ຄວາມສະຫງົບ Lao Security News, ບ້ານແສງສະຫວ່າງ, Vientiane (2025)

Q: What is the address?

ບ້ານແສງສະຫວ່າງ

23/08/2025

#ແຈ້ງເຕືອນໄພ ພາຍຸດີເປຼຊັ່ນ (TD)! ພາກກາງຫາພາກເໜືອຈົ່ງມີສະຕິລະມັດລະວັງ ແລະ ກຽມພ້ອມຮັບມື ຕໍ່ກັບສະພາບຝົນຕົກຫນັກຕິດຕໍ່ກັນຫຼາຍ ທີ່ຈະເຮັດໃຫ້ມີດິນເຈື່ອນ ນໍ້າຖ້ວມຊຸ ໃນລະຫວ່າງວັນທີ 25 - 28 ສິງຫານີ້
==============
ວັນທີ 23 ສິງຫາ 2025 ກົມອຸຕຸນິຍົມ ແລະ ອຸທົກກະສາດ ກະຊວງ ກະສິກໍາ ແລະ ສິ່ງແວດລ້ອມ ໄດ້ອອກ ແຈ້ງເຕືອນໄພ ພາຍຸດີເປຼຊັ່ນ (TD) ໃນລະຫວ່າງວັນທີ 25 - 28 ສິງຫາ 2025 ວ່າ: ໃນເວລາ 07 ໂມງ 00 ຂອງວັນທີ 23 ສິງຫາ 2025 ພາຍຸດີເປຼຊັນ (TD) ໄດ້ເຄື່ອນທີ່ ຢູ່ເຂດທະເລຈີນໃຕ້ຕອນກາງ, ເຊິ່ງມີຈຸດສູນກາງໃນເສັ້ນ ຂະຫນານທີ 17.2 ອົງສາເຫນືອ ແລະ ເສັ້ນແວງທີ່ 116.9 ອົງສາຕາເວັນ ອອກ ດ້ວຍຄວາມໄວ 55 ກິໂລແມັດຕໍ່ຊົ່ວໂມງ.
ພາຍຸຫົວນີ້ຈະມີກໍາລັງ ແຮງເພີ່ມຂຶ້ນ ກາຍເປັນພາຍຸຫມຸນເຂດຮ້ອນ ແລະ ຈະສືບຕໍ່ເຄື່ອນທີ່ຜ່ານ ພາກໃຕ້ຂອງເກາະໄຮຫນານໃກ້ແຄມຝັ່ງທາງພາກເຫນືອ ແລະ ພາກກາງຂອງ ສສ ຫວຽດນາມ ໃນວັນທີ 24 ຫາ 25 ສິງຫາ 2025 ນີ້. ຈາກນັ້ນພາຍຸ ຫົວນີ້ ສືບຕໍ່ເຄື່ອນທີ່ຜ່ານ ພາກກາງ ແລະ ພາກເຫນືອ ຂອງ ສປປ ລາວ. ຊຶ່ງ ຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມ ໃນລະດັບຄ່ອຍ ຫາ ຕົກປານກາງຢູ່ ທົ່ວໄປໃນແຕ່ລະພາກ ແລະ ຈະມີຝົນຕົກຫນັກ ຫາ ຫນັກຫຼາຍ ພ້ອມຈະມີ ລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງ ຜົ້ງສາລີ, ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ຫຼວງນໍ້າທາ, ຫຼວງພະບາງ, ໄຊຍະບູລີ, ນະຄອນຫຼວງ ວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະ ເຂດ ໃນໄລຍະວັນທີ 25 ຫາ 28 ສິງຫາ 2025 ນີ້.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນໃນແຕ່ລະ ພາກ ລວມທັງນະຄອນຫຼວງວຽງຈັນ ຈົ່ງມີສະຕິລະມັດລະວັງ ແລະ ກຽມພ້ອມຮັບມື ຕໍ່ກັບສະພາບຝົນຕົກຫນັກຕິດຕໍ່ກັນຫຼາຍ ວັນ ທີ່ຈະເຮັດໃຫ້ມີດິນເຈື່ອນ, ນໍ້າຖ້ວມຊຸ, ນໍ້າຖ້ວມຍື່ງ ແລະ ນໍ້າຖ້ວມອັ່ງໃນຕົວເມືອງ.

23/08/2025

ສະຫລອງວັນຊາດ ຫວຽດນາມ ຄົບຮອບ 80 ປີ

ສະຖານທູດຫວຽດນາມ ປະຈຳ ລາວ ໄດ້ຈັດພິທີສະເຫລີມສະຫລອງ ວັນຊາດຫວຽດນາມ ຄົບຮອບ 80 ປີ (02/09/1945-2/9/2025) ໃນວັນທີ 22 ສິງຫາ 2025 ນີ້, ຢູ່ນະຄອນຫລວງວຽງຈັນ ໃຫ້ກຽດເຂົ້າຮ່ວມມີ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ, ທ່ານ ນາງ ຫວໍ ທິ ແອັງ ຊວນ ຮອງປະທານປະເທດ ແຫ່ງ ສສ ຫວຽດນາມ, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ມີບັນດາລັດຖະມົນຕີ, ບັນດາເອກອັກຄະລັດຖະທູດ, ອຸປະທູດ, ຜູ້ຕາງໜ້າອົງການຈັດຕັ້ງສາກົນຢູ່ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໂອກາດດັ່ງກ່າວ, ທ່ານ ຫງວຽນ ມິງ ເຕີມ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ລາວ ໄດ້ຍົກໃຫ້ເຫັນມູນເຊື້ອແຫ່ງການຕໍ່ສູ້ ປົດປ່ອຍປະເທດຊາດ ໃນໄລຍະຜ່ານມາ ເຊິ່ງໃນໄລຍະ 80 ປີທີ່ຜ່ານມາ, ພາຍໃຕ້ການນຳພາຂອງພັກກອມມູນິດຫວຽດນາມ ດ້ວຍແນວຄິດອັນເປັນອຳມະຕະທີ່ວ່າ“ບໍ່ມີສິ່ງໃດທີ່ປະເສີດເລີດລໍ້າເໜືອກວ່າເອກະລາດ ແລະ ອິດສະລະພາບ”, ທົ່ວປວງຊົນທັງຊາດຫວຽດນາມ ໄດ້ສາມັກຄີເປັນຈິດໜຶ່ງໃຈດຽວ, ຮ່ວມກັບນ້ຳໃຈສາມັກຄີສາກົນ ອັນບໍລິສຸດຜຸດຜ່ອງ ນໍາເອົາການປະຕິວັດຂອງຫວຽດນາມ ຈາກໄຊຊະນະນີິ້ສູ່ໄຊຊະນະອື່ນ, ປະຕິບັດສຳເລັດພາລະກິດປົດປ່ອຍຊາດ ແລະ ທ້ອນໂຮມປະເທດຊາດເປັນເອກະພາບ ແລະ ພວມປະຕິບັດພາລະກິດປ່ຽນແປງໃໝ່ສຳເລັດຜົນ, ກ້າວໄປສູ່ສັງຄົມນິຍົມຢ່າງໜັກແໜ້ນ.
ທ່ານ ຫງວຽນ ມິງ ເຕີມ ຍັງໃຫ້ຮູ້ອີກວ່າ: ໃນວັນທີ 2 ກັນຍາ 1945, ຢູ່ສະໜາມຫລວງ ບາດິ່ງ, ທີ່ນະຄອນຫລວງຮ່າໂນ້ຍ, ປະທານໂຮ່ຈີ່ມິງ ໄດ້ອ່ານບົດຖະແຫລງປະກາດເອກະລາດ, ຊຶ່ງໄດ້ປະກາດໃຫ້ທົ່ວປວງຊົນທັງຊາດ ແລະ ທົ່ວໂລກຊາບກ່ຽວກັບຄວາມເປັນເອກະລາດ, ອິດສະລະພາບ, ຄວາມສະເໝີພາບຂອງຊາດຫວຽດນາມ ແລະ ການສະຖາປະນາ ສາທາລະນະລັດ ປະຊາທິປະໄຕຫວຽດນາມ, ປັດຈຸບັນແມ່ນ ປະເທດສາທາລະນະລັດ ສັງຄົມນິຍົມຫວຽດນາມ. ໃນນັ້ນ, ໄດ້ເນັ້ນໜັກວ່າ: “ປະເທດ ຫວຽດນາມ ມີສິດໄດ້ຮັບຄວາມເປັນເອກະລາດ, ອິດສະລະພາບ ແລະ ໃນຕົວຈິງໄດ້ກາຍເປັນປະເທດໜຶ່ງທີ່ມີອິດສະລະພາບ ແລະ ຄວາມເປັນເອກະລາດ. ທົ່ວປວງຊົນທັງຊາດຫວຽດນາມ ຕັດສິນໃຈຈະອຸທິດຈິດໃຈ ແລະ ກຳລັງແຮງ, ຊີວິດອິນຊີ ແລະ ຊັບສິນທັງໝົດ ເພື່ອປົກປັກຮັກສາອິດສະລະພາບ ແລະ ຄວາມເປັນເອກະລາດ ດັ່ງກ່າວ”. ການກຳເນີດຂອງສາທາລະນະລັດ ປະຊາທິປະໄຕ ຫວຽດນາມ ແມ່ນຂີດໝາຍຈຸດເລີ່ມຕົ້ນຂອງສັງກາດໃໝ່ຂອງຊາດ ຊຶ່ງແມ່ນສັງກາດແຫ່ງຄວາມເປັນເອກະລາດ, ອິດສະລະພາບ ແລະ ເປັນເຈົ້າຊາຕາກຳ ຂອງຊາດ. ນັບແຕ່ນັ້ນເປັນຕົ້ນມາ, ປະຊາຊົນຫວຽດນາມ ໄດ້ຖືເອົາວັນທີ 2 ກັນຍາ ຂອງທຸກໆປີ ແມ່ນ “ວັນບຸນເອກະລາດ”.
ຈາກພື້ນຖານເສດຖະກິດທີ່ຫລ້າຫລັງ, ຫວຽດນາມ ໄດ້ບືນຕົວເຮັດໃຫ້ພື້ນຖານເສດຖະກິດ ຂຶ້ນເປັນອັນດັບທີ 32 ໃນໂລກ, ຢູ່ໃນກຸ່ມ 20 ພື້ນຖານເສດຖະກິດແຖວໜ້າດ້ານການຄ້າ ແລະ ການດຶງດູດການລົງທຶນຈາກຕ່າງປະເທດ, ເປັນຕ່ອງໂສ້ອັນສໍາຄັນຂອງ 17 ສັນຍາການຄ້າເສລີ (FTA) ເຊື່ອມຈອດກັບ 60 ພື້ນຖານເສດຖະກິດຫລັກໆໃນພາກພື້ນ ແລະ ທົ່ວໂລກ. ພ້ອມນີ້, ຫວຽດນາມ ຍັງໄດ້ສ້າງຕັ້ງສາຍພົວພັນທາງການທູດກັບ 194 ປະເທດໃນໂລກ. ໃນນັ້ນ, ມີບັນດາສະມາຊິກຖາວອນຂອງສະພາຄວາມໝັ້ນຄົງສະຫະປະຊາຊາດ, ບັນດາປະເທດໃຫຍ່ທັງໝົດ ແລະ ແມ່ນສະມາຊິກທີ່ຕັ້ງໜ້າຂອງ 70 ກວ່າອົງການຈັດຕັ້ງໃນພາກພື້ນ ແລະ ສາກົນ.
ພັກ, ລັດ ແລະ ປະຊາຊົນ ຫວຽດນາມ ຍາມໃດກໍມີຄວາມຮັບຮູ້ຢ່າງເລິກເຊິ່ງວ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດຂອງຕົນ, ເພື່ອໃຫ້ຫວຽດນາມ ມີພາລະກິດອັນໜັກແໜ້ນ, ມີກໍາລັງບົ່ມຊ້ອນ, ມີຖານະບົດບາດ ແລະ ອິດທິພົນ, ຊື່ສຽງໃນວົງຄະນາຍາດສາກົນ ຄືທຸກວັນນີ້, ໄປຄຽງຄູ່ກັບຄວາມມານະພະຍາຍາມບຸກໜ້າບືນຕົວ ຂອງຕົນເອງແລ້ວ, ຍາມໃດກໍໄດ້ ຮັບການສະໜັບສະໜູນ, ການຊ່ວຍເຫລືອອັນລ້ຳຄ່າ ຈາກເພື່ອນມິດສາກົນ ໂດຍສະເພາະ ແມ່ນການຊ່ວຍເຫລືອທີ່ໃຫຍ່ຫລວງ, ໝົດຈິດໝົດໃຈ, ມີປະສິດທິຜົນຂອງ ພັກ, ລັດ ແລະ ປະຊາຊົນລາວ ອ້າຍນ້ອງ.
ທີ່ມາ: ຂປລ

