01/10/2025
දැන් මට අවුරුදු 28 යි 🌸
සැප්තැම්බර් තිස් වෙනිදා, ඊයේ කියන්නේ මගේ විසි අටවෙනි උපන්දිනය ! මගේ උපන්දිනය වෙනුවෙන් මට හම්බුණු ලස්සනම තෑග්ග දෙන්නේ මගේ අම්මා, පළවෙනි එක මේ මගේ ජීවිතය, දෙවෙනි එක මෙන්න මේ පුංචි කාඩ් එක🌸 මගේ ජීවිතේ ලොකුම inspiration එක වෙන්නේ මගේ අම්මා ! මේ ලෝකේ කරුණාවන්තම හදවතක් තියෙන ආදරේ විතරක්ම දීපු හොඳ දේ විතරක්ම උගන්නපු අම්මා 🥹
ඉස්සර චූටි කාලේ මැටිල්ඩා පොත කියවද්දී මට හැමතිස්සෙම මතක් වෙන්නේ අපේ අම්මාව ! ලොකුම පුදුමය තමයි ! දවස තිස්සෙම මහන්සී වෙලා කිසිම අඩුපාඩුවක් නොකර හැම වැඩ රාජකාරියක්ම අහවර කරපු අපේ අම්මාට පොත් කියවන්නත් වෙලාවක් තිබුණු එක ! තේකක් බොන ගමන් අහුවෙන හිස් කඩදාසියක හරි ලස්සනට portraits අඳින්නත් වෙලාව හදාගත්තු එක ! අපි හැමෝටම කිසිම වෙනසක් නොකර හැමෝම ගැන හොයලා බලන්න, ආදරේ දෙන්න, කෑවද බිවුවාද කියලා හොයන්න, රසම රස කෑම හදන්න මේ පැය විසිහතරක් ඇතුළේ අමුතුවෙන්ම වෙලාව හදාගන්නේ කොහොමද කියන එක මට හරි පුදුමයි. අදටත් අම්මා එහෙමමයි !
හොඳම කතාව තමයි, හැම ඉරිදාටම වගේ පුරුදු පරිදි ගමේ පුස්තකාලයට මාවත් එක්කගෙන ගියපු අම්මාට අන්තිමට ඒ පුස්තකාලයේ කියවන්න පොත් නැතිව ගියපු එක !
පොත් කියවන ගමන් අම්මා මේ ලෝකේ නොගියපු, නොදැකපු තැනක් නැති තරම්. චිලී රටේ ඉසබෙල් අය්යන්දේ, හරුකි මුරකාමි, ගේබ්‍රියෙල් ගාර්සියා මාකේස්, විභූති භූෂණ බන්ද්‍යෙපාධ්‍යාය, කුෂ්වාන්ත් සිං මේ හැම ලේඛකයෙක්ගේම වගේ පොත් ගැන හොඳ කියවීමක් අම්මා ළඟ තිබුණා. මේ සැරේ බුක් ෆෙයාර් එක ඇතුළේ කොච්චර නම් ඇවිද්දත් මේ හැම stall එකකම වගේ තිබුණු ලෝකේ හැම රටකම වගේ හොඳම ලේඛකයන් ගේ පොත් බහුතරයකම ගැන වගේ හරි ආසාවෙන් රහ කරලා කතා කරනකොට මට පුදුමත් හිතුණා !
චූටි කාලේ මට නින්ද යනකල්ම අම්මා ලස්සන කතාන්දර කියලා දෙනවා. අන්තිමට කියලා කියලා කියන්න කතාන්දරයක් ඉතිරි නොවුණු දා පටන් එයා කියලා දීලා තියෙන්නේ එයාම ගොතපු සුරංගනා කතා කියලා කීවේ මට ටිකක් තේරෙන වයසකට ආවාම පහු කාලෙක.
හැන්දෑවට ඉර බහිනකොට ඒ අහසේ පාට වෙනස් වෙලා යනකොට ටක්ගාලා කුස්සියේ ජනේලේ ළඟට වෙලා මාත් එක්ක
අහස දිහා බලන් ඉන්න පුරුද්දක් අම්මාට තිබුණා. අපේ මිදුලේ කොහේහරි පුංචි ලස්සන මලක් පිපුණත්, පාට පාට සමනලයෙක් ආවත්, චූටි කුරුල්ලෙක් ගහක උන්නත් හෙමින් වගේ මට කතා කරලා ඒ ලස්සන දකින්න, රස විඳින්න මට කියලා දුන්නේ අම්මා ! උපන්දිනයකට වුණත් සිබිල් නැන්දාගේ ලස්සනම ලස්සන කතන්දර පොත් අම්මයි තාත්තායි තෑගි කළා.
මේ ලෝකේ අද වෙනකොට මගේ මේ නිර්මාණශීලිත්වය නිසා කොහේ හෝ ආදරණීය හදවතක් අස්සේ පොඩි හරි inspiration එකක් ඇති කළා නම් ඒ හැමදෙයක්ම පිටිපස්ස්සෙම ඉන්න ලස්සනම හදවත මගේ අම්මා !
මේ ලෝකේ ආදරණීය, නිර්මාණශීලී, සංවේදී දරුවෙක් ඉබේ බිහිවෙන්නේ නැහෑ, එහෙම බිහිවෙනවා නම් ඒ නිර්මාණශීලීත්වය, සංවේදීත්වය ඇතුළේ කොහේ හෝ මුල්ලක ආදරණීය අම්මා කෙනෙක්, තාත්තා කෙනෙක් ඉන්නවා.
ලැවෙන්ඩර්
01.10.2025
