05/09/2026
🔴 “මේ තරම් වැඩ කරන්න බෑ” කියලා
පොලිස් ලොක්කෙක් ගෙදර යයි…
රාජකාරි පීඩනය ගැන විමර්ශනයක්!
දෙහිවල පොලිසියේ රථවාහන අංශයේ ස්ථානාධිපති ලෙස රාජකාරි කළ පොලිස් පරීක්ෂකවරයෙකු රාජකාරි වැඩ වැඩිවීමෙන් ඇති වූ පීඩනය තවදුරටත් දරාගත නොහැකි බව සඳහන් කරමින් සේවය අතහැර ගොස් ඇති බව පොලිසිය පවසනවා. ඔහු සේවයෙන් ඉවත්ව යාමට පෙර තොරතුරු පොතේ සටහනක්ද තබා ඇති බවයි වාර්තා වන්නේ. රාජකාරි බර වැඩිවීම තමන්ට දැඩි පීඩනයක් ඇති කර තිබූ බව එම සටහනෙන් පෙන්වා දී තිබෙනවා.
කොහොම වුණත් සිද්ධිය මෙතැනින් නතර වෙලා නැහැ. මේ ආකාරයෙන් නිලධාරියෙකු සේවය අතහැර යාම අනෙකුත් පොලිස් නිලධාරීන්ටත් වැරදි පූර්වාදර්ශයක් විය හැකි බවට ඉහළ නිලධාරීන්ගේ අවධානය යොමුවී තිබෙනවා. ඒ අනුව මේ සම්බන්ධයෙන් විමර්ශනයක්ද ආරම්භ කර ඇති බවයි සඳහන් වන්නේ. මේ අතර අදාළ සිද්ධිය සම්බන්ධයෙන් අධිකරණයටද කරුණු ඉදිරිපත් කර තිබෙනවා.
එහිදී අදාළ පොලිස් පරීක්ෂකවරයාට නොතීසි නිකුත් කිරීම සහ ඔහුට ගුවන් ගමන් තහනමක් පැනවීම සඳහා කළ ඉල්ලීම් අධිකරණය විසින් ප්‍රතික්ෂේප කර ඇති බවයි වාර්තා වන්නේ. රාජකාරි පීඩනයක් හේතුවෙන් පොලිස් නිලධාරියෙකු සේවය අතහැර යාමත්, ඒ සම්බන්ධයෙන් ඉහළ නිලධාරීන් විමර්ශනයක් ආරම්භ කිරීමත් මේ වනවිට අවධානයට ලක්ව ඇති සිදුවීමක් බවට පත්ව තිබෙනවා.
