17/05/2026
මේ දවස්වල හැමෝම කතා වෙන මොකක්ද මේ PayPal?
අන්තර්ජාලය පාවිච්චි කරන, Facebook ඉන්න, එහෙමත් නැත්නම් Online සල්ලි හොයන්න ට්‍රයි කරන ගොඩක් අය අතරේ මේ දවස්වල වැඩියෙන්ම කතාවෙන දෙයක් තමයි
ලංකාවෙ අයට paypal පාවිච්චි කරන්න පුලුවන් වෙනවා කියන එක.
හැමෝම කිව්වට ඇත්තටම මොකක්ද මේ? මේකෙන් අපිට තියෙන වාසිය මොකක්ද? අද අපි ඒ ගැන කතා කරමු.
සරලවම කිව්වොත් PayPal කියන්නේ ලෝකය පුරා විසිරිලා ඉන්න බිලියන ගණනක් මිනිස්සු පාවිච්චි කරන ඩිජිටල් මුදල් පසුම්බියක් (Digital Wallet). හරියට ඔයාගේ සාක්කුවේ තියෙන පර්ස් එක වගේම තමයි, හැබැයි මේක තියෙන්නේ ඉන්ටර්නෙට් එකේ. ඔයාගේ බැංකු කාඩ්පත් මේකට සම්බන්ධ කරලා, ලෝකේ ඕනෑම රටක ගනුදෙනුවක් ඉතාම වේගයෙන් කරන්න මේක පහසුකම් සපයනවා
එතකොට මෙච්චර කල් ලංකාවේ අය PayPal පාවිච්චි කළේම නැද්ද?
නෑ, පාවිච්චි කළා. හැබැයි ඒක හරියට "ගින්දර එක්ක සෙල්ලම් කරනවා" වගේ වැඩක්. මෙච්චර කල් අපේ රටේ අයට නිල වශයෙන් PayPal පහසුකම තිබුණේ නැති නිසා, ගොඩක් දෙනෙක් කළේ වෙනත් රටවල් (උදා: පිලිපීනය, ඩුබායි) විදිහට පෙනී ඉඳලා, සමහර වෙලාවට VPN පවා පාවිච්චි කරලා හොර රහසෙ ගිණුම් හදාගත්ත එක. 🎭
එතකොට අපි PayPal පාවිච්චි කළේ ලොකු අවදානමක් අරගෙන. මොකද බොරු තොරතුරු දාලා හදපු ගිණුමක් ඕනෑම වෙලාවක Permanent Ban වෙන්න පුළුවන්. එහෙම වුණොත් ඒ ගිණුම ඇතුළේ තියෙන සල්ලිත් එක්කමයි අපිට අහිමි වෙන්නේ. අපි කළේ නීති විරෝධී දෙයක් නිසා නීතියේ පිහිට පතන්නත් බැහැ. හැබැයි දැන් ඒ යුගය ඉවරයි!හෙට ඉඳලා ලංකාවේ අපිට එහෙම අනවශ්‍ය රිස්ක් එකක් ගන්න අවශ්‍ය වෙන්නේ නැහැ.
අපිට අපේ රටේ නමම පාවිච්චි කරලා paypal ගිණුමක් හදාගන්න ඉස්සරහට හැකියාව ලැබෙනවා.
Paypal ඇයි ඔච්චරටම වැදගත් වෙන්නෙ? ඇයි මිනිස්සු ඕකට ඔච්චර කැමති?
අපි දැනට සාමාන්‍යයෙන් online payment එකක් කරනවනම් කරන්නෙ අදාළ වෙබ් අඩවියට ගිහින් අපේ බැංකු කාඩ් වල විස්තර ඇතුළත් කරලා ඒ හරහා ගෙවීම් කරන එකනේ. හැබැයි එහෙම අන්තර්ජාලයේ තියෙන හැම වෙබ් අඩවියකටම ඔයාගේ බැංකු විස්තර දෙන එක අනතුරුදායකයි. අපි දෙන තොරතුරු කාගෙ කාගෙ අතට යනවද කියල අපිවත් දන්නෙ නෑ.
නමුත් PayPal හරහා ගෙවීමක් කරනවා නම්, ඔයාගේ කාඩ් පතේ අංකය විකුණන කෙනාට පේන්නේ නැහැ. ඔයාට සල්ලි දාන්න හෝ ගන්න කෙනාට දෙන්න ඕන වෙන්නෙ ඔයාගෙ email එක විතරයි.
ඔයා ඔන්ලයින් ඕඩර් එකක් දාලා ඔයා ඇණවුම් කරපු බඩුව ලැබුණේ නැත්නම් හෝ වැරදි එකක් ලැබුණොත්, PayPal හරහා පැමිණිලි කරලා ඔයාගේ මුදල් නැවත ලබාගන්න (Refund කරගන්න) පුළුවන් 100%ක්ම් නෙවෙයි. ගොඩක් වෙලාවට
ඔයා අන්තර්ජාලයෙන් මුදල් උපයන කෙනෙක් නම්, ඔයාගේ මහන්සියෙන් උපයන වැටුප ඉතාම විශ්වාසවන්තව ලංකාවට ගෙන්න ගන්න තියෙන හොඳම ක්‍රමය මේක කියල කියන්නත් පුලුවන්.
සැරින් සැරේ කාඩ් අංක ගහන්න ඕන නැහැ. එක පාරක් Setup කළාම ඔයාගේ Email එකයි Password එකයි විතරක් පාවිච්චි කරලා තත්පර ගණනකින් ගෙවීම් කරන්න පුළුවන්.
දැන් ලංකාවේ ගොඩක් බැංකු හරහා PayPal වලට සල්ලි යවන්න වගේම, පිටරටින් එන සල්ලි අපේ බැංකු ගිණුම්වලට නිල වශයෙන් ලබාගන්නත් අවස්ථාව ලබාදෙන්න සූදානමින් ඉන්නවා. මේක ඇත්තටම අපේ රටේ ඩිජිටල් ආර්ථිකයට ලැබුණු ලොකු ජයග්‍රහණයක්! 🇱🇰
Dilshan Eranga ✍️🙏
