https://www.facebook.com/311129222094219/

Insight News by Hansi, Colombo 10, Colombo (2025)

15/07/2024

හිටපු පාකිස්තාන අගමැති ඉම්රාන් ඛාන් තවමත් පසුවන්නේ බන්ධනාගාරගතවයි. ඔහුගේ තාරික් ඊ ඉන්සාෆ් පක්ෂය තහනම් කිරීමට පාකිස්තාන රජය දැන් සූදානම් වෙමින් සිටිනවා. එම පක්ෂය විදෙස් රටවලින් නීතිවිරෝධිව මූල්‍යාධාර සපයාගෙන එම මුදල් රටතුළ ප්‍රචණ්ඩත්වය පැතිරවීමට සහ කැරලිගැසීමට යොදාගත් බවට සාක්ෂි හමුව ඇතැයිද රජයේ පාර්ශ්ව පවසනවා.
පසුගිය පාකිස්තාන මහා මැතිවරණයට ඉදිරිපත්වීමේ අවස්ථාවද තාරික් ඊ ඉන්සාෆ් පක්ෂයට අහිමි වුණා. කෙසේ නමුත් එම පක්ෂ අපේක්ෂකයින් ස්වාධීනව මැතිවරණයට ඉදිරිපත්වී ආසන 90කට වැඩි සංඛ්‍යාවක් දිනාගත්තා. එහෙත් එරට ප්‍රධාන ධාරාවේ කිසිදු පක්ෂයක් තනිව එතරම් ආසන ගණනක් දිනාගත්තේ නැහැ.

07/07/2024

මේ අවුරුද්ද සැලකෙන්නේ මැතිවරණ වසර විදිහට. මොකද මේ අවුරුද්ද පුරා ලෝකයේ රටවල් රැසක මැතිවරණ පැවැත්වෙන නිසා. මේ විදිහට ඉන්දියාවේ, බංග්ලාදේශයේ, ඉරානයේ, බ්‍රිතාන්‍යයේ මැතිවරණ වසර මුල් කාලයේදී පැවැත්වුණා. වසර අවසානයේදී අමෙරිකාව, ශ්‍රී ලංකාව ඇතුළු තවත් රටවල් රැසක මැතිවරණ පැවැත්වීමට නියමිතව පවතිනවා.
2024 වසරේ තවත් තීරණාත්මක මැතිවරණයක් වන ප්‍රංශ පාර්ලිමේන්තු මැතිවරණයේ දෙවැනි අදියර අද පැවැත්වෙනවා.
ඒ යටතේ ප්‍රංශ ප්‍රධාන භූමියේ ඡන්ද ප්‍රකාශකිරීම් එරට වේලාවෙන් අද උදෑසන 8ට ආරම්භ වූ අතර, එහි පළමු ප්‍රතිඵලය එරට වේලාවෙන් අද රාත්‍රී 8ට පමණ ප්‍රකාශයට පත් කෙරෙනු ඇතැයි අපේක්ෂිතයි. පසුගිය ජුනි මස 30 වැනිදා මැතිවරණයේ පළමු අදියර පැවැත්වුණු අතර මරීන් ලා පෙන්ගේ අන්ත දක්ෂිණාංශික නැෂනල් රැලී පක්ෂය එහි පෙරමුණ ගැනීමට සමත්ව තිබුණා. එහිදී ජනාධිපති එමානුවෙල් මැක්‍රොන්ගේ මධ්‍ය මතවාදී පක්ෂය ප්‍රබල පසුබෑමකට ලක්ව සිටි අතර ඔවුන් දෙවැනි අදියරෙන් ද පරාජයට පත්වