Speaker Mahinda Yapa Media Division

03/07/2024

01/07/2024

මාතර රාහුල විද්‍යාලයේ ආදි ශිෂ්‍ය සංගමය සංවිධානය කල රාහුල පා ගමන පසුගිය 2024.06.29 දින මාතර නගරයේදී ගරු කතානායක මහින්ද යාපා අබේවර්ධන මැතිතුමන්ගේ ප්‍රධානත්වයෙන් පැවැත්විණි.

එම විද්‍යාලයේ අභිමානය හා ශක්තිය පෙන්නුම් කල සංස්කෘතිකාංග රැසකින් වර්ණවත් වු මෙම පා ගමනට රාහුල ආදිශිෂ්‍යයින් හා සිසුන් දස දහසකට අධික පිරිසක් සහභාගී වුහ.

ඊට අමතරව හෙලිකොප්ටර් සංදර්ශනයක් හා නිල්වලා ගගේ බෝට්ටු සංදර්ශනයකින් ද මෙවර පා ගමන වර්ණවත් විය.
රාහුල විද්‍යාලයේ විදුහල්පතිතුමිය වන සමිතා කුරුකුලසූරිය මහත්මියගේ උපදෙස් මත ආදි ශිෂ්‍ය කණ්ඩායම් මෙම පා ගමන සංවිධානය කර තිබුණි.

මෙම අවස්ථාවට පාර්ලිමේන්තු මන්ත්‍රී බුද්ධික පතිරණ මහතා සහ ගරු කතානායකතුමන්ගේ විදේශ කටයුතු සම්බන්ධීකරණ ලේකම් වෛද්‍ය චමීර යාපා මහතා ඇතුළු සම්භාවනීය අමුත්තන් රැසක් ද සහභාගී විය.

- කථානායක මාධ්‍ය අංශය.

28/06/2024

🔷 විදේශ ණය ප්‍රතිව්‍යුහගත කිරීමේ ගිවිසුම් ක්‍රියාත්මක කිරීම සදහා වූ යෝජනා සම්මතය ජූලි 2 සහ 3 විවාදයට - පාර්ලිමේන්තු කටයුතු පිළිබඳ කාරක සභාව තීරණය කරයි

විදේශ ණය ප්‍රතිව්‍යුහගත කිරීමේ ගිවිසුම් ක්‍රියාත්මක කිරීම සදහා වූ යෝජනා සම්මතය පිළිබඳ විවාදය ජූලි 2 සහ 3 දෙදින පැවැත්වීමට පාර්ලිමේන්තු කටයුතු පිළිබඳ කාරක සභාවේදී තීරණය වූ බව පාර්ලිමේන්තුවේ කාර්ය මණ්ඩල ප්‍රධානී සහ නියෝජ්‍ය මහලේකම් චමින්ද කුලරත්න මහතා පැවසීය.

අද (28) පෙරවරුවේ කථානායක ගරු මහින්ද යාපා අබේවර්ධන මහතාගේ ප්‍රධානත්වයෙන් සහ අග්‍රාමාත්‍ය ගරු දිනේෂ් ගුණවර්ධන මහතාගේ සහභාගීත්වයෙන් පැවති පාර්ලිමේන්තු කටයුතු පිළිබඳ කාරක සභාවේදී මේ බව තීරණය වී ඇත.

මේ අනුව ජූලි 2 වැනි අඟහරුවාදා පෙ.ව 9.30 ට පාර්ලිමේන්තුව රැස්වීමට නියමිත අතර ප.ව 5.00 දක්වා විවාදය පැවැත්වීමට තීරණය වී තිබේ. එසේම විදේශ ණය ප්‍රතිව්‍යුහගත කිරීමේ ගිවිසුම් ක්‍රියාත්මක කිරීම සම්බන්ධයෙන් එදින පෙරවරුවේ ගරු ජනාධිපතිවරයා විසින් පාර්ලිමේන්තුවට විශේෂ ප්‍රකාශයක් කිරීමට ද නියමිතව බව නියෝජ්‍ය මහලේකම්වරයා වැඩිදුරටත් පැවසීය.

ජූලි 3 වැනි බදාදා පෙ.ව 9.30 සිට ප.ව 5.00 දක්වා මෙම විවාදය දෙවැනි දිනටත් පැවැත්වීමට මෙහිදී තීරණය වී ඇත. අනතුරුව ප.ව 5.00 මෙම යෝජනා සම්මතයට අදාළ ඡන්ද විමසීම පැවැත්වීමට නියමිතව තිබේ.

