23/05/2026
යුක්තිය වෙනුවෙන් තනිව සටන් කරන ළමාරක්ෂක අධිකාරියේ නිලධාරිනියට මඩ ප්රහාර: පල්ලේගම නඩුවේ බලය සහ ධනය හමුවේ නීතිය නැමෙන හැටි
රාජකාරිය අකුරටම කරන නිලධාරිනියට පෞද්ගලික මඩ ප්රහාර
අනුරාධපුර අටමස්තානාධිපති පල්ලේගම හේමරතන හිමියන් විසින් බාලවයස්කාර දැරියක බරපතළ ලිංගික අපයෝජනයකට ලක් කිරීමේ නඩුවේදී, ජාතික ළමාරක්ෂක අධිකාරිය (National Child Protection Authority) වෙනුවෙන් පෙනී සිටිමින් අතිශය තීරණාත්මක සාක්ෂි රැසක් අධිකරණය හමුවේ අනාවරණය කළ අධ්යක්ෂ (නීතිය බලාත්මක කිරීම ) නීතිඥ සංජීවනී අබේකෝන් මහත්මිය ඉලක්ක කරගනිමින් මේ වන විට සංවිධානාත්මක පෞද්ගලික මඩ ප්රහාර මාලාවක් ආරම්භ කර තිබේ.
ඇයව මෙම නඩුවෙන් ඉවත් කිරීමේ සහ ඇයගේ පෙනී සිටීම දුර්වල කිරීමේ අරමුණින් මෙම මඩ ප්රහාර දියත් කර ඇති බව පැහැදිලිය. සැකකරු සතු ධන බලය සහ දේශපාලන හිතවත්කම් හමුවේ නොසැලී, වින්දිත දැරියට ඇමතුම් 84ක් ලැබුණු ආකාරය සහ වෛද්ය වාර්තා මගින් තහවුරු වූ සාක්ෂි ඍජුවම අධිකරණයට ඉදිරිපත් කළේ ළමාරක්ෂක අධිකාරිය නියෝජනය කළ ඇයයි.
මෙවැනි ප්රබලයන් සමඟ හැප්පෙමින් සාක්ෂි සහිතව යුක්තිය වෙනුවෙන් පෙනී සිටින ඇය වැනි නිලධාරිනියන් දඩයම් කිරීමට උත්සාහ කිරීම නින්දා සහගතය.
***ආණ්ඩුවේ සහ විපක්ෂයේ නිහඬතාවය පිටුපස ඇති සැබෑව***
රටේ මහත් ආන්දෝලනයකට ලක්ව ඇති මෙවැනි බරපතළ ළමා අපරාධ නඩුවකදී සමස්ත දේශපාලන අධිකාරියම පසුවන්නේ දැඩි නිහඬතාවයකය. නීතියේ සමානත්වය ගැන කතා කරන වත්මන් NPP ආණ්ඩුව පමණක් නොව, විපක්ෂයේ කිසිදු ප්රධාන පක්ෂයක් හෝ මේ වෙනුවෙන් ඍජුව කටයුතු කිරීමට ඉදිරිපත් නොවීමෙන් පැහැදිලි වන්නේ මෙරට සාම්ප්රදායික දේශපාලන බලපෑම් සහ ආගමික බල අධිකාරිය ඉදිරියේ සියල්ලන්ම එක ලෙස දණ නමා ඇති බවයි. මෙවැනි පසුබිමක, දේශපාලන හෝ රාජ්ය අනුග්රහයක් නොමැතිව ළමාරක්ෂක අධිකාරිය වෙනුවෙන් යුක්තිය පතා පෙනී සිටින නිලධාරීන්ට සිය රාජකාරිය ඉටු කිරීමට සිදුව ඇත්තේ අතිශය අවදානම් සහගත සහ දුෂ්කර වටපිටාවකය.
**මුල සිටම දියත් වූ 'වංගු ගැසීමේ' සහ ඇප ලබාදීමේ ක්රියාවලිය**
මෙම නඩුව ආරම්භ වූ දින සිටම සැකකරු ආරක්ෂා කිරීම සඳහා විවිධ උපක්රම භාවිතා වූ ආකාරය රහසක් නොවේ. මුල් අවස්ථාවේදී සැකකරුව අධිකරණයට ඉදිරිපත් කිරීම මඟහරිමින් වෛද්ය හේතු දක්වා රෝහල්ගත කර තැබීමට කටයුතු කළ අතර, අවසානයේදී ජාතික ළමාරක්ෂක අධිකාරිය විසින් විමර්ශනවල ඇති බරපතළ අඩුපාඩු (වීඩියෝ, ඩීඑන්ඒ සහ දුරකථන වාර්තා මඟහැරීම) පෙන්වා දෙද්දීත්, නීතිපතිවරයාගේ පාර්ශවයෙන් පොලිසියෙන් සැකකරු ට විරුද්ද ව කටයුතු නොකිරීම කැපී පෙනුණි.
අධිකරණය වෙත කරුණු නිසි පරිදි වාර්තා නොකර, සැකකරුට ඉතා පහසුවෙන් ඇප ලබා ගැනීමට අවශ්ය වටපිටාව සකස් කර දීම පැහැදිලිවම නීතිය හා සාමය අමාත්යංශයේ ඉහළ බලධාරීන්ගේ මැදිහත්වීම මත සිදු වූවකි. යුක්තිය යන්න පන්තිය, ධනය සහ බලය මත තීරණය වන බව වත්මන් ආණ්ඩුවද ප්රායෝගිකව ඔප්පු කරමින් සිටී.
**කොන්ද පණ ඇති නිලධාරීන් වෙනුවෙන් රටම පෙළගැසිය යුතුයි**
අවසානයේදී ලේ පැල්ලම් සහිත ඇඳුම් වැළලී, සාක්ෂිකරුවන් විකිණී යන සහ තවදුරටත් දරුවන් අපයෝජනයට ලක්වන මෙවැනි දූෂිත පද්ධතියක් තුළ, තමන්ට එල්ල වන මඩ ප්රහාර සහ තර්ජන නොතකා අසරණ දරුවන් වෙනුවෙන් නැගී සිටින නිලධාරීන් ආරක්ෂා කරගැනීම සමස්ත සමාජයේම වගකීමකි. ජාතික ළමාරක්ෂක අධිකාරිය වෙනුවෙන් සිය වගකීම අකුරටම ඉටු කරන සංජීවනී අබේකෝන් මහත්මිය වැනි ධෛර්යවන්ත නිලධාරිනියන් වෙනුවෙන් පොදු මහජනතාව ලෙස අප සැමවිටම පෙනී සිටිය යුතුය.
ඇයගේ එම අප්රතිහත ධෛර්යයට සහ සටන්කාමීත්වයට සමස්ත සමාජයේම උත්තමාචාරය හිමිවිය යුතුය. නීතිඥ මහත්මියනි, අධෛර්යමත් නොවන්න; ඔබ වෙනුවෙන් මහ පොළොවේ සුවහසක් මිනිස්සු ඔබට ශක්තියක් වන්නට සැමදා සිටිනු ඇත 🙏🙏🙏
සම්පත් දිල්ලිමුණි ✍️
