Lao news

17/11/2025

🇱🇦🇯🇵ຍິນດີຕ້ອນຮັບ ສົມເດັດ ເຈົ້າຍິງ ໄອໂກະ ແຫ່ງປະເທດຍີ່ປຸ່ນ ສະເດັດມາຢ້ຽມຢາມ ສປປ ລາວ

ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ພ້ອມດ້ວຍຄະນະ ໄດ້ເດີນທາງມາເຖິງສະໜາມບິນ ສາກົນວັດໄຕ, ນະຄອນຫລວງວຽງຈັນ, ສປປ ລາວ ໃນຕອນຄໍ່າຂອງວັນທີ 17 ພະຈິກ 2025 ໂດຍມີ ທ່ານ ນາງ ຟອງ ສະໝຸດ ອັ່ນລາວັນ ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ຂອງ ສປປ ລາວ ແລະ ພາກສ່ວນກ່ຽວ ຂ້ອງ ໃຫ້ການຕ້ອນຮັບຢ່າງອົບອຸ່ນ.

ການສະເດັດມາຢ້ຽມຢາມ ສປປ ລາວ ໃນຄັ້ງນີ້, ເພື່ອຕອບສະໜອງຕາມການເຊື້ອເຊີນຂອງ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໂດຍ ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ຈະດໍາເນີນ ການຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 17-21 ພະຈິກ 2025, ເຊິ່ງເປັນການຢ້ຽມຢາມ ຕ່າງປະເທດຢ່າງເປັນທາງການຄັ້ງທຳອິດຂອງ ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ.

ການສະເດັດມາຢ້ຽມຢາມ ສປປ ລາວ ຂອງ ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ໃນຄັ້ງນີ້ ມີຂຶ້ນ ໃນທ່າມກາງບັນຍາກາດທີ່ສອງປະເທດ ສປປ ລາວ ແລະ ຍີ່ປຸ່ນ ພວມສະເຫລີມສະຫລອງການສ້າງຕັ້ງສາຍພົວ ພັນທາງການທູດນໍາກັນ ຄົບຮອບ 70 ແລະ ຄົບຮອບ 60 ປີ ທີ່ລັດຖະບານຍີ່ປຸ່ນ ໄດ້ສົ່ງອາສາສະໝັກຍີ່ປຸ່ນ ມາປະຕິບັດໜ້າທີ່ຢູ່ ສປປ ລາວ ເລີ່ມແຕ່ປີ 1965 ເປັນຕົ້ນມາ.

ການເຄື່ອນໄຫວສຳຄັນຂອງ ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ຄັ້ງນີ້ ນອກຈາກການພົບປະ ກັບການນຳສູງສຸດທຸກຂັ້ນຂອງ ສປປ ລາວ ແລ້ວ, ຍັງມີແຜນຢ້ຽມຊົມສະຖານທີ່ທາງດ້ານວັດທະນະທຳສຳຄັນ ຢູ່ ນະຄອນຫລວງວຽງຈັນ ແລະ ແຂວງຫລວງພະບາງ ອີກດ້ວຍ.

ຂ່າວ: ຂປລ

12/11/2025

ກຳລັງ ປກຊ-ປກສ ປະສານຄວາມພ້ອມ ຮອບທີ 3 ສວນສະໜາມສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ .....................................................
ວັນທີ 12 ພະຈິກ 2025 ນີ້, ຢູ່ທີ່ສະໜາມຫຼວງ ໄດ້ມີພິທີ ສະແດງທົດລອງ ການສວນສະໜາມສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ ປະສານກ້ອນກຳລັງ ປກຊ-ປກສ ຄັ້ງທີ 3, ໂດຍມີສະຫາຍ ບຸນທອງ ຈິດມະນີ ຮອງປະທານປະເທດ, ຜູ້ປະຈໍາການຄະນະເລຂາທິການສູນກາງພັກ, ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ຜູ້ຊີ້ນໍາວຽກງານ ປກຊ-ປກສ ຂັ້ນສູນກາງ, ສະຫາຍ ພົນໂທ ຄຳລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ, ສະຫາຍ ພົນໂທ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະຫງົບ,ມີບັນດາຄະນະນຳກະຊວງ, ບັນດາຄະນະນຳກົມໃຫຍ່, ຫ້ອງວ່າການ ປກຊ-ປກສ, ບັນດາຄະນະນຳລວມ,ບັນດາອານຸກໍາມະການຮັບປະກັນ,ກ້ອນກໍາລັງສວນສະໜາມ ກຳລັງປກຊ-ປກສ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ເພື່ອຮັບປະກັນໃຫ້ແກ່ການຈັດຕັ້ງປະຕິບັດໜ້າວຽກ ການກະກຽມດ້ານເນື້ອໃນ, ກໍາລັງພົນເຂົ້າຮ່ວມ, ເຄື່ອງອຸປະກອນການປະກອບ, ວິທີການ, ວາລະດໍາເນີນການຈັດຕັ້ງ ງານໂຮມຊຸມນຸມ ແລະ ການຈັດຕັ້ງຫັດແອບສວນສະໜາມ ສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ ໃຫ້ເປັນເອກະພາບ, ມີເນື້ອໃນ, ມີຄວາມໝາຍເລິກເຊິ່ງ ແລະ ສົມກຽດ. ກົມໃຫຍ່ເສນາທິການກອງທັບ ໃນນາມຄະນະຊີ້ນໍາກ້ອນສວນສະໜາມ ໄດ້ປະສານສົມທົບກັບບັນດາອົງການກະຊວງ, ກະຊວງປ້ອງກັນຄວາມສະຫງົບ, ກົມກອງກຳລັງຫຼວງ ແລະ ກຳລັງທ້ອງຖິ່ນ ສ້າງແຜນການ ຈັດຕັ້ງສະແດງທົດລອງ ການສວນສະໜາມສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີ ປະສານກ້ອນກຳລັງ ປກຊ-ປກສ ຄັ້ງທີ 3 ເພື່ອລະນຶກເຖິງວັນສໍາຄັນທາງປະຫວັດສາດຂອງຊາດ, ເອກອ້າງຜົນງານໃນການສ້າງສາ ແລະ ພັດທະນາປະເທດຊາດ ຕະຫຼອດໄລຍະ 50 ປີ ຕໍ່ແຂກພາຍໃນ ແລະ ຕ່າງປະເທດ ພ້ອມທັງ ຖືເອົາໂອກາດນີ້ ເຕົ້າໂຮມຄວາມສາມັກຄີປອງດອງຊາດ, ຂອງປະຊາຊົນລາວບັນດາເຜົ່າໃນທົ່ວປະເທດ ໂດຍພາຍໃຕ້ການນຳພາ ຂອງພັກປະຊາຊົນ ປະຕິວັດລາວ ໃຫ້ເປັນປຶກແຜ່ນ, ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດຊີ້ນໍາ ຂອງພັກວາງອອກ ໃຫ້ບັນລຸຕາມຈຸດປະສົງຄາດໝາຍ.

ຫຼັງຈາກສໍາເລັດການສະແດງ, ບັນດາການນຳ ໄດ້ສະແດງຄວາມຊົມເຊີຍ ເຖິງຄວາມອົດທົນພະຍາຍາມຂອງທຸກສະຫາຍ ທີ່ພະຍາຍາມປັບປຸງບ່ອນທີ່ຍັງຄົງຄ້າງ, ພ້ອມທັງເນັ້ນໜັກ ໃຫ້ບັນດາຄະນະຮັບຜິດຊອບແຕ່ລະກ້ອນກໍາລັງ ສືບຕໍ່ເອົາໃຈໃສ່ຫຼາຍຢ່າງ ໂດຍສະເພາະ ແມ່ນຈັງວະທ່າທີຕ່າງໆ, ໄລຍະຫາງແຕ່ລະກ້ອນ, ລະດັບການຍົກແຂນຂາ ຕ້ອງສູງຕໍ່າສະເໝີກັນ, ສຽງເສບກັບສຽງພາກ ຕ້ອງໃຫ້ເຂົ້າກັນ, ກໍານົດຈຸດແຕ່ລະໜ້າວຽກ ໃຫ້ລະອຽດຊັດເຈນ ເພື່ອໃຫ້ມີຄວາມເປັນເອກະພາບ ແລະ ງົດງາມ ພ້ອມທັງຮັບປະກັນບໍໃຫ້ມີຄວາມຜິດພາດ, ສາມາດສະແດງອອກມາໄດ້ສົມບູນທີ່ສຸດ ໃນມື້ສະເຫຼີມສະຫຼອງແທ້.

10/11/2025

05/11/2025

ປະກາດການແຕ່ງຕັ້ງໜ້າທີ່ ແລະ ຍົກຍ້າຍນາຍທະຫານຂັ້ນສູງ ຢູ່ກະຊວງປ້ອງກັນປະເທດ
.......................................................
ພິທີປະກາດການແຕ່ງຕັ້ງໜ້າທີ່ ແລະ ຍົກຍ້າຍນາຍທະຫານຂັ້ນສູງ ຢູ່ກະຊວງປ້ອງກັນປະເທດ ໄດ້ຈັດຂຶ້ນວັນທີ 5 ພະຈິກ 2025 ນີ້, ໂດຍການເປັນປະທານຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ, ມີຄະນະນຳກະຊວງ, ຄະນະນຳ 4 ກົມໃຫຍ່, ຫ້ອງວ່າການກະຊວງ, ນາຍທະຫານທີ່ໄດ້ຮັບໜ້າທີ່ໃໝ່ ແລະ ພະນັກງານຫຼັກແຫຼ່ງອ້ອມຂ້າງກະຊວງປ້ອງກັນປະເທດເຂົ້າຮ່ວມ.

ສະຫາຍ ພົນຈັດຕະວາ ແສງມະນີວອນ ຄຳມະນີ ຮອງຫົວໜ້າກົມໃຫຍ່ການເມືອງກອງທັບ ໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງໜ້າທີ່ນາຍທະຫານ ຢູ່ກະຊວງປ້ອງກັນປະເທດ. ນາຍົກລັດຖະມົນຕີ ອອກດຳລັດ: ແຕ່ງຕັ້ງ ສະຫາຍ ພົນຕີ ໄພວັນ ຈັນທະພົມມາ ເປັນຫົວໜ້າຫ້ອງວ່າການກະຊວງປ້ອງກັນປະເທດ, ສະຫາຍ ພົນຈັດຕະວາ ວົງຈັນ ພັນຈັນທະມານ ເປັນຮອງຫົວໜ້າກົມໃຫຍ່ການເມືອງກອງທັບ ແລະ ສະຫາຍ ພົນຈັດຕະວາ ບົວວັນ ອາດຖະໜາໄຊ ເປັນຫົວໜ້າຫ້ອງການຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບສູນກາງ ແລະ ຜ່ານຄຳສັ່ງຍົກຍ້າຍ ນາຍທະຫານໄປຮັບໜ້າທີ່ໃໝ່. ນາຍົກລັດຖະມົນຕີ ອອກຄຳສັ່ງ: ຍົກຍ້າຍ ສະຫາຍ ພົນຈັດຕະວາ ຄຳຜິວ ມະນີວົງ ຫົວໜ້າຫ້ອງການຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບສູນກາງ ໄປຮັບໜ້າທີ່ ໃໝ່ຢູ່ ກອງພົນທີ 2 ແລະ ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການແຕ່ງຕັ້ງ: ສະຫາຍ ພັນໂທ ວັນໄຊ ເນຕິບັນດິດ ເປັນຮອງຫົວໜ້າກົມເສດຖະກິດ ຫ້ອງວ່າການກະຊວງປ້ອງກັນປະເທດ, ຈາກນັ້ນໄດ້ຜ່ານມະຕິຂອງຄະນະພັກກະຊວງປ້ອງກັນປະເທດ ວ່າດ້ວຍການແຕ່ງຕັ້ງປ່ຽນແທນ ກຳມະການຄະນະບໍລິຫານງານພັກ, ກຳມະການຄະນະປະຈຳພັກກະຊວງປ້ອງກັນປະເທດ. ຄະນະພັກກະຊວງປ້ອງກັນປະເທດ ຕົກລົງ: ແຕ່ງຕັ້ງ ສະຫາຍ ພົນຕີ ໄພວັນ ຈັນທະພົມມາ ຫົວໜ້າຫ້ອງວ່າການກະຊວງປ້ອງກັນປະເທດ ເປັນກຳມະການຄະນະບໍລິຫານງານພັກ, ກຳມະການຄະນະປະຈຳພັກ ທັງເປັນເລຂາຄະນະບໍລິຫານງານພັກ ຫ້ອງວ່າການກະຊວງປ້ອງກັນປະເທດ ປ່ຽນແທນ ສະຫາຍ ພົນຕີ ສົມພອນ ມິດຕະພອນ ທີ່ຍົກຍ້າຍໄປຮັບໜ້າທີ່ໃໝ່, ສະຫາຍ ພົນຈັດຕະວາ ວົງຈັນ ພັນຈັນທະມານ ຮອງຫົວໜ້າກົມໃຫຍ່ການເມືອງກອງທັບ ເປັນກຳມະການຄະນະບໍລິຫານງານພັກ, ກຳມະການຄະນະປະຈຳພັກ ທັງເປັນປະທານຄະນະກວດກາພັກ ປ່ຽນແທນ ສະຫາຍ ພົນຕີ ໄພວັນ ຈັນທະພົມມາ ທີ່ຍົກຍ້າຍໄປຮັບໜ້າທີ່ໃໝ່ ແລະ ສະຫາຍ ພົນຈັດຕະວາ ບົວວັນ ອາດຖະໜາໄຊ ຫົວໜ້າຫ້ອງການຄະນະກຳມະການ ປກຊ-ປກສ ສູນກາງ ເປັນກຳມະການຄະນະບໍລິຫານງານພັກ ທັງເປັນເລຂາຄະນະພັກຮາກຖານ ຫ້ອງການຄະນະກຳມະການ ປກຊ-ປກສ ສູນກາງ ປ່ຽນແທນ ສະຫາຍ ພົນຈັດຕະວາ ຄຳຜິວ ມະນີວົງ ທີ່ຍົກຍ້າຍໄປຮັບໜ້າທີ່ໃໝ່.

ໃນພິທີ ສະຫາຍ ພົນໂທ ຄຳລຽງ ອຸທະໄກສອນ ໄດ້ຮຽກຮ້ອງໃຫ້ບັນດາສະຫາຍທີ່ໄດ້ຮັບໜ້າທີ່ໃໝ່ ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນກວ່າເກົ່າ, ເພີ່ມທະວີບົດບາດການນຳພາ-ຊີ້ນຳ, ຮັດແໜ້ນຄວາມສາມັກຄີເປັນປຶກແຜນແໜ້ນໜາ ພາຍໃນໝູ່ຄະນະ, ປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ ພ້ອມກັນເຮັດສຳເລັດໜ້າທີ່ ທີ່ພັກ-ລັດມອບໝາຍໃຫ້.

05/11/2025

ພຸໄຟ ດອກໄມ້ໄຟ ບູຊາພະທາດຫຼວງວຽງຈັນ ໃນຄ່ຳຄືນວັນທີ 5 ພະຈິກ 2025

27/10/2025

ນ້ຳຕາແຫ່ງຄວາມປິຕິຍິນດີສຳລັບ ປະເທດ ຕີມໍ-ເລສເຕ ໃນທີ່ກອງປະຊຸມສຸດຍອດອາຊຽນ ຄັ້ງທີ 47 ທີ່ນະຄອນ ຫຼວງກົວລາລຳເປີ ປະເທດມາເລເຊຍ ປະຫວັດສາດໄດ້ຖືກສ້າງຂຶ້ນອີກຄັ້ງໜຶ່ງ ເມື່ອປະເທດ ຕີມໍ-ເລສເຕ ໄດ້ເຂົ້າຮ່ວມຢ່າງເປັນທາງການ ກັບສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ) ໃນຖານະເປັນປະເທດສະມາຊິກທີ 11.
ນີ້ໝາຍເຖິງການຂະຫຍາຍຕົວຄັ້ງທຳອິດ ຂອງອາຊຽນໃນຮອບ 26 ປີ, ນັບຕັ້ງແຕ່ການເຂົ້າຮ່ວມຂອງກຳປູເຈຍໃນປີ 1999 ໃນທີ່ສຸດກໍເຮັດໃຫ້ກຸ່ມພາກພື້ນ ມີຄວາມສາມັກຄີທາງພູມສາດ ທົ່ວອາຊີຕາເວັນອອກສຽງໃຕ້.
ພວກເຮົາປະຊາຊົນພົນລະເມືອງປະຊາຊາດອາຊຽນ ຂໍສະແດງຄວາມຍິນດີຕ້ອນຮັບ ແລະ ສຸດແສນຍິນດີ ທີ່ໄດ້ເພື່ອນມິດຄະນາຍາດເຂົ້າມາຮ່ວມໃນຄວາມມັກສະໝານ ສາມັກຄີກ້າວໄປສູ່ຄວາມສີວິໄລໄປນຳກັນ.

🇹🇱| Tears of Joy for Timor-Leste. At the 47th ASEAN Summit in Kuala Lumpur, Malaysia, history was made as Timor-Leste officially joined the Association of Southeast Asian Nations (ASEAN) as its 11th member state.

This marks ASEAN’s first expansion in 26 years, since Cambodia’s admission in 1999 finally completing the regional bloc’s geographical unity across Southeast Asia.
Sunday, October 26, 2025
Kuala Lumpur Convention Centre, Malaysia

ຂໍຂອບໃຈຂ່າວຈາກ : ASEAN Skyline Rising.

24/10/2025

ມະຕິຕົກລົງ ປັງປຸງສີສັນຂອງ ເຄື່ອງໝາຍຊາດ

16/10/2025

🇱🇦🤝🏻🇹🇭ຍິນດີຕ້ອນຮັບ ທ່ານ ອານຸທິນ ຊານວີຣະກູນ ນາຍົກລັດຖະມົນຕີ ແຫ່ງຣາຊະອານາຈັກໄທ ພ້ອມດ້ວຍພັນລະຍາ ແລະ ຄະນະ ເດີນທາງເຖິງນະຄອນຫຼວງວຽງຈັນ ເປັນທີ່ຮຽບຮ້ອຍແລ້ວ.

ໃນຕອນເຊົ້າຂອງວັນທີ 16 ຕຸລາ 2025, ພະນະທ່ານ ອະນຸທິນ ຊານວີຣະກຸນ, ນາຍົກລັດຖະມົນຕີ ແຫ່ງ ຣາຊະອານາຈັກໄທ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງເຖິງສະໜາມບິນສາກົນວັດໄຕ, ນະຄອນຫຼວງວຽງຈັນ ເພື່ອດໍາເນີນການຢ້ຽມຢາມ ສປປ ລາວ ຢ່າງເປັນທາງການ, ເຊິ່ງພິທີຕ້ອນຮັບທີ່ສະໜາມບິນ ໄດ້ຈັດຂຶ້ນຢ່າງອົບອຸ່ນ ແລະ ສົມກຽດ ໂດຍມີ ທ່ານ ເຫຼັກໄຫຼ ສີວິໄລ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ທັງເປັນລັດຖະມົນຕີກຽດຕິຍົດ ພ້ອມດ້ວຍຄະນະ ທັງຝ່າຍລາວ ແລະ ຝ່າຍໄທ ໃຫ້ການຕ້ອນຮັບ.

ການຢ້ຽມຢາມ ສປປ ລາວ ຢ່າງເປັນທາງການຄັ້ງນີ້ ແມ່ນຕອບສະໜອງຕາມການເຊື້ອເຊີນຂອງ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ເສີມຂະຫຍາຍການພົວພັນຮ່ວມມື ຖານບ້ານໃກ້ເຮືອນຄຽງທີ່ດີທີ່ມີມາແຕ່ດົນນານ ກໍຄືການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ ລະຫວ່າງ ສອງຊາດ ລາວ ແລະ ໄທ ໃຫ້ພັດທະນາ ແລະ ຂະຫຍາຍຕົວຍິ່ງໆຂຶ້ນ.