මෙරට ණය ප්‍රතිව්‍යුහගතකරණය පිළිබඳ ශ්‍රී ලංකා ප්‍රජාතාන්ත්‍රික සමාජවාදී ජනරජය හා ණය හිමියන්ගේ කමිටුව (OCC) අතර 2024.06.26 දින එළඹෙන ලද අවසන් ගිවිසුම සහ ශ්‍රී ලංකා ප්‍රජාතාන්ත්‍රික සමාජවාදී ජනරජය සහ චීන අපනයන හා ආනයන බැංකුව (EXIM Bank) අතර 2024.06.26 දින එළඹෙන ලද අවසන් ණය ගිවිසුම් සංශෝධන කිරීමේ ගිවිසුම ක්‍රියාත්මක කිරීම සදහා අවශ්‍ය අවසරය මුදල්, ආර්ථික ස්ථායිකරණ හා ජාතික ප්‍රතිපත්ති අමාත්‍යවරයා වෙත ලබාදීමට මෙම යෝජනා සම්මතය පාර්ලිමේන්තුවට ඉදිරිපත් කෙරේ.

- කථානායක මාධ්‍ය අංශය.

28/06/2024

ශ්‍රී ලංකා විදුලිබල පනත් කෙටුම්පත සඳහා කථානායක ගරු මහින්ද යාපා අබේවර්ධන මහතා 2024.06.27 දින පාර්ලිමේන්තුවේදී සිය සහතිකය සටහන් කළේය.

විදුලිබල ක්ෂේත්‍රයට සිදුකරනු ලබන ප්‍රතිසංස්කරණ ක්‍රියාත්මක කිරීමට අවශ්‍ය විධිවිධාන සැලැස්වීම අරමුණු කරගත් මෙම පනත් කෙටුම්පත 2024 අප්‍රේල් 25 වැනි දින පාර්ලිමේන්තුවට ඉදිරිපත් කරන ලදී. අනතුරුව පසුගිය 2024 ජූනි 6 වැනිදා පාර්ලිමේන්තුවේදී විවාද කිරීමෙන් පසු වැඩි ඡන්ද 44 කින් පනත් කෙටුම්පත සම්මත විය.

ඒ අනුව මෙම පනත් කෙටුම්පත 2024 අංක 36 දරන ශ්‍රී ලංකා විදුලිබල පනත වශයෙන් බලාත්මක වේ.

- කථානායක මාධ්‍ය අංශය.

28/06/2024

🔷 තරුණ නියෝජිතයින් සඳහා පැවැත්වෙන ආංශික අධීක්ෂණ කාරක සභා පිළිබඳ වැඩමුළු මාලාවේ දෙවැනි වැඩමුළුව සාර්ථකව අවසන් කෙරේ.

පාර්ලිමේන්තුවේ ආංශික අධීක්ෂණ කාරක සභා නියෝජනය කිරීම සඳහා තෝරාගනු ලැබූ තරුණ නියෝජිතයින්ට එම කාරක සභා ක්‍රියා පිළිවෙල පිළිබඳ දැනුවත් කිරීමේ වැඩමුළුවක් 2024.06.25 දින බත්තරමුල්ල වෝටර්ස් එජ් හෝටල් පරිශ්‍රයේදී සාර්ථකව පැවැත්විණි.

එක්සත් ජාතීන්ගේ සංවර්ධන වැඩසටහනේ (UNDP) සහයෝගයෙන් ශ්‍රී ලංකා පාර්ලිමේන්තුව විසින් සංවිධානය කරනු ලබන වැඩ මුළු හතරකින් සමන්විත වැඩසටහන් මාලාවේ දෙවන වැඩමුළුව ලෙස මෙය සංවිධානය කර තිබුණි. ආංශික අධීක්ෂණ කාරක සභා වල විෂය පථයන් සම්බන්ධයෙන් තරුණ නියෝජිතයින්ට වඩාත් විධිමත් අවබෝධයක් ලබාදීම මෙම වැඩමුළුවේ මූලික අරමුණ විය.

මෙම වැඩමුළුව ගරු කථානායක මහින්ද යාපා අබේවර්ධන, පරිසරය, ස්වාභාවික සම්පත් හා තිරසර සංවර්ධනය පිළිබඳ ආංශික අධීක්ෂණ කාරක සභාවේ සභාපති ගරු අජිත් මාන්නප්පෙරුම, සෞඛ්‍ය පිළිබඳ ආංශික අධීක්ෂණ කාරක සභාවේ සභාපති ගරු මයන්ත දිසානායක, විවෘත සහ වගකිවයුතු රජයක් පිළිබඳ ආංශික අධීක්ෂණ කාරක සභාවේ සභාපති ගරු ජගත් කුමාර සුමිත්‍රාආරච්චි, බලශක්තිය සහ ප්‍රවාහනය පිළිබඳ ආංශික අධීක්ෂණ කාරක සභාවේ සභාපති ගරු නාලක බණ්ඩාර කෝට්ටේගොඩ, සෞඛ්‍ය පිළිබඳ ආංශික අධීක්ෂණ කාරක සභාව මගින් පත් කල අනුකාරක සභාවේ සභාපති වෛද්‍ය ගරු උපුල් ගලප්පත්ති, ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සාමාජික ගරු මධුර විතානගේ යන පාර්ලිමේන්තු මන්ත්‍රීවරුන් මෙන්ම පාර්ලිමේන්තුවේ මහලේකම් කුෂානි රෝහණදීර යන මහත්ම මහත්මීන්ගේ මුලිකත්වයෙන් පැවැත්විණි.

