LaoNews (2025)

13/08/2025

ຄວາມປອດໄພຂອງຕ່ອງໂສ້ການສະໜອງບໍ່ສາມາດບັນລຸຜົນເປັນຈິງໂດຍອາໄສ “ການນາບຂູ່ດ້ານເສດຖະກິດ”
ເມື່ອບໍ່ດົນມານີ້ ທ່ານໂດນັນ ທຣຳ ປະທານາທິບໍດີອາເມຣິກາກ່າວວ່າ, ອາເມຣິກາຈະເກັບພາສີປະມານ 100% ຕໍ່ແຜ່ນຊິບ ແລະ ເຊມີຄອນດັກເຕີ, ແຕ່ຈະບໍ່ເກັບນຳບໍລິສັດທີ່ “ສ້າງຕັ້ງໂຮງງານຢູ່ອາເມຣິກາ”. ທ່ານໂດນັນ ທຣຳເນັ້ນໜັກເປັນພິເສດວ່າ, ຖ້າຜະລິດຢູ່ອາເມຣິກາ, ຈະບໍ່ເກັບຄ່າຫຍັງເລີຍ.
ນະໂຍບາຍດັ່ງກ່າວເບິ່ງແລ້ວຄືງ່າຍດາຍ, ແຕ່ໃນຄວາມຈິງແລ້ວໄດ້ສະແດງໃຫ້ເຫັນວ່າ ອາເມຣິກນຳໃຊ້ເຄື່ອງມື “ນາບຂູ່ດ້ານເສດຖະກິດ” ເພື່ອສະແຫວງຫາອັນທີ່ວ່າ “ຄວາມປອດໄພຂອງຕ່ອງໂສ້ການສະໜອງ”. ຊຸມປີມໍ່ໆມານີ້, ອາເມຣິກາໄດ້ນຳໃຊ້ເລ່ລ່ຽມທີ່ແນບນຽນໃນຂົງເຂດຕ່ອງໂສ້ການສະໜອງຂອງໂລກ, ຈາກສົງຄາມການຄ້າຮອດການປິດກັ້ນດ້ານວິທະຍາສາດເຕັກໂນໂລຊີ, ຈາກການບັງຄັບປະເທດພັນທະມິດໃຫ້ເຂົ້າຂ້າງຝ່າຍຕົນຮອດການປະກາດໃຊ້ກົດໝາຍທີ່ກ່ຽວຂ້ອງກັບອຸດສາຫະກຳຕ່າງໆ, ຈຸດປະສົງຕົ້ນຕໍແມ່ນເຈຕະນາສ້າງຕ່ອງໂສ້ການສະໜອງຂອງໂລກຄືນໃໝ່, ເຮັດໃຫ້ຂັ້ນຕອນທີ່ເປັນຂໍກຸນແຈຂອງຕ່ອງໂສ້ການສະໜອງກັບຄືນສູ່ອາເມຣິກາ, ຮັບປະກັນໃຫ້ຕົນເອງມີສິດນຳພາແບບເດັດຖານໃນເຕັກໂນໂລຊີທີ່ເປັນຂໍກຸນແຈ ແລະ ຂົງເຂດອຸດສາຫະກຳ.
ເມື່ອເບິ່ງຈາກແງ່ມູມອຸດສາຫະກຳແລ້ວ, ອຸດສາຫະກຳແຜ່ນຊິບ ແລະ ເຊມີຄອນດັກເຕີແມ່ນອຸດສາຫະກຳໂລກາພິວັດທີ່ມີລັກສະນະຕົວແທນ, ການແບ່ງງານຂອງຕ່ອງໂສ້ອຸດສາຫະກຳໃນໂລກມີຄວາມຊັດເຈນ ແລະ ມີການປະສານສົມທົບໃນລະດັບສູງ, ອາເມຣິກາມີຄວາມສາມາດນຳໜ້າໃນການອອກແບບແຜ່ນຊິບ, ເອີຣົບມີທ່າແຮງທີ່ພົ້ນເດັ່ນໃນດ້ານອຸປະກອນ ແລະ ວັດສະດຸເຊມີຄອນດັກເຕີ, ສຳລັບອາຊີແມ່ນຖານສຳຄັນໃນດ້ານການຜະລິດ ການປະກອບ ແລະ ທົດລອງແຜ່ນຊິບ. ໂຄງສ້າງແບບນີ້ໃນໂລກແມ່ນເປັນຮູບເປັນຮ່າງຂຶ້ນຢູ່ບົນພື້ນຖານຂອງທ່າແຮງດ້ານຊັບພະຍາກອນ, ການສະສົມເຕັກໂນໂລຊີ ແລະ ປະສິດທິຜົນດ້ານຕົ້ນທຶນຢູ່ປະເທດ ແລະ ເຂດແຄວ້ນຕ່າງໆ, ໄດ້ຮັບປະກັນການດຳເນີນງານທີ່ມີປະສິດທິພາບສູງ ແລະ ການປະດິດສ້າງຢ່າງຕໍ່ເນື່ອງຂອງອຸດສາຫະກຳ. ອາເມຣິກາເກັບພາສີ 100%, ເຈຕະນາບີບບັງຄັບວິສາຫະກິດໃຫ້ຍົກຍ້າຍກຳລັງການຜະລິດກັບຄືນສູ່ອາເມຣິກາ, ບໍ່ຕ້ອງສົງໄສວ່າ ນີ້ເປັນການແຊກແຊງຢ່າງປ່າເຖື່ອນຕໍ່ຕ່ອງໂສ້ອຸດສາຫະກຳຂອງໂລກ.
ເວົ້າສະເພາະວິສາຫະກິດຂອງອາເມຣິກາແລ້ວ, ນະໂຍບາຍດັ່ງກ່າວອາດຈະສາມາດຊຸກຍູ້ໃຫ້ບາງວິສາຫະກິດກັບຄືນສູ່ອາເມຣິກາໃນໄລຍະສັ້ນ, ສ້າງໂອກາດດ້ານການລົງທຶນ ແລະ ປະກອບອາຊີບຈຳນວນໜຶ່ງໃຫ້ແກ່ອາເມຣິກາ. ແຕ່ເມື່ອເບິ່ງໃນໄລຍະຍາວແລ້ວເຫັນວ່າ, ຕົ້ນທຶນການຜະລິດຢູ່ປະເທດຕົນເພີ່ມຂຶ້ນຈະຫຼຸດຜ່ອນກຳລັງການແຂ່ງຂັນຂອງວິສາຫະກິອາເມຣິກາຢູ່ຕະຫຼາດທົ່ວໂລກ. ຖ້າຫາກບໍລິສັດແອັບເປີ້ນ ແລະ ບໍລິສັດອື່ນໆຍົກຍ້າຍຕ່ອງໂສ້ການສະໜອງກັບຄືນອາເມຣິກາເພື່ອຫຼີກລ່ຽງພາສີ, ຕົ້ນທຶນຜະລິດຕະພັນຍ່ອມຈະເພີ່ມຂຶ້ນຢ່າງຫຼວງຫຼາຍ, ທ່າແຮງດ້ານລາຄາໃນຕະຫຼາດສາກົນກໍຈະສູນເສຍໄປເລີຍ. ນອກນັ້ນ, ຕ່ອງໂສ້ອຸດສາຫະກຳຢູ່ອາເມຣິກາບໍ່ສົມບູນ, ຄວາມຄົບຖ້ວນ ແລະ ຄວາມຄ່ອງແຄ້ວຂອງຕ່ອງໂສ້ການສະໜອງບໍ່ເທົ່າໂຄງສ້າງໂລກາພິວັດ, ຄວາມສ່ຽງດ້ານການບໍລິຫານຂອງວິສາຫະກິດກໍຈະເພີ່ມຂຶ້ນໄປພ້ອມກັນ.
ເມື່ອເບິ່ງຈາກທົ່ວໂລກແລ້ວເຫັນວ່າ, ນະໂຍບາຍພາສີຂອງອາເມຣິກາຈະພາໃຫ້ເກີດຜົນກະທົບຕາມມາເພາະຈະເຮັດໃຫ້ຕ່ອງໂສ້ອຸດສາຫະກຳແຜ່ນຊິບຂອງໂລກແຍກຕົວອອກຢ່າງກະແຈກກະຈາຍ. ປະເທດອື່ນຢາກຮັບມືກັບລັດທິປົກປ້ອງການຄ້າຂອງອາເມຣິກາ, ຈະເລັ່ງລັດສ້າງຕ່ອງໂສ້ອຸດສາຫະກຳແຜ່ນຊິບຢູ່ປະເທດຕົນ ຫຼື ພາກພື້ນຕົນ, ເພື່ອຫຼຸດຜ່ອນເພີ່ງພາການອາໄສອາເມຣິກາ. ນີ້ຈະຫຼຸດຜ່ອນປະສິດທິພາບດ້ານການຈັດສັນຊັບພະຍາກອນໃນທົ່ວໂລກໃຫ້ຕ່ຳລົງ, ຄວາມໄວແຫ່ງການປະດິດສ້າງໃໝ່ໃນອຸດສາຫະກຳແຜ່ນຊິບກໍຈະຊ້າລົງຍ້ອນການຮ່ວມມືສາກົນຖືກສະກັດກັ້ນ. ພ້ອມກັນນັ້ນ, ສະພາບຄວາມເຄັ່ງຕຶງຂອງການຄ້າທົ່ວໂລກຈະຮຸນແຮງຂຶ້ນຕື່ມອີກ, ລະບຽບການຄ້າສາກົນໄດ້ຖືກທຳລາຍຢ່າງໜັກໜ່ວງ ແລະ ບາດກ້າວແຫ່ງການຟື້ນຟູເສດຖະກິດໂລກກໍຈະຖືກກີດຂວາງ.
ຄວາມປອດໄພທີ່ແທ້ຈິງຂອງຕ່ອງໂສ້ການສະໜອງຄວນສ້າງຂຶ້ນຢູ່ບົນພື້ນຖານແຫ່ງການຮ່ວມມືທົ່ວໂລກທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ແຕ່ບໍ່ແມ່ນບັນລຸຜົນເປັນຈິງໂດຍຜ່ານ “ການນາບຂູ່ດ້ານເສດຖະກິດ”. ຄຳນາບຂູ່ກ່ຽວກັບການເພີ່ມພາສີຂອງທ່ານໂດນັນ ທຣຳອາດຈະແລກມາໄດ້ພິທີວາງສີລາຈາລຶກສ້າງຕັ້ງໂຮງງານບໍ່ເທົ່າໃດຫຼັງ, ແຕ່ບໍ່ສາມາດບຳລຸງສ້າງກຳລັງແຂ່ງຂັນດ້ານອຸດສາຫະກຳແບບຍືນຍົງຢ່າງແທ້ຈິງ. ປະເທດຕ່າງໆໃນໂລກຄວນສຸມຄວາມພະຍາຍາມພ້ອມກັນ, ປະຕິບັດຕາມຫຼັກການທີ່ເປີດປະຕູສູ່ພາຍນອກ ຮ່ວມມື ຍຸຕິທຳ ແລະ ທ່ຽງທຳ, ຮັກສາຄວາມໝັ້ນທ່ຽງ ແລະ ຄວາມໂລ່ງລ່ຽນຂອງຕ່ອງໂສ້ອຸດສາຫະກ ແລະ ຕ່ອງໂສ້ການສະໜອງຂອງໂລກເພື່ອຊຸກຍູ້ການພັດທະນາຢ່າງປອດໄສຂອງເສດຖະກິດໂລກ.

