29/10/2025
පාසල් දරුවන්ගේ ආකල්ප හා පෞරුෂ සංවර්ධනය කිරීම ඇතුළු අරමුණු රාශියක් පෙරදැරුව "ක්ලීන් ශ්‍රී ලංකා" වැඩසටහනේ "නෙක්ස් ජෙන් ලීඩ්ස්" ජාතික වැඩසටහනට සමගාමීව උතුරු මැද පළාත් සමාරම්භක වැඩසටහන (29) වනදා අනුරාධපුර පුසියන්කුලම මහා විද්‍යාලයේදී පළාත් ආණ්ඩුකාර වසන්ත ජිනදාස මහතාගේ ප්‍රධානත්වයෙන් ආරම්භ විය.
අනුරාධපුර අධ්‍යාපන කලාපයේ පාසල් 10ක දරුවන් 100 දෙනෙකු මේ සඳහා සහභාගී වී සිටින අතර ඔවුන් සඳහා උදෑසන සිට රාත්‍රී 07.30 දක්වා වැඩසටහන් රාශියක් සූදානම් කර ඇත. ඒ අතර ශරීර සුවතා වැඩසටහන්, පාසල් දරුවන්ගේ නායකත්ව පුහුණු වැඩසටහන්, ව්‍යාපෘතීන් හඳුන්වාදීම, නායකත්ව පුහුණු ක්‍රියාකාරකම්, දෙමාපියන් දැනුවත් කිරීමේ වැඩසටහන්, සංගීත වැඩසටහන් ආදී වැඩසටහන් රාශියකින් සමන්විතය.
මෙම වැඩසටහනින් අනතුරුව පුහුණුව ලැබූ දරුවන් තම පාසලට ගැලපෙන ව්‍යාපෘතියක් හඳුනාගෙන එය පාසල තුළ ක්‍රියාත්මක කළ යුතුය. එය සාරධර්ම ප්‍රවර්ධනය සඳහා යෝග්‍ය ව්‍යාපෘතියක් විය යුතුය. එය වසරක් පුරා අධීක්ෂණය කර හොඳම ව්‍යාපෘතිය එක් අධ්‍යාපන කලාපයකින් 10 බැගින් උතුරු මැද පළාතින් ව්‍යාපෘතීන් 80ක් තෝරාගෙන ජාතික මට්ටම සඳහා ඉදිරිපත් කරනු ලබයි . එයින් ජයග්‍රහණය කරනු ලබන පාසල් සඳහා විදෙස් සංචාර මගින් වැඩිදුර පුහුණුව ලබාදීමට නියමිතය.
මෙම වැඩසටහන සමාරම්භක අවස්ථාවට පළාත් අධ්‍යාපනා හා ප්‍රධාන අමාත්‍යාංශයේ ලේකම් කේ.එම්.එච්එස්.කේ. ජයලත්, පළාත් අධ්‍යාපන අධ්‍යක්ෂ එස්.එස්.ඩබ්. සමරකෝන් පළාත් විභාග අධ්‍යක්ෂ ඒ.සී.කේ. ප්‍රියංකර, නියෝජ්‍ය අධ්‍යාපන අධ්‍යක්ෂ ජයපද්ම බණ්ඩාර, සහකාර අධ්‍යක්ෂ ප්‍රදීප් හේවාමානගේ, ආණ්ඩුකාර පෞද්ගලික ලේකම් සමරකෝන් හේරත්, සම්බන්ධීකරන ලේකම් ආනන්ද රත්නායක, මහජන සම්බන්ධීකරණ නිලධාරි අසේල විජේසිංහ, විද්‍යාලයේ විදුහල්පති චමින්ද පේමසිරි ඇතුළු ගුරුවරුන්, දෙමාපියන්, පාසල් දරුවන් ඇතුළු පිරිසක් එක් විය