ພາບຈາກ: MediaLAOS
#ນາຍົກລັດຖະມົນຕີແຫ່ງປະເທດໄທ #ຣາຊະອານາຈັກໄທ

15/10/2025

ອອກມາແລ້ວ! ລະບຽບບຸນທາດຫລວງປີນີ້
---
🌠 ອີງຕາມແຈ້ງການສະບັບເລກທີ 593/ຈນວ, ລົງວັນທີ 9 ຕຸລາ​ 2025​ ຂອງເຈົ້າຄອງນະຄອນຫຼວງວຽງຈັນ​ ກ່ຽວກົດລະບຽບ​ ວ່າດ້ວຍການຄຸ້ມຄອງ ງານບຸນນະມັດສະການພຣະທາດຫຼວງ ວາງສະແດງສິນຄ້າ ພສ 2568, ວັນທີ 1-5 ພະຈິກ ປະຈໍາປີ 2025:

1. ຫ້າມຂາຍ ແລະ ນໍາເອົາສິ່ງເສບຕິດ, ດື່ມສິ່ງມຶນເມົາ, ຫຼິ້ນການພະນັນ ແລະ ອາລະວາດຕີກັນ, ອາວຸດ, ມີດ, ງ້າວ, ໜ້າ, ກະຖຸນ, ສາຍແອວຫົວໃຫຍ່ ແລະ ສະນັບມື, ສິ່ງຂອງລອກຮຽນແບບ, ສິນຄ້າລາມົກ ອະນາຈານ ແລະ ສິນຄ້າທີ່ຜິດກົດໝາຍ ເຂົ້າມາໃນງານ ແລະ ວາງຂາຍພາຍໃນງານບຸນ ຢ່າງເດັດຂາດ;

2. ຫ້າມໂຄສະນາ ຂາຍສິນຄ້າເກີນຄວາມເປັນຈິງ, ບໍ່ອະນຸຍາດນຸ່ງເຄື່ອງລາມົກອະນາຈານ ເຂົ້າໃນໃນງານບຸນ.​

3. ຫ້າມເທສິນຄ້າຂາຍຊະຊາຍລົງພື້ນ, ປູຂາຍລົງພື້ນຢູ່ຕໍ່ບູດຂອງຕົນ, ວາງສິນຄ້າອອກມານອກຮ້ານ ແລະ ຊື້ຂາຍສິນຄ້າເປັນເງິນຕາຕ່າງປະເທດ ເດັດຂາດ;

4. ຫ້າມບຸກຄົນ, ນິຕິບຸກຄົນ, ວັດ, ສຳນັກງານ, ອົງການປົກຄອງບ້ານ ວາງສິ່ງກີດຂວາງການຈັດສັນ ສະຖານທີ່ວາງສະແດງ-ຂາຍສິນຄ້າ ຂອງຄະນະກຳມະການຈັດງານບຸນ;

5. ສໍາລັບນັກສະແດງສິລະປະຜູ້ໃນງານແຕ່ລະຈຸດ ຕ້ອງແຕ່ງກາຍ ແລະ ນຸ່ງເຄື່ອງສຸພາບຮຽບຮ້ອຍ ໃຫ້ຖືກຕ້ອງຕາມຮີດຄອງປະເພນີອັນດີງາມ ຂອງລາວ;

6. ຫ້າມຫົ່ມຜ້າອ້ອມອົງພຣະທາດຫຼວງ ເດັດຂາດ;

7. ຫ້າມເຮັດກິດຈະກຳທາງສາສະໜາ ຫຼື ກິດຈະກຳໃດໜຶ່ງ ທີ່ບໍ່ສອດຄ່ອງກັບຮີດຄອງປະເພນີ ທີ່ ເຄີຍປະຕິບັດມາ ຢູ່ບໍລິເວນເດີ່ນພຣະທາດຫຼວງ ແລະ ໃນກົມມະລຽນພຣະທາດຫຼວງເດັດຂາດ;

8. ຫ້າມເພດຍິງນຸ່ງໂສ້ງ, ກະໂປ່ງ ຫຼື ສະເກິດ (ຕ້ອງນຸ່ງສິ້ນທຸກຄັ້ງທີ່ເຂົ້າໃນກົມມະລຽນພຣະທາດຫຼວງ); ສໍາລັບເພດຊາຍ ຫ້າມນຸ່ງໂສ້ງຂາສັ້ນເກີນເທິງຫົວເຂົ້າ, ຫ້າມນຸ່ງສິ້ນ (ຕ້ອງນຸ່ງໂສ້ງຂາຍາວ ຫຼື ຜ້າສະໂຫຼ້ງ);

9. ຫ້າມໄຕ້ທຽນໃສ່ຕີນພຣະທາດຫຼວງ, ຕາມລະບຽງກົມມະລຽນ ຫຼື ສິ່ງກໍ່ສ້າງອື່ນໆ (ໄຕ້ໄດ້ ສະເພາະຮາງເຫຼັກທີ່ຈັດສັນໄວ້);

10. ຂະບວນການແຫ່ຜາສາດເຜິ້ງ ຕ້ອງໄດ້ລົງທະບຽນນໍາອົງການແນວລາວສ້າງຊາດນະຄອນຫຼວງ ຈຶ່ງມີສິດແຫ່ເຂົ້າໄປພາຍໃນກົມມະລຽນພຣະທາດຫຼວງໄດ້; ຮູບແບບຜະສາດເຜິ້ງຖືກຕ້ອງຕາມປະເພນີ ແລະ ຫ້າມນໍາເອົາສິ່ງປະດິດທີ່ບໍ່ແມ່ນຜະສາດເຜິ້ງເຂົ້າມາໃນງານບຸນ ເດັດຂາດ;

11. ຫ້າມພຣະສົງ, ແມ່ຊີ-ແມ່ຂາວ-ພໍ່ຂາວ ນໍາເອົາຝ້າຍມັດແຂນເຄື່ອງສັກກາລະບູຊາອື່ນ ມາວາງເຮັດກິດຈະກຳທາງພິທີທາງສາສະໜາ ຢູ່ອ້ອມຮອບຂອບເຂດຮົ້ວ, ດ້ານໜ້າທາງເຂົ້າກົມມະລຽນ ເດັດຂາດ.