23/08/2025

ບັນຍາກາດຕາດມູນມື້ນີ້ ປະຊາຊົນແໜ້ນໜາ
============
#ມື້ນີ້ວັນທີ 23 ສິງຫາ 2025 ກົງກັບວັນເສົາ ເປັນມື້ບຸນຫໍ່ເຂົ້າປະດັບດິນ ປະຊາຊົນຈຳນວນຫຼວງຫຼາຍໄດ້ພາຄອບຄົວ ໝູ່ເພື່ອນ ອອກມາພັກຜ່ອນ ຫຼິ້ນນໍ້າເຢັນໆທີ່ຕາດມູນ ເມືອງສີໂຄດຕະບອງ ນະຄອນຫຼວງວຽງຈັນ, ບັນຍາກາດຄຶກຄື້ນມ່ວນຊື່ນ ຜູ້ຄົນຄັບຄາໜາແໜ້ນ ເປັນການສົ່ງເສີມການທ່ອງທ່ຽວພາຍໃນ ເງິນບໍ່ຮົ່ວໄຫຼໄປນອກປະເທດ.
ເຖິງແນວໃດກໍຕາມ, ພັກຜ່ອນມ່ວນຊື່ນແລ້ວ ຂໍໃຫ້ທຸກທ່ານລະມັດລະວັງໃນເວລາຂັບຂີ່ພາຫະນະເດີນທາງກັບບ້ານ ເມົາແລ້ວບໍ່ຂັບຂີ່ເພື່ອຄວາມປອດໄພຂອງຊີວິດ ແລະ ຊັບສິນຂອງທ່ານ.
#ໜັງສືພິມຄວາມສະຫງົບ #ທ່ອງທ່ຽວພາຍໃນ

23/08/2025

ນາຍົກລັດຖະມົນຕີ ຮ່ວມໃສ່ບາດ ບຸນຫໍ່ເຂົ້າປະດັບດິນ ຢູ່ນະຄອນຫລວງພະບາງ

ຕອນເຊົ້າວັນທີ 23 ສິງຫາ 2025 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ, ພ້ອມດ້ວຍພັນລະຍາ ແລະ ການນໍາຂັ້ນສູງຈາກສູນກາງ, ມີທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ທ່ານ ຄໍາຂັນ ຈັນທະວີສຸກ ເຈົ້າແຂວງຫລວງພະບາງ ພ້ອມດ້ວຍ ການນໍາຂອງແຂວງ, ນະຄອນ ຕະຫລອດຮອດປະຊາຊົນ ຊາວຫລວງພະບາງ ໄດ້ຮ່ວມໃສ່ບາດຢູ່ຕໍ່ໜ້າວັດແສນສຸຂະຣາມ ນະຄອນຫລວງພະບາງ ໃນໂອກາດງານບຸນຫໍ່ເຂົ້າປະດັບດິນ-ບຸນຊ່ວງເຮືອເດືອນເກົ້າ ປະຈໍາປີ 2025. ນອກຈາກ ການໃສ່ບາດຢູ່ຕໍ່ໜ້າວັດແສນແລ້ວ, ຍັງມີຊາວພຸດທະສາສະນິກະຊົນທັງພາຍໃນ ແລະ ແຂກຕ່າງປະເທດ ທີ່ມີຈິດໃຈເຫລື້ອມໃສສັດທາທາງພຸດທະສາສະໜາ ໄດ້ພ້ອມກັນຫ້າງຫາກະກຽມເຂົ້າໜຽວ, ເຂົ້າຕົ້ມ, ເຂົ້າໜົມ ແລະ ປັດໄຈ ມາໃສ່ບາດຢູ່ຕາມວັດວາອາຣາມ ແລະ ເສັ້ນທາງຕ່າງໆ ພາຍໃນເທສະບານ ນະຄອນຫລວງພະບາງ ຢ່າງຫລວງຫລາຍ.
ກິດຈະກໍາການໃສ່ບາດ ເປັນໜຶ່ງໃນການອານຸລັກປົກປັກຮັກສາ ແລະ ເສີມຂະຫຍາຍ ວັດທະນະທຳ-ຮີດຄອງປະເພນີອັນດີງາມ ຂອງຊາດ ໂດຍສະເພາະຂອງຊາວຫລວງພະບາງ ທີ່ສືບທອດກັນມາແຕ່ກ່ອນໄວ້ໃຫ້ຍືນຍົງຕະຫລອດໄປ, ທັງເປັນການສົ່ງເສີມ ແລະ ເປັນອີກໜຶ່ງກິດຈະກໍາການທ່ອງທ່ຽວ ທີ່ຕິດພັນກັບການອະນຸລັກຮັກສາ ວັດທະນະທໍາ ຮີດຄອງປະເພນີ ອັນດີງາມ ທີ່ເປັນເອກລັກສະເພາະຂອງຊາວຫລວງພະບາງ ທີ່ມີມາແຕ່ດົນນານອີກດ້ວຍ.
ຂ່າວ: ເພັດສາຄອນ ສິມມະວົງ

23/08/2025

ນາຍົກເຂົ້າຮ່ວມພິທີເປີຊ່ວງເຮືອປະເພນີທີ່ ນະຄອນ-ຫຼວງພະບາງ
#ປີນີ້ຄືກຄື້ນຫຼາຍມີສີພາຍ ແລະ ເຮືອຊ່ວງທັງພາຍໃນ ແລະ ຕ່າງແຂວງເຂົ້າຮ່ວມແຂ່ງຂັນ 22 ລໍາ
----------------------------