මෙදින වැඩමුළුවේ ආරාධිත දේශනය "තිරසර ප්‍රජාතන්ත්‍රවාදය උදෙසා ව්‍යවස්ථාදායක ක්‍රියාකාරකම්වල තරුණ සහභාගීත්වය " යන තේමාව ඔස්සේ ශ්‍රී ලංකා තිරසර සංවර්ධන සභාවේ අධ්‍යක්ෂ ජනරාල් චමින්ද්‍රි සපරමාදු මහත්මිය විසින් සිදුකරන ලදී.

මෙහිදී තරුණ නියෝජිතයින්ට තමන් නියෝජනය කරන ආංශික අධීක්ෂණ කාරක සභාවේ සභාපතිවරයා සහ අදාළ අමාත්‍යාංශ නිලධාරීන් සමග විශේෂ සැසියකට එක්වී ක්‍රියාකාරකම් සහිතව අදාළ කාරක සභා විෂය පථයන් පිළිබඳ දැනුම ලබාගැනීමට, කාරක සභාව මගින් ක්‍රියාත්මක කළ සහ ක්‍රියාත්මක කිරීමට අපේක්ෂිත ඉදිරි කටයුතු පිළිබඳව පුළුල් වූ අවබෝධයක් ලබාගැනීමට අවස්ථාව ලබා දී තිබුනි.

මෙම වැඩමුළුව සඳහා, පාර්ලිමේන්තුවේ අධ්‍යක්ෂ ( ව්‍යවස්ථාදායක සේවා) එම්. ජයලත් පෙරේරා, ආංශික අධීක්ෂණ කාරක සභා වල විෂය පථයන්ට අදාළව සම්බන්ධීකරණ කටයුතු සිදුකරන අමාත්‍යංශ නිලධාරීන්, එක්සත් ජාතීන්ගේ සංවර්ධන වැඩසටහනේ නිලධාරීන් සහ පාර්ලිමේන්තුවේ ආංශික අධීක්ෂණ කාරක සභා කාර්යාංශයේ ලේකම්වරිය ඇතුලු නිලධාරීන් පිරිසක් ද සහභාගී වී සිටියහ.

- කථානායක මාධ්‍ය අංශය.

25/06/2024

"2024 ධර්ම රශ්මි" පොසොන් කලාපයේ තුන්වන දින සමාරම්භක අවස්ථාව ගරු කතානායකතුමන්ගේ සුරතින් ඇරඹෙයි.

ප්‍රවාහන, මහා මාර්ග හා ජනමාධ්‍ය අමාත්‍ය අචාර්ය බන්දුල ගුණවර්ධන මැතිතුමන්ගේ සංකල්පයකට අනුව හෝමාගම පුරවරය කේන්ද්‍ර කර ගනිමින් සංවිධානය කෙරෙන "2024 ධර්ම රශ්මි" පොසොන් කලාපයේ තුන්වන දින සමාරම්භක අවස්ථාව ගරු කතානායක මහින්ද යාපා අබේවර්ධන මැතිතුමන්ගේ ප්‍රධානත්වයෙන් සිදුවිය.

එහිදී පිටිපන මහින්ද රාජපක්ෂ ක්‍රීඩාංගණය ඉදිකර තිබූ "ධර්ම ද්වජ" ජාතකය සහිත දර්ශනීය තොරණ විදුලි ආලෝකයෙන් ආලෝකමත් කිරීම කතානායකතුමන්ගේ සුරතින් සිදුවිය.

ඉන් අනතුරුව එම භූමියේ ශ්‍රී ලංකා යුද හමුදාව විසින් සංවිධානය කරනු ලබන එකවර දහසකට ආසන්න පිරිසකට ආහාර ලබා ගැනීමට හැකි දැවැන්ත බත් දන්සල විවෘත කිරීමේ අවස්ථාවට ද කතානායකතුමන් එක්විය.

මීට සමගාමීව NSBM හරිත සරසවියේ සිසුන් හා කාර්ය මණ්ඩලය සහ ශ්‍රී ලංකා ගුවන්විදුලි සංස්ථාව එක්ව ඉදිරිපත් කරන ලද "බැති ගී සරණිය" ගරු කතානායක මහින්ද යාපා අබේවර්ධන මැතිතුමා ඇතුළු ආරාධිත අමුත්තන් රැසකගේ සහභාගිත්වයෙන් NSBM හරිත සරසවි පරිශ්‍රයේදී ආරම්භ විය.

