22/07/2026
இயற்கை வளம் அதிகம் இருந்தும் ஏன் மட்டக்களப்பு இலங்கையின் முன்னணி மீன்பிடி மாவட்டமாக இல்லை?
கிழக்கு மாகாணத்தில் அமைந்துள்ள மட்டக்களப்பு மாவட்டம், இலங்கையின் மிகப்பெரிய கடல்சார் வளங்களைக் கொண்ட பகுதிகளில் ஒன்றாகக் கருதப்படுகிறது. இந்தியப் பெருங்கடலை ஒட்டிய நீண்ட கடற்கரை, உலகப் புகழ்பெற்ற மட்டக்களப்பு வாவி, முகத்துவாரங்கள், மாங்குரோவ் காடுகள் மற்றும் வளமான கடல் உயிரியல் அமைப்புகள் என நீலப் பொருளாதார வளர்ச்சிக்கு தேவையான பெரும்பாலான இயற்கை வளங்களையும் இந்த மாவட்டம் கொண்டுள்ளது.
இவ்வளவு வளங்கள் இருந்தும் ஏன் மட்டக்களப்பு இலங்கையின் முன்னணி மீன்பிடி மாவட்டமாக இல்லை?
இந்தக் கேள்விக்கான பதில் இயற்கை வளங்களின் பற்றாக்குறையில் இல்லை. மாறாக, மீன்பிடி முறை, கடல்சார் உட்கட்டமைப்பு, முதலீடு மற்றும் வரலாற்றுப் பின்னணி போன்ற பல காரணிகளுடன் தொடர்புடையதாகும்.
இலங்கை கடற்றொழில் அமைச்சின் 2024 ஆம் ஆண்டுக்கான வருடாந்த மீன்வள புள்ளிவிபர அறிக்கையின்படி, மட்டக்களப்பு மாவட்டத்தின் மொத்த மீன் உற்பத்தி 23,875 மெட்ரிக் தொன் ஆகும். இலங்கையின் மாவட்டங்களின் மீன்பிடி அடிப்படையில் 8வது இடத்தில் காணப்படுகின்றது.
அதே ஆண்டில் முன்னணியில் இருந்த சில மாவட்டங்களாக காலி மாவட்டம் 48,465 மெட்ரிக் தொன்னாகவும், திருகோணமலை மாவட்டம் 38,260 மெட்ரிக் தொன்னாகவும், ஹம்பாந்தோட்டை 36,705 மெட்ரிக் தொன்னாகவும் காணப்படுவதோடு முதல் மூன்று இடங்களையும் பெறுகின்றன.
இதனால் மட்டக்களப்பு முக்கிய மீன்பிடி மாவட்டமாக இருந்தாலும், முதல் மூன்று இடங்களுக்குள் இடம்பெறவில்லை.
மட்டக்களப்பின் பெரும்பாலான மீனவர்கள் இன்னும் ஒரு நாள் கடல் பயணங்கள்,சிறிய ஃபைபர்கிளாஸ் படகுகள்,பாரம்பரிய மீன்பிடி கருவிகள், வாவி மற்றும் கரையோர மீன்பிடி ஆகியவற்றை நம்பியே வாழ்ந்து வருகின்றனர்.இந்த முறை ஆயிரக்கணக்கான குடும்பங்களுக்கு வாழ்வாதாரமாக இருந்தாலும், அதிகளவிலான மீன் உற்பத்தியை உருவாக்க முடியாது.
காலி, ஹம்பாந்தோட்டை போன்ற மாவட்டங்களில் நூற்றுக்கணக்கான பலநாள் மீன்பிடி கப்பல்கள் இயங்குகின்றன.
இந்தக் கப்பல்கள் பல நூறு கிலோமீட்டர் தூரம் ஆழ்கடலுக்குச் செல்கின்றன, பல நாட்கள் கடலில் தங்கி மீன்பிடிக்கின்றன Yellowfin Tuna, Bigeye Tuna, Skipjack Tuna, Swordfish போன்ற உயர்ந்த சந்தை மதிப்புள்ள மீன்களைப் பிடிக்கின்றன.
மட்டக்களப்பில் இத்தகைய பலநாள் ஆழ்கடல் மீன்பிடி கப்பல்களின் எண்ணிக்கை குறைவாக இருப்பதால், மொத்த உற்பத்தியும் குறைவாக உள்ளது.
