25/02/2023
ඌව නම් මිනිසා | A MAN CALLED OVE 📚
• කර්තෘ - Fredrik Backman
• පරිවර්තනය - ගංගා නිරෝෂිණී සුදුවැලිකන්ද
◽️| 'සෙවණැලි සියල්ල පලවා හරින්නට අවශ්‍ය වන්නෙ එක් ආලෝක කිරණයක් පමණි'
මින් පෙර කියවා නිම කළ පොතක් ඉතාමත් මෘදු ලෙස, ඉතාමත් ඕනෑකමින් වසා දැමූ මොහොතක් මගේ මතකයේ නැත. එවැනි සිදුවීම් වලින් මගේ මතකය හිස්ය. ඒත් මතකයේ වූ ඒ හිස් බව පැවතියේ, 'ඌව' නම් මිනිසාගේ ජීවිතය තුළින් පුරා තෙදිනක් ගමන් කර අවසන් වනතුරු පමණි. පෙර දින, වේලාව මධ්‍යහ්නයට ආසන්න මොහොතේ දී; සූර්යයා තම කාෂ්ඨක රශ්මිය, පොළෝ තලය සූරා කමින් සිටි මොහොතේ දී; සම මතින් වැලි කඩදාසියකින් ඇතිල්ලී යන තරම් වියළි සුළඟක් පැවති මොහොතේ දී; ඒ සියලුම සාධක මුසුව පාරිසරික උෂ්ණත්වය ඉහළම අගයක පැවති මොහොතේ දී, සන්සුන් වූ සිතින්, තෙරපෙමින් පැවති හැඟීම් සමුදායක් එක් වූ බරැති සුසුමක් හෙළමින්, මම 'ඌව' නම් මිනිසාගෙන් සමුගත්තෙමි. එම සමුගැනීම වේදනාකාරී නොවීය; කටුක නොවීය. එය හුදෙක් ම පරිපූර්ණ වූ හැඟීමකින් යුතු සැහැල්ලු සමුගැනීමක් පමණක් ම විය. එහෙත් එම සමුගැනීමේ සැහැල්ලුව, තවමත් ඇරඹී නැති බිඳෙනසුලු වූත්, හිස් වූත් වචනයෙන් විස්තර කිරීමට නොහී හැඟීමකට ප්‍රවේශය සපයන්නාක් බඳු විය. 'දන්නවද ඌව, ඔයාට හදවතක් තියෙනවා කියලා වෙලාවක කෙනෙක් සැක කරන්න ඉඩ තියෙනවා.' වරෙක 'පර්වානේ', ඌවගේ දෑතට තට්ටු කරමින් පැවසූයේ එයයි. අවසානයේ දි මට ද ඔහුට පැවසීමට තිබූයේ එපමණකි. 'ඌව' නම්, මිනිසෙක්මයි.
'ඌව (Ove)' යනු කවුද?
'ඌව' නම්, පනස්නව වැනි වියේ පසුවූ, ස්ථිර ප්‍රතිපත්ති සහ තමන්ගේ ම ක්‍රියා මූලධර්ම පැවති, තමා හා තමා ම එකඟ වූ දෛනික චර්යාවන් ද පැවති, ස්වීඩන් ජාතික මිනිසෙකි. ඔහු දැඩි ය; රෞද්‍ර ය. ඔහු කිසිවෙකු සමඟ සිනාසෙන්නේ නැත. කිසිවෙකු සමඟ අවශ්‍ය පමණක්ට වඩා කතාබහේ යෙදෙන්නේ ද නැත. එනම් ඔහු, අල්ලාප සල්ලාපයේ යෙදීම කොහෙත්ම ප්‍රිය නොකළේය. ඔහු, තම නිදන කාමරයේ ජනේලය තුළින් බලා, තමා අකමැති පුද්ගලයින් දෙස තම ඇඟිලි දිගු කරමින්, ඔවුන්ගේ චර්යාවන් පවා විවේචනය කරන්නා වූ දඩබ්බර මහලු මිනිසෙක් විය. ඔහු නිවසෙන් පිටත දීත් එසේමය. ඔහු සැමවිට එසේ ම විය. ඌව සතුව 'ලස්සන' හෝ සුවපහසු' දේවල් පැවතියේ නැත. ඔහු සතු වූයේ 'ප්‍රයෝජනවත්' දේවල් ය. සෘජු රේඛාවන්ට සහ පැහැදිලි තීරණ ප්‍රිය කළ ඔහු, ගණිත මූලධර්ම ද ප්‍රිය කළ අතර, ඔහුගේ මුළු ජීවිතයම, නිශ්චිත වූ මිමි වලින් යුතු විය. ඔහු සැමවිටම සියල්ලේ ම, නිශ්චිත මෙන් ම පරිපූර්ණත්වය පිළිබඳව සලකා බැලීය. ඔහු, සෙන්ටිමීටර් එකසිය අසූ පහට වඩා උසැති සියලු මිනිසුන් කෙරෙහි සහජාශයික සැකයකින් බැලීය. එවන් උසකින් පිහිටි මොළය දක්වා රැධිරයට ගමන් කිරීමට නොහැකි බවට වන ඔහු තුළ වූ විශ්වාසය, ඌවගේ ඒ සැකයට හේතු වූ කරුණ විය.
ඔහු මේ ලෝකයේ දැඩි සේ අප්‍රිය කළ දෙයක් වී නම්, ඒ කිසිවෙකු ඔහුව රැවටීමට උත්සහ කිරීමයි. වරෙක මිනිසුන් ඔහුව සමාජශීලි නොවන පුද්ගලයකු ලෙස හැඳින්වීය. ඒ ඔහු මිනිසුන් ගැන එතරම් උනන්දු වූයේ නැති නිසාවෙනි. ඌව සිතුවේ ම සාමාන්‍යයෙන් මිනිසුන්ට පිස්සු කියාය. ඌව මුළුමනින්ම භෞතික දෙයින් පිරුණු මිනිසෙකු විය. ඔහු ඉස්කුරුප්පු ඇණ සහ තෙල් පෙරහන් ප්‍රිය කළේය. ඔහු මිටි මොළවා ගත් දෑත් සාක්කු තුළ තදින් ඔබාගෙන ජීවිතය ගත කළේය. ඔහු අකමැති ඕනෑම දෙයක් හමුවේ, ඌව තම දෑත් සැමවිටම සාක්කු තුළ කිටි කිටියේ මිටි මෙළවීය. ඔහු සංගීතය, පොතපත්, නර්තය ප්‍රිය නොකළේය. ඔහු නර්තනය දුටුවේ 'අතිශයින්ම අක්‍රමවත් සහ හිස කැරකැවිලල ඇති කරන දෙයක්' මෙනි. තවද ඌව පැහැදිලිවම ඖෂධ විශ්වාස නොකළේය. 'ඒවායෙන් ලැබෙන නියම ප්‍රතිඵල මානසික ඒවා පමණක් බවත්, එහි ප්‍රතිඵලයක් ලෙසින්, ඒවා ගැලපෙන්නේ දුර්වල මොළමුල ඇති මිනිසුන්ට පමණක් බවත්' ඔහු සැමවිටම විශ්වාස කළේය.
එහෙයින් ඌව යනු 'අමුතු පහේ වයසක මනුස්සයෙක්' යැයි කෙනෙකුට සිතෙන්නට පුළුවන. එහෙත් ඌවට ඕනෑ කළේ සැනසිල්ලේ මැරෙන්නටය. ඔහු එය විධිමත් වූ අවස්ථාවන් හතරක් දී උත්සහ කළේය. එහෙත් ඔහුගේ අසල්වැසියන් ඔහු ගැන විපරම් කරන්නට, උපකාර ඉල්ලන්නට, ඔහු සමඟ බලෙන් ම හෝ කතාබහේ යෙදෙන්නට පැමිණි හෙයින් ඒ සිවු උත්සහයන් අසාර්ථක වී ගියේය. තමාට ඒ මෝඩ අසල්වැසියන්ගෙන් ගැලවීමට නොහැකි වේයැයි ඔහු තැවෙනනට විය. ගෙවී යමින් තිබුනු නොවැම්බර් මාසයේ එක් උදෑසනක, දියණියන් දෙදෙනෙකු සමඟ එම පෙදෙසට පදිංචියට පැමිණෙන විදේශීය යුවළක්, පසුපසට ධාවනය කළ ට්‍රේලරයකින්, ඌවගේ මල් පාත්ති තලා දමා, ඔහුගේ තැපැල් පෙට්ටිය ද බිමට සමතලා කර, සැනසිල්ලේ මැරෙන්නට සිටි ඌවගේ ඒ අයිතිය සහමුලින්ම උදුරා දැමීමේ සිදුවීම් මාලාවකට ප්‍රවේශයක් සැපයීය.
මේ, Fredrik Backman විසින් රචිත 'A man called Ove' කෘතියයි.
1981 වසරේ ජූනි දෙවැනි දින උපත ලැබූ Fredrik Backman, ස්වීඩන් ජාතික තීරු ලිපි රචකයකු සහ ග්‍රන්ථ කතුවරයෙකි. ඔහු හැදී වැඩුණේ ස්වීඩනයේ ස්කානියා හී හෙල්සිංබොර්ග් හි දීය. ඔහු ස්වීඩන් පුවතක් වන Helsingborgs Dagblad සඳහා සහ ස්වීඩනයේ පිරිමින් සඳහා වෙන් වූ පුවත්පතක් වන Moore Magazine සඳහා ද ලිපි ලියමින් සිට ඇත. 2012 දී 'A man called Ove' රචනා කරමින් ඔහු නවකතාකරුවකු ලෙස ද පෙනී සිටීම ඇරඹුවේය. එම නවකතාව චිත්‍රපටයක් ලෙස අනුවර්තනය කරමින්, Hannes Holm ගේ අධ්‍යක්ෂණයෙන්, ස්වීඩන් භාෂාවෙන්, 2015 දෙසැම්බර් 25 වන දින සහ නැවතත් Marc Forster ගේ අධ්‍යක්ෂණයෙන්, ඉංග්‍රිසි භාෂාවෙන්, 2022 දෙසැම්බර් 29 වන දින තිරගත කෙරිණි.
මීට අමතරව ඔහු මේ වන විට Things My Son Needs to Know about the World (2012), My Grandmother Asked Me to Tell You She's Sorry (2013), Britt-Marie Was Here (2014), Beartown (2017) - මෙය ස්වීඩන් නිශ්පාදන සමාගමක් වන Filmlance විසින් රූපවාහිනී කතාමාලාවක් ලෙස ඉදිරිපත් කිරීමට නියමිතයි -, Us Against You (2018), Anxious People (2020), and The Winners (2022) යන කෘතීන් රචනා කොට ඇත. ස්කැන්ඩිනේවියානු රටවල් මුළුල්ලේ අංක එකේ අලෙවි වාර්තා තැබූ කෘතියක් වූ ඔහුගේ කුළුදුල්ම නවකතාව; 'A man called Ove', ලොව පුරා මිලියන ගණනින් අලෙවි විය. ඒ Henry Koch විසින් එම කෘතිය ඉංග්‍රිසි භාෂාවට පෙරැළීමත් සමඟය. මේ වන විට ඔහුගේ කෘති භාෂා විසිපහකට අධිකව පරිවර්තනය වී ඇත.
Fredrik Backman රචකයා, තම 'A man called Ove' තුළින්, 'ඌව' නම් මිනිසෙකුගේ කතාවක්, ඔහුගේ ජීවිත ප්‍රවාහයේ අවසාන කාල සීමාවේ දී ආරම්භ කරයි. යටකී ගතිපැවතුම් සහ සිතුවිලි වලින් නිර්මිත 'ඌව' නම් චරිතය, වර්තමාන සමාජය තුළ සිටිය හැකි චරිතයක් ද නැති ද යන ගැටලුව, එනම් යම් අභව්‍ය චරිතයක් නොවන්නේදැයි යන ගැටලුව, පාඨක සිතේ මුල සිට ම රචකයා උපද්දවන්නේය. එය සත්‍යයකි. ඔහු තරමක නොව, අතිශයින් ම හුදෙකලා වූ චරිතයකි. ඔහුට තිබූයේ සීමා සහිත ලෝකයකි. ඔහුට එය ප්‍රමාණවත් විය. ඔහු එයින් අතිශයින් ම සෑහිණි. එහෙත් ඔහුට අවශ්‍ය වූයේ සැනසිල්ලේ මැරෙන්නට නම්, සමාජයට, රුයිතෙට යන මිනිසෙකු සේ පෙනෙන මේ අමුතු පහේ මිනිසාගේ අතීතය සොයා බැලීම නොවටින්නේද? අභව්‍ය චරිතයක් සේ පෙනෙන 'ඌව' ගේ ජීවිතය, සදාකාලිකව ම කළු සහ සුදු පැහැයන්ගෙන් පිරී තිබුණි ද? එසේ නම් ඔහු වර්ණ දුටුවේ ම නැති ද? රචකයා, ඌව ගේ කතාවේ සෙවණැලි පලවා හරින ආලෝක කිරණක් සේ 'සෝනියා' ගෙන එන්නේ ඒ ගැටලු වලට පිළිතුරු දීමට සහ ඒ හිදැස් පිරවීමටය.
| 'ඌව ලෝකය දුටුවේ කළු සහ සුදු පැහැයෙන් යැයි මිනිස්සු කීහ. එහෙත් වර්ණය ඇය වූවාය. ඔහු සතු වූ සෑම වර්ණයක්ම.' ....
'ඈ හමුවන්නට පෙර ඔහු ජීවත් වූයේ කෙසේදැයි කිසිවෙකු ඌවගෙන් අසා නැත. එහෙත් කිසිවෙකු ඔහුගෙන් අසා තිබුණා නම්, ඈ හමුවන්නට පෙර තමා ජීවත් වූයේ නැතැයි ඔහු පිළිතුරු දෙනු ඇත' .....
'ඈ සටන් කළේ යහපත වෙනුවෙනි. ඈට කිසිදා නොසිටි දරුවන් වෙනුවෙනි. ඉතින් ඌව ඈ වෙනුවෙන් සටන් කළේය' |
ඉහත වූ දෘෂ්ටාන්ත කිහිපය, ඌව-සෝනියා ප්‍රේම කතාවේ වූ සියුම් ම තැන් ස්පර්ශ කළ, සංවේදීම ස්ථාන යැයි හැඟෙයි. තරුණ අවධියේ දී ඌව ඇයව, රේල්ලුවේ දී දකින්නේ අහම්බෙනි. මින් පෙර කිසිදු දිනෙක, කිසිවෙකු වෙනුවෙන් වෙන් නොවූ ඔහුගේ හදවත, අහම්බෙන් දුටු ඇය වෙනුවෙන් එදින පටන් වෙන් වන්නට ඇරඹිණි. වයස අවුරුදු 8 දී ඔහුගේ මවගේ වියෝවයෙන් සහ වයස අවුරුදු 16 දී ඔහුගේ පියාගේ මරණයෙන් පසුව, ඔහු හඬ නගා සිනාසුණු මුල්ම වතාව ද එය විය. රළුපරළු මිනිසෙකු බව මිනිසුන් කී ඌව සමඟ, සෝනියා වැනි රූමත් තරුණියක් ස්ව-කැමැත්තෙන් ම විවාහ වීමට තරම්, වෙනත් පිරිමියකු තුළින් නොදුටු, එහෙත් ඔහු තුළින් පමණක් ඇය දුටු සුවිශේෂීත්වය කුමක් වන්නට ඇතිද?
ඈ තම ජීවිතයේ සෑම මොහොතක් ම, ඔහු සමඟ බෙදා ගැනීමට ස්ව-කැමැත්තෙන් ම තීරණය කළේ ඇයි දැයි ඇගේ මිතුරන් මෙන් ම ඌව පවා දැන සිටියේ නැත. එහෙත් ඔහු මෙය දැන සිටියේය. ඌව එතෙක් ගෙවූ තම දිවියේ දුටුවේ කළු සහ සුදු වර්ණයන් පමණක්ම ය. නමුත් සෝනියා, ඔහුගේ වර්ණය වූවාය. එමෙන් ම ඈ හමුවන්නට පෙර තමා ජීවත් නොවූ බවත්, ඔහු ජීවත් වීමට පටන් ගත්තේ ඇගේ හමුවීමත් සමඟම බවත් ඔහු දැන සිටියේය. 'සෝනියා' ගෙ හමුවීම, ඌවගේ ජීවිතය ඉන් පසු කිසිදාක පෙර ආකාරයේ නොවීමට හේතු විය. රචකයා මුළු කතාව පුරාවටම විටෙන් විටෙන් අවධි කරන මේ ඌව-සෝනියා ආදර කතාවේ අතීතය, පනස්නව හැවිරිදි ඌවගේ චරිත ගුණාංග වෙනුවෙන් සාධනීය හේතු සපයන්නේය. ඉඳින්, ඒ හේතු මොනවාද? ඔහු බස් රථ අප්‍රිය කරන්නේ මන්ද? සුදු කමිසකරුවන්ව දුටු තැන පිළිකුල් කරන්නේ මන්ද? පනස් නව හැවිරිදි ඌව ගෙ චරිතයේ එවන් ගැටලු බොහෝමයකට පිළිතුරු ලෙස සැපයෙන ඒ හේතු, ඔබව වඩාත් සංවේදී කරවනු ඇත.
'A man called Ove' නවකතාව ගොඩනැගෙන්නේ, එක්තරා ආකාරයකට එක සමාන නිවාස පේළි සහිත, වාහන නැවැත්වීමටත්, ධාවනයටත් නිශ්චිත වූ නීති රීති ඇති, පදිංචිකරුවන් ගේ සංගමයක් මඟින් ඒ සියල්ලම පාලනය කෙරෙන සන්දර්භයකය. ඒ සන්දර්භය තුළ සිටින්නේ ඌව පමණක් නොවෙයි. රචකයා තම 'ඌව' නම් චරිතය හරහා ඉටුකර ගැනීමට නියමිත අරමුණ වෙත, එම චරිතය තල්ලු වී යාමට අවැසි අභිප්‍රේරණය සැපයීමට, පර්වානේ සහ පැට්‍රික්, රූන සහ ඇනීටා මෙන් ම ජීමී ද ඇතුළුව ඌව ගෙ නිවස අසල නිරතුරුවම ගැවසෙන, තැනින් තැන ලොම් හැලී ගිය බළලා යන චරිත යොදාගනියි. ඌවට මෙන් ම ඔවුන් එකිනෙකාට ප්‍රත්‍යෙක චරිත ලක්ෂණ ඇත. ඒවා පැහැදිලිව වෙන් වී පෙනෙන සේ චරිත ගොඩනැගීමට රචකයා සමත්ව ඇත. විශේෂයෙන් ම ඌව සහ බළලාගේ සුසංයෝගය, හරි අපූරු කියැවීමක් ය. අතීතයේ දී සෝනියා ඇති දැඩි කළ අර්නස්ට් නම් බළලා ද, වර්තමානයේ දී ඔහු සමඟ ගැවසෙන මේ බළලා ද අතර වූ අතීත-වර්තමාන සහසම්බන්ධය පිළිබඳව, අළු යටින් විටෙන් විටෙන් මතුවන ගිනි පුපුරු සේ, රචකයා නොකියාම පාඨකයාට කියා දේ. එය පාඨක අප තේරුම් ගත යුත්තකි. මන්ද ඌව කිසිදාක බළලන් ප්‍රිය කළේ නැත. එහෙත් බළලා ඌව ප්‍රිය කළේය.
රචකයා, තම කතාව සඳහා වස්තු විෂය කොට ගන්නා මේ ඌව නම් චරිතයේ ප්‍රබන්ධමය ජීවිත කතාව සඳහා පාදක කරගන්නා අනුභූතිය සැලකීමේ දී, එය හුදෙක් ම වර්තමානය හා බැඳී පවතින සුලබ අත්දැකීමක් බව පෙනී යයි. සමාජය තුළ එක්තරා කොටසක හිමිකාරිත්වය දරන, පැසුණු හිසකේ ඇති 'මහළු' යැයි වෙන් කළ හැකි මිනිසුන් අතර, ක්ෂණිකව කෝප ගන්නා, හැම සැමවිට ම රවා බලන, රළුපරළු මිනිසුන් අප දැක ඇති අතර සමාජය, ඔවුන්ව පසෙකට කරමින්, තම ප්‍රසාදමය නොවන හැඟීම් වලින් ඔවුන්ට දමා ගසන්නට නිරායාසයෙන් ම පෙළඹේ. නමුත් ඒ රළුපරළු මහල්ලන්ගේ අතීතය කෙබඳුදැයි විමසීම, සමාජය අතහැර දමයි. නමුත් විටෙක ඔවුගේ ඒ රළුපරළු, ප්‍රකෝපකාරී ස්වභාවයට හේතුකාරක වූ අතීතයක් ඔවුන්ට තිබෙන්නට පුළුවන. තවද ඔවුන්ගේ අතීතය අදට වඩා සරල මෙන් ම සැහැල්ලු වන්නට ද පුළුවන. එහෙයින් රචකයා, සමාජය තුළින් ලද මේ අත්දැකීම, සුදුසු පරිදි සූචනය කරමින්, 'ඌව' නම් චරිතය හරහා කියාපාන ආකාරයක්, කතාවේ සමස්තය තුළින් පෙනී යයි. මෙහිදි රචකයා, 'ඌව' නම් චරිතය, විවිධ වූ පරිච්ඡේද ඔස්සේ, විවිධ පුද්ගලයින් හා සිදුවීම් තුළින් විවිධ ස්ථර වලට විභේදනය කරමින්, බාහිරට නොපෙනෙන ඔහුගේ ඇතුළාන්තය විවරණය කිරීමට දැඩි අරගලයක යෙදෙයි. අවසානයේදි ඔහුගේ ඒ අරගලය සාර්ථක වී ඇති බව පසක් වුණි.
රචකයාගේ භාෂා භාවිතය සැලකීමේ දී සුවිශේෂීතා කිහිපයක් ම දුටිමි. ඔහු බොහෝ විට යම් ස්ථානයක්, වස්තුවක්, පුද්ගලයෙක් හෝ යම් අවස්ථාවක් වඩාත් හොඳින් විස්තර කිරීමටත්, පැහැදිලි කිරීමටත් ඒවා වෙනත් දෙයකට සමාන කිරීම සිදුකර ඇත. එනම් ඔහු, තම කතාව තුළ,, ඖචිත්‍යය ගුණයෙන් යුතු උපමා භාවිතයට බොහෝ ඉඩක් වෙන්කර ඇත. එහෙයින් මෙය අපූර්වත්වයකින් යුතු කියැවීමක් බවට පත්ව ඇත. බොහෝ අවස්ථාවලදී ඔහු යොදාගන්නා උපමාවන් කාටුන්කරණයට ලක් වූ ඒවා මෙන් වෙයි. ඔහුගේ ඒ භාවිතාව, ඔහුගේ පරිකල්පන ශක්තිය තුළින් හරි අපූරු සංකල්ප රූප මැවීමට ඔහු තුළැති ශක්‍යතාවය විදහා පෙන්වයි. තවද ප්‍රශස්ත මට්ටමේ බන්ධිත-දිගු වාක්‍ය රටා, 'A man called Ove' කෘතිය තුළ බොහෝ සෙයින් දකින්නට ලැබෙයි. Fredrik Backman, බන්ධිත- දිගු වාක්‍ය රටා භාවිතයට ප්‍රිය වූවෙකු විය යුතුය. එමෙන්ම කතාව තුළ බහුල ඉඩක් වෙන් වන්නේ දෙබස් ගොඩනැගීමට වඩා විස්තරකරණයටය. යම් යම් අවස්ථාවල දී, දෙබස් වලින් පැවසිය හැකි දේ පවා ඔහු විස්තරකරණයෙන් පාඨකයාට සමීප කරවයි. බොහෝ විට එය, කතාවේ ආකෘතිය විසින් ඉල්ලා සිටින දෙයකි.
සරල සන්දර්භයක ගොඩනැගෙන කතාවක් තුළින් රචකයා ආදරය, වියෝවය, මිත්‍රත්වය සහ පවුල පිළිබඳව අමතක කළ නොහී කතාවක් නිර්මාණය කරයි. මන්ද 'A man called Ove' නවකතාව, හැඟීම් සමූහයක සම්මිශ්‍රණයකි. මෙය විටෙක ඔබව සංවේදී කරවමින් හඬවන්නටත්, සිත තුළ සැහැල්ලුව දනවමින් සිනහවන්නටත් පොළඹවයි. එනම් මෙය, බේදවාචක සහ හාස්‍යයේ මිශ්‍රණයකි. විටෙක ඌව ගෙ චරිතයේ ඇති රළු බව තුළින් පාඨකයාට යම් සිනහවක් පවා ලැබෙයි. ඒ වින්දනය අමුතුය. එනම් රචකයා, පාඨකයා හා සමඟ යම් ක්‍රීඩාවක නියැලෙන සේයාවක් පෙනෙයි. එහිදී, අව් රශ්මිය නිසාවෙන් බොහෝ සෙයින් රත් වූ ලෝහයක් මතට, හදිසියේ ම සිසිල් ජල ප්‍රවාහයක් එල්ල කරන්නාක් මෙන්, පාඨකයා තුළ ක්‍රමයෙන් අවධි කරවන ශෝක ආදී ස්ථායිභාවයන්ට, හාස ආදී ස්ථායිභාවයන් ගෙන් හදිසියේ ම පහර ගසමින්, පාඨකයා තුළ හාස්‍ය රසය රචකයා උපද්දවයි. එහෙයින් මේ සියල්ල සමඟ, ඔබගේ වටපිටාවේ, ඔබට හමුවන රළුපරළු මහල්ලන් පිළිබඳව, ඔබ තුළ පෙර නොවූ නව දයාවක්; කරුණාවක් හටගනු ඇත. අවසානයේ දි Fredrik Backman යනු, අමතක නොවන ලෙස, ගැඹුරු ස්ථරයන්ගෙන් යුතුව, විචක්ණශීලීව, නමුත් ඉතාමත් සංයමයෙන් සහ සැහැල්ලුවෙන් චරිත නිර්මාණය කිරීමට දක්ෂයකු බව පසක් වුණි.
Fredrik Backman ලාංකේය පාඨකයාට හඳුන්වා දෙමින් ඔහුගේ කුළුදුල්ම නිර්මාණ; 'A man called Ove', 'ඌව නම් මිනිසා' නමින් සිංහල බසට පෙරළුෑ, අප ආදරණීය ප්‍රවීණ ලේඛිකා, ගංගා නිරෝෂිණී සුදුවැලිකන්ද: Ganga Suduwelikanda මහත්මිය ගේ නවතම පරිවර්තන කාර්‍යය මෙයයි. 'ලිට්ල් හවුස්' කතාමාලාව ඇතුළුව පරිවර්තනය ගණනාවකින් පාඨකයින්ගේ සිත් තුළ බොහෝ මතක සටහන් ඇඳි ඇයගේ, පරිවර්තනයේ දී පෙන්වන සකසුරුවම් බව, මෙහිදී ද සුපුරුදු පරිදි දැකගත හැකිය. විශේෂයෙන් ම Fredrik Backman ගේ බන්ධිත-දිගු වාක්‍ය කොටස් පරිවර්තනයේ දී, ඇය ඉතාමත් සංයමයෙන් සහ අවධානයෙන් යුතුව සිදුකර ඇත. අර්ථව්‍යක්ති ගුණය, නැතිනම් අර්ථ නිරාකූල වීමේ ගුණය නිසාවෙන්, ඇගේ පරිවර්තන බස අවබෝධ කරගැනීමට අපහසු නොවෙයි. කෙසේ නමුත්, ඇගේ අතින් පරිවර්තනය වන Fredrik Backman ගේ තවත් කෘතියක් බලාපොරොත්තුවෙන් සිටිමි.
.............................................................................................................
- ✍🏻 | දුල්ශාන් සංජය වන්ද්‍රසිරි ꧂
𝑷𝒖𝒃𝒍𝒊𝒔𝒉𝒆𝒓 - Little House Publishers
( 📷 Edited by - Dulshan )
[ Goodreads ඇගයීම - 4.37/5 ]
විරාමයක ගමනක් | 84