මෙම අවස්ථාවට මහා සංඝරත්නය, සංවර්ධන ලොතරැයි මණ්ඩලයේ සභාපති N.K.A.G නාරගල මැතිතුමා,ජ්‍යෙෂ්ඨ මාධ්‍යවේදී හඩ්සන් සමරසිංහ මැතිතුමා ඇතුළු විශාල පිරිසක් එක්ව සිටියහ.

- කථානායක මාධ්‍ය අංශය.

24/06/2024

Industry Expo 20204 ජාත්‍යන්තර ප්‍රදර්ශනයේ 5 දින සමාරම්භක අවස්ථාවට ගරු කතානායකතුමන් එක් වෙයි ....

කර්මාන්ත අමාත්‍යාංශය දෙවන වරටත් සංවිධානය කරනු ලබන Industry Expo 2024 ජාත්‍යන්තර කර්මාන්ත ප්‍රදර්ශනය 2024.06.23 දින බණ්ඩාරනායක ජාත්‍යන්තර සම්මන්ත්‍රණ ශාලාවේදී පැවැති අතර ගරු කතානායක මහින්ද යාපා අබේවර්ධන මැතිතුමන් 5 වන දින ප්‍රධාන ආරාධිතයා ලෙස සමාරම්භක අවස්ථාවට එක් විය.

සෞඛ්‍ය හා කර්මාන්ත ගරු අමාත්‍ය වෛද්‍ය රමේෂ් පතිරණ මැතුමාගේ මග පෙන්වීම මත අපනයන කේන්ද්‍රීය නිෂ්පාදන ආර්ථිකයක් බලගැන්වීමේ අරමුණ පෙරදැරිව දේශීය කර්මාන්තකරුවන් ශක්තිමත් කිරීම උදෙසා කර්මාන්ත අමාත්‍යාංශය,ලංකා කාර්මික සංවර්ධන මණ්ඩලය, රාජ්‍ය ආයතන සහ පෞද්ගලික අංශයේ සහයෝගිත්වයෙන් මෙම ජාත්‍යන්තර කර්මාන්ත ප්‍රදර්ශනය සංවිධානය වී තිබුණි.

එමෙන්ම මෙම ජාත්‍යන්තර ප්‍රදර්ශනය දැවැන්ත ප්‍රදර්ශන කුටි 1307 කින් සමන්විත වූ අතර ජර්මනිය, ප්‍රංශය, ඉතාලිය, ඉන්දියාව, බංගලාදේශය ,චීනය, සිංගප්පූරුව ,මැලේසියාව ඇතුළු රටවල් 23 නියෝජනය කරමින් ප්‍රදර්ශන කුටි 38 ක් ඉදිරිපත් කර තිබීම විශේෂත්වයකි.

එහිදී සමාරම්භක උළෙලෙන් අනතුරුව කතානායකතුමන් ප්‍රදර්ශන භූමියේ සංචාරයක ද නිරත විය.

මෙම අවස්ථාවට අධිකරණ බන්ධනාගාර කටයුතු සහ ආණ්ඩුක්‍රම ප්‍රතිසංස්කරණ ගරු අමාත්‍ය විජයදාස රාජපක්ෂ මැතිතුමා, ශ්‍රී ලංකා පාර්ලිමේන්තුවේ මහලේකම් කුෂාණි රෝහණදීර මැතිණිය ,ලංකා කර්මාන්ත සංවර්ධන මණ්ඩලයේ සභාපති වෛද්‍ය සාරංග අලහප්පෙරුම මැතිතුමා ඇතුළු විශාල පිරිසක් එක් ව සිටියහ.

- කථානායක මාධ්‍ය අංශය.

22/06/2024

උමන්දාව විශ්ව ගම්මානයේ "රාජකීය දන්සල" විවෘත කිරීම ගරු කථානායකතුමන්ගේ සුරතින්.....


ඓතිහාසික උමන්දාව බෞද්ධ විශ්ව ගම්මානයේ පොසොන් පුර පසළොස්වක පොහොය නිමිති කරගෙන පත්වනු ලබන "රාජකීය දන්සලේ "ආරම්භක අවස්ථාව ගරු කතානායක මහින්ද යාපා අබේවර්ධන මැතිතුමා සහ ගුවන් හමුදාපති එයා මාෂල් උදේනි රාජපක්ෂ ප්‍රධානත්වයෙන් සිදු විය.