12. ຫ້າມສວຍໂອກາດຂຶ້ນລາຄາຄ່າເຊົ່າຫ້ອງ, ຄ່າບໍລິການຕາມລໍາພັງໃຈ, ການເປັນນາຍໜ້າຈັບຈ່ອງ ຫ້ອງຂາຍສິນຄ້າ ແລະ ບໍລິການ ເພື່ອເກງກຳໄລ ເດັດຂາດ;

13. ຫ້າມນໍາເອົາເຄື່ອງສຽງ ຂະໜາດໃຫຍ່ ທີ່ມີຄວາມດັງເກີນ 85 ດີຊີເບວ ເຂົ້າມານໍາໃຊ້ ໂດຍບໍ່ມີໃບອະນຸຍາດ, ຖ້າພົບເຫັນຈະຖືກປັບໃໝ ເຄື່ອງລະ 10.000.000 ກີບ;

14. ກິດຈະກຳທາງດ້ານວັດທະນະທຳ-ການທ່ອງທ່ຽວ ເຊັ່ນ: ຂາຍອາຫານ-ເຄື່ອງດື່ມ ທີ່ມີດົນຕີ, ເຄື່ອງສຽງຢູ່ຂອບເຂດບໍລິເວນງານບຸນ ຕ້ອງໄດ້ມາຂໍອະນຸຍາດ ນໍາພະແນກວັດທະນະທຳ ແລະ ການທ່ອງທ່ຽວ (ອະນຸກຳມະການຄຸ້ມຄອງວັດທະນະທຳ);

15. ຫ້າມບໍ່ໃຫ້ນໍາເອົາຄົນຕ່າງປະເທດ ມາໂຄສະນາສິນຄ້າ ຢູ່ບັນດາຮ້ານຄ້າ, ບູດວາງສະແດງສິນຄ້າ ແລະ ເວທີ ອື່ນໆ. ຍົກເວັ້ນ ບັນດານະຄອນປະເທດເພື່ອນມິດ ທີ່ຖືກເຊີນເຂົ້າຮ່ວມ;

16. ບັນດາຮ້ານຄ້າຂາຍ, ຈຳໜ່າຍ ແລະ ໂຄສະນາສິນຄ້າ ທຸກປະເພດ ໃນຂອບເຂດບໍລິເວນງານບຸນພຣະທາດຫຼວງ ຫ້າມແຈກແຜນພັບ, ໂຄສະນາສິນຄ້າ ແລະ ສ້າງສິ່ງເສດເຫຼືອ-ຂີ້ເຫຍື້ອ ຊະຊາຍ;

17. ຫ້າມເປີດຮ້ານ, ບູດວາງສະແດງສິນຄ້າ ໃນຂອບເຂດເດີ່ນສະໜາມຫຼວງ, ພຣະທາດຫຼວງ​ ບໍລິເວນອ້ອມຮອບ ກາຍເວລາ 23:00 ໂມງ ເດັດຂາດ.

- ບຸກຄົນ, ນິຕິບຸກຄົນ ຫຼື ພາກສ່ວນໃດໜຶ່ງທີ່ຝ່າຝືນກົດລະບຽບສະບັບນີ້ ແລະ ຂໍ້ກຳນົດຕ່າງໆທີ່ໄດ້ວາງອອກ ຈະໄດ້ຖືກກ່າວເຕືອນສຶກສາອົບຮົມ (ກໍລະນີສະຖານເບົາ), ປັບໃໝ ແລະ ປະຕິບັດວິໄນຕາມ ສະຖານໜັກ ຫຼື ເບົາ ຂອງຄວາມຜິດ ແລະ ຕາມລະບຽບກົດໝາຍ ຂອງລັດ, ໃນກໍລະນີມີການລະເມີດກົດ ລະບຽບ, ຂໍ້ກຳນົດຮ້າຍແຮງ​ ແມ່ນຈະບໍ່ມີການກ່າວເຕືອນ ເຈົ້າໜ້າທີ່ ສາມາດເຂົ້າຈັດຕັ້ງປະຕິບັດໄດ້ເລີຍ;

- ທຸກຄົນຕ້ອງເປັນເຈົ້າການເຮັດວຽກງານປ້ອງກັນຄວາມສະຫງົບສຸກ, ນັບຖືກົດລະບຽບສະບັບນີ້ ຢ່າງເຂັ້ມງວດ ຖ້າຜູ້ໃດລະເມີດຂໍ້ຫ້າມໃດໜຶ່ງແມ່ນຈະຖືກປັບໃໝແຕ່ 500.000 ກີບ ຫາ 10.000.000 ກີບ ແລ້ວແຕ່ກໍລະນີໜັກ-ເບົາ ຫຼື ກັກຕົວສືບສວນ ຕາມສະຖານຄວາມຜິດ;

