12/10/2026
ஹட்டன் வலயக் கல்விப் பணிமனையில் பணியாற்றும் அதிகாரிகள் மற்றும் ஊழியர்கள், இன்று முற்பகல் தமது பணிகளிலிருந்து விலகி அலுவலகத்திற்கு வெளியே போராட்டத்தில் ஈடுபட்டனர்.
ஹட்டன் வலயக் கல்வி அலுவலகத்தில் பணியாற்றுவதற்குப் போதிய வசதிகள் இல்லை எனப் போராட்டத்தில் ஈடுபட்ட ஊழியர்கள் தெரிவித்தனர்.
மழை பெய்யும் நாட்களில் அலுவலகத்திற்குள் மழைநீர் கசிவதால் கணினிக் கட்டமைப்புகள் சேதமடைவதாகவும் அவர்கள் குறிப்பிட்டனர்.
இவ்வாறான சந்தர்ப்பங்களில் கணினிகளைப் பாதுகாப்பதற்காக அவற்றை அகற்றிவிட்டு, மழை நின்ற பின்னர் மீண்டும் பொருத்தும்போது மின்சாரக் கசிவு ஏற்படுவதாகவும், இதனால் தமது உயிருக்கும் ஆபத்து ஏற்படுவதாகவும் ஊழியர்கள் தெரிவித்தனர்.
ஹட்டன் வலயக் கல்வி அலுவலகத்தின் கீழ் சிங்கள மற்றும் தமிழ் மொழிப் பிரிவுகளைச் சேர்ந்த சுமார் 140 பாடசாலைகள் இயங்குகின்றன.
அங்கு பணியாற்றும் சுமார் 3,500 ஆசிரியர்களின் சம்பளத் தயாரிப்பு மற்றும் கோப்புகளைத் தயாரித்தல் உள்ளிட்ட பணிகளை முன்னெடுப்பதற்காக சுமார் 70 அதிகாரிகளும் ஊழியர்களும் பணியாற்றுகின்றனர்.
எனினும், இவ்வளவு பணிகளை முன்னெடுக்கும் ஊழியர்களுக்குத் தேவையான அடிப்படை வசதிகள்கூட அலுவலகத்தில் இல்லை எனப் போராட்டத்தில் ஈடுபட்டவர்கள் சுட்டிக்காட்டினர்.
ஹட்டன் பகுதிக்கு அருகில் புதிய வலயக் கல்வி அலுவலகமொன்றை அமைப்பதற்காக அரசாங்கத்தால் நிதி ஒதுக்கப்பட்டுள்ள போதிலும், இதுவரை ஆரம்பகட்டத் திட்டமிடல் பணிகள்கூட நிறைவுசெய்யப்படவில்லை எனவும் அவர்கள் தெரிவித்தனர்.
இதனால் ஒதுக்கப்பட்ட நிதி மீண்டும் திறைசேரிக்குத் திரும்பிச் செல்லும் நிலை ஏற்பட்டுள்ளதாகவும் அவர்கள் குறிப்பிட்டனர்.
மேலும், அலுவலகத்தில் சுமார் 35 பெண் ஊழியர்கள் பணியாற்றுகின்ற போதிலும், அவர்களுக்காக ஒரேயொரு கழிப்பறை மாத்திரமே உள்ளதாகவும் ஊழியர்கள் தெரிவித்தனர்.
பாடசாலைகளில் பணியாற்றும் ஆசிரியர்கள் தமது அலுவலகப் பணிகளுக்காக வருகை தரும் சந்தர்ப்பங்களில், அலுவலகத்திற்குள் கடும் நெரிசல் ஏற்படுவதாகவும் அவர்கள் சுட்டிக்காட்டினர்.
எனவே, புதிய வலயக் கல்வி பணிமனையை நிர்மாணிப்பதற்காக அரசாங்கத்தால் ஒதுக்கப்பட்டுள்ள நிதியைப் பயன்படுத்தியாவது, தற்போதைய அலுவலகத்தில் நிலவும் குறைபாடுகளை நிவர்த்தி செய்ய நடவடிக்கை எடுக்க வேண்டும் எனப் போராட்டத்தில் ஈடுபட்டவர்கள் கோரிக்கை விடுத்தனர்.
இந்த விடயம் தொடர்பாக நுவரெலியா மாவட்ட ஒருங்கிணைப்புக் குழுவின் தலைவரும், நுவரெலியா மாவட்ட நாடாளுமன்ற உறுப்பினருமான மஞ்சுள சுரவீர ஆராச்சியிடம் வினவினோம்.
ஹட்டன் நகருக்கு அண்மையில் புதிய வலயக் கல்வி பணிமனையை நிர்மாணிப்பதற்காக அரசாங்கம் 60 மில்லியன் ரூபாயை ஒதுக்கியுள்ளதாக அவர் தெரிவித்தார்.
புதிய கட்டடத்தை நிர்மாணிப்பதற்குப் பொருத்தமான காணியை அடையாளம் கண்டு, அது தொடர்பாக மாவட்ட ஒருங்கிணைப்புக் குழுவுக்கு அறிவிக்குமாறு ஹட்டன் வலயக் கல்விப் பணிப்பாளருக்கும், வலயத்திலுள்ள அனைத்து பாடசாலை அதிபர்களுக்கும் கூட்டமொன்றின் ஊடாக அறிவுறுத்தல்கள் வழங்கப்பட்டுள்ளதாகவும் அவர் மேலும் தெரிவித்தார்.