උමන්දාව විශ්ව බෞද්ධ ගම්මානයේ නිර්මාතෘ පූජ්‍ය සිරි සමන්තභද්‍ර ස්වාමීන් වහන්සේගේ අනුශාසනාව පරිදි මෙම රාජකීය දන්සල සුවිශේෂී ආකාරයට සැදැහැවතුන් වෙනුවෙන් සංවිධානය කර තිබුණි.

ජාත්‍යන්තර යෝග දිනයට සමගාමීව ඉන්දියානු මහ කොමසාරිස් කාර්යාලය මගින් සංවිධානය කර තිබූ යෝග වැඩසටහනට ද ගරු කථානායකතුමන් සහභාගි විය.


ඉන් අනතුරුව ගරු කතානායකතුමන් උමන්දාව විශ්ව බෞද්ධ ගම්මානය සංචාරයක නිරත වූ අතර එහිදී ශ්‍රී විෂ්ණු දෙවියන්ගේ අනුරුවක් ගරු කථානායකතුමන් වෙත ලබා දීම පූජ්‍ය සිරි සමන්තභද්‍ර ස්වාමීන් වහන්සේගේ සුරතින් සිදුවිය.

මෙම අවස්ථාවට මහා සංඝරත්නය හා සැදැහැවතුන් විශාල ප්‍රමාණයක් එක්ව සිටියහ.

කථානායක මාධ්‍ය අංශය.

21/06/2024

සුපින්වත් පොසොන් මංගල්‍යයකට සුභ පැතුම්!

පළමුව, මෙවර පොසොන් උත්සවය , ප්‍රතිපත්ති සහ ආමිස පූජාවෙන් සැමරීමට උත්සුක වන ලක්වාසී සහ අන් සියලු බොදුනුවන්ට අපගේ සුබ පැතුම් එක්කරනු කැමැත්තෙමි.
අවුරුදු දෙදහස් පන්සියයකටත් පෙර එකිනෙකා පරයා යමින් විප්ලවයකින් හෝ යුද්ධයකින් හෝ නොව, අවිහිංසාවෙන්,කරුණා මෙත් සිසිලෙන් යුත් අගනා දර්ශනයකින් සමෘද්ධිමත් සමාජ පරිවර්තනයකට මග පෑදූ ධර්ම ශාස්තෘවරයකු වේ නම් , ඒ් අපේ බුදුරජාණන් වහන්සේ විය යුතුය. එම ධර්ම මාර්ගයේ ගමන් ගැනීමට අපට මග පාදා දුන්නේ ලක්වාසීන් දෙවන බුදුන් ලෙස සලකන මිහිඳු මහ රහතන් වහන්සේ ඇතුළු ධර්ම දූත පිරිසගේ ලංකා ආගමනයෙනි.

මහින්දාගමනය , මෙරටට අනන්‍ය වූ ආගමික, සංස්කෘතික, සාමාජයීය, දේශපාලනික සහ කලාත්මක ආදී සකලවිධ අංශයකින්ම ශිෂ්ටාචාරමය පරිවර්තනයකට හේතු වූ බව රහසක් නොවේ . බෞද්ධාගම සහ ලක්වැසියන් අතර එවක ඇති වූ අවිච්ඡින්න බැඳීම අදටත් අපේ ගම්- නගරවල විවිධ ආකාරයේ දන්සැල්, උත්සව, පූජා ආදියෙන් මනාව දෘශ්‍යමාන වෙයි. එදා දෙවනපෑතිස් රජු ඇරඹූ ධර්මදානමය පින්කම් පසුකාලීනව ක්‍රමානුකූලව පොහෝ දිනයන්හි පන්සලක් පාසා ධර්මදේශනා ලෙස ආරම්භ ක‍ළෙන් ලක්වැසි ජනතාව ඒ ධර්මෝපදේශයන් අනුව කටයුතු කිරීමට පුරුදු පුහුණු වූහ. ලොව අන්‍ය ජාතීන් අතර ලක්දිව ධර්මද්වීපයකැයි රැව් පිළිරැව් දුන්නේ අපේ පූර්වජයන් එම සදෝපදේශයන් අනුව කටයුතු කළ පුරවැසියන් පිරිසක් වූ නිසා බව මෙහිදී ගෞරවයෙන් සිහිපත් කළ යුත්තෙමු.

