບ ສະເດັດຢ້ຽມຢາມທາງການ ສປປ ລາວ ໃນປີ 2024 ຜ່ານມາ ກໍໄດ້ສະເດັດ ຢ້ຽມຢາມໂຮງຮຽນແຫ່ງນີ້ ແລະ ກົມສົມເດັດພະເທບ ຍັງໄດ້ໃຫ້ການສະໜັບສະໜູນຊ່ວຍເຫຼືອສ້າງຫ້ອງການຄູ 1 ຫຼັງ, ຫໍພັກຍິງ 1 ຫຼັງ ແລະ ມອບອຸປະກອນຮັບໃຊ້ການຮຽນ-ການສອນ (ເຄື່ອງສາຍໂປຼເຈັກເຕີ້ ຈໍານວນ 10 ເຄື່ອງ) ລວມມູນຄ່າ: 2,735,300 ບາດ; ທັງສອງອາຄານນີ້ ແມ່ນໄດ້ເລີ່ມລົງມືກໍ່ສ້າງນັບຕັ້ງແຕ່ທ້າຍເດືອນມີນາ ເຖິງ ທ້າຍເດືອນຕຸລາ 2024 ແມ່ນສໍາເລັດ ລວມມູນຄ່າການກໍ່ສ້າງທັງໝົດ 2,231,000 ບາດ; ນອກຈາກນັ້ນ, ຍັງໄດ້ຮັບການຊ່ວຍເຫຼືອໃນການສ້ອມແປງໂຮງງານນໍ້າດື່ມ ໃນປີ 2024 ລວມມູນຄ່າການສ້ອມແປງແມ່ນ 230,000 ບາດ; ພິເສດ, ໂຮງຮຽນຍັງໄດ້ຮັບທຶນການສຶກສາລະດັບ ປະລິນຍາຕີ ເພື່ອໄປສຶກສາຕໍ່ ຢູ່ທີ່ ຣາຊະອານາຈັກໄທ ຈຳນວນ 8 ທຶນ ມີ: ສາຂາ ໄອທີ 5 ທຶນ ແລະ ນິຕິວິທະຍາສາດ 3 ທຶນ.
ສະນັ້ນ, ເພື່ອຕອບສະໜອງຕໍ່ວຽກງານການຮຽນ-ການສອນ ໃນໄລຍະໃໝ່ ກໍຄືການບຳລຸງກໍ່ສ້າງນັກຮຽນໃຫ້ມີຄຸນນະພາບ ແລະ ມີຄວາມຮູ້ຄວາມສາມາດທຽບເທົ່າກັບສາກົນ ໂຮງຮຽນວັດທະນະທໍາປ້ອງກັນຄວາມສະຫງົບ ໄດ້ວາງ ທິດທາງແຜນການໃນຕໍ່ໜ້າເປັນຕົ້ນ: ການບໍລິຫານຈັດການ, ການຮຽນ-ການສອນ, ວຽກງານໂພຊະນາການ ແລະ ວຽກງານກາຍຍະກໍາ ແລະ ສິລະປະວັນນະຄະດີ, ເພື່ອປັບປຸງພື້ນຖານໂຄງລ່າງ ແລະ ສິ່ງອໍານວຍຄວາມສະດວກໃນດ້ານຕ່າງໆ ເປັນຕົ້ນແມ່ນ: ການກໍ່ສ້າງອາຄານຮຽນ ແລະ ອຸປະກອນການຮຽນ-ການສອນໃຫ້ມີຄວາມທັນສະໄໝ, ສ້າງ ແລະ ປັບປຸງເສັ້ນທາງແຕ່ເສັ້ນທາງເລກທີ 13 ເໜືອ ຫາ ໂຮງຮຽນ, ກໍ່ສ້າງກຳແພງ, ສ້ອມແປງ ແລະ ບຳລຸງຮັກສາໂຮງງານ ນໍ້າດື່ມໃຫ້ນໍາໃຊ້ໄດ້ຢ່າງຕໍ່ເນື່ອງ, ຕິດຕັ້ງກ້ອງວົງຈອນປິດ ແລະ ອື່ນໆ.
