04/10/2025
නීති ශිෂ්‍ය බෞද්ධ සහෝදරත්වය මගින් වාර්ෂික ව සංවිධාන කරන රුධිර සහ පටක දන්දීමේ කඳවුර මෙවරත් පසුගිය ජුනි 26 දින උදෑසන 9 සිට දවස පුරා නීති විද්‍යාලයීය ප්‍රධාන ශාලාවේ දී පවත්වන්නට යෙදුණි.
මෙම වටිනා දානමය පින්කමේ ආරම්භක වැඩසටහන සඳහා ආරාධිත අමුත්තන් ලෙස කැලණිය විශ්වවිද්‍යාලයේ කථිකාචාර්ය, පූජ්‍ය වලස්මුල්ලේ භද්දිය හිමියන්, ශ්‍රී ලංකා නීති විද්‍යාලයේ විදුහල්පති ජනාධිපති නීතිඥ ප්‍රසාන්ත ලාල් ද අල්විස් මැතිතුමා, ශ්‍රී ලංකා නීති විද්‍යාලයේ නියෝජ්‍ය විදුහල්පති නීතිඥ ෂෙහාන් සී. පෙරේරා මැතිතුමා, නීතිඥ හෂිනි ඈපා මැතිනිය සහ නීති ශිෂ්‍ය බෞද්ධ සහෝදරත්වයේ හිටපු නිලධාරීවරුන් සහභාගී විය.
නීති ශිෂ්‍ය බෞද්ධ සහෝදරත්වය, ජාතික රුධිර පාරවිලයන මධ්‍යස්ථානය සමග එක් ව ජීවිතයක් අවැසි බොහෝ මිනිසුන් වෙනුවෙන් ලේ බිඳුවක් හෝ දන්දෙන්නට කළ ඇරයුම නීති ශිෂ්‍ය ප්‍රජාව බොහොම හෘදයාංගම පිළිගෙන තිබූ අයුරු දක්නට ලැබුණි. නීති ශිෂ්‍ය ප්‍රජාව පමණක් නොව නීති ක්ෂේත්‍රයේ බොහෝ දෙනෙකු ද පැමිණ මෙම මහඟු කර්තව්‍යයට දායක වූ බැව් කිව යුතු ය. එහි දී ලේ දන් දීමට අමතර ව පටක දන්දීමට ද හැකියාව ලැබුණු අතර ඒ සඳහා ද බොහෝ දෙනෙකු ඉතා යුහුසුළු ව සම්බන්ධ වූ අයුරු දැක ගන්නට ලැබිණි.
විශේෂයෙන්ම මා සිත් ගත් කරුණක් ලෙස 149 සහ 150 ශිෂ්‍ය කණ්ඩායම්වල ඇතැම් නීති ශිෂ්‍යයන් ස්වේච්ඡාවෙන්ම මෙම මහඟු කර්තව්‍යයට සහාය දැක්වීමට පැමිණ සිටීම දැක්විය හැකි ය.
අවසාන වශයෙන් නීතියේ දෙවඟනගේ සෙවණ යට, තර්ක විතර්ක කැටිකොට ගත් සිත් තුළ, මනුෂ්‍යත්වය දුටු සුන්දර මොහොතක් ලෙස මම එම මොහොත නිර්වචනය කරන්නට කැමැත්තෙමි.
එවන් වූ පින්සාර මොහොතක කොටස්කරුවන් වනු වස් එහි සපැමිණි සියලු දෙනා හට මම හිස නමා ආචාර කරමි. මට ද එහි කොටස්කරුවෙක් වන්නට ලැබීම භාග්‍යයක් කොට සලකමි.
උපේකා ලියනගේ
150 ශිෂ්‍ය කණ්ඩායම
Photo credits - Law Students' Buddhist Brotherhood
