28/07/2025
අරගලය පැවති සමයේ රඹුක්කන ප්‍රදේශයේ ඉන්ධන පිරවුම් හලක් අසල වැඩි මිලට ඉන්ධන අලෙවි කිරීමේ සිද්ධියට විරෝධය පළ කරමින් මහජනතා විසින් උද්ඝෝෂණයක් සිදුකළ අවස්ථාවේදී එය විසුරුවා හැරීම සඳහා පොලීසිය විසින් වෙඩි තැබීමෙන් පුද්ගලයකු මරණයට පත්වීම ඇතුළු තවත් පිරිසක් තුවාල ලැබීම තුළින් මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙස ඉල්ලා ගොනු කෙරුණු මූලික අයිතිවාසිකම් පෙත්සම් 07 ක් විභාගයට ගැනීමට ශ්‍රේෂ්ඨාධිකරණය අද (28) අවසර ලබා දුන්නේය.
අදාළ පෙත්සම් සලකා බැලීමෙන් අනතුරුව අචල වෙංගප්පුලි, ප්‍රියන්ත ප්‍රනාන්දු සහ මේනකා විජේසුන්දර යන මහත්ම මහත්මීන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම නියෝගය නිකුත් කළේය.
ඒ අනුව මෙම පෙත්සමට අදාළ විරෝධතා තිබේ නම් ඒවා සති හයක් තුළ ගොනු කිරීමට පියවර ගන්නා ලෙස අදාළ පෙත්සම්වල වග උත්තරකරුවන් ලෙස නම් කර තිබූ මෙම වෙඩිතැබීම සිදුකිරීමට අණදුන් බව කියන කෑගල්ල හිටපු ජ්‍යෙෂ්ඨ පොලිස් අධිකාරී කේ.බී. කීර්තිරත්න සහ වෙඩිතැබීම සිදුකළ බව කියන පොලිස් කොස්තාපල්වරු තුන්දෙනෙකුට අධිකරණය විසින් නොතීසි නිකුත් කළේය.
මෙම විරෝධතාවලට අදාළ ප්‍රතිවිරෝධතා තිබේ නම් ඒවා සති හයක් තුළ ගොනු කිරීමට පියවර ගන්නා ලෙසත් අධිකරණය විසින් පෙත්සම්කාර පාර්ශවයට නියෝග කළේය.
ඉන් අනතුරුව මෙම පෙත්සම් විභාගය සඳහා ලබන පෙබරවාරි 27 වනදා කැඳවීමටද නියම විය.
මෙම පොලිස් වෙඩි තැබීමේ සිද්ධියෙන් මියගිය චමින්ද ලක්ෂාන් නමැති 41 හැවිරිදි පුද්ගලයාගේ බිරිඳ ඇතුළු මෙම කළහකාරි සිද්ධියෙන් තුවාල ලැබූ පුද්ගලයින් විසින් මෙම මූලික අයිතිවාසිකම් 07 ක් ඉදිරිපත් කර තිබුණි.
පෙත්සම්කරුවන් වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් කියා සිටියේ පොලිසිය විසින් කලහකාරී සිද්ධියක් විසුරුවා හැරීම සඳහා අනුගමනය කළ යුතු මූලික ක්‍රියා පටිපාටින් හා නීතිමය ප්‍රතිපාදන අනුගමනය නොකොට සෘජුවම වෙඩි ප්‍රහාර එල්ල කිරීම සම්පූර්ණයෙන්ම නීතියට පටහැනි බවය.
මේ තුළින් පෙත්සම්කරුවන්ගේ මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙසත් එම නීතිඥවරු අධිකරණය හමුවේ කරුණු දක්වා සිටියේය.
මෙහිදී වගඋත්තරකාර පොලිස් නිලධාරින් වෙනුවෙන් පෙනී සිටි නීතිඥ රවින්ද්‍රනාත් දාබරේ මහතා අධිකරණය හමුවේ කරුණු දක්වමින් මෙම සිද්ධියේදී මහජන සාමය ආරක්ෂා කිරීම සඳහා ගත හැකි සියලු ක්‍රියාමාර්ග වගඋත්තරකරුවන් විසින් ගත් බව සඳහන් කළේය.
මහජනතාවට අවවාද කිරීම් ඇතුළු නීතිමය ප්‍රතිපාදනය අනුගමනය කළ බවත් මහජන සාමය ආරක්ෂා කිරීමේ අරමුණින් අවසානයේදී කළ නොහැකි විකල්පයක් නොමැති තැන මෙම වෙඩි තැබීම සිදුකිරීමට සිදු වූ බවත් නීතිඥවරයා මෙහිදී පැවසීය.
මෙහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් ශනිල් කුලරත්න මහතා අධිකරණය හමුවේ කරුණු දක්වමින් මෙම වෙඩි තැබීමේ සිද්ධියට සම්බන්ධ බව කියන පොලිස් නිලධාරීන්ට විරුද්ධව කෑගල්ල මහෙස්ත්‍රාත් අධිකරණය හමුවේ චෝදනා පත්‍ර ගොනුකර ලගු නොවන නඩු විභාගයක් ආරම්භ කිරීමට කටයුතු යොදා තිබෙන බව සඳහන් කළේය.
ඉදිරිපත් වූ සියලු කරුණු සලකා බැලූ ත්‍රිපුද්ගල විනිසුරු මඩුල්ල අනතුරුව මෙම නියෝග නිකුත් කළේය.