ໃນວັນທີ 23 ສີງຫາ ນີ້: ອົງການປົກຄອງນະຄອນ-ຫຼວງພະບາງ ໄດ້ຈັດບຸນຊ່ວງເຮືອປະເພນີ ໂອກາດບຸນຫໍ່ເຂົ້າປະດັບດິນ ປະຈໍາປີ ພ.ສ 2568 ຄ.ສ 2025, ໂດຍມີ ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍການນໍາພັກ-ລັດ ຂັ້ນສູນກາງ-ຂັ້ນແຂວງຫຼວງພະບາງ, ແຂກຮັບເຊີນ, ແຂກທັງພາຍໃນ ແລະ ຕ່າງປະເທດ, ຕະຫຼອດຮອດປະຊາຊົນບັນດາເຜົ່າ ຊາວແຂວງຫຼວງພະບາງ ຮ່ວມຊົມ ຮ່ວມເຊຍ ຕາມແຄມຝັ່ງນ້ຳຄານ ຢ່າງຄຶກຄື້ນ-ມ່ວນຊື່ນ.
ໃນໂອກາດນີ້, ທ່ານ ສຳນານ ສົນທະນີ ເລຂາຄະນະບໍລິຫານງານພັກ ນະຄອນ-ຫຼວງພະບາງ ຮອງປະທານຈັດງານບຸນ ໄດ້ກ່າວເປີດພິທີຢ່າງເປັນທາງການວ່າ: ງານບຸນຫໍ່ເຂົ້າປະດັບດິນຊ່ວງເຮືອເດືອນເກົ້າ ທີ່ຍື່ງນ້ຳຄານ ເປັນບຸນສີລິມຸງຄຸນ ອັນຊົງຄຸນຄ່າທາງດ້ານປະຫວັດສາດ ແລະ ວັດທະນະທໍາຮີດຄອງປະເພນີຂອງຊາວນະຄອນ-ຫຼວງພະບາງ ຊຶ່ງໄດ້ສືບທອດກັນມາຕັ້ງແຕ່ບູຮານນະການ ຈົນເຖິງປັດຈຸບັນ. ພໍຮອດແຮມ 14 ຄໍ່າ ເດືອນເກົ້າລາວຂອງທຸກປີ ປະຊາຊົນບັນດາເຜົ່າ ຢູ່ບັນດາບ້ານໄດ້ນຳເອົາເຮືອຊ່ວງເຂົ້າມາຮ່ວມແຂ່ງຂັນຕາມຮີດຄອງ ເພື່ອເສີມຂະຫຍາຍຄວາມສາມັກຄີປອງດອງ ຂອງປະຊາຊົນລາວບັນດາເຜົ່າ ສະແດງໃຫ້ເຫັນດ້ານພາລະກຳລັງ, ການຢ້ຽມຢາມຖາມຂ່າວ ຕາມວິຖີຊີວິດຂອງຊາວຫຼວງພະບາງ ດັ່ງເດີມໂດຍແທ້ ພ້ອມທັງເປັນການຄອບໄຄວ່ ສິ່ງສັກສິດ ແລະ ບູຊາພະຍານາກ ໃຫ້ປົກປັກຮັກສາບ້ານເມືອງ ໃຫ້ມີຄວາມຈະເລີນຮຸ່ງເຮືອງ, ສີວິໄລ ແລະ ຢູ່ເຢັນເປັນສຸກ. ສະເພາະປີນີ້, ມີເຮືອຊ່ວງເຂົ້າຮ່ວມແຂ່ງຂັນທັງໝົດ 22 ລໍາ, ມາຈາກບັນດາບ້ານພາຍໃນ ນະຄອນ-ຫຼວງພະບາງ, ມາຈາກພະແນກການຂອງແຂວງ, ທະນາຄານ-ບໍລິສັດ, ຫົວໜ່ວຍທຸລະກິດ, ມາຈາກເມືອງ ແລະ ແຂວງອ້ອມຂ້າງ. ທ່ານກ່າວຕື່ມວ່າ: ເພື່ອຮັບປະກັນໃຫ້ງານບຸນປີນີ້ ມີບັນຍາກາດຟົດຟື້ນ, ເບີກບານມ່ວນຊື່ນ ຮັບປະກັນໃຫ້ມີຄວາມເປັນລະບຽບຮຽບຮ້ອຍ, ທັງຮັກສາໄດ້ມູນເຊື້ອທາງດ້ານວັດທະນະທໍາ-ຮີດຄອງປະເພນີ ອັນດີງາມທີ່ເປັນເອກະລັກສະເພາະຂອງຊາວນະຄອນ-ຫຼວງພະບາງ ຂໍຮຽກຮ້ອງໃຫ້ຄະນະກໍາມະການຈັດການແຂ່ງຂັນ, ຄະນະຮັບຜິດຊອບ-ສີພາຍເຮືອຊ່ວງ ຕະຫຼອດເຖິງນັກສີພາຍ ຈົ່ງເຊີດຊູນໍ້າໃຈເຄົາລົບ ແລະ ປະຕິບັດຕາມກະຕິກາການແຂ່ງຂັນຢ່າງເຂັ້ມງວດ, ການແຂ່ງຂັນຈະຊະນະ ຫຼື ເສຍ ບໍ່ໃຫ້ຖືເປັນບັນຫາສໍາຄັນ ສິ່ງສຳຄັນທີ່ສຸດແມ່ນຄວາມສາມັກຄີ ພ້ອມກັນອະນຸລັກຮັກສາ, ຮີດຄອງປະເພນີ-ສົ່ງເສີມມູນເຊື້ອອັນດີງາມ ທີ່ດັ່ງເດີມ ແລະ ໂດດເດັ່ນຂອງຊາວຫຼວງພະບາງ, ທັງມີເນື້ອໃນ, ມີບັນຍາກາດຄວາມເບີກບານມ່ວນຊືນ ແລະ ມີສຸຂະພາບທີ່ແຂງແຮງ.
ພາຍຫຼັງເປີດພິທີຢ່າງເປັນທາງການ ໄດ້ມີການເປີດສາກການແຂ່ງຂັນ ໂດຍເລີ່ມຈາກເຮືອຊ່ວງນາງດຳ ນາງດ່ອນ ແຂ່ງຂັນກັນກ່ອນ ຮີດຄອງປະເພນີ, ຈຶ່ງດຳເນີນການແຂ່ງຂັນຕາມຕາຕະລາງຄາດຄູ່, ສ່ວນການແຂ່ງຂັນຈະປະຕິບັດໃນຮູບແບບ ເສຍສອງຄັ້ງແລ້ວຂັດອອກ ພ້ອມທັງຈັດອັນດັບທີ, ສ່ວນເຮືອທີ່ເສຍຄັ້ງໜຶ່ງ ແມ່ນສາມາດຊີງຂຶ້ນໄປເຖິງຮອບຊີງຊະນະເລີດ ໂດຍຈະດຳເນີນເປັນເວາ 1 ວັນຈຶ່ງສຳເລັດ.
ຂ່າວ: ມີເດຍລາວ

23/08/2025

ທ່ານ ສະເຫຼີມໄຊ ກົມມະສິດ ຊີ້ນຳວຽກງານ ແຂວງຊຽງຂວາງ.