cr ວິເຄາະສະຖານະການ锐视评

01/08/2025

ທ່ານ ທຣຳ ປະກາດແລ້ວ, ຈະເກັບອັດຕາພາສີຕໍ້ປະເທດທົ່ວໂລກໃນ 10%-41%. ລາວ-ມຽນມາຮັບໄປ 40% ອັດຕາພາສີ, ສູງສຸດແມ່ນຊິເຣຍໄດ້ຮັບ 41%. ຄຳສັ່ງຈະມີຜົນສັກສິດນັບແຕ່ວັນທີ 7 ສິງຫານີ້.

18/07/2025

ສ້າງຂະບວນການອອກແຮງງານ ຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກກະຊວງ ປກສ ຄັ້ງທີ VI
===============
ກະຊວງປ້ອງກັນຄວາມສະຫງົບ ໄດ້ສ້າງຂະບວນການອອກແຮງງານລວມ ເພື່ອຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກກະຊວງປ້ອງກັນຄວາມສະຫງົບ ຄັ້ງທີ VI ທີ່ຈະເປີດຂຶ້ນໃນມໍ່ໆນີ້ ໃນວັນທີ 18 ກໍລະກົດ 2025, ນໍາພາສ້າງຂະບວນການໂດຍ ພົຈວ ແສງທອງ ເກື້ອບຸນລໍ່າ ຮອງຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ, ມີຄະນະພັກ-ຄະນະບັນຊາ, ອົງການຈັດຕັ້ງມະຫາຊົນ ພ້ອມດ້ວຍພະນັກງານ, ນາຍ ແລະ ພົນຕໍາຫຼວດ ເຂົ້າຮ່ວມ.
ພົຈວ ແສງທອງ ເກື້ອບຸນລໍ່າ ໃຫ້ສໍາພາດວ່າ: ການສ້າງຂະບວນການອອກແຮງງານລວມຄັ້ງນີ້ ເພື່ອເປັນການຂໍ່ານັບຮັບຕ້ອນວັນສໍາຄັນຕ່າງໆຂອງພັກ-ຂອງຊາດ ໂດຍສະເພາະ ແມ່ນເພື່ອຂໍ່ານັບຮັບຕ້ອນກອງປະຊຸມໃຫຍ່ຂອງອົງຄະນະພັກກະຊວງປ້ອງກັນຄວາມສະຫງົບ ຄັ້ງທີ VI ທີ່ຈະເປີດຂຶ້ນໃນມໍ່ໆນີ້. ພ້ອມນີ້, ກໍເພື່ອຂໍ່ານັບຮັບຕ້ອນກອງປະຊຸມໃຫຍ່ຂອງພັກ ຄັ້ງທີ XII, ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກນະຄອນຫຼວງວຽງຈັນ, ແລະ ວັນສ້າງຕັ້ງສະຫະພັນແມ່ຍິງລາວ ຄົບຮອບ 70 ປີ (20 ກໍລະກົດ 1955-20 ກໍລະກົດ 2025) ໃຫ້ເປັນຂະບວນການຢ່າງຟົດຟື້ນ, ການອອກແຮງງານໃນຄັ້ງນີ້ ປະກອບມີ, ຄະນະພັກ-ຄະນະບັນຊາ, ນາຍ ແລະ ພົນຕໍາຫຼວດ ຈາກ 4 ພາກສ່ວນ ຄື: ຫ້ອງວ່າການ, ກົມໃຫຍ່ການເມືອງ, ກົມໃຫຍ່ສັນຕິບານ ແລະ ກົມສື່ສານ ເຂົ້າຮ່ວມ.
ການສ້າງຂະບວນການອອກແຮງງານ ແມ່ນໄດ້ພ້ອມກັນອານາໃນຂອບເຂດຕຶກກະຊວງປ້ອງກັນຄວາມສະຫງົບ ເຊິ່ງໄດ້ພ້ອມກັນປັດກວາດເດີ່ນດ້ານໜ້າ, ດ້ານຫຼັງ, ດ້ານຂ້າງ, ລົກຫຍ້າບໍລິເວນອ້ອມຮອບກໍາແພງ ແລະ ໄດ້ລ່ວງຮ່ອງລະບາຍນໍ້າ ພ້ອມທັງສີດນໍ້າລະບາຍ ເພື່ອເຮັດໃຫ້ມີຄວາມສະອາດຈົບງາມ ທັງເປັນການສະກັດກັ້ນແຫຼ່ງເພາະພັນຍຸງລາຍໃນລະດູຝົນ ເພື່ອຄວາມພອດໄພຈາກພະຍາດໄຂ້ຍຸງລາຍ ແລະ ເຮັດໃຫ້ພາຍໃນຕຶກກະຊວງປ້ອງກັນຄວາມສະຫງົບມີຄວາມເປັນລະບຽບຮຽບຮ້ອຍ.
ພາບ-ຂ່າວ: ແກ້ວ ອຸເພັດ

cr ຄວາມສະຫງົບ Lao Security News

18/07/2025

ທ່ານ ທອງລຸນ ສີສຸລິດ ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນ ສ ເບລາຣຸດຊີ.........
ໃນວັນທີ 17 ກໍລະກົດນີ້, ທີ່ທໍານຽບປະທານປະເທດ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ມາກຊິມ ຣືເຊັນກົບ ລັດຖະມົນຕີກະຊວງການຕ່າງປະເທດ ແຫ່ງ ສ ເບລາຣຸດຊີ ແລະ ຄະນະ, ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 16-18 ກໍລະກົດ 2025.
ໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງ ຕໍ່ການຢ້ຽມຢາມຄັ້ງນີ້ ຊຶ່ງຖືເປັນນິມິດໝາຍທີ່ສຳຄັນ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ສປປ ລາວ ແລະ ສ ເບລາຣຸດຊີ ໃຫ້ແໜ້ນແຟ້ນຂຶ້ນກວ່າເກົ່າ, ພ້ອມທັງໄດ້ຝາກຄວາມຢື້ຢາມຖາມຂ່າວໄປຍັງ ທ່ານ ອາເລັກຊານເດີ ລູກາເຊັນໂກ ປະທານາທິບໍດີ ແຫ່ງ ສ ເບລາຣຸດຊີ ແລະ ເຊື້ອເຊີນເດີນທາງມາຢ້ຽມຢາມທາງການ ທີ່ ສປປ ລາວ ໃນເວລາທີ່ສະດວກ. ທ່ານ ປະທານປະເທດ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສ ເບລາຣຸດຊີ ທີ່ນັບມື້ມີການຂະຫຍາຍຕົວຢ່າງບໍ່ຢຸດຢັ້ງ, ອັນພົ້ນເດັ່ນແມ່ນການແລກປ່ຽນການຢ້ຽມຢາມຂອງຄະນະຜູ້ແທນການນຳຂັ້ນສູງຂອງສອງປະເທດ ຢ່າງເປັນປະຈຳ. ເຫດການທີ່ມີລັກສະນະປະຫວັດສາດ ແມ່ນການຢ້ຽມຢາມລັດຖະກິດທີ່ ສ ເບລາຣຸດຊີ ຂອງ ທ່ານ ຈູມມາລີ ໄຊຍະສອນ ອະດີດປະທານປະເທດ ແຫ່ງ ສປປ ລາວ, ໃນປີ 2013 ຖືເປັນບາດລ້ຽວໃໝ່ທີ່ສໍາຄັນ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະ ຫວ່າງ ສອງປະເທດ ໂດຍໄດ້ມີການລົງນາມເອກະສານຮ່ວມມືນໍາກັນ 12 ສະບັບ. ພ້ອມກັນນີ້, ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການເລືອກຕັ້ງ ປະທານາທິບໍດີ ສ ເບລາຣຸດຊີ ໃນເດືອນມັງກອນຜ່ານມາ ແລະ ໃນມໍ່ໆມານີ້ ກໍໄດ້ພົບປະກັບ ທ່ານ ອາເລັກຊານເດີ ລູກາເຊັນໂກ ໃນໂອກາດເຂົ້າຮ່ວມກອງປະຊຸມສຸດຍອດກຸ່ມບຣິກສ໌ ທີ່ເມືອງກາຊານ ສ ຣັດເຊຍ. ພ້ອມທັງສະແດງຄວາມຊົມເຊີຍ ທີ່ສອງຝ່າຍ ໄດ້ລົງນາມສັນຍາຍົກເວັ້ນວີຊາ ສໍາລັບຜູ້ຖືໜັງສືຜ່ານແດນທໍາມະດາ ລະຫວ່າງ ສປປ ລາວ ແລະ ສ ເບລາຣຸດຊີ ຊຶ່ງຈະກາຍເປັນສິ່ງອຳນວຍຄວາມສະດວກໃນການໄປມາຫາສູ່ກັນ ລະຫວ່າງ ປະຊາຊົນສອງປະເທດ. ພ້ອມທັງ ໄດ້ຢືນຢັນເຖິງຄວາມມຸ້ງຫວັງຂອງ ສປປ ລາວ ຈະສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມື ລະຫວ່າງ ສອງພັກການເມືອງ, ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ, ການທ່ອງທ່ຽວ, ວັດທະນະທໍາ, ສາທາລະນະສຸກ, ພະລັງງານ, ບໍ່ແຮ່ ແລະ ຂະແໜງການອື່ນໆ ທີ່ສອງປະເທດມີທ່າແຮງ ແລະ ມີຜົນປະໂຫຍດຮ່ວມກັນ.
ໃນຕອນທ້າຍ, ທ່ານ ທອງລຸນ ສີສຸລິດ ໄດ້ເນັ້ນໃຫ້ສອງກະຊວງການຕ່າງປະເທດ ເຮັດວຽກຮ່ວມກັນ ເພື່ອຈັດຕັ້ງຜັນຂະຫຍາຍບັນດາຂໍ້ຕົກລົງທີ່ການນໍາຂອງສອງປະເທດ ໄດ້ຕົກລົງຮ່ວມກັນ ໃຫ້ປະກົດຜົນເປັນຮູບປະທໍາ.
ໃນຂະນະດຽວກັນ, ທ່ານ ມາກຊິມ ຣືເຊັນກົບ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ນໍາເອົາຄວາມຢື້ຢາມຖາມຂ່າວຈາກ ປະທານາທິບໍດີ ແຫ່ງ ສ ເບລາຣຸດຊີ ມາຍັງ ປະທານປະເທດ ແຫ່ງ ສປປ ລາວ ພ້ອມທັງໄດ້ເຊື້ອເຊີນ ທ່ານ ປະທານປະເທດແຫ່ງ ສປປ ລາວ ໄປຢ້ຽມຢາມ ສ ເບລາຣຸດຊີ ໃນເວລາທີ່ເໝາະສົມ ແລະ ໄດ້ແຈ້ງຜົນການພົບປະກັບ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໂດຍຫຍໍ້ໃຫ້ຊາບ ພ້ອມທັງໄດ້ຢືນຢັນວ່າ: ຈະສືບຕໍ່ເຮັດວຽກຮ່ວມກັບຝ່າຍລາວ ຢ່າງໃກ້ຊິດ ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ໃຫ້ນັບມື້ຈະເລີນງອກງາມຍິ່ງໆຂຶ້ນ.
(ຂ່າວ: ກະຊວງຕ່າງປະເທດ, ພາບ: ແສງຈັນ)

18/07/2025

ສປປ ເກົາຫຼີກ່າວປະນາມ“ປຶ້ມປົກຂາວວ່າດ້ວຍການປ້ອງກັນປະເທດ”ຂອງຍີ່ປຸ່ນ
ວັນທີ 17 ກໍລະກົດນີ້, ຫົວໜ້າຫ້ອງການນະໂຍບາຍສຳນັກງານຄົ້ນຄວ້າຍີ່ປຸ່ນຂອງກະຊວງການຕ່າງປະເທດ ສປປ ເກົາຫຼີໄດ້ສະແດງຄວາມເຫັນໂດຍກ່າວປະນາມຍີ່ປຸ່ນທີ່ປະກາດ“ປຶ້ມປົກຂາວວ່າດ້ວຍການປ້ອງກັນປະເທດ”ປີ 2025 ທີ່ລະບຸວ່າມາດຕະການເພີ່ມທະວີກຳລັງທະຫານຂອງ ສປປ ເກົາຫຼີ ແລະ ປະເທດອື່ນໆເປັນການຂົ່ມຂູ່ທີ່ຂ້ຽວຂາດ.
ທ່ານເຫັນວ່າ: ຍີ່ປຸ່ນຊື້ອາວຸດຈຳນວນຫຼວງຫຼາຍຈາກອາເມຣິກາ ແລະ ຈັດວາງອາວຸດທີ່ຜະລິດຢູ່ອາເມຣິກາຢ່າງຫຼວງຫຼາຍ ເຊິ່ງເປັນການທຳລາຍສັນຕິພາບ ແລະ ຄວາມໝັ້ນຄົງຂອງພາກພື້ນກໍຄືຂອງໂລກຢ່າງໂຫດຮ້າຍ, ເຈຕະນາສ້າງສະພາບເຄັ່ງຕຶງພາຍໃນພາກພື້ນ. ພາກພື້ນ ແລະ ປະຊາຄົມໂລກຄວນຍົກສູງສະຕິລະວັງຕົວຕໍ່ຄວາມຢາກເປັນປະເທດໃຫຍ່ດ້ານການທະຫານຂອງຍີ່ປຸ່ນທີ່ນັບມື້ນັບປ່າເຖື່ອນ ແລະ ອັນຕະລາຍ, ພ້ອມທັງສະແດງຄວາມຄັດຄ້ານຕໍ່ເລື່ອງນີ້ຢ່າງເດັດດ່ຽວ.

cr CMG FM93

15/07/2025

ປະເທດດ້ອຍພັດທະນາ ເປັນປະເທດແບບໃດ?
ທ່ານຮູ້ກ່ຽວກັບປະຫວັດ ຄວາມເປັນມາຂອງປະເທດດ້ອຍພັດທະນາ ຫຼື ບໍ່? ແລະ ຖ້າປະເທດໃດໜຶ່ງອອກຈາກສະຖານະພາບດ້ອຍພັດທະນາ, ປະເທດນັ້ນຈະຢູ່ໃນສະຖານະພາບໃດ? ບົດຄວາມນີ້ມີຄໍາຕອບ !!!
ນັບແຕ່ປີ 1971 ເປັນຕົ້ນມາ, ອົງການ ສະຫະປະຊາຊາດ (ຫຼື ສປຊ) ໄດ້ກໍານົດສະຖານະພາບ ປະເທດດ້ອຍພັດທະນາ (Least Developed Countries ຫຼື LDCs) ຢ່າງເປັນທາງການ ໂດຍອີງຕາມຍັດຕິ ຂອງສະມັດຊາໃຫຍ່ ອົງການ ສປຊ ສະບັບເລກທີ A/RES/2768, ລົງວັນທີ 18 ພະຈິກ 1971, ເຊິ່ງໄດ້ກໍານົດເອົາບັນດາປະເທດທີ່ມີລາຍຮັບຕໍ່າ ແລະ ປະເຊີນກັບອຸປະສັກທາງດ້ານໂຄງສ້າງຢ່າງໜັກໜ່ວງຕໍ່ການພັດທະນາ ເຂົ້າໃນບັນຊີປະເທດດ້ອຍພັດທະນາ. ໃນນັ້ນ, ສປປ ລາວ ຈຶ່ງຖືກຈັດເຂົ້າໃນບັນຊີປະເທດດ້ອຍພັດທະນາ ນັບແຕ່ນັ້ນມາຈົນເຖິງປັດຈຸບັນ.
ບັນຊີປະເທດດ້ອຍພັດທະນາ ແມ່ນຖືກກໍານົດໂດຍ ຄະນະກໍາມະການດ້ານນະໂຍບາຍເພື່ອການພັດທະນາ ຂອງອົງການ ສປຊ (Committee for Development Policy ຫຼື CDP), ເຊິ່ງໄດ້ກໍານົດ 03 ເງື່ອນໄຂ ຫລື ມາດຖານ ເຊິ່ງລວມມີ: 1) ລາຍຮັບແຫ່ງຊາດສະເລ່ຍຕໍ່ຫົວຄົນ (Gross National Incomes ຫຼື GNI) ໂດຍກໍານົດເປັນສະກຸນເງິນໂດລາສະຫະລັດ; 2) ດັດສະນີຊັບສິນມະນຸດ (Human Assets Index ຫຼື HAI) ໂດຍຄິດໄລ່ຈາກ 0-100; ແລະ 3) ດັດສະນີຄວາມບອບບາງທາງດ້ານເສດຖະກິດ ແລະ ສິ່ງແວດລ້ອມ (Economic and Environmental Vulnerability Index ຫຼື EVI) ໂດຍຄິດໄລ່ຈາກ 0-100. ໃນເບື້ອງຕົ້ນ, ປະເທດທີ່ກໍານົດໃຫ້ຢູ່ໃນສະຖານະພາບດ້ອຍພັດທະນາ ແມ່ນຈະມີລາຍຮັບແຫ່ງຊາດສະເລ່ຍຕໍ່ຫົວຄົນ (GNI) ຈໍານວນ $1,088 ໂດລາສະຫະລັດ ລົງມາ; ດັດສະນີຊັບສິນມະນຸດ (HAI) ໃນຕົວເລກ 60 ຫຼື ໜ້ອຍກວ່າ; ແລະ ດັດສະນີຄວາມບອບບາງທາງດ້ານເສດຖະກິດ ແລະ ສິ່ງແວດລ້ອມ (EVI) ໃນຕົວເລກ 36 ຫຼື ຫຼາຍກວ່າ.
ສໍາລັບເງື່ອນໄຂຂອງປະເທດທີ່ສາມາດຫຼຸດພົ້ນອອກຈາກສະຖານະພາບດ້ອຍພັດທະນາໄດ້ນັ້ນ, ປະເທດດັ່ງກ່າວຕ້ອງຜ່ານການປະເມີນ ອີງຕາມມາດຖານ ທັງສາມເງື່ອນໄຂ, ເຊິ່ງໃນປີ 2024 ໄດ້ກໍານົດໄວ້ວ່າ:
1) ລາຍຮັບແຫ່ງຊາດສະເລ່ຍຕໍ່ຫົວຄົນ (GNI) ຕ້ອງມີຈໍານວນ $1,306 ຂຶ້ນໄປ;
2) ດັດສະນີຊັບພະຍາກອນມະນຸດ (HAI) ໃນຕົວເລກ 66 ຫຼື ຫຼາຍກວ່າ; ແລະ
3) ດັດສະນີຄວາມບອບບາງ (EVI) ໃນຕົວເລກ 32 ຫຼື ໜ້ອຍກວ່າ.
ປັດຈຸບັນ, ປະເທດທີ່ຢູ່ໃນບັນຊີດ້ອຍພັດທະນາ ມີທັງໝົດ 44 ປະເທດ ເຊິ່ງໃນນັ້ນ ຢູ່ທະວີບອາຟຣິກາ ມີ 32 ປະເທດ, ຢູ່ພາກພື້ນອາຊີ-ປາຊີຟິກ ມີ 10 ປະເທດ, ຢູ່ພາກພື້ນຕາເວັນອອກກາງ ມີ 01 ປະເທດ ແລະ ຂົງເຂດທະເລກາຣີບຽນ (Caribbean) 01 ປະເທດ, ເຊິ່ງມີລາຍລະອຽດຄື:
📍ໃນທະວີບອາຟຣິກາ ຈໍານວນ 32 ປະເທດ ໄດ້ແກ່: ອັງໂກລາ (Angola), ເບແນັງ (Benin), ບູກິນາຟາໂຊ (Burkina Faso), ບູຣູນດີ (Burundi), ອາຟຣິກາກາງ (Central African Republic), ຊາດ (Chad), ໂກໂມຣົສ (Comoros), ກົງໂກ Congo, ຈິບູຕີ (Djibouti), ອິຣິເທຣຍ (Eritrea); ເອທິໂອປີ (Ethiopia), ກຳເບຍ (Gambia), ກິເນ (Guinea), ກິເນ-ບິຊາວ (Guinea-Bissau), ເລໂຊໂຕ (Lesotho), ໄລບີເຣຍ (Liberia), ມາດາກາສະກາ (Madagascar), ມາລາວີ (Malawi), ມາລີ (Mali), ໂມຣິຕາເນຍ (Mauritania), ໂມຊຳບິກ (Mozambique), ນິເຊ (Niger), ຣູວັນດາ (Rwanda), ເຊເນການ (Senegal) ພວມກະກຽມອອກໃນປີ 2029, ເຊຍຣາເລໂອນ (Sierra Leone), ໂຊມາລີ (Somalia), ຊູດັງໃຕ້ (South Sudan), ຊູດັງ (Sudan), ຕັງຊານີ (Tanzania), ໂຕໂກ (Togo), ອູກັນດາ (Uganda) ແລະ ຊຳເບຍ (Zambia).
📍ພາກພື້ນອາຊີ ແລະ ປາຊີຟິກ ມີຈໍານວນ 10 ປະເທດ: ອາຟະການິດສະຖານ (Afghanistan), ບັງກລາເທດ (Bangladesh) ກຽມອອກໃນປີ 2026, ກໍາປູເຈຍ (Cambodia) ກຽມອອກໃນປີ 2029, ສປປ ລາວ 🇱🇦 (ກຽມອອກໃນປີ 2026), ກິຣີບາຕີ (Kiribati), ມຽນມາ (Myanmar), ເນປານ (Nepal) ກຽມອອກໃນປີ 2026 (ເຄີຍອອກແລ້ວ ແຕ່ກັບເຂົ້າມາຢູ່ໃນສະຖານະພາບດ້ອຍພັດທະນາຄືນ ຍ້ອນໄພພິບັດທາງທໍາມະຊາດ), ໂຊໂລມອນ ໄອແລນ (Solomon Islands) ກຽມອອກໃນປີ 2027, ຕິມໍແລັດສະເຕ (Timor-Leste) ແລະ ຕູວາລູ (Tuvalu).
📍ພາກພື້ນຕາເວັນອອກກາງ ມີ 01 ປະເທດ: ເຢເມນ (Yemen).
📍ຂົງເຂດກາຣີບຽນ (Caribbean) ມີ 01 ປະເທດ: ໄຮຕິ (Haiti).
ບັນດາປະເທດດ້ອຍພັດທະນາ ມີອັດຕາກວມເອົາຄວາມທຸກຍາກຂອງໂລກປະມານ 40% ແລະ ມີປະຊາກອນທັງໝົດກວມເອົາປະມານ 13% ຂອງປະຊາກອນໂລກ ຫຼື ປະມານ 1.16 ຕື້ຄົນ. ນັບແຕ່ປີ 1971 ມາຮອດປັດຈຸບັນ, ມີພຽງແຕ່ 08 ປະເທດເທົ່ານັ້ນ ທີ່ສາມາດຫລຸດພົ້ນຈາກສະຖານະພາບດ້ອຍພັດທະນາ ຄື: ບົດສະວານາ (Botswana) ໃນປີ 1994, ກັບແວກ (Cabo Verde) ໃນປີ 2007, ມານດີບ (Maldives) ໃນປີ 2011, ຊາມົວ (Samoa) ໃນປີ 2014, ເອກວາຕໍຣິອານ ກິເນ (Equatorial Guinea) ໃນປີ 2017, ວານູອາຕູ (Vanuatu) ໃນປີ 2020, ບູຖານ (Bhutan) ໃນປີ 2023 ແລະ ຫຼັງສຸດແມ່ນ ຊາວໂຕເມ ແລະ ປຣິນຊິບ (São Tomé and Príncipe) ໃນປີ 2024.
ຫຼາຍທ່ານອາດຈະສົງໄສ ຫຼື ອາດບໍ່ແນ່ໃຈວ່າ ຫຼັງຈາກບັນດາປະເທດເຫຼົ່ານີ້ອອກຈາກສະຖານະພາບດ້ອຍພັດທະນາໄປແລ້ວ ປະເທດເຫຼົ່ານີ້ຈະຢູ່ໃນສະຖານະພາບໃດ❓ ຈະກາຍເປັນປະເທດທີ່ຈະເລີນ ຫຼື ປະເທດທີ່ພັດທະນາແລ້ວ ເລີຍບໍ່❓ ຄໍາຕອບຄື: ຫຼັງຈາກທີ່ປະເທດເຫຼົ່ານີ້ອອກຈາກສະຖານະພາບດ້ອຍພັດທະນາແລ້ວ, ປະເທດເຫຼົ່ານີ້ກໍຈະຢູ່ໃນສະຖານະພາບເປັນປະເທດ "ກໍາລັງພັດທະນາ" ຫຼື Developing Countries ຄືກັບຫຼາຍໆປະເທດ ເຊັ່ນ: ສປ ຈີນ, ສສ.ຫວຽດນາມ, ໄທ, ອິນໂດເນເຊຍ ແລະ ອຶ່ນໆ, ເຊິ່ງບໍ່ໄດ້ໝາຍຄວາມວ່າຈະກາຍເປັນປະເທດທີ່ຈະເລີນ ຫຼື ພັດທະນາແລ້ວໂດຍທັນທີທັນໃດ ແລະ ບໍ່ໄດ້ໝາຍຄວາມວ່າ ໝົດທຸກຄົນໃນປະເທດຈະພົ້ນທຸກ. ປະເທດເຫຼົ່ານີ້ກໍຍັງຈະຕ້ອງສືບຕໍ່ພັດທະນາເສດຖະກິດ-ສັງຄົມຂອງຕົນ ຕາມແນວທາງຂອງລັດຖະບານປະເທດນັ້ນໆວາງອອກໃນແຕ່ລະໄລຍະ ເພື່ອກ້າວໄປສູ່ການເປັນປະເທດທີ່ພັດທະນາແລ້ວ ຫຼື ໃນພາສາອັງກິດ ເອີ້ນວ່າ “Developed Countries” ເຊັ່ນ: ຝຣັ່ງ, ສະວິດ, ຍີ່ປຸ່ນ ແລະ ອຶ່ນໆ. ນອກນີ້, ໃຫ້ທຸກຄົນເຂົ້າໃຈນຳກັນຕື່ມອີກວ່າ ເຖິງວ່າບັນດາປະເທດທີ່ໄດ້ຮັບສະຖານະພາບວ່າເປັນປະເທດທີ່ພັດທະນາແລ້ວ ກໍບໍ່ໄດ້ໝາຍຄວາມວ່າປະເທດນັ້ນໆ ຈະບໍ່ມີຜູ້ທຸກຍາກ ແລະ ທຸກຄົນໃນປະເທດມີລາຍຮັບທີ່ສູງທັງໝົດ.
ສໍາລັບການປະເມີນຄັ້ງຫຼ້າສຸດ ຂອງຄະນະກໍາມະການນະໂຍບາຍດ້ານການພັດທະນາ (CDP) ຕໍ່ກັບເງື່ອນໄຂໃນການອອກຈາກສະຖານະພາບດ້ອຍພັດທະນາ ຂອງ ສປປ ລາວ 🇱🇦 ແມ່ນສາມາດຜ່ານເງື່ອນໄຂຈໍານວນສາມຄັ້ງຕິດຕໍ່ກັນຄື ໃນປີ 2018 (ຜ່ານສອງໃນສາມເງື່ອນໄຂ), 2021 ແລະ 2024 (ຜ່ານທັງສາມເງື່ອນໄຂ), ເຊິ່ງໃນປີ 2024 ແມ່ນມີລາຍລະອຽດຄື:
1) ລາຍຮັບ GNI ຈໍານວນ: $2,503; ✅
2) ດັດສະນີ HAI ແມ່ນ 74.8; ✅
3) ດັດສະນີ EVI ແມ່ນ 29.8 ✅
ສະນັ້ນ, ການອອກຈາກສະຖານະພາບດ້ອຍພັດທະນາຂອງ ສປປ ລາວ ບໍ່ໄດ້ໝາຍຄວາມວ່າ ສປປ ລາວ ເຮົາຈະກາຍເປັນປະເທດທີ່ຈະເລີນ ຫຼື ພັດທະນາແລ້ວ ໂດຍທັນທີທັນໃດ, ແຕ່ຈະເປັນບາດກ້າວທໍາອິດທີ່ຈະນໍາພາປະເທດກ້າວເຂົ້າສູ່ສະຖານະພາບ “ປະເທດກໍາລັງພັດທະນາ” (Developing Country) ແລະ ເລີ່ມຕົ້ນເສັ້ນທາງທີ່ຈະນໍາພາປະເທດໄປສູ່ຈຸດມຸ່ງໝາຍອັນສູງສຸດ ກໍຄືການກາຍເປັນ “ປະເທດທີ່ພັດທະນາແລ້ວ” (Developed Country) ຕາມແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ແລະ ແຜນພັດທະນາອື່ນໆ ທີ່ພັກ-ລັດຖະບານ ໄດ້ວາງອອກໃນແຕ່ໄລຍະ.
ອີງຕາມຜົນການປະເມີນຂອງອົງການ ສປຊ ໃນປັດຈຸບັນ, ສປປ ລາວ ແມ່ນສາມາດຖືກສະເຫນີ ຫລື ແນະນໍາ (Recommended) ໃຫ້ອອກຈາກສະຖານະພາບດັ່ງກ່າວໄດ້ພາຍໃນປີ 2026 ພ້ອມກັບ ບັງກລາເທດ ແລະ ເນປານ ໂດຍປະຕິບັດຕາມຂັ້ນຕອນການຮັບຮອງຢ່າງເປັນທາງການໂດຍ ສະພາເສດຖະກິດ-ສັງຄົມ ສປຊ (ECOSOC) ແລະ ສະມັດຊາໃຫຍ່ ອົງການ ສປຊ (UN General Assembly).
ສະຫລຸບແລ້ວ, ການທີ່ປະເທດໃດຫນຶ່ງຈະຖືກບັນຈຸເຂົ້າ ຫລື ໃຫ້ອອກຈາກບັນຊີປະເທດດ້ອຍພັດທະນາ ແມ່ນການຕັດສິນໂດຍຜ່ານກົນໄກຂອງສາກົນ ກໍຄືອົງການ ສປຊ 🇺🇳 ເຊິ່ງບໍ່ແມ່ນລັດຖະບານປະເທດໃດຫນຶ່ງ ຈະສາມາດກໍານົດໄດ້ດ້ວຍຕົນເອງ.
ສໍາລັບຂໍ້ມູນເພີ່ມເຕີມ ກ່ຽວກັບ ການກະກຽມຄວາມພ້ອມຂອງ ສປປ ລາວ, ກາລະໂອກາດ ແລະ ສິ່ງທ້າທາຍຕ່າງໆ ໃນການຫລຸດພົ້ນອອກຈາກສະຖານະພາບດ້ອຍພັດທະນາຂອງ ສປປ ລາວ ມາເປັນ “ກໍາລັງພັດທະນາ”, ກະລຸນາຕິດຕາມໄດ້ ໃນບົດຄວາມສະບັບຕໍ່ໄປ.
ຂຽນໂດຍ: ລົດສະດາ ຄຸນນະວົງສາ, ພະແນກເສດຖະກິດ-ສັງຄົມ ສປຊ, ກົມອົງການຈັດຕັ້ງສາກົນ, ກະຊວງການຕ່າງປະເທດ.
ຮຽບຮຽງໂດຍ: ກອງເລຂາຄະນະຊີ້ນໍາລະດັບຊາດ ເພື່ອການຈັດຕັ້ງປະຕິບັດແຜນດໍາເນີນງານ ສປຊ ສໍາລັບ ປະເທດດ້ອຍພັດທະນາ, ກະຊວງການຕ່າງປະເທດ.