ເນື່ອງໃນໂອກາດທີ່ມີຄວາມໝາຍຄວາມສໍາຄັນນີ້, ພົນໂທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບລາວ ຕາງໜ້າຄູ-ອານຈານ ແລະ ນັກຮຽນ ໄດ້ສະແດງຄວາມຂອບໃຈເປັນຢ່າງສູງ ແລະ ຮູ້ບຸນຄຸນ ມາຍັງ ສົມເດັດ ພະກະນິດຖາທິຣາດເຈົ້າ ກົມສົມເດັດພະເທບພະຣັດຣາດສຸດາ ສະຫຍາມບໍຣົມມະຣາດຊະກຸມາຣີ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ໂຮງຮຽນວັດທະນະທໍາປ້ອງກັນຄວາມສະຫງົບ ໃນຕະຫຼອດໄລຍະຜ່ານມາ ທັງໝົດເຫຼົ່ານີ້ລ້ວນແຕ່ໄດ້ປະກອບສ່ວນອັນສໍາຄັນເຂົ້າໃນການສົ່ງເສີມ, ບຳລຸງກໍ ສ້າງຊັບພະຍາກອນມະນຸດ ຂອງ ສປປ ລາວ ໃຫ້ນັບມື້ເຂັ້ມແຂງ ເຮັດໃຫ້ໂຮງຮຽນແຫ່ງນີ້ ມີໃບໜ້າອັນໃໝ່ຍິ່ງໃຫຍ່ກວ່າເກົ່າ ແລະ ໄດ້ຮັບຜົນສໍາເລັດໃນທຸກໆດ້ານເປັນກ້າວໆມາ ແລະ ຫວັງຢ່າງຍິ່ງວ່າ ໂຄງການອັນເນື່ອງມາຈາກ ພະຣາດຊະດໍາຣິ ຂອງ ກົມສົມເດັດພະເທບ ຈະສືບຕໍ່ໃຫ້ການຊ່ວຍເຫຼືອ ແລະ ສະໜັບສະໜູນໃນໂອກາດຕໍ່ໆໄປ; ພ້ອມດຽວກັນນີ້, ກໍຫວັງຢ່າງຍິ່ງວ່າ ຈະໄດ້ມີໂອກາດຕ້ອນຮັບການສະເດັດຢ້ຽມຢາມ ຂອງ ກົມສົມ ເດັດພະເທບ ໃນໂອກາດໜ້າຕື່ມອີກ.
ເນື່ອງໃນໂອກາດປີໃໝ່ລາວ ຫຼື ບຸນສົງການໄທ ທີ່ຫາກໍສິ້ນສຸດບໍ່ດົນນີ້ ແລະ ຍັງເປັນເດືອນສິລິມຸງຄຸນແຫ່ງວັນ ຄ້າຍວັນພະຣາຊະສົມພົບ ຂອງ ກົມສົມເດັດພະເທບ ຄົບຮອບ 70 ປີ, ຂ້າພະເຈົ້າ ພ້ອມດ້ວຍ ຄູ-ອາຈານ, ນັກຮຽນ ໂຮງຮຽນວັດທະນະທໍາປ້ອງກັນຄວາມສະຫງົບ ຂໍອວຍພອນໄຊຍະມຸງຄຸນອັນປະເສີດແດ່ ສົມເດັດ ພະກະນິດຖາ ທິຣາດເຈົ້າ ກົມສົມເດັດພະເທບພະຣັດຣາດສຸດາ ສະຫຍາມບໍຣົມມະຣາດຊະກຸມາຣີ ຈົ່ງມີພະວໍລະກາຍແຂງແຮງ, ມີພະກະເສມສໍາລານຍິ່ງຍືນນານ ແລະ ສືບຕໍ່ເປັນຮົ່ມໂພຮົ່ມໄຊໃຫ້ແກ່ການເສີມສ້າງສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີ ກໍຄືການຮັດແໜ້ນສາຍພົວພັນໃນລະດັບການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ລະຫວ່າງ ສອງປະເທດ ກໍ່ຄື ປະຊາຊົນສອງຊາດ ລາວ ແລະ ໄທ ໄປຊົ່ວກາລະນານ.
ຈາກນັ້ນ, ກໍໄດ້ຮ່ວມ ພິທີຕັດແຖບຖ້າເປີດນໍາໃຊ້ອາຄານຫໍປະຊຸມຫຼັງໃໝ່ຂອງໂຮງຮຽນວັດທະນະທໍາປ້ອງກັນຄວາມສະຫງົບຢ່າງເປັນທາງການ.