ໃນວັນທີ 22 ສິງຫາ 2025 ທີ່ຫ້ອງວ່າການແຂວງຊຽງຂວາງ, ທ່ານ ສະເຫຼີມໄຊ ກົມມະສິດ, ຮອງນາຍົກລັດ ຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ແລະ ການພົວພັນຮ່ວມມືກັບຕ່າງປະເທດ ໄດ້ພົບປະໂອ້ລົມ ຊີ້ນຳວຽກງານ ຕໍ່ການນຳຫຼັກແຫຼ່ງ, ໂດຍການຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມມີ ທ່ານ ບຸນຈັນ ສີວົງພັນ, ເຈົ້າແຂວງໆຊຽງຂວາງ ພ້ອມດ້ວຍຄະນະນຳຂອງແຂວງ ແລະ ບັນດາພະແນກການອ້ອມຂ້າງແຂວງ.
ໃນໂອກາດນີ້, ທ່ານ ເຈົ້າແຂວງໆຊຽງຂວາງ ໄດ້ລາຍງານ ກ່ຽວກັບສະພາບການພັດທະນາເສດຖະກິດ-ສັງຄົມ ທີ່ພົ້ນເດັ່ນຂອງແຂວງ ໃນໄລຍະ 8 ເດືອນທີ່ຜ່ານມາ ໃຫ້ຊາບວ່າ ໄດ້ເອົາໃຈໃສ່ນໍາພາປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ຫັນພະນັກງານລົງກໍ່ສ້າງຮາກຖານການເມືອງ ຢູ່ຈຸດທີ່ຫຼໍ່ແຫຼມ; ການພັດທະນາເສດຖະກິດ ມີທ່າອ່ຽງເພີ່ມຂຶ້ນ, ຄາດຄະ ເນໝົດປີ 2025 ຈະຂະຫຍາຍຕົວໃນລະດັບ 6%; ໄດ້ສຸມໃສ່ການຜະລິດກະສິກໍາ, ປູກພືດສະບຽງອາຫານ ແລະ ພືດເປັນສິນຄ້າ ເປັນຕົ້ນ ການປູກເຂົ້າ ແລະ ລ້ຽງສັດໃຫຍ່ ຢ່າງເປັນຂະບວນກວ້າງຂວາງ; ດ້ານພະລັງງານໄຟຟ້າ ສາມາດຜະລິດ ແລະ ຈໍາໜ່າຍ ໄດ້ 73 ລ້ານກວ່າກິໂລວັດໂມງ, ເທົ່າກັບ 52% ຂອງແຜນປີ; ດ້ານແຮ່ທາດ ທີ່ເຄື່ອນໄຫວຢູ່ແຂວງຊຽງຂວາງ ມີທັງໝົດ 93 ບໍລິສັດ, ໃນນັ້ນ ສຶກສາສຳຫຼວດ 27 ບໍລິສັດ, ຂຸດຄົ້ນ ແລະ ປຸງແຕ່ງ 66 ບໍລິສັດ; ວຽກງານວັດທະນະທຳ-ສັງຄົມ ໄດ້ເອົາໃຈໃສ່ປັບປຸງພື້ນຖານໂຄງລ່າງ, ຍົກລະດັບຄຸນນະພາບການຮຽນ-ການສອນ, ການບໍລິການ ດ້ານສາທາລະນະສຸກ ໃຫ້ດີຂຶ້ນເປັນກ້າວໆ; ທົ່ວແຂວງຍັງມີບ້ານທຸກຍາກ ກວມ 38%, ມີບ້ານພັດທະນາ ກວມ 22%, ພິເສດ ໄດ້ຈັດພິທີປະກາດ ແລະ ຮັບຮອງເອົາບ້ານຄັງວຽງ, ເມືອງໝອກ ເປັນຕົວເມືອງນ້ອຍໃນຊົນນະບົດ ໃນເດືອນມິຖຸນາ ທີ່ຜ່ານມາ; ການພົວພັນ-ຮ່ວມມືກັບຕ່າງປະເທດ ໄດ້ເອົາໃຈໃສ່ ເສີມຂະຫຍາຍສາຍພົວພັນ ແລະ ການຮ່ວມມືອັນດີງາມກັບ ແຂວງ ແລະ ນະຄອນ ຈຳນວນໜຶ່ງ ຂອງ ສສ ຫວຽດນາມ ແລະ ສປ ຈີນ ໂດຍໄດ້ຜັດປ່ຽນກັນໄປຢ້ຽມຢາມ ພົບປະແລກປ່ຽນບົດຮຽນ ແລະທັດສະນະສຶກສາ ເຊິ່ງກັນ ແລະ ກັນຢ່າງເປັນປົກກະຕິ.
ໃນໂອກາດດຽວກັນ, ຮອງນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມ ຕໍ່ຜູ້ເຂົ້າຮ່ວມ ໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດ ທີ່ແຂວງສາມາດຍາດມາໄດ້ ໃນໄລຍະທີ່ຜ່ານມາ; ໄດ້ຍົກໃຫ້ເຫັນສະພາບພົ້ນເດັ່ນທີ່ເກີດຂຶ້ນຢູ່ສາກົນ, ພາກພື້ນ ແລະ ພາຍໃນປະເທດ ໂດຍສະເພາະ ທ່າອ່ຽງ, ຄວາມສ່ຽງ ແລະ ບັນດາສິ່ງທ້າທາຍ ຕໍ່ການພັດທະນາເສດຖະກິດສັງຄົມ ຂອງປະເທດເຮົາ. ອັນສຳຄັນ, ທ່ານ ໄດ້ເນັ້ນໜັກຕໍ່ການນຳແຂວງ ໃຫ້ເອົາໃຈໃສ່ຕື່ມບາງຈຸດ ເປັນຕົ້ນ: ສືບຕໍ່ນໍາພາ-ຊີ້ນໍາ ຈັດຕັ້ງປະຕິບັດວຽກງານປ້ອງກັນຊາດ, ປ້ອງກັນຄວາມສະຫງົບ, ຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ ຢູ່ພາຍໃນແຂວງ ໃຫ້ມີຄວາມສະຫງົບຕໍ່ເນື່ອງ; ສືບຕໍ່ເພີ່ມທະວີສຶກສາອົບຮົມ ວຽກງານການເມືອງ-ແນວຄິດ ດ້ວຍຫຼາຍຮູບການ, ສອດຫ້ອຍຢູ່ນໍາທຸກຂົງເຂດວຽກງານ ແລະ ຕ້ອງເຮັດຢ່າງເປັນປະຈຳ; ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕາມ 5 ຈຸດສຸມ ໃຫ້ໄດ້ຮັບສຳເລັດຕາມແຜນທີ່ກຳນົດໄວ້; ເອົາໃຈໃສ່ການຈັດເກັບລາຍຮັບ, ອັດຊ່ອງວ່າງການຮົ່ວໄຫຼຂອງງົບປະມານ ແລະ ສືບຕໍ່ສ້ອມແປງເສັ້ນທາງ ໃຫ້ສາມາດທຽວໄປມາໄດ້ສະດວກ; ສຸມໃສ່ເລັ່ງແກ້ໄຂປະກົດການຫຍໍ້ທໍ້ດ້ານແຮ່ທາດ ຕາມນິຕິກໍາຕ່າງໆ ທີ່ພັກ-ລັດຖະບານວາງອອກ ຢ່າງເຂັ້ມງວດ ແລະ ເດັດຂາດ, ທັງເພີ່ມທະວີການຄຸ້ມຄອງທີ່ມີປະສິດທິຜົນສູງ ໂດຍສະເພາະ ການປະຕິບັດດ້ານພັນທະ, ການປົກປັກຮັກສາສິ່ງແວດລ້ອມ, ການປ້ອງກັນຜົນກະທົບດ້ານຕ່າງໆ ໃຫ້ດີ; ສືບຕໍ່ເອົາໃຈໃສ່ພົວພັນຮ່ວມມືກັບຕ່າງປະເທດ ໂດຍສະເພາະ ກັບບັນດາປະເທດເພື່ອນມິດຍຸດທະສາດ ແລະ ຄູ່ຮ່ວມພັດທະນາ ຢູ່ໃນທ້ອງຖິ່ນຂອງຕົນ ໃຫ້ມີປະສິດທິພາບ, ປະສິດທິຜົນ; ໄດ້ສະເໜີ ໃຫ້ສືບຕໍ່ກະກຽມຄວາມພ້ອມຮອບດ້ານ ໃຫ້ແກ່ການດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ໃຫ້ດີ ແລະ ມີຜົນສໍາເລັດ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້.
ໃນຕອນທ້າຍ, ກໍ່ໄດ້ມີບໍລິສັດຈຳນວນໜຶ່ງມອບທຶນຊ່ວຍເຫຼືອ ຈໍານວນ 2,420,000,000 ກີບ (ສອງພັນສີ່ຮ້ອຍຊາວລ້ານກີບ) ໃຫ້ແກ່ອົງການປົກຄອງແຂວງຊຽງຂວາງ ເພື່ອນໍາໃຊ້ເຂົ້າໃນການກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ແລະ ຟື້ນຟູຜົນກະທົບ ຈາກໄພພິບັດທຳມະຊາດ ທີ່ເກີດຂຶ້ນໃນປີ 2025. ຫຼັງຈາກນັ້ນ, ທ່ານ ຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປຕິດຕາມກວດກາເບິ່ງພື້ນທີ່ຕົວຈິງ ການຂຸດຄົ້ນແຮ່ຫາຍາກ ຂອງບໍລິສັດ ກວາງຈຽນຊິນ ແສງສະຫວ່າງ ພັດທະນາແຮ່ຫາຍາກ ແລະ ໄດ້ໄປຢ້ຽມຢາມຟາມລ້ຽງງົວນົມ ຂອງບໍລິສັດ ພັດທະນາກະສິກຳ ລາວ-ຢີ່ປຸ່ນ ຢູ່ພາຍໃນແຂວງດັ່ງກ່າວ ຕື່ມອີກ.

ຂ່າວ ແລະ ພາບ: ກົມປະຊາສຳພັນ, ຫສນຍ.