cr Lao Youth Radio FM 90.0 Mhz

07/07/2025

ອີງຕາມຊ່ອງຂ່າວເອເຊຍຂອງສິງກະໂປ, ອຸປະກອນອິນເຕີເນັດດາວທຽມ STARLINK ຂອງ Musk ໄດ້ຖືກນໍາໃຊ້ຢ່າງກວ້າງຂວາງໂດຍແກ້ງ ຄໍເຊັນເຕີ ໃນອາຊີຕາເວັນອອກສຽງໃຕ້, ເຊິ່ງມີຜົນກະທົບທາງລົບຕໍ່ວຽກງານຕ້ານການສໍ້ໂກງທາງໂທລະສັບ ໃນຫລາຍປະເທດ. ຕາມຂ່າວລາຍງານ, ບໍລິສັດ SpaceX ບໍ່ໄດ້ອອກມາຕອບສະຫນອງກ່ຽວກັບບັນຫາດັ່ງກ່າວ.
ໃນເດືອນ 3, ສະມາຊິກສະພາຜູ້ແທນລາຊະດອນຂອງໄທ Rangsiman Rome ຍັງໄດ້ກ່າວຫາທ່ານ Musk ວ່າໄດ້ອະນຸຍາດໃຫ້ກຸມສໍ້ໂກງນໍາໃຊ້ອຸປະກອນ Starlink ໃນພາກພື້ນ. ທ່ານ Rangsiman Rome ກ່າວວ່າ ມີ “ຫຼັກຖານແນ່ນອນ” ທີ່ຢືນຢັນໄດ້ ແກ້ງ ຄໍເຊັນເຕີສໍ້ໂກງໃນເອເຊຍຕາເວັນອອກສ່ຽງໃຕ້ໄດ້ນຳໃຊ້ STARLINK ເພື່ອເຊື່ອມຕໍ່ກັບສັງຄົມ.

05/06/2025

🚫ອາເມລິກາ ຫ້າມບໍ່ໃຫ້ ປະຊາຊົນລາວເຂົ້າໄປອາເມລິກາ
ທ່ານ ໂດນັນ ທຣຳ (Donald Trump) ປະທານາທິບໍດສະຫະລັດອາມາລິກາ ໄດ້ລົງນາມຄຳສັ່ງ ຫ້າມບໍ່ໃຫ້ປະຊາຊົນ ຈາກ 12 ປະເທດ ເຂົ້າໄປອາເມລິກາ ລວມທັງ ປະເທດອັຟການີສະຖານ, ມຽນມາ, ຈາດ (chad), ກົງໂກ(Congo), Equatorial Guinea, Eritrea, Haiti, Iran, Libya, Somalia, Sudan, ແລະ Yemen. ນອກຈາກນັ້ນ, ປະຊາຊົນຈາກບູຣຸນດີ (Burundi), ຄິວບາ, ລາວ, ເຊຍຣາລີໂອນ(Sierra Leone), ໂຕໂກ (Togo), ເຕີກເມນິສະຖານ (Turkmenistan), ແລະເວເນຊູເອລາ (Venezuela)ໄດ້ຖືກຫ້າມບໍ່ໃຫ້ເຂົ້າໄປໃນສະຫະລັດ ອາເມລິກາ.

29/05/2025

ລັດຖະມົນຕີກະຊວງຍຸຕິທຳ ແຫ່ງ ສປປ ລາວ ຕ້ອນຮັບການຢ້ຽມຢາມ ຂອງຫົວໜ້າອົງການໄອຍະການສູງສຸດ ແຫ່ງ ສະຫະພັນຣັດເຊຍ
********************
ໃນວັນທີ 28 ພຶດສະພາ 2025 ນີ້, ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ໄດ້ຕ້ອນຮັບການເຂົ້າຢ້ຽມຢາມ ຂອງ ທ່ານ ອີກໍຣ ກຣາສນົບ ຫົວໜ້າອົງການໄອຍະການສູງສຸດ ແຫ່ງ ສະຫະພັນຣັດເຊຍ ພ້ອມຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢ່າງເປັນທາງການ ຢູ່ ສປປ ລາວ ໃນ ລະຫວ່າງວັນທີ 27-29 ພຶດ ສະພາ 2025.
ໂອກາດນີ້, ທ່ານ ລັດຖະມົນຕີກະຊວງຍຸຕິທຳ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ອີກໍຣ ກຣາສນົບ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ຊຶ່ງ ເປັນການປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມື ໃນຫຼາຍດ້ານ ລະຫ່ວາງ ສອງປະເທດ ລາວ-ຣັດເຊຍ ໂດຍສະເພາະ ການຮ່ວມມືໃນຂົງເຂດກົດໝາຍ ແລະ ຍຸຕິທຳ ໃຫ້ໄດ້ຮັບການພັດທະນາ ແລະ ແຕກດອກອອກຜົນຂຶ້ນໄປເລື້ອຍໆ. ພ້ອມທັງ, ຕີລາຄາສູງຕໍ່ໝາກຜົນແຫ່ງການຮ່ວມມືໃນດ້ານຕ່າງໆ ລະຫວ່າງ ສອງປະເທດ ລາວ-ຣັດເຊຍ ໂດຍສະເພາະການຮ່ວມມື ລະຫວ່າງ ກະຊວງຍຸຕິທຳ ແລະ ອົງການໄອຍະການສູງສຸດ ແຫ່ງ ສະຫະພັນຣັດເຊຍ ທີ່ໄດ້ມີການພົວພັນກັນຢ່າງສະໜິດແໜ້ນ ເຮັດໃຫ້ວຽກງານຂອງທັງສອງຝ່າຍ ໄດ້ຮັບການພັດທະນາ ແໜ້ນແຟ້ນຂຶ້ນກວ່າເກົ່າ, ພ້ອມທັງສະແດງຄວາມຂອບໃຈ ຕໍ່ລັດຖະບານຣັດເຊຍ ທີ່ໄດ້ໃຫ້ການຊ່ວຍເຫຼືອ ແກ່ ສປປ ລາວ ໃນດ້ານຕ່າງໆມາໂດຍຕະຫຼອດ ເຮັດໃຫ້ວຽກງານຫຼາຍດ້ານ ຢູ່ ສປປ ລາວ ໄດ້ຮັບການພັດທະນາຂຶ້ນໄປເລື້ອຍໆ ແລະ ຫວັງຢ່າງຍິ່ງວ່າຈະສືບຕໍ່ຊຸກຍູ້ ຊ່ວຍເຫຼອ ແລະ ຜັກດັນການຮ່ວມມືຂອງ ສອງ ຝ່າຍ ລະຫວ່າງ ສອງຂະແໜງການກະຊວງຍຸຕິທໍາ ລາວ-ສ.ຣັດເຊຍ ໂດຍສະເພາະໃນວຽກທີ່ຄ້າງຄາ ແລະ ທິດທາງການຮ່ວມມືໃນຕໍ່ໜ້າ ໃຫ້ປະກົດຜົນເປັນຈິງໂດຍໄວ; ສືບຕໍ່ການແລກປ່ຽນຄະນະຜູ້ແທນຂອງ ສອງ ຝ່າຍ ໂດຍສະເພາະການຢ້ຽມຢາມ ແລະ ແລກປ່ຽນບົດຮຽນຂອງຄະນະຜູ້ແທນຂັ້ນສູງຂອງ ສອງ ຊາດ ແລະ ການແລກປ່ຽນບົດຮຽນທາງດ້ານວິຊາການ ກ່ຽວກັບວຽກງານທາງດ້ານກົດໜາຍ ເພື່ອຮັດແໜ້ນສາຍພົວພັນ ແລະ ຮ່ວມມື ລະຫວ່າງ ສອງ ຂະແໜງການ ສປປ ລາວ ແລະ ສ.ຣັດເຊຍ ໃຫ້ກ້າວສູ່ລວງເລິກຢ່າງຮອບດ້ານ ຕາມເງື່ອນໄຂທີ່ເໜາະສົມ; ສືບຕໍ່ແລກປ່ຽນຖອດຖອນບົດຮຽນ ຄວາມຮູ້ທາງດ້ານວິຊາສະເພາະ ລວມທັງແລກປ່ຽນຂໍ້ມູນຂ່າວສານ ແລະ ເອກະສານທາງວິຊາການຕ່າງໆທາງດ້ານກົດໝາຍ ແລະ ນິຕິກໍາທີ່ກ່ຽວຂ້ອງ.
ທ່ານ ອີກໍຣ ກຣາສນົບ ກໍໄດ້ສະແດງຄວາມຂອບໃຈຕໍ່ ທ່ານ ໄພວີ ສີບົວລິພາ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມທັງ ແຈ້ງຈຸດປະສົງ ຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ໃຫ້ທ່ານລັດຖະມົນຕີກະຊວງຍຸຕິທຳ ຮັບຊາບຕື່ມອີກດ້ວຍ.

cr ໜັງສືພິມກົດໝາຍ

29/05/2025

ໄຂກອງປະຊຸມສະໄໝສາມັນ ຂອງລັດຖະບານ ປະຈຳເດືອນພຶດສະພາ 2025
ກອງປະຊຸມສະໄໝສາມັນຂອງລັດຖະບານ ປະຈຳເດືອນພຶດສະພາ 2025 ໄດ້ໄຂຂຶ້ນໃນຕອນເຊົ້າວັນທີ 29 ພຶດສະພາ 2025 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ-ອົງການ ເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງ ແລະ ປະກອບຄຳເຫັນ ຕໍ່ການລາຍງານສະພາບພົ້ນເດັ່ນ ປະຈຳເດືອນພຶດສະພາ ແລະ ທິດທາງແຜນວຽກຈຸດສຸມ ປະຈຳເດືອນມິຖຸນາ 2025.
ກອງປະຊຸມຄັ້ງນີ້ ຈະດໍາເນີນເປັນເວລາ 02 ວັນ ເຊິ່ງຈະໄດ້ພ້ອມກັນຄົ້ນຄວ້າ, ປຶກສາຫາລື ປະກອບຄຳເຫັນ ແລະ ພິຈາລະນາ ຕໍ່ບັນດາຫົວຂໍ້ທີ່ສໍາຄັນ ຄື:
1. ການສະຫຼຸບວຽກງານພົ້ນເດັ່ນປະຈໍາເດືອນ ພຶດສະພາ ແລະ ທິດທາງແຜນການ ປະຈຳເດືອນ ມິຖຸນາ 2025 ຂອງລັດຖະບານ; ລາຍງານໂດຍຫຍໍ້ ກ່ຽວກັບຫົວຂໍ້ ແລະ ເນື້ອໃນ ທີ່ລັດຖະບານ ຈະລາຍງານຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ແລະ ບົດລາຍງານຂອງທ່ານ ນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2025 ແລະ ແຜນການ 6 ເດືອນທ້າຍປີ 2025; ລາຍງານ ກ່ຽວກັບການທາບທາມຮ່າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030); ລາຍງານ ກ່ຽວກັບການຈັດຕັ້ງປະຕິບັດບັນດານະໂຍບາຍ, ນິຕິກຳ, ກົນໄກຕ່າງໆ ໃນການພັດທະນາພະລັງງານໄຟຟ້ານໍ້າຕົກ; ລາຍງານ ກ່ຽວກັບການຈັດຕັ້ງປະຕິບັດປີທ່ອງທ່ຽວລາວ ແລະ ທິດທາງແຜນການໃນຕໍ່ໜ້າ; ລາຍງານ ກ່ຽວກັບການຕີລາຄາການໂຄສະນາເຜີຍແຜ່ກົດໝາຍທົ່ວປະເທດ; ລາຍງານກ່ຽວກັບນະໂຍບາຍການການກໍ່ສ້າງ-ສ້ອມແປງເສັ້ນທາງໃນໄລຍະໃໝ່ (ຜົນຂອງກອງປະຊຸມຮ່ວມ ລະຫວ່າງ ຄະນະລັດຖະບານ ກັບ ຄະນະປະຈໍາສະພາແຫ່ງຊາດ ຄັ້ງທີ 2 ປີ 2024) ແລະ ລາຍງານກ່ຽວກັບການກໍ່ສ້າງ ແລະ ສ້ອມແປງເສັ້ນທາງຕ່າງໆ ທີ່ຍັງຫຍຸ້ງຍາກ ແລະ ເປ່ເພ.
2. ຮ່າງຍຸດທະສາດພັດທະນາການເງິນແຫ່ງລັດ ຮອດປີ 2035 ແລະ ວິໄສທັດຮອດປີ 2040.
3. ຮ່າງດຳລັດ ວ່າດ້ວຍການຄຸ້ມຄອງ ແລະ ການກູ້ຢືມໂດຍກົງ, ການໃຫ້ກູ້ຢືມຕໍ່ ແລະ ການຄໍ້າປະກັນການໃຫ້ກູ້ຢືມ.
4. ຮ່າງດຳລັດ ວ່າດ້ວຍໜຶ່ງເມືອງ ໜຶ່ງຜະລິດຕະພັນ.
5. ຮ່າງດໍາລັດ ວ່າດ້ວຍການສົ່ງເສີມທຸລະກິດແບບສະຕາດອັບ.
6. ຮ່າງດຳລັດ ວ່າດ້ວຍນະໂຍບາຍຕໍ່ຄະນະກິລາທີມຊາດ.
7. ຮ່າງດຳລັດ ວ່າດ້ວຍສະຖານທີ່ທ່ອງທ່ຽວ.
ໃນໂອກາດກ່າວເປີດກອງປະຊຸມ, ທ່ານ ປະທານກອງປະຊຸມ ໄດ້ຍົກໃຫ້ເຫັນສະພາບການພົ້ນເດັ່ນ ທີ່ເກີດຂຶ້ນຢູ່ພາກພື້ນ ແລະ ສາກົນ ຍັງສືບຕໍ່ຜັນແປຢ່າງສະຫຼັບຊັບຊ້ອນ ແລະ ຄາດເດົາໄດ້ຍາກ ໂດຍສະເພາະ ແມ່ນຄວາມຂັດແຍ່ງທາງດ້ານເສດຖະກິດ-ການຄ້າ ລະຫວ່າງ ສ. ອາເມລິກາ ກັບ ສປ ຈີນ ເຖິງວ່າໄດ້ມີການເຈລະຈາຜ່ອນອັດຕາພາສີລົງ ແຕ່ໃນໄລຍະຍາວກໍ່ຍັງຄາດເດົາໄດ້ຍາກ ວ່າຈະເປັນໄປໃນທິດທາງໃດ, ຄວາມຂັດແຍ່ງທາງດ້ານການທະຫານ ແລະ ການເມືອງຢູ່ພາກພື້ນ ແລະ ສາກົົນ ແມ່ນຍັງສືບຕໍ່ເຄັ່ງຮ້ອນ; ນອກຈາກນີ້ ຍັງມີໄຟໄໝ້ປ່າ, ພະຍາດລະບາດ ແລະ ບັນຫາອື່ນໆ ກໍຍັງຈະສືບຕໍ່ເປັນສິ່ງທ້າທາຍ ທີ່ຈະເປັນໄພຄຸກຄາມ ແລະ ສ້າງຜົນເສຍຫາຍ ຕໍ່ຊີວິດ ແລະ ຊັບສິນ ຂອງປະຊາຊົນຢູ່ຫຼາຍປະເທດ. ຈາກສະພາບຄືດັ່ງກ່າວ ເຮັດໃຫ້ສະພາບເສດຖະກິດໂລກ ທີ່ມີຄວາມຫຍຸ້ງຍາກຢູ່ແລ້ວນັ້ນ ຍິ່ງຈະສືບຕໍ່ມີຄວາມຜັນຜວນ ແລະ ມີຜົນກະທົບເປັນວົງກ້ວາງຕື່ມ ເວົ້າລວມ, ເວົ້າສະເພາະ ຕໍ່ການພັດທະນາເສດຖະກິດ-ສັງຄົມຂອງປະເທດເຮົາ, ສະນັ້ນ ບັນດາຂະ ແໜງການກ່ຽວຂ້ອງ ຈະຕ້ອງໄດ້ພ້ອມກັນສືບຕໍ່ສຸມໃສ່ຄົ້ນຄວ້າບັນດາມາດຕະການ ແລະ ວິທີການ ໃນການປ້ອງກັນ ແລະ ແກ້ໄຂຜົນກະທົບຕໍ່ຊີວິດການເປັນຢູ່ຂອງປະຊາຊົນ, ພະນັກງານ-ລັດຖະກອນ ແລະ ການພັດທະນາເສດຖະກິດ-ສັງຄົມ ຂອງປະເທດເຮົາ.

ພາບ ແລະ ຂ່າວ: ກົມປະຊາສຳພັນ ຫສນຍ.

29/05/2025

ລັດຖະມົນຕີ ກະຊວງການເງິນ ຕ້ອນຮັບ
ຜູ້ອຳນວຍການ ຫ້ອງການ ເອດີບີ ປະຈຳລາວ
ຂປລ. ໃນວັນທີ 27 ພຶດສະພາ 2025 ຜ່ານມາ, ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ໄດ້ຕ້ອນຮັບການເຂົ້າພົບປະຂອງ ທ່ານ ນາງ ເອລິສເບັດ-ແອນ ແຊນນີ ແຄມເບວ ຜູ້ອຳນວຍການຫ້ອງການ ທະນາຄານພັດທະນາອາຊີ ປະຈໍາ ສປປ ລາວ (ADB) ເພື່ອແນະນຳໂຕເອງ ຢ່າງເປັນທາງການ ໃນວາລະການປະຈໍາການຢູ່ ສປປ ລາວ ເພື່ອເສີມຂະຫຍາຍສາຍພົວພັນຮ່ວມມື, ປຶກສາຫາລືວຽກງານການຮ່ວມມືສອງຝ່າຍ ລະຫວ່າງ ສປປ ລາວ ແລະ ADB, ຍຸດທະສາດການຮ່ວມມື CPS (2024-2028).
ໂອກາດນີ້, ທ່ານ ສັນຕິພາບ ພົມວິຫານ ໄດ້ສະແດງຄວາມຊົມເຊີຍ ມາຍັງທ່ານ ນາງ ເອລິສເບັດ-ແອນ ແຊນນີ ແຄມເບວ ທີ່ໄດ້ຮັບການແຕ່ງຕັ້ງ ເປັນຜູ້ອຳນວຍການ ຫ້ອງການ ADB ປະຈໍາ ສປປ ລາວ, ກະຊວງການເງິນ ຍິນດີຕ້ອນຮັບ ແລະ ພ້ອມທີ່ຈະໃຫ້ການສະໜັບສະໜູນ ແລະ ຮ່ວມມືຈັດຕັ້ງປະຕິບັດວຽກງານ ຮ່ວມກັບ ADB ປະຈໍາ ສປປ ລາວ ໃຫ້ມີປະສິດທິພາບ ແລະ ປະສິດທິຜົນຫລາຍຂຶ້ນ ໂດຍສະເພາະ ແມ່ນການຈັດຕັ້ງປະຕິບັດຍຸດທະສາດການຮ່ວມມື ລະຫວ່າງ ສປປ ລາວ ແລະ ADB ໄລຍະປີ 2024-2028 ໃຫ້ບັນລຸຕາມເປົ້າໝາຍ ເຊິ່ງການຈັດຕັ້ງປະຕິບັດບັນດາຍຸດທະສາດ ໄດ້ກາຍເປັນເຄື່ອງມືວັດແທກການຮ່ວມມື ລະຫວ່າງ ສປປ ລາວ ແລະ ADB, ການອອກແບບ ແລະ ຈັດຕັ້ງປະຕິບັດໂຄງການ ຕ້ອງມີລັກສະນະຈຸດສຸມ ເນັ້ນໃຫ້ເຫັນໝາກຜົນທີ່ເປັນປະໂຫຍດໃຫ້ສົງຄົມຢ່າງຍືນຍົງ, ທົນທານ, ສ້າງມູນຄ່າເພີ່ມ, ຕໍ່ຍອດໃຫ້ເງິນກູ້. ສະນັ້ນ, ການປະສານສົມທົບ ລະຫວ່າງ ADB ແລະ ພາກສ່ວນກ່ຽວຂ້ອງຂອງລັດ ເປັນຕົ້ນ ກະຊວງການເງິນ ຈະຕ້ອງເຮັດວຽກຮ່ວມກັນຢ່າງໃກ້ຊິດ ເພື່ອຄົ້ນຄວ້າ, ຄັດເລືອກກິດຈະກຳຂອງໂຄງການທີ່ເຫັນວ່າ ຈະເກີດປະໂຫຍດສູງສຸດ ໃນການນຳໃຊ້ເງິນກູ້.
ພ້ອມນີ້, ທ່ານລັດຖະມົນຕີກະຊວງການເງິນ ຍັງໃຫ້ສະເໜີ ADB ຊ່ວຍພິຈາລະນາ ການລະ ດົມຂົນຂວາຍພາກເອກະຊົນ ເຂົ້າມາມີສ່ວນຮ່ວມໃນການພັດທະນາໂຄງການຕ່າງໆ ໃນຂະແໜງສັງຄົມ ແລະ ການບໍລິການ ເພື່ອຫລຸດຜ່ອນການກູ້ຢືມຂອງລັດຖະບານ; ສະເໜີ ADB ສືບຕໍ່ຊຸກຍູ້ ສົ່ງເສີມການເຊື່ອມຈອດລະຫວ່າງ ສປປ ລາວ ກັບປະເທດເພື່ອນບ້ານ ແລະ ພາກພື້ນ ເພື່ອສ້າງໃຫ້ ສປປ ລາວ ເປັນສູນກາງດ້ານການຂົນສົ່ງ, ເສດຖະກິດ, ການທ່ອງທ່ຽວ ແລະ ອື່ນໆ ທີ່ຈະຊ່ວຍເພີ່ມລາຍຮັບໃຫ້ ສປປ ລາວ ແລະ ຊ່ວຍໃຫ້ ສປປ ລາວ ສາມາດເຂົ້າເຖິງແຫລ່ງທຶນສີຂຽວ ທີ່ມີເງື່ອນໄຂຜ່ອນຜັນ ເພື່ອນຳໃຊ້ເຂົ້າໃນການພັດທະນາໂຄງລ່າງພື້ນຖານ ແລະ ການພັດທະນາສີຂຽວ.
ຂ່າວ: ກະຊວງການເງິນ

29/05/2025

ສະພາແຫ່ງຊາດ ລົງຕິດຕາມການຈັດຕັ້ງ
ປະຕິບັດແຜນພັດທະນາວຽກ ຮສສ
ຂປລ. ກອງປະຊຸມ ຕິດຕາມກວດເກາ ແລະ ຊຸມຍູ້ການຈັດຕັ້ງປະຕິບັດລັດຖະທໍາມະນູນ, ບັນ ດາກົດໝາຍ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນພັດທະນາຂະແໜງແຮງງານ ແລະ ສະຫວັດດີການສັງຄົມ ປີ 2025 ຈັດຂຶ້ນໃນວັນທີ 28 ພຶດສະພາ 2025 ພາຍໃຕ້ການເປັນປະທານຂອງ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ(ຮສສ) ແລະ ທ່ານ ບຸນຕາ ເທບພະວົງ ກຳມະການຄະນະປະຈໍາສະພາແຫ່ງຊາດ, ກຳມາທິການວັດທະນະທໍາ-ສັງຄົມ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດ ແຜນພັດທະນາສດຖະກິດ-ສັງຄົມ ແຫ່ງຊາດ ປະຈໍາປີ 2025 ໂດຍສະເພາະ 7 ຄາດໝາຍຂອງຂະແໜງການແຮງງານ ແລະ ສະຫວັດດີການສັງຄົມ ຕາມທີ່ກຳນົດໄວ້ໃນມະຕິກອງປະຊຸມສະພາແຫ່ງຊາດ ສະບັບ 153/ສພຊ, ລົງວັນທີ 12 ທັນວາ 2024 ເຊິ່ງມີຜົນສຳເລັດຫລາຍດ້ານ ເປັນຕົ້ນ ພັດທະນາສີມືແຮງງານໃຫ້ກຳລັງແຮງງານຕາມຄວາມຕ້ອງການຂອງຕະຫລາດແຮງງານໃນຮູບແບບຕ່າງໆ ໄດ້ທັງໝົດ 97.793 ຄົນ, ຍິງ47.141 ຄົນ (ມະຕິສະພາ 8.000 ຄົນ); ຈັດຫາກຳລັງແຮງງານເຂົ້າສູ່ຕະຫລາດແຮງງານພາຍໃນ ແລະ ຕ່າງປະເທດໄດ້ 95.721 ຄົນ, ຍິງ 50.536 ຄົນ, ລື່ນແຜນການປີ 105,86%, ອັດຕາການວ່າງງານຍັງສາມາດຮັກສາໄດ້ລະດັບ 2,4%; ຂະຫຍາຍການຄຸ້ມຄອງຫົວໜ່ວຍວິສາຫະກິດເພີ່ມໃໝ່ ໄດ້ທັງໝົດ421 ຫົວໜ່ວຍ (ມະຕິສະພາ 525 ຫົວໜ່ວຍ) ແລະ ຂຶ້ນທະບຽນຜູ້ປະກັນຕົນໃໝ່ໄດ້ 19.361 ຄົນ, (ມະຕິສະພາ 58.500 ຄົນ); ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດປະຕິວັດຊາດປະຊາທິປະໄຕໃນ 3 ເປົ້າໝາຍບຸລິມະສິດປະຈໍາງວດ 1 ປີ 2025 ໄດ້ 354 ທ່ານ, ຍິງ 30 ທ່ານ (ມະຕິສະພາ 691 ທ່ານ) ເປັນເງິນທັງໝົດ 6,99 ຕື້ກີບ; ເກັບກູ້ລະເບີດບໍ່ທັນແຕກອອກຈາກເນື້ອທີ່ທໍາການຜະລິດ ແລະ ເຂດຊຸມຊົນ, ເຂດຈຸດສຸມການຜະລິດ ໄດ້ 929 ເຮັກຕາ (ແຜນການ 3.170 ເຮັກຕາ), (ມະຕິສະພາ 7.500 ເຮັກຕາ) ແລະ ທໍາລາຍລະເບີດຈໍານວນ 9.944 ໜ່ວຍ ແລະ ໂຄສະ ນາທີ່ມາ ແລະ ຜົນຮ້າຍຂອງລະເບີດບໍ່ທັນແຕກຕົກຄ້າງ ໃຫ້ຊຸມຊຸມເປົ້າໝາຍ ໄດ້ 149 ບ້ານ (ແຜນ ການ 450 ບ້ານ).
ສ່ວນການຄຸ້ມຄອງ ແລະ ຈັດຕັ້ງປະຕິບັດງົບປະມານທີ່ລັດຖະບານຈັດສັນໃຫ້ ໂດຍສະເພາະງົບປະມານພາກປົກກະຕິ ແລະ ລາຍຮັບວິຊາການໃນປີ 2025 ນີ້ ເຫັນວ່າມີຄວາມຄ່ອງຕົວດີສາມາດຈັດຕັ້ງປະຕິບັດໄດ້ຕາມແຜນ ແລະ ທັນກັບກຳນົດເວລາໂດຍພື້ນຖານ, ບັນດາຫົວໜ່ວຍວິຊາການອ້ອມຂ້າງກະຊວງ ກໍໄດ້ເອົາໃຈໃສ່ຈັດຕັ້ງປະຕິບັດລາຍຮັບ-ລາຍຈ່າຍງົບປະມານ ແລະ ສະຫລຸບການຈັດຕັ້ງປະຕິບັດບົນພື້ນຖານກົດໝາຍ ແລະ ລະບຽບການເງິນຢ່າງຮັດກຸມ, ສະແດງອອກ ຕົວເລກງົບປະມານທີ່ໄດ້ຮັບອະນຸມັດໃນປີ 2025 (ລວມທັງເງິນປະກອບສ່ວນເຂົ້າຄັງປະກັນສັງຄົມ) ທັງໝົດ 803,49 ຕື້ກີບ. ໃນນີ້, ງົບປະມານພາກປົກກະຕິ 796,35 ຕື້ກີບ ແລະ ລາຍຮັບວິຊາການ 7,14 ຕື້ກີບ. ຜ່ານການຈັດຕັ້ງປະຕິບັດໃນ 5 ເດືອນຕົ້ນປີ 2025 ສາມາດປະຕິບັດໄດ້ 615,26 ຕື້ກີບ, ເທົ່າກັບ 76.57% ຂອງແຜນການ.
ກະຊວງ ຮສສ ຍາມໃດກໍພະຍາຍາມໃນການຊຸກຍູ້ ແລະ ສົ່ງເສີມໃຫ້ກໍາລັງແຮງງານໄດ້ມີວຽກເຮັດງານທໍາຕາມຂະແໜງການເສດຖະກິດ-ສັງຄົມ ແລະ ການບໍລິການ ໂດຍໄດ້ຄົ້ນຄ້ວາສ້າງນະໂຍບາຍເພື່ອດັດສົມມະຫາພາກດ້ານແຮງງານ ກໍຄື ການດຸ່ນດ່ຽງແຮງງານຕາມຄວາມຕ້ອງການຂອງຕະຫລາດແຮງງານ; ສຸມໃສ່ໃນການຄົ້ນຄວ້າສ້າງນະໂຍບາຍການດັດສົມມະຫາພາກ ດ້ານການພັດທະນາສີມືແຮງງານເພື່ອຕອບສະໜອງແຮງງານທີ່ມີຄຸນນະພາບ ເຊັ່ນ: ມີສີມືດີ, ມີວິໄນແຮງງານດີ ສາມາດຕອບສະ ໜອງຕາມຄວາມຕ້ອງການຂອງຕະຫລາດແຮງງານ ໂດຍການປະສານສົມທົບກັບທຸກພາກສ່ວນກ່ຽວ ຂ້ອງ; ເພີ່ມທະວີເອົາໃຈໃສ່ໃນວຽກງານກວດກາແຮງງານ ຢູ່ບັນດາຫົວໜ່ວຍທຸລະກິດ ແລະ ໂຄງການລົງທຶນຕ່າງໆ ເພື່ອເຮັດໃຫ້ຜູ້ໃຊ້ແຮງງານ ນຳໃຊ້ແຮງງານບົນພື້ນຖານກົດໝາຍ ແລະ ລະບຽບການ; ເອົາໃຈໃສ່ໃນການສ້າງຄວາມເຂັ້ມແຂງໃຫ້ເຈົ້າໜ້າທີ່ກວດກາແຮງງານ ໃນການບັງຄັບໃຊ້ກົດໝາຍ, ສ້າງໃຫ້ເປັນທັງຜູ້ກວດກາ ແລະ ເປັນນັກໂຄສະນາເຜີຍແຜ່ກົດໝາຍ ແລະ ລະບຽບການຕ່າງໆ ໃຫ້ຜູ້ອອກແຮງງານ ແລະ ຜູ້ໃຊ້ແຮງງານເພື່ອເຮັດໃຫ້ເຂົາເຈົ້້າຮັບຮູ້ສິດ ແລະ ຜົນປະໂຫຍດຂອງຕົນ; ຊຸກຍູ້ໃຫ້ຜູ້ໃຊ້ແຮງງານສ້າງ ແລະ ປັບປຸງກົດລະບຽບພາຍໃນ; ໃຫ້ຄໍາປຶກສາດ້ານນິຕິກໍາ ແລະ ລະບຽບການກ່ຽວກັບການຄຸ້ມຄອງແຮງງານ, ເພີ່ມທະ ວີກົນໄກການເຮັດຽກຂອງສາມຝ່າຍ ໃຫ້ເຂັ້ມແຂງກວ່າເກົ່າ, ເອົາໃຈໃສ່ໃນການຕິດຕາມ, ກວດກາ ການ ຈັດຕັ້ງປະຕິບັດກົດໝາຍ ແລະ ລະບຽບການຢ່າງເຂັ້ມງວດ ນັບແຕ່ຂັ້ນສູນກາງຮອດ. ພ້ອມກັນນັ້ນ, ກໍຕ້ອງໄດ້ສ້າງ ແລະ ປັບປຸງບັນດານິຕິກຳ ໃຫ້ສອດຄ່ອງກັບເງື່ອນໄຂຕົວຈິງໃນແຕ່ລະໄລຍະ.

cr ປະເທດລາວ Pathedlao

LaoNews

13/08/2025

01/08/2025

18/07/2025

18/07/2025

18/07/2025

15/07/2025

07/07/2025

05/06/2025

29/05/2025

29/05/2025

29/05/2025

29/05/2025

Address

Website

Alerts

Shortcuts

Share