26/08/2025
වෛද්‍ය විද්‍යාව වෙනුවෙන් සිදු කල විශිෂ්ඨම සොයාගැනීම් අතර එකක් වන්නේ මීට ශතවර්ෂයකට එපිටින් සිදුකල අධිවේගී ඉලෙක්ට්‍රෝන කම්භයක් ටන්ග්ස්ටන් ලෝහයක ඝට්ටනය කොට නිපද වූ X කිරණ සොයාගැනීමයි.
එහි බල මහිමයෙන් අදට දහස් ගණනක් රෝග විනිශ්චය කරගනිමින් අකලට මැලවී යන්නට තිබූ ජීවිත පණ ලබයි. මිත්‍රවරුනි, වෛද්‍ය විද්‍යාවේදීත් යම් මිනිසෙකුට විකිරණ කදම්භයක් එල්ල කරන්නට අවසර ඇත්තේ එකී විකිරණ මාත්‍රාව මගින් රෝගීයා වන අවධානමට වඩා ප්‍රතිලාභය බලවත් නම් පමණි. මක් නිසාද යත් විකිරණ සඳහා නිරාවරණය පිලිකා රෝග අවධානම, ජාන විකෘති කිරීම ඇතුලු සෞඛ්‍යමය අවදානම් රැසක් ඇති කරන බැවිනි..
අද විකිරණ මෙලෙසින් යොදාගත්තද 1960 දශයකයට එපිටින් ලෝකයේ මූලික මිනිස් අයිතිවාසිකම් පවා උල්ලංඝනය කරමින්, දකුණු අප්‍රිකානු භූමියේ අයිතිය දිනාගත් සුදු ජාතිකයන් විසින් දිනපතාම පැය ගණනාවක වැඩ මුර නිමවා යන කිසිත් නොදත් අවිහිංසක කලු ජාතික දියමන්ති පතල් කම්කරුවන්ව සාමාන්‍ය x කිරණ නොව, සජීවි x කිරණ scan කිරීමකට ( fluoroscopy) සඳහා ලක් කරන ලද්දේ බලහත් කාරයෙනි. මක් නිසාද යත් අප්‍රිකානු භූමියේ සැබෑ උරුම කරුවන් වූ මේ කලු ජාතිකයන් දියමන්ති ශරීරයේ සඟවාගෙන යනු ඇතැයි වූ අනිසි බිය හේතුවෙනි.
මේ ඔබ දකින්නේ වර්ෂ 1952 දී මෙලෙසින් x කිරණ ගතකොට සමස්ත ශරීරයම පරීක්ෂාවට ලක් කරනා දකුණු අප්‍රිකාවේ De Beers පතලේ කලු ජාතික පතල් කම්කරුවෙකි. මිත්‍රවරුනි, දිනපතා අධික විකිරණයට නිරාවරණය වූ මේ අහිංසකයන් දහස් ගණනින් කී දෙනෙකු පිලිකාවට ගොදුරු වන්නට ඇතිද, කී දෙනෙකු ජානමය විකෘතීන් කර දරා සිටින්නට ඇත්ද යන්නෙහි වගකීමක් හෝ ස්වකීය අප්‍රිකානු භූමියට බට සුදු ජාතික පතල් සමාගම දරන්නේ හෝ හානි පූරණයක් කර නොමැත. අද මානව හිමිකම් ගැන පාරම්බානා මිනිසුන් එදා හැසිරුනේ එලෙසින්‍ ය.