ஒரு மாவட்டத்தின் மீன்பிடி வளர்ச்சிக்கு கடல் வளம் மட்டுமல்ல, அதற்கான உட்கட்டமைப்பும் அவசியம். மீன்பிடியில் முன்னணியில் உள்ள மாவட்டங்களில் நவீன மீன்பிடி துறைமுகங்கள், பனிக்கட்டி உற்பத்தி நிலையங்கள்,குளிர்சாதன சேமிப்பு மையங்கள்,படகு பழுதுபார்க்கும் நிலையங்கள், எரிபொருள் விநியோக மையங்கள், மீன் ஏல மையங்கள், ஏற்றுமதி செயலாக்க மையங்கள் ஆகியன தேவையான அளவுகளில் காணப்படுகின்றன.
மட்டக்களப்பிலும் இவ்வசதிகள் இருந்தாலும், அவற்றின் அளவும் தொழில்நுட்ப வசதிகளும் தென் மாகாணத்தின் முக்கிய மீன்பிடி மாவட்டங்களுடன் ஒப்பிடும்போது இன்னும் விரிவடைய வேண்டியுள்ளது.
மீன் பிடிப்பு அளவை மட்டும் வைத்து ஒரு மாவட்டத்தின் கடல்சார் பொருளாதாரத்தை மதிப்பிட முடியாது. அந்த வகையில் மட்டக்களப்பின் மிகப்பெரிய பலம் அதன் உலகப் புகழ்பெற்ற மட்டக்களப்பு வாவி, மாங்குரோவ் காடுகள், கழிமுகங்கள், இறால் மற்றும் நண்டு வளங்கள், கடற்பாசி வளர்ப்புக்கான ஏற்ற கடற்கரை ஆகியவற்றில்தான் உள்ளது.
இவை அனைத்தும் எதிர்காலத்தில் அதிக பொருளாதார மதிப்பை உருவாக்கக்கூடிய நீலப் பொருளாதார துறைகளாகும்.
மட்டக்களப்பு அதிக மீன் பிடிப்பை மட்டும் நோக்காமல், மீனிலிருந்து அதிக பொருளாதார மதிப்பை உருவாக்கும் தொழில்துறைகளில் கவனம் செலுத்தினால், நாட்டின் முன்னணி நீலப் பொருளாதார மையமாக உருவாகும் வாய்ப்பு உள்ளது.
இத்தகைய தொழில்கள் வேலைவாய்ப்பையும், ஏற்றுமதி வருமானத்தையும் அதிகரிப்பதோடு, மீன் கழிவுகளையும் உயர்மதிப்புள்ள வளங்களாக மாற்றும்.
மட்டக்களப்பு இன்று இலங்கையின் முதல் மீன்பிடி மாவட்டமாக இல்லாததற்கு காரணம் கடல் வளம் குறைவாக இருப்பதல்ல. மாறாக, சிறிய அளவிலான மீன்பிடி முறை, குறைந்த பலநாள் ஆழ்கடல் கப்பல்கள், முழுமையாக வளராத உட்கட்டமைப்பு மற்றும் உள்நாட்டு போரின் நீண்டகால தாக்கங்கள் போன்ற காரணிகளே இதற்குப் பின்னால் உள்ளன.
ஆனால் இயற்கை வளங்களைப் பொருத்தவரை, மட்டக்களப்பு இலங்கையின் மிகப்பெரிய கடல்சார் திறன் கொண்ட மாவட்டங்களில் ஒன்றாகவே உள்ளது. ஆழ்கடல் மீன்பிடி, நவீன துறைமுக வசதிகள், மதிப்பூட்டப்பட்ட கடலுணவு தொழில்கள் மற்றும் நீலப் பொருளாதார முதலீடுகள் அதிகரித்தால், எதிர்காலத்தில் மட்டக்களப்பு இலங்கையின் முன்னணி நீலப் பொருளாதார மையமாக மாறும் திறன் கொண்டுள்ளது.
Reference -
Annual Fisheries Statistical Bulletin 2024
National Fisheries and Aquaculture Policy
Sri Lanka Socio-Economic Data 2025