23/08/2025

ທ່ານ ສົມມາດ ພົລເສນາ ເຄື່ອນໄຫວວຽກງານ ຢູ່ແຂວງອັດຕະປື

ວັນທີ 21-22 ສິງຫາ 2025, ທ່ານ ສົມມາດ ພົລເສນາ ກໍາມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ຕິດຕາມກວດກາໂຄງການພັດທະນາທີ່ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ສິ່ງແວດລ້ອມ ຢູ່ແຂວງອັດຕະປື ໂດຍການຕ້ອນຮັບຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ.
ໂອກາດນີ້, ທ່ານ ສົມມາດ ພົລເສນາ ກໍໄດ້ພົບປະກັບ ພົທ ວັນທອງ ກອງມະນີ ກໍາມະການສູນກາງພັກ ເລຂາພັກແຂວງ ເຈົ້າແຂວງອັດຕະປື ເພື່ອແຈ້ງຈຸດປະສົງຂອງການເຄື່ອນໄຫວ ພ້ອມນີ້, ໄດ້ຮັບຟັງການລາຍງານກ່ຽວກັບສະພາບລວມໃນການຊີ້້ນຳ-ນໍາພາ ຂອງຄະນະພັກ, ອົງການປົກຄອງແຂວງ ຕໍ່ແຜນພັດທະນາເສດຖະກິດ-ສັງຄົມຂອງແຂວງ ເຊິ່ງມີຫຼາຍດ້ານທີ່ພົ້ນເດັ່ນ.
ຈາກນັ້ນ, ໄດ້ຈັດກອງປະຊຸມເຮັດວຽກຮ່ວມກັບສະພາປະຊາຊົນແຂວງ ຕາງໜ້າພະແນກການຂອງແຂວງຄື: ພະແນກການເງີນ, ພະກະສິກຳ ແລະ ສິ່ງແວດລ້ອມ, ອຸດສາຫະກຳ ແລະ ການຄ້າ, ແຮງງານ ແລະ ສະຫວັດດີການສັງຄົມ, ສຶກສາທິການ ແລະ ກິລາ ແລະ ແຂກທີ່ຖືກເຊີນເຂົ້າຮ່ວມ ເຊິ່ງມີຈຸດປະສົງເພື່ອຕິດຕາມກວດກາການຈັດຕັ້ງປະຕິບັດຂອງບັນດາໂຄງການພັດທະນາເສດຖະກິດ-ສັງຄົມ ທີ່ມີຜົນກະທົບຕໍ່ຊີວິດການເປັນຢູ່ຂອງປະຊາຊົນ ບັນດາເຜົ່າ ແລະ ສິ່ງແວດລ້ອມ ໂດຍສະເພາະແມ່ນຜົນກະທົບຈາກໂຄງການຂຸດຄົ້ນແຮ່ທາດ ຕິດພັນກັບການຈັດຕັ້ງປະຕິບັດວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ເພື່ອເກັບກຳຂໍ້ມູນສະພາບຕົວຈິງຢູ່ຂົງເຂດທີ່ໄດ້ຮັບຜົນກະທົບຈາກໂຄງການພັດທະນາ, ພື້ນທີ່ທຳການຜະລິດ, ນ້ຳກິນນ້ຳໃຊ້ບໍ່ພຽງພໍ, ນິເວດວິທະຍາ, ຄວາມອຸດົມສົມບູນຂອງຊັບພະຍາກອນທຳມະຊາດ ກໍຄືການທົດແທນຄ່າເສຍຫາຍ, ການປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ ນຳມາວິເຄາະວິໄຈ ແລະ ສັງລວມລາຍງານຕໍ່ກອງປະຊຸມ ຄະນະປະຈໍາສະພາແຫ່ງຊາດ ເພື່ອສະເໜີທິດທາງ, ວິທີການ ແລະ ມາດຕະການ ໃຫ້ລັດຖະບານ ກໍຄືຂະແໜງການທີ່ກ່ຽວຂ້ອງ ປັບປຸງແກ້ໄຂ.
ກອງປະຊຸມໄດ້ຮັບຟັງ ແລະ ຕີລາຄາຄືນການຈັດຕັ້ງປະຕິບັດນິຕິກໍາໃຕ້ກົດໝາຍ, ມະຕິສະພາແຫ່ງຊາດ ໃນວຽກງານການເຊົ່າສຳປະທານທີ່ດິນຂອງບໍລິສັດທາໂກ, ບໍລິສັດ ວັງຕັດ ຂຸດຄົ້ນແຮ່ຄຳ ຈຳກັດ, ການຊົດເຊີຍຜົນກະທົບ, ການເວນຄືນເນື້ອທີ່ດີນ, ການຍົກຍ້າຍຈັດສັນ, ສ້າງອາຊີບຄົງທີ່ ໂດຍສະເພາະການສົ່ງເສີມດ້ານການປູກການລ່ຽງ, ການອອກໃບຕາດິນ ແລະ ການຈັດສັນ-ຄຸ້ມຄອງ 3 ປະເພດປ່າ, ການເຝິກອົມຮົບອາຊີບໃຫ້ແກ່ປະຊາຊົນ ແລະ ການກໍ່ສ້າງພື້ນຖານໂຄງລ່າງຕ່າງໆ ທີ່ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ສິ່ງແວດລ້ອມ ຢູ່ແຂວງອັດຕະປື.
ໃນການເຄື່ອນໄຫວຢູ່ ຄັ້ງນີ້, ທ່ານ ສົມມາດ ພົລເສນາ ພ້ອມດ້ວຍຄະນະຈາກສະພາແຫ່ງຊາດ ແລະ ສະພາປະຊາຊົນແຂວງ ຍັງໄດ້ເຄື່ອນໄຫວຢ້ຽມຢາມ ພາກສະໜາມຂອງບໍລິສັດທາໂກ ຕັ້ງຢູ່ບ້ານຫາດຊັນ ເມືອງໄຊເສດຖາ ແລະ ບໍລິສັດ ວັງຕັດ ຂຸດຄົ້ນແຮ່ຄຳ ຈຳກັດ ຢູ່ເຂດບ້ານວັງຕັດ ເມືອງຊານໄຊ ແຂວງອັດຕະປື. ເພື່ອຢ້ຽມຢາມ ແລະ ຮັບຟັງການລາຍງານການຈັດຕັ້ງປະຕິບັດກິດຈະການຕ່າງໆຂອງທັງສອງບໍລິສັດ ຕິດພັນກັບການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃຫ້ແກ່ປະຊາຊົນລາວບັນດາເຜົ່າ ໃນເຂດພັດທະນາໂຄງການ ເຊິ່ງຜ່ານການຢ້ຽມຢາມທັງສອງບໍລິສັດ ລ້ວນແລ້ວແຕ່ເປັນບໍລິສັດໃຫຍ່ ມີການລົງທຶນຫຼາຍໃນຂະແໜງກະສິກຳ ແລະ ບໍ່ແຮ່, ປູກຢາງພາລາ, ປູກກ້ວຍ, ລ້ຽງງົວພັນຊີ້ນ ແລະ ການຂຸດຄົ້ນແຮ່ຄໍາ ແລະ ອື່ນໆ.

(ວິນັດ ສີສຸລາດ)

23/08/2025

ຫວນລະນຶກເຖິງ ວັນຍຶດອຳນາດທົ່ວປະເທດ
=========/========
ວັນທີ 23 ສິງຫາ ປີ 1945 ແລະ ປີ 1975 ແມ່ນເຫດການສໍາຄັນທາງປະຫວັດສາດຂອງຊາດລາວເຮົາ ທີ່ໄດ້ສະແດງໃຫ້ເຫັນມານະຈິດ ແລະ ມູນເຊື້ອແຫ່ງການຕໍ່ສູ້ພິລະອາດຫານຂອງຄົນລາວທຸກເຜົ່າ, ທຸກຊັ້ນຄົນທີ່ຮັກຊາດ ຮັກບ້ານເກີດເມືອງນອນ ພາຍໃຕ້ການນຳພາອັນສະຫຼາດສ່ອງໃສ ຂອງພັກປະຊາຊົນປະຕິວັດລາວ ເພື່ອຄວາມເປັນເອກະລາດຂອງຊາດ ແລະ ອິດສະຫຼະພາບຂອງຕົນດ້ວຍຈິດໃຈ “ຍອມຕາຍດີກວ່າຍອມເປັນຂ້ອຍຂ້າຕ່າງຊາດ”

ວັນທີ 23 ສິງຫາ ແມ່ນວັນແຫ່ງມະຫາສາມັກຄີ, ແມ່ນວັນແຫ່ງການຕໍ່ສູ້ທີ່ອາດຫານຊານໄຊຂອງປະຊາຊົນລາວ. ການຍຶດອຳນາດໃນວັນທີ 23 ສິງຫາ 1945 ແມ່ນເຫດການສໍາຄັນທາງປະຫວັດສາດແຫ່ງການຕໍ່ສູ້ຕ້ານລັດທິລ່າເມືອງຂຶ້ນແບບເກົ່າ.

ພາຍຫຼັງການຍຶດອຳນາດໃນວັນທີ 23 ສິງຫາ 1945 ໄດ້ບໍ່ພໍເທົ່າໃດມື້ພວກລ່າເມືອງຂຶ້ນຝຣັ່ງກໍໄດ້ເພີ່ມກຳລັງຕ່າວໂຈມຕີ ແລະ ກັບຄືນມາຍຶດຄອງປະເທດເຮົາເປັນຫົວເມືອງຂື້ນອີກເທື່ອໃໝ່. ຈາກນັ້ນມາປະຊາຊົນລາວຈຳຕ້ອງໄດ້ດຳເນີນການຕໍ່ສູ້ຢ່າງລະອິດລະອ້ຽວຂ້ຽວຂາດ, ຍືດເຍື້ອຍາວນານ ແລະ ມີໄຊຍິ່ງໃຫຍ່ພາຍໃຕ້ການນຳພາຂອງພັກປະຊາຊົນປະຕິວັດລາວ ຕ້ານກັບລັດທິລ່າເມືອງຂື້ນແບບເກົ່າ, ແບບໃໝ່ ແລະ ອິດທິກຳລັງປະຕິການທີ່ເປັນຕີນມືຂອງພວກເຂົາ.
ວັນຍຶດອຳນາດ 23 ສິງຫາ 1975 ໄດ້ສ້າງເງື່ອນໄຂອໍານວຍ ໃຫ້ແກ່ການດຳເນີນກອງປະຊຸມໃຫຍ່ຜູ້ແທນທົ່ວປະເທດຄັ້ງປະຫວັດສາດປະກາດລົບລ້າງລະບອບສັກດີນາ – ລ່າເມືອງຂຶ້ນ, ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງເປັນທາງການໃນວັນທີ 2 ທັນວາ 1975.

ສະນັ້ນ, ຈຶ່ງເວົ້າໄດ້ວ່າວັນຍຶດອຳນາດ 23 ສິງຫາ 1975 ແມ່ນວັນແຫ່ງການເສີມຂະຫຍາຍມູນເຊື້ອສາມັກຕີຕໍ່ສູ້ພິລະອາດຫານຂອງຊາດລາວ – ຄົນລາວວິລະຊົນ, ແມ່ນວັນແຫ່ງການເຊີດຊູມານະຈິດປະຕິວັດ ແລະ ນ້ຳໃຈຮັກຊາດອັນສູງສົ່ງຂອງຄົນລາວເພື່ອສ້າງຜົນງານ ແລະ ຍາດເອົາໄຊຊະນະໃໝ່ໃຫຍ່ຫຼວງກວ່າເກົ່າ.

22/08/2025

#ຮິດຢ່າໃຫ້ໝອງຄອງຢ່າໃຫ້ເສົ້າ ຕາມພໍ່ແມ່ ປູຍ່າ ຕາຍາຍຍ ໄດ້ພາເຮັດກັນມາ, ມຶ້ອື່ນຢ່າລືມໄປເຮັດບຸນນຳກັນເດີ້ 23/08/2025 ໃສ່ບາດ ບຸນຫໍ່ເຂົ້າປະດັບດີນ.
--------------------------
#ປະເພນີບຸນເຂົ້າປະດັບດິນ.
ຄໍາວ່າ “ເຂົ້າປະດັບດິນ” ໄດ້ແກ່ເຂົ້າ ແລະເຄື່ອງຫວານຂອງຄາວພ້ອມທັງໝາກພູຢາສູບທີ່ຫໍ່ດ້ວຍໃບຕອງກ້ວຍ ຫຼືພາຊະນະອື່ນໆ(ດີແທ້ຄວນໃສ່ແຕ່ໃບຕອງບໍ່ຄວນໃສ່ຖົງຢາງຫຼືກັບໂຟມ)ແລ້ວນໍາໄປວາງໄວ້ຕາມໜ້າດິນບໍລິເວນໃນວັດ, ອ້ອມວັດ, ບ້ານເຮືອນ ແລະໄຮ່ນາຮົ້ວສວນ ຫຼືຫ້ອຍໄວ້ຕາມຕົ້ນໄມ້ ເພື່ອທານໃຫ້ດວງວິນຍານບັນພະບູລຸດ ແລະຍາດພີ່ນ້ອງຂອງຕົນເອີ້ນວ່າເຂົ້າປະດັບດິບ.

ການເຮັດບຸນເຂົ້າປະດັບດິນກໍານົດຂຶ້ນໃນວັນແຮມ 14 ຄໍ່າເດືອນເກົ້າ (ເດືອນເກົ້າດັບ) ໂດຍມີຄວາມເຊື່ອມາແຕ່ບູຮານວ່າ ມື້ເດືອນເກົ້າດັບເປັນມື້ທີ່ຈ່າຍົມພິບານປ່ອຍສັດນາຮົກໃຫ້ກັບຄືນມາໂລກມະນຸດ ເພື່ອຮັບເອົາເຄື່ອງກິນຂອງທານຈາກຍາດຕິພີ່ນ້ອງທີ່ຍັງມີຊີວິດຢູ່ໃນໂລກມະນຸດໂດຍມີການທານໃນສອງລັກສະນະຄື ການນໍາເຄື່ອງຫວານຂອງຄາວໄປຫ້ອຍ ຫຼືປະໄວ້ຕາມກໍາແພງວັດ, ຮົ້ວຮາວ ແລະສະຖານທີ່ສໍາຄັນເຊັ່ນ ຕາມກໍາແພງ ຫຼືຮົ້ວເຮືອນຕາມໄຮ່ນາ. ນອກຈາກນັ້ນ, ຍັງມີການທໍາບຸນຖວາຍທານແກ່ພຣະສົງສາມະເນນເພື່ອອຸທິດສ່ວນບຸນກຸສົນຫາຍາດຕິພີ່ນ້ອງທີ່ລ່ວງລັບໄປແລ້ວ.

ເນື່ອງຈາກວ່າ ຜີຫຼືອະສຸລະກາຍຈະກິນອາຫານດ້ວຍສອງວິທີຄື ອາຫານທີ່ຄົນນໍາມາໄຫວ້ ຫຼືບູຊາຜີຈະມານັ່ງກິນເໝືອນກັບມະນຸດກິນເຂົ້າ ແຕ່ເປັນການກິນດ້ວຍອຸປະທານຄື ກິນດ້ວຍຄວາມຍຶດໝັ້ນວ່າຕົນໄດ້ກິນສິ່ງນັ້ນສິ່ງນີ້ ແຊບແນວນັ້ນແນວນີ້ດັ່ງຄໍາເວົ້າວ່າ “ຜີກິນອາຍຄົນບາຍຕ່ອນ” ການກິນລັກສະນະນີ້ ເອີ້ນວ່າກິນດ້ວຍການນ້ອມຈິດເຂົ້າໄປກິນ ແຕ່ການກິນລັກສະນະນີ້ເປັນການແກ້ໄຂສະເພາະໜ້າເທົ່ານັ້ນບໍ່ດົນຜີ ຫຼືອະສຸລະກາຍເຫຼົ່ານັ້ນກໍກັບມາອຶດຫິວ ແລະມີອັດຕະພາບດັ່ງເດີມ ແລະສໍາລັບເຂົ້າປາອາຫານທີ່ຍາດພີ່ນ້ອງຖວາຍແກ່ພຣະສົງແລ້ວອຸທິດສ່ວນບຸນໄປໃຫ້ ສະພາບຂອງອາຫານການກິນທັງຫຼາຍ ຈະແປສະພາບເປັນບຸນ ເປັນອາຫານທິບ ທີ່ພຽງແຕ່ຜີ ຫຼືອະສຸລະກາຍນັ້ນນ້ອມຈິດຂອງຕົນອະນຸໂມທະນາຮັບເອົາກໍຈະຮູ້ສຶກອີ່ມເກີດເປັນປິຕິສຸກຄື ມີຄວາມຮູ້ສຶກອີ່ມທາງໃຈປຽບເໝືອນຄົນທີ່ອີ່ມບຸນຈະບໍ່ຮູ້ສຶກອິດເມື່ອຍຫຼືຫິວເລີຍແຕ່ກັບຮູ້ສຶກມີຄວາມສຸກຢູ່ໃນໃຈ.

ນອກຈາກນັ້ນ, ການກິນລັກສະນະນີ້ທີ່ຍາດອຸທິດບຸນໃຫ້ ເປັນການຊ່ວຍເຫຼືອໃຫ້ເປັນການຊ່ວຍໃຫ້ພົ້ນທຸກຢ່າງຖາວອນ ເພາະນອກຈາກຈະເຮັດໃຫ້ຫາຍຈາກຄວາມອຶດຫິວແລ້ວ ຍັງເຮັດໃຫ້ອັດຕະພາບຂອງຜີ ຫຼືອະສຸລະກາຍເຫຼົ່ານັ້ນໄດ້ພົ້ນຈາກຄວາມທຸກໄດ້ສະເຫວີຍສຸກຕາມກໍາລັງບຸນທີ່ຍາດອຸທິດຫາອີກດ້ວຍ.

ການນໍາເອົາວັດຖຸເຄື່ອງຫວານເຄື່ອງຄາວໄປປະດັບໄວ້ດິນດັ່ງກ່າວນັ້ນນອກຈາກຈະເປັນການທານໃຫ້ແກ່ຍາດພີ່ນ້ອງແລ້ວຍັງເປັນການຜາຍແຜ່ແກ່ມະນຸດສັບພະສັດທັງຫຼາຍໃຫ້ໄດ້ຮັບທົ່ວເຖິງກັນຢ່າງອຸດົມສົມບູນເຊັ່ນຄົນທຸກຍາກ ນົກໜູປູປີກ ແລະມົດແມງຕ່າງໆ ສະແດງເຖິງຄວາມເອື້ອເຟື້ອເຜື່ອແຜ່ວັດຖຸທານຂອງຕົນຢ່າງບໍ່ຫວງແຫນ.

ບຸນເຂົ້າປະດັບດິນຖືເປັນບຸນໜຶ່ງທີ່ສໍາຄັນຂອງຊາດເຊິ່ງເຈົ້າມະຫາຊີວິດຈະຕ້ອງໄດ້ເປັນແມ່ແບບໃນການນໍາໜ້າພາທາງປະຕິບັດເພື່ອຄວາມຢູ່ເຢັນເປັນສຸກຂອງບ້ານເມືອງ ແລະປະຊາລາສະດອນດັ່ງປາກົດອອກໃນຄອງ 14 ຂອງພຣະລາຊາວ່າ

“ ເປັນທ້າວພະຍາ ຄັນຮອບເດືອນ 9 ດັບໃຫ້ປ່າວເຕືອນລາດສະດອນບ້ານເມືອງ ຂອງຕົນທານຫໍ່ເຂົ້າປະດັບດິນໄປຫາປູ່ຍ່າຕາຍາຍລູກເຕົ້າ ຫຼານເຫຼັນອັນເຖິງແກ່ອະນິດຈະກຳ ໄປສູ່ປະລະໂລກທົ່ວທຸກແຫ່ງ ແລ້ວໃຫ້ເຈົ້ານາຍເສນາຂ້າລາດຊະການຫົວບ້ານຫົວເມືອງສິບຮ້ອຍນ້ອຍໃຫຍ່ລົງມາຖືນ້ຳພະພິພັດຖວາຍສັດສານຸສັດອີກເທື່ອໜຶ່ງ ແລ້ວຊ່ວງເຮືອສະຫຼອງອຸສຸພະນາກປາກດົງ ແລະ ປາກຄານພະຍານາກ 15 ຕະກຸນ ອັນຮັກສາບ້ານເມືອງຈຶ່ງຈະຢູ່ເຢັນເປັນສຸກເຂົ້າໄຮ່ນາບໍລິບູນ”.

ນອກຈາກບຸນເຂົ້າປະດັບດິນແລ້ວຢູ່ຫຼວງພະບາງຍັງມີການຈັດບຸນຊ່ວງເຮືອຂຶ້ນ ອັນເປັນການສືບທອດຮີດຄອງມາແຕ່ສະໄໝອານາຈັກລາວລ້ານຊ້າງ ເຊິ່ງຈຸດປະສົງແມ່ນເພື່ອບູຊາ ພະຍານາກ 15 ຕະກຸນ ອັນເປັນເທວະດາຮັກສາທາງນໍ້າຄື ນາງດໍາຢູ່ຄົກທອ່ນ, ນາງດ່ອນຢູ່ຄົກເຮືອ, ນາງຄໍາເຝືອຢູ່ເໜືອທ່າຊ້າງ, ທ້າວໂຕ່ງກວ້າງຂວາງຢູ່ປາກຄານ, ທ້າວທອງຈານຢູ່ຜາດ່ຽວ, ທ້າວຄໍາປ່ຽວຢູ່ຜາເສືອ, ທ້າວບຸນເຍືອຢູ່ກ້ອນກ່າຍຟ້າ, ທ້າວຄໍາຫຼ້າຢູ່ຜາບັງ, ທ້າວຄໍາປັງຢູ່ພູຊ້າງ, ທ້າວບຸນກວ້າງຢູ່ພູຊວງ, ທ້າວບຸນຍວງຢູ່ກ້ອງໝຶດແອ່ນ, ທ້າວຄໍາແທ່ນຢູ່ຜາຊະວາ, ທ້າວຈົງລົວຢູ່ຜາສຸມເສົ້າ(ຜາຍ່າເຖົ້າ), ອຸສຸພະນາກເຈົ້າຢູ່ເຝົ້າສົບດົງ ແລະທ້າວໃຈຈໍານົງຢູ່ຮັກສາພຣະບາດ ສີສັດຕະນາກເຈົ້າຢູ່ເຝົ້າຈອມສີ. ເພື່ອໃຫ້ບ້ານເມືອງຢູ່ເຢັນເປັນສຸກ ທັງເປັນໄລຍະທີ່ມີນໍ້າອຸດົມສົມບູນສະດວກແກ່ການຊ່ວງເຮືອ ແລະໄດ້ກາຍມາເປັນປະເພນີປະຈໍາຂອງແຂວງຫຼວງພະບາງຈົນເທົ້າທຸກວັນນີ້.

#ມູນເຫດແຫ່ງການເຮັດບຸນເຂົ້າປະດັບດິນ

ດັ່ງໄດ້ກ່າວໃນເບື້ອງຕົ້ນແລ້ວວ່າຄົນລາວບູຮານມີຄວາມເຊື່ອທີ່ສືບທອດກັນມາແຕ່ບູຮານນະການວ່າໃນມື້ວັນເດືອນເກົ້າດັບເປັນມື້ທີ່ຈ່າຍົມພິບານທີ່ຮັກສານາຮົກໄດ້ເປີດປະຕູນາຮົກປ່ອຍໃຫ້ສັດນາຮົກທັງຫຼາຍໄດ້ມີໂອກາດກັບມາຍັງໂລກມະນຸດເພື່ອຮັບເອົາວັດຖຸ ຫວານຄາວ ແລະສ່ວນບຸນກຸສົນທີ່ຍາດຕິພີ່ນ້ອງພ້ອມໃຈກັນອຸທິດຫາ.

ນອກຈາກນັ້ນ, ຍັງມີເລື່ອງເລົ່າໄວ້ໃນທໍາມະບົດວ່າ ໃນສະໄໝພຸດທະການຍາດຂອງພະເຈົ້າພິມພິສານໄດ້ພາກັນກິນຂອງສົງໂດຍບໍ່ໄດ້ຮັບອະນຸຍາດເຊັ່ນ ອາຫານຫວານຄາວ ແລະໝາກໄມ້ພາຍໃນວັດເມື່ອສິ້ນຊີບວາຍຊົນໄປຈຶ່ງໄດ້ເອົາຕົນເມືອເກີດເປັນເຜດໄດ້ຮັບຄວາມທຸກທໍລະມານ ອຶດຢາກຫອດຫິວ ເຂົ້າຈະກິນກໍ່ບໍ່ມີ ຜ້າຈະນຸ່ງຫົ່ມກໍບໍ່ມີ ເປັນເຜດຜີເປືອຍຢູ່ໃນແຖວນັ້ນ ມື້ໝຶ່ງພຣະເຈົ້າພິມພິສານເຂົ້າໄປຖວາຍທານ ພວກຍາດພີ່ນ້ອງເຫຼົ່ານັ້ນຈຶ່ງເກີດຄວາມປິຕິຍິນດີເປັນຢ່າງຍິ່ງພ້ອມກັນມາຮັບເອົາຜົນບຸນ ແຕ່ພຣະເຈົ້າພິມພິສານບໍ່ໄດ້ ອຸທິດຜົນສົ່ງໄປໃຫ້ພວກເຜດຍາດພີ່ນ້ອງຈຶ່ງບໍ່ໄດ້ຮັບຜົນທານ ຕ່າງກໍມາສະແດງປະຕິກິລິຍາຮ້ອງໄຫ້ຄວນຄາງ ໃຫ້ປະກົດແກ່ເຈົ້າພິມພິສານ ພຣະອົງສົງໄສວ່າແມ່ນເຫດອັນໃດຈຶ່ງໄດ້ນຳເອົາເລື່ອງນັ້ນເຂົ້າໄປຂາບທູນພຣະພຸດທະເຈົ້າ ພຣະພຸດທະອົງຈຶ່ງໄດ້ຕັດ ບອກເລື່ອງນັ້ນໃຫ້ເຈົ້າພິມພິສານຊົງຊາບ ແລ້ວ ຈຶ່ງໄດ້ເຮັດທານ ອຸທິດຜົນສົ່ງໄປໃຫ້ ພວກເຜດເຫຼົ່ານັ້ນຈຶ່ງໄດ້ຮັບຜົນທານ ມີເຂົ້າປາອາຫານອຸດົມສົມບູນແຕ່ຍັງບໍ່ມີຜ້ານຸ່ງ ມື້ຕໍ່ມາພຣະເຈົ້າພິມພິສານຖວາຍຜ້າ ແລ້ວອຸທິດຜົນສົ່ງໄປໃຫ້ອີກ. ພວກເຜດເຫຼົ່ານັ້ນຈຶ່ງອຸດົມສົມບູນໄປດ້ວຍອາຫານ ພ້ອມທັງເຄື່ອງນຸ່ງຫົ່ມທຸກປະການ ດ້ວຍເຫດຜົນນີ້ຍາດພີ່ນ້ອງຂອງເຮົາທັງຫຼາຍທີ່ລ່ວງລັບໄປແລ້ວ ເມື່ອເຂົາເຈົ້າຍັງຢູ່ໃນເປຕະວິໄສຍັງບໍ່ໄດ້ໄປເກີດ ກຸສົນທີ່ເຮົາບຳເພັນໄປແລ້ວ ກໍຈະອຳນວຍປະໂຫຍດສຸກໃຫ້ແກ່ທັງສອງຝ່າຍ ຄືທັງຍາດພີ່ນ້ອງຂອງເຮົາ ແລະແກ່ຕົວເຮົາອີກດ້ວຍ.

ເພາະສະນັ້ນ, ຈຶ່ງມີການເຮັດບຸນເຂົ້າປະດັບດິນສືບໆກັນມາຈົນເຖິງປັດຈຸບັນນີ້.

#ພິທີເຮັດບຸນຫໍ່ເຂົ້າປະດັບດິນ

ມື້ແຮມ 13 ຄ່ຳ ເດືອນ 9 ກຽມຫາເຄື່ອງ ອາຫານຫວານຄາວ, ຫໍ່ເຂົ້າຕົ້ມ ເຂົ້າໜົມ ນໍ້າອ້ອຍ ນໍ້າຕານ ໝາກ ພູ ຢາດູດ ໃຫ້ຄົບເພື່ອຈະໄດ້ເຮັດທານ ແລ້ວແບ່ງສ່ວນຂອງທານນັ້ນອອກເປັນ 4 ສ່ວນຄື ທີ່ໜຶ່ງ ເອົາໄວ້ກິນກັນໃນຄອບຄົວ ສວນທີ່ສອງແບ່ງໃຫ້ຍາດຕິພີ່ນ້ອງ ຫຼືຍາດມິດສະຫາຍບ້ານໃກ້ເຮືອນຄຽງ ສ່ວນທີ່ສາມ ແມ່ນອຸທິດຜົນໃຫ້ແກ່ຍາດພີ່ນ້ອງພໍ່ແມ່ ແລະຄົນທີ່ລ່ວງລັບໄປແລ້ວ ໃນສ່ວນນີ້ເພິ່ນຈະຫໍ່ເປັນຫໍ່ນ້ອຍໃຫ້ໄດ້ພໍສົມຄວນ ເອົາໃບກ້ວຍມາຫໍ່ຂອງຫວານ 1 ຫໍ່ ຂອງຄາວ 1 ຫໍ່ ໝາກພູ ກອກຢາ 1 ຫໍ່ ແລ້ວຫຍິບຕິດກັນເປັນຫໍ່ໃຫຍ່ໃສ່ໃບຕອງ. ສ່ວນທີ່ສີ່ນັ້ນແມ່ນນໍາໄປຕັກບາດຖວາຍພຣະສົງ. ໂດຍມີຂັ້ນຕອນດັ່ງນີ້
ພໍເຖິງ 4 ໂມງເຊົ້າ ມື້ແຮມ 14 ຄ່ຳ ເດືອນ 9 ກໍເອົາເຄື່ອງສ່ວນທີ່ຈະເຮັດບຸນໃຫ້ແກ່ຍາດພີ່ນ້ອງທີ່ຕາຍໄປນັ້ນ ໃສ່ກະຕ່າກະບຸງເອົາໄປຫ້ອຍໄວ້ຕາມກົກໄມ້ ຕາມເດີ່ນວັດ ນອກກໍາແພງວັດ ແລະໄຮ່ນາຮົ້ວສວນ ສ່ວນນີ້ເຮົາຖືວ່າໄດ້ອຸທິດຜົນເພື່ອບຸບພະເປຕະພະລີແລ້ວ ຄັນແຈ້ງສວ່າງແລ້ວ ກໍເອົາສ່ວນທີ່ ຈັດໄວ້ສຳຫຼັບຖວາຍພຣະສົງນັ້ນໄປໂຮມກັນ ທີ່ສາລາໂຮງທໍາ ແລ້ວໄຫ້ວພຣະຮັບສິນ ຕັກບາດຖວາຍສັງຄະທານ ຟັງທໍາມະເທດສະໜາ ແລ້ວຄາລະວະຮັບພອນຢາດນໍ້າເປັນອັນຈົບພິທີ.