- ຖ້າພົບເຫັນບຸກຄົນ, ນິຕິບຸກຄົນ ລະເມີດຕໍ່ລະກົດລະບຽບດັ່ງກ່າວນີ້ ຂໍໃຫ້ແຈ້ງຕໍ່ຄະນະຮັບຜິດຊອບງານບຸນ ຫຼືເຈົ້າໜ້າທີ່ ທີ່ກ່ຽວຂ້ອງຢູ່ພາຍໃນງານບຸນ ແລະ ຜາມກຳມະການ;

- ຕໍ່ຜູ້ມີຜົນງານຈະໄດ້ຮັບການຍ້ອງຍໍຊົມເຊີຍຈາກຄະນະກຳມະການຈັດງານຢ່າງສົມກຽດ.

14/10/2025

ເພີ່ມທະວີການຮ່ວມມືຮອບດ້ານ ລະຫວ່າງ ກອງທັບ ລາວ-ຫວຽດນາມ
...................

​ວັນທີ 14 ຕຸລາ 2025 ນີ້, ສະຫາຍ ພົນເອກ ຟານ ວັນ ຢາງ ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ເຊິ່ງພິທີຕ້ອນຮັບຢ່າງເປັນທາງການ ໄດ້ຈັດຂຶ້ນໃນຕອນບ່າຍ ຂອງວັນທີ 14 ຕຸລາ 2025 ຢູ່ ກະຊວງປ້ອງກັນປະເທດ ໂດຍການຕ້ອນຮັບ ຂອງສະຫາຍ ພົນໂທ ຄໍາລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍຄະນະ.

ພາຍຫຼັງສໍາເລັດພິທີຕ້ອນຮັບຢ່າງເປັນທາງການ, ສອງຝ່າຍ ໄດ້ພົບປະແລກປ່ຽນຕີລາຄາຄືນ ສະພາບວຽກງານດ້ານຕ່າງໆ ທີ່ໄດ້ຮ່ວມມືກັນຈັດຕັ້ງປະຕິບັດໃນໄລຍະຜ່ານມາ ບົນພື້ນຖານທີ່ມີມູນເຊື້ອສາຍພົວພັນແບບພິເສດລະຫວ່າງ ສອງຊາດ ກໍຄືສອງກອງທັບ ລາວ-ຫວຽດນາມ, ຫວຽດນາມ-ລາວ ເຖິງວ່າສະພາບການຜັນແປຂອງໂລກ ຈະພົບຄວາມຫຍຸ້ງຍາກສັບສົນແນວໃດກໍຕາມ ໃນໄລຍະຜ່ານມາ ສອງກອງທັບ ລາວ-ຫວຽດນາມ ຍາມໃດກໍມີການເພີ່ມທະວີການຮ່ວມມືເຊິ່ງກັນ ແລະ ກັນຢ່າງແໜ້ນແຟ້ນ ໂດຍສະເພາະວຽກງານຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ຫວຽດນາມ, ຫວຽດນາມ-ລາວ, ການໄປມາ-ຫາສູ່ ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ປະຊາຊົນສອງຊາດ ນັບມື້ແໜ້ນແຟ້ນຍິ່ງໆ ຂຶ້ນ, ສອງຝ່າຍ ຍັງໄດ້ຕີລາຄາແລກປ່ຽນບົດຮຽນ ເຊິ່ງກັນ ແລະ ກັນ ຕໍ່ສະພາບການພັດທະນາ ຂອງສອງປະເທດ ແລະ ສອງຝ່າຍໄດ້ຮ່ວມກັນປຶກສາຫາລື ເພີ່ມທະວີການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນ, ການແລກປ່ຽນຄະນະຜູ້ແທນ ຂອງທັງສອງຝ່າຍ ແລະ ການພົວພັນຮ່ວມມືທາງດ້ານການພັດທະນາເສດຖະກິດ ລະຫວ່າງ ກອງທັບປະຊາຊົນລາວ ແລະ ກອງທັບປະຊາຊົນ ຫວຽດນາມ, ສ້າງໃຫ້ສະພາບໃນຂອບເຂດເສັ້ນຊາຍແດນມີຄວາມສະຫງົບສຸກໂດຍພື້ນຖານ, ສືບຕໍ່ແລກປ່ຽນຢ້ຽມຢາມ, ສິລະປະວັດ-ທະນະທຳ ແລະ ກິລາ, ສົມທົບແລກປ່ຽນຂໍ້ມູນຂ່າວສານ ແລະ ສະກັດກັ້ນກຸ່ມຄົນບໍ່ຫວັງດີ ທີ່ມ້າງເພທຳລາຍສາຍພົວພັນອັນດີງາມ ລະຫວ່າງ ສອງຊາດ ລາວ-ຫວຽດນາມ, ຮ່ວມກັນແກ້ໄຂບັນຫາການລັກລອບເຂົ້າເມືອງຜິດກົດໝາຍ, ອາດຊະຍາກຳຂ້າມຊາດ, ການຄ້າມະນຸດ, ການຄ້າຂາຍເຖື່ອນ ແລະ ການກໍ່ອາດຊະຍາກຳຕ່າງໆ ທີ່ຜິດກົດໝາຍ.