අද ඔවුන්ගේ ඇවෑමෙන් අප අපේ දූ දරුවන් සමඟ කාර්යබහුල නව ලෝකයකට පිවිස සිටිමු. ඒ නව ලෝකයෙහි අපගේ ජීවන රටාවේ කාර්යබහුල බව නිසා මොහොතක් නැවතී පන්සලක් වැඳ පුදාගන්නට, ශීල සමාදානයට පවා කාලය මඳ වෙන බෞද්ධයන් පිරිසක් අප අතර සිටින බව මම දනිමි. බෞද්ධ දර්ශනය අසීමිතව විශ්වාස කරන අයෙකු ලෙස මට පැවසිය හැක්කේ මේ දර්ශනය සාන්දෘෂ්ටිකය, අකාලිකය, ඒහිපස්සිකය, ඕපනයික බවය, එනමුත් එකී ධර්මය තමන් විසින් ස්වසන්තානයෙහි වෙන- වෙනම උපදවා දත යුත්තකි. එහෙයින්, කාර්යබහුල ජීවන රටාවෙන් මිදී හැකි සෑම විටම පාහේ, බෞද්ධ දර්ශනයෙහි ඇති මේ සාරාර්ථ සත්‍යය නැතහොත් සියලු සංස්කාරකයන්ගේ අනිත්‍ය ගති ස්වභාවය අපි සිහිපත් කළ යුත්තෝ වෙමු . පෘථග්ජන අප සියලු දෙනා ඇතුළු මෙලෝ සියල්ල ඉපිද- නැසී යන ස්වභාවයෙන් යුක්තය. ඒකායන සැපත වන්නේ, සංස්කාරයන්ගේ සංසිඳීමයි.
ඔබ සැමට අනිත්‍ය - දුක්ඛ-අනාත්ම ත්‍රිලක්ෂණය අවබෝධ කරගත හැකි ප්‍රඥා සිත් පහළ වන සුපින්වත් පොසොන් මංගල්‍යයකට ආසිරි වේවා !

මහින්ද යාපා අබේවර්ධන,
කථානායක,
ශ්‍රී ලංකා පාර්ලිමේන්තුව.

20/06/2024

මාතර රන් දූපත උපෝසථාගාර රජ මහා විහාරස්ථානයේ චෛත්‍ය රාජයාණන් වහන්සේ කොත් පැළඳවීමේ පුණ්‍ය උත්සවය 2024 ජූනී මස 20 දින ගරු කථානායක මහින්ද යාපා අබේවර්ධන මැතිතුමාගේ සහභාගිත්වයෙන් සිදුවිය.

මෙහිදී සියම් මහා නිකායේ ශ්‍රී රෝහණ මහා සංඝ සභාවේ මහා නායක සිත්තම්ගල්ලෙන රජමහා විහාරාධිපති මාතර රන්දුපත උපෝසථාගාර රජමහා විහාරයේ විහාරාධිපති අතිපූජ්‍ය අගළබඩ පියසිරි මහනාහිමිපාණන් වහන්සේගේ සුරතින් කොත් වහන්සේ නිරාවරණය කිරීම සිදුවිය.

ශාස්ත්‍රපති විහාරාධිකාරී විටියල ඉන්ද්‍රරතන හිමියන්ගේ අනුශාසනාව පරිදි ඉදි කළ මෙම මහ සෑරදුන් උසින් අඩි හැටපහකින් යුක්තය.

මෙම අවස්ථාවට දෙවිනුවර ඓතිහාසික පරම විචිත්‍රාරාම රජමහා විහාරස්ථානයේ විහාරාධිපති අමරපුර මහා සංඝ සභාවේ කල්‍යාණ වංශ පාර්ශ්වයේ මහානායක දෙවිනුවර සිරිසුනන්ද නාහිමියන්, මහා විහාරවංශික ශ්‍යාමොපාලි මහා නිකායේ ශ්‍රී රෝහණ පාර්ශ්වයේ ප්‍රධාන ලේඛකාධිකාරී අනුනායක කඹුරැපිටිය සපුගොඩ ඉලංගම්ගොඩ පුරාණ විහාර රජමහා විහාරය ඇතුළු පංච මහා විහාරාධිපති සද්ධර්ම කීර්ති ශ්‍රී සුගත ධම්ම විශාරද ශාස්ත්‍රපති ඕමාරේ කස්සප නාහිමියන් ප්‍රමුඛ මහා සංඝරත්නයද සැදැහැවතුන් පිරිසක්ද එක්ව සිටියහ.

- කථානායක මාධ්‍ය අංශය.

18/06/2024

දක්ෂිණ ලංකාවේ රුහුණු මාගම්පත්තුවේ මත්තල ජාත්‍යන්තර අංගිරස බෞද්ධ මධ්‍යස්ථානයේදී ඉදිවන අංගීරස සිරි ගෞතම බුදුගුණ මහා සෑරදුන් උදෙසා මංගල ශිලා ප්‍රතිෂ්ඨාපනය කිරීම 2024 ජුනි 16 දින සිදු වු අතර එම අවස්ථාවට ගරු කතානායක මහින්ද යාපා අබේවර්ධන මැතිතුමා සහභාගි විය.

කූරගල රජමහා විහාරයේ විහාරාධිපති රත්නපුර මහා දිසාවේ ප්‍රධාන සංඝ නායක පූජ්‍ය වතුරකුඹුරේ ධම්මරතන හිමියන්ගේ අනුශාසනාව පරිදි ඉදිවන මෙම මහ සෑරදුන් උසින් අඩි 158 යුක්තය.