ຂອບໃຈບົດຄວາມ: ພຣະສຸລິຍາ
ຈາກປຶ້ມ: ເປີດປະຕູສູ່ວັດສີຄູນວຽງ

22/08/2025

#ແຈ້ງເຕືອນ ເພຈມູນນິທິກູ້ໄພປອມ ຢ່າຫຼົງເຊື່ອໂອນເງິນໄປຊ່ວຍເຫຼືອ ເປັນບັນຊີບູກຄົນ #ມູນນີທິກູ້ໄພແທ້ບັນຊີເປັນຊື່ຂອງມູນນິທິເທົ່ານັ້ນ.

22/08/2025

ຄະນະບໍລິຫານງານຊາວໜຸ່ມກະຊວງ ປກສ ອວຍພອນອົງການຜູ້ຕາງໜ້າກະຊວງປ້ອງກັນຄວາມສະຫງົບ ສສ ຫວຽດນາມ ປະຈຳ ສປປ ລາວ.
==========00000=========
ໃນຕອນບ່າຍວັນທີ 22 ສິງຫາ 2025 ຄະນະບໍລິຫານງານຊາວໜຸ່ມກະຊວງປ້ອງກັນຄວາມສະຫງົບ ນຳພາໂດຍ ພັອ ສີສົມບັດ ໄຊປັນຍາ ເລຂາຄະນະບໍລິຫານງານຊາວໜຸ່ມກະຊວງ ປກສ ພ້ອມດ້ວຍຄະນະ ເຂົ້າອວຍ
ພອນ ພົຈວ ຮິ່ງ ຕວ໋ນ ແຮັ້ງ ຫົວໜ້າອົງການຜູ້ຕາງໜ້າກະຊວງປ້ອງກັນຄວາມສະຫງົບ ສສ ຫວຽດນາມ ປະຈຳ ສປປ ລາວ.
ພັອ ສີສົມບັດ ໄຊປັນຍາ ໄດ້ກ່າວອວຍພອນ ພົຈວ ຮິ່ງ ຕວ໋ນ ແຮັ້ງ ເນື່ອງໃນໂອກາດ ສະເຫຼີມສະຫຼອງວັນມູນເຊື້ອກຳລັງປ້ອງກັນຄວາມສະຫງົບ ປະຊາຊົນ ສສ ຫວຽດນາມ, ວັນໄຊຊະນະການ ປະຕິວັດ ເດືອນສິງຫາ ຄົບຮອບ 80 ປີ (19 ສິງຫາ 1945-19 ສິງຫາ 2025) ແລະ ວັນສະຖາປະນາ ສສ ຫວຽດນາມ ( 2 ກັນຍາ 1945-2 ກັນຍາ 2025 ) ເພື່ອສະແດງຄວາມຊົມເຊີຍຕໍ່ຜົນງານອັນໃຫຍ່ຫຼວງ ຮອບດ້ານ ແລະ ມີຄວາມໝາຍປະຫວັດສາດ ທີ່ພັກ, ລັດ ແລະ ປະຊາຊົນ ຫວຽດນາມອ້າຍນ້ອງຍາດມາໄດ້ຕະຫຼອດໄລຍະ 80 ປີ ຜ່ານມາ ແລະ ສະແດງໃຫ້ເຫັນເຖິງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງປະເທດ ອັນເປັນມູນເຊື້ອລະຫວ່າງສອງຊາດ ລາວ-ຫວຽດນາມ.
ພົຈວ ຮິ່ງ ຕວ໋ນ ແຮັ້ງ ໄດ້ກ່າວຂອບໃຈຕໍ່ຄະນະບໍລິຫານງານຊາວໜຸ່ມກະຊວງ ປກສ ທີ່ເຫັນໄດ້ຄວາມໝາຍຄວາມສຳຄັນມູນເຊື້ອປະຫວັດສາດຂອງ ສສ ຫວຽດນາມ, ພ້ອມທັງໄດ້ຍົກໃຫ້ເຫັນເຖິງການເຕີບໃຫຍ່ຂະຫຍາຍຕົວໃນ ແຕ່ລະດ້ານນັບແຕ່ອະດີດເຖິງປັດຈຸບັນ ທີ່ ສສ ຫວຽດ ນາມ ຍາດມາໄດ້ໃນຕະຫຼອດໄລຍະ 80 ປີທີ່ຜ່ານມາ ແລະ ສະແດງຄວາມພາກພູມໃຈ ຕໍ່ສາຍພົວພັນແບບພິເສດ ແລະການຮ່ວມມືຮອບດ້ານ ລະຫວ່າງ ສອງພັກ-ສອງລັດ, ສອງກະຊວງ ປກສ ແລະ ປະຊາຊົນສອງຊາດ ລາວ-ຫວຽດນາມ, ເຊິ່ງຍາມໃດກໍໄດ້ມີການຮ່ວມມືກັນຢ່າງສະໜິດແໜ້ນ ແລະ ສືບຕໍ່ເພີ່ມພູນຄູນສ້າງສາຍພົວພັນ ລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງທະນົງແກ່ນຂຶ້ນໄປເລື້ອຍໆ.
____________
#ໜັງສືພິມຄວາມສະຫງົບ #ລາວ-ຫວຽດນາມ ໝັ້ນຢືນ

22/08/2025

“ໄຟຟ້າຫົງສາ ສະໜັບສະໜູບການຟື້ນຟູ ເມືອງຫົງສາ ຈໍານວນ 257.600.000 ກີບ ຫຼັງໄດ້ຮັບຜົນກະທົບຈາກພາຍຸວິພາ”
+++++++++++++
+ ວັນທີ 22 ສິງຫາ 2025, ບໍລິສັດ ໄຟຟ້າ ຫົງສາ ຈໍາກັດ ນໍາໂດຍ ທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ບໍລິສັດ ພ້ອມດ້ວຍຄະນະຜູ້ບໍລິຫານ ແລະ ພະນັກງານ ເຂົ້າຮ່ວມພິທີມອບຮັບງົບປະມານສະໜັບສະໜູນເພື່ອການຟື້ນຟູພື້ນທີ່ເມືອງຫົງສາ ຫຼັງໄດ້ຮັບຄວາມເສຍຫາຍຈາກອິດທິພົນຂອງພາຍຸວິພາ
ງົບປະມານສະໜັບສະໜູນ ຈໍານວນ 257.600.000 ກີບ, ໄດ້ຮັບກຽດຈາກ ທ່ານ ພອນສະຫວັນ ໄຊສົມພັນ ເລຂາພັກເມືອງ ເມືອງຫົງສາ ແລະ ທ່ານ ແຫຼ້ ອ່ອນສົມບູນ ປະທານຄະນະກໍາມະການປົກຄອງເມືອງ ເມືອງຫົງສາ ເປັນຜູ້ຮັບມອບ ທີ່ ຫ້ອງວ່າການເມືອງຫົງສາ.

+ ການສະໜັບສະໜູນຄັ້ງນີ້ ມີຈຸດປະສົງເພື່ອເລັ່ງການຊ້ອມແຊມໂຄງສ້າງພື້ນຖານ ແລະ ພື້ນທີ່ສໍາຄັນຂອງເມືອງຫົງສາ ໃຫ້ກັບມາໃຊ້ງານໄດ້ຢ່າງປອດໄພ ແລະ ມີປະສິດທິພາບ ພ້ອມເສີມຄວາມພ້ອມຂອງຊຸມຊົນໃນການຮັບມືກັບເຫດການໃນອະນາຄົດ ບໍລິສັດ ໄຟຟ້າ ຫົງສາ ຈໍາກັດ ຍັງຄົງຍຶດໝັ້ນໃນການເຮັດວຽກຮ່ວມກັບໜ່ວຍງານທ້ອງຖິ່ນ ເພື່ອສະໜັບສະໜູນການພັດທະນາທີ່ໝັ້ນຄົງ ແລະ ຍືນຍົງຂອງຊຸມຊົນ.

ຄວາມສະຫງົບ Lao Security News

23/08/2025

23/08/2025

23/08/2025

23/08/2025

23/08/2025

23/08/2025

23/08/2025

23/08/2025

22/08/2025

22/08/2025

22/08/2025

22/08/2025

Address

Telephone

Website

Alerts

Shortcuts

Share

Category

ຄວາມສະຫງົບລາຍວັນ