ຈາກນັ້ນ, ສອງຝ່າຍ ໄດ້ເຊັນບົດບັນທຶກຊ່ວຍຈໍາ ລະຫວ່າງກະຊວງປ້ອງກັນປະເທດ ລາວ-ຫວຽດນາມ ກ່ຽວກັບການເພີ່ມທະວີຮ່ວມມືການກໍ່ສ້າງ, ເຝິກອົບຮົບ, ບໍາລຸງ ແຫຼ່ງຊັບພະຍາກອນ. ໂອກາດດຽວກັນ, ກະຊວງປ້ອງກັນປະເທດ ແຫ່ງ ສສ ຫວຽດນາມ ໄດ້ມອບເຄື່ອງຊ່ວຍເຫຼືອກະຊວງປ້ອງກັນປະເທດ ແຫ່ງ ສປປ ລາວ ເພື່ອນຳໃຊ້ເຂົ້າໃນພິທີສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 50 ປີທີ່ໃກ້ຈະເຖິງນີ້.

ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ສະຫາຍ ພົນເອກ ຟານ ວັນ ຢາງ ພ້ອມດ້ວຍຄະນະ ຈະໄດ້ເຂົ້າຮ່ວມຮັບຊົມການເຝິກຊ້ອມກອບກູ້ໄພພິບັດຮ່ວມ 3 ກອງທັບ (ກຳປູເຈຍ-ລາວ-ຫວຽດນາມ) ທີ່ ວິທະຍາຄານພະລາທິການກອງທັບ (ນ້ຳຫຸມ), ເຂົ້າຮ່ວມພົບປະລະຫວ່າງ 3 ລັດຖະມົນຕີກະຊວງປ້ອງກັນປະເທດ ກຳປູເຈຍ-ລາວ-ຫວຽດນາມ ແລະ ເຂົ້າວາງພວງມາລາຢູ່ອະນຸສາວະລີນັກຮົບນິລະນາມ (ດາວແດງ) ເພື່ອລະລຶກເຖິງຄຸນງາມຄວາມດີ ຂອງນັກຮົບປະວັດທີ່ເສຍສະຫຼະຊີວິດໃນປາງສົງຄາມ ຕື່ມອີກ.

ໂດຍ ນາງ ວິໄລພອນ

08/10/2025

ສະຫາຍ ທອງລຸນ ສີສຸລິດ ເລຂາທິການໃຫຍ່ ສປປ ລາວ ພົບປະກັບ ສະຫາຍ ກິມ ເຈິງ ອຸນ ເລຂາທິການໃຫ່ຍພັກແຮງງານເກົາຫຼີ

ໂດຍຕອບສະໜອງຕາມການເຊື້ອເຊີນຂອງ ສະຫາຍ ກິມ ເຈິງ ອຸນ, ເລຂາທິການໃຫ່ຍພັກແຮງງານເກົາຫຼີ, ປະທານກິດຈະການແຫ່ງລັດ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ, ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ນໍາພາຄະນະຜູ້ແທນຂັ້ນສູງ ຂອງ ພັກ ແລະ ລັດ ແຫ່ງ ສປປ ລາວ ເດີນທາງໄປຢ້ຽມຢາມລັດຖະກິດ ຢູ່ ສປປ ເກົາຫຼີ ໃນລະຫວ່າງວັນທີ 7-8 ຕຸລາ 2025 ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ເເລະ ສປປ ເກົາຫຼີ ໃຫ້ນັບມື້ນັບແໜ້ນເເຟ້ນ ແລະ ຂະຫຍາຍຕົວຍິ່ງໆຂື້ນ.

ການຢ້ຽມຢາມລັດຖະກິດ ຢູ່ ສປປ ເກົາຫຼີ ຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ມີຂຶ້ນໃນທ່າມກາງທີ່ສອງປະເທດ ສປປ ລາວ ແລະ ສປປ ເກົາຫຼີ ພວມສະເຫຼີມສະຫຼອງ ແລະ ຂໍ່ານັບຮັບຕ້ອນວັນຄົບຮອບ 60 ປີ ແຫ່ງການພົບປະສຸດຍອດຄັ້ງທໍາອິດ ທີ່ ນະຄອນຫຼວງພຽງຢາງ ຂອງ ປະທານ ໄກສອນ ພົມວິຫານ, ຜູ້ນໍາທີ່ແສນເຄົາລົບຮັກຂອງປະຊາຊົນລາວ ແລະ ປະທານ ກິມ ອິນ ຊຸງ, ຜູ້ນໍາທີ່ຍິ່ງໃຫຍ່ ແລະ ອາມາຕະຂອງປະຊາຊົນເກົາຫຼີ ໃນວັນທີ 28 ຕຸລາ 2025 ແລະ ຂໍ່ານັບຊົມເຊີຍວັນສ້າງຕັ້ງພັກແຮງງານເກົາຫຼີ ຄົບຮອບ 80 ປີ ໃນວັນທີ 10 ຕຸລາ 2025 ທີ່ຈະມາເຖິງນີ້, ພ້ອມທັງໄດ້ເປັນການສະເຫຼີມສະຫຼອງສາຍພົວພັນທາງການທູດ ລະຫວ່າງ ສປປ ລາວ ແລະ ສປປ ເກົາຫຼີ ຄົບຮອບ 50 ປີ.