මංගල ශිලා ප්‍රතිෂ්ඨාපනය සිදුවූයේ හත්සීයක් මහා සංඝරත්නය ආශිර්වාද පිරිත් සජ්ඣායනා මධ්‍යයේ ය.

මෙම අවස්ථාවට අස්ගිරි පාර්ශ්වයේ මහා නායක අතිපූජ්‍ය වරකාගොඩ ශ්‍රී ඥානරතන නාහිමිපාණන්,මල්වතු මහ විහාර පාර්ශ්වයේ අනු නායක පූජ්‍ය දිඹුල් කුඹුරේ විමලධම්ම හිමිපාණන් ප්‍රමුඛ මහා සංඝරත්නයද නියෝජ්‍ය කතානායක අජිත් රාජපක්ෂ,ගරු අමාත්‍යවරුන් වන චමල් රාජපක්ෂ,මහින්ද අමරවීර,පවිත්‍රා දේවී වන්නිආරච්චි මැතිණියද දකුණු පළාත් ආණ්ඩුකාර ලක්ෂ්මන් යාපා අබේවර්ධන මැතිතුමා සහ ත්‍රිවිධ හමුදාපතිවරුන් ද සැදැහැවතුන් විශාල පිරිසක්ද සහභාගි විය.

- කථානායක මාධ්‍ය අංශය.

17/06/2024

ඊද් මුබාරක් !

දුල් හිජ්ජා (හජ්) මාසය සඳහා අඩ සඳ දර්ශනය වී ඇති බැවින්, අද දින හජ් උත්සවය සමරන ශ්‍රී ලංකාවේ මුස්ලිම්වරුන් වෙත අන්‍යාගම් අදහන සියලු ලාංකිකයන්ගේ උණුසුම් සුබ පැතුම් ප්‍රථමයෙන්ම එක් කරනු කැමැත්තෙමි.

ඉස්ලාමීය ආගම අනුව, සඳ බැලීම සටහන් කරනුයේ ධු අල්-හිජ්ජා මාසයේ ආරම්භයයි. එම ධර්මයෙහි ඇතුළත් වන අනිවාර්ය පංච ආගමික වතාවත් අතුරෙහි අවසාන අංගය වන්නේ හජ් වන්දනාව යි. ශුද්ධ ස්ථානයක් වෙත ගමන් කිරීම ‘හජ්’ යන වදනෙහි සිංහල අර්ථය ලෙස ගත හැකියි. හජ් උත්සවය අතිශය ගෞරවනීය ලෙස , සෞදි අරාබි රාජ්‍යයෙහි ශුද්ධ වූ මක්කම් බිමෙහි සමරනු ලබන බවද අපගේ ලාංකික මුස්ලිම් හිතවතුන් කැපවීමෙන් ඒ් සඳහා සහභාගිවන බවද අපගේ දැනීමයි.

අපගේ හිතවත් මුස්ලිම් සහෝදර-සහෝදරියන් කැපවීමේ සහ පරිත්‍යාගයේ ඓතිහාසික සර්වකාලීන සංකේතය ලෙස සලකනුයේ සිය ආගමික කර්තෘ ඉබ්‍රාහිම් නබිතුමාත්, එතුමන්ගේ පුත්‍ර ඉස්මායිල් නබිතුමා සහ හාජර් මව්තුමියයි. ඔවුන් මෙසේ ශතවර්ෂ ගණනාවක් සමස්ත ලෝකවාසී ජනතාවගේ ගෞරවාදරයට ලක් වනුයේ සෙසු සියලු ලෝකයා වෙනුවෙන් සිදුකළ අසීමිත කැපකිරීම්වලට කෘතවේදීත්වය ඵල කිරීම පිණිසය.

ඒපමණක් නොව, විවිධ හේතූන් නිසා අර්බුදයට පත් ලොවක මිනිසුන් අතර පැවතිය යුතු බැඳීමේ සැබෑ අර්ථය පිළිබඳ පුළුල් ආදර්ශයක් ද මෙම හජ් උත්සවයෙන් සැපයෙයි. කිසිදු පුද්ගල තරාතිරමක් නොතකා ලොව දසතින් පැමිණ එකට ශුද්ධ වූ දෙවියන් නමදින සියලු ඉස්ලාම් බැතිමතුන්ගේ දර්ශනයෙන් මෙම මහා පූජෝත්සවය මඟින් අප සැමටද පෙන්වාදෙන්නේ සාමූහිකව, එකමුතුව දිවි ගෙවීමෙහි වටිනාකම බව මගේ විශ්වාසයයි. විවිධ ආගම් සහ ජාතීන් වෙසෙන රටක් වන අපේ ශ්‍රී ලංකාවට ඒ ආදර්ශය අතිශය වැදගත්ය. ලොව තවර අන්දමේ සාර්ථකත්වයක් අත්පත් කරගන්නට වුවද අපේ සාමූහිකත්වය, කැපවීම සහ එකමුතුකම එකසේ බලපායි.

ශුද්ධ වූ මක්කා භූමිය ලොවට පතුරන ගෞරවනීය සමානාත්මතාවයේ පණිවුඩය රැගෙන හජ් වන්දනාවෙහි යෙදෙන බැතිමතුන් ඇතුළු මෙරට හා ලෝකවාසී සියලු මුස්ලිම් ප්‍රජාවට උතුම් ඊදුල් - අල් හා උළෙලක් වේවා !

මහින්ද යාපා අබේවර්ධන,
කථානායක,
ශ්‍රී ලංකා පාර්ලිමේන්තුව.

- - - - - - - - - - - - - - - - - - - - - - - -

ஈத் முபாரக்

துல் ஹிஜ்ஜா மாதத்துக்கான தலைப்பிறை மாதத்தின் முதல் பகுதியில் தென்பட்டதை
தொடர்ந்து இத் தினத்தில் ஹஜ் பெருநாளை கொண்டாடும் அனைத்து இலங்கையர்களுக்கும்
வாழ்த்துக்களை தெரிவித்துக் கொள்வதில் மகிழ்ச்சி அடைகின்றேன்.

இஸ்லாம் சமயத்தினபடி பிறை பார்ப்பது மாத ஆரம்பத்தில் இடம்பெறுகின்றது. இஸ்லாம்
மதத்தின் பிரகாரம் ஹஜ் கடமையானது ஐந்து கடமைகளின் இறுதிக் கடமை ஹஜ் ஆகும்.
இதன்போNது சவுதி அரேபியாவின் மக்கமா மாநகரில் ஹஜ் கிரியைகள் நடைபெறுவதும்
அதில் எமது இலங்கை முஸ்லிம்களும் பங்கு கொள்வதையும் நாம் அறிகின்றோம்.

எமது இஸ்லாமிய சகோதர சகோதரிகள் விட்டுக்கொடுப்புகள் மற்றும் சகோதரத்துடன் இணைந்த
இப்பெருநாள் இப்ராஹிம் நபி அவர்கள்இ அவரது மகன் இஸ்மாயில் நபி மற்றும் ஹாஜரா
தாயினுடைய உயர்ந்த பண்பினை முழு உலகத்திற்கும் பறைசாற்றும் முகமாக் முழு
உலகத்திற்கும் சிறந்ததொரு நற்செய்தியை எடுத்துச் சொல்கின்றது. அதுமாத்திரமின்றி பல்வேறு
காரணங்களுக்காக பிரிந்திருக்கும் மனித சமூகத்திற்கு ஒரு எடுத்துக்காட்டாக இந்த ஹஜ்
பண்டிகை அமைகின்றது.
உலகத்திலே வாழுகின்ற அனைத்து மக்களும் எவ்வித வேறுபாடுகளுமின்றி சமமானவர்கள்
என்று இறைவன் முன்னிலையில் ஒன்றாக எடுத்துக்காட்டி செயற்படுவதை அவதானிக்க
முடிகின்றது. இதன்மூலமாக ஒற்றுமை சமத்துவம் இனநல்லிணக்கம் போன்ற உயர்
பெருமானங்களை மதிப்பதாக அமைகின்றது. பல இனங்களைக் கொண்ட நாடு என்று
அடிப்படையில் இலங்கையில் இவ்வாறான பண்டிகைகளின் மூலமாக பல முன்மாதிரியான
விடயங்களைப் பெற்றுக்கொள்ளக் கூடியதாக அமைகின்றது. மேலும் இப்பெருநாளின்
போதிக்கப்படும் தத்துவங்கள் இலங்கையராகிய எமது நாட்டின் முன்னேற்றத்திற்கு உந்து
சக்தியாக அமையும் என்பதில் ஐயமில்லை.

புனித மக்கா நகரில் உலகத்திற்கு பறைசாற்றும் ஒற்றுமையை ஏந்திச்சென்ற இலங்கை
மக்களுக்கும் இலங்கை திருநாட்டில் ஈகை திருநாளை கொண்டாடிக் கொண்டிருக்கும் இலங்கை
மக்கள் உட்பட முழு உலக மக்களுக்கும் இனிய ஹஜ்ஜுப் பெருநாள் நல்வாழ்த்துக்களை
தெரிவித்துக் கொள்கின்றேன்
மஹிந்த யாப்பா அபேவர்தன

சபாநாயகர்
இலங்கை பாராளுமன்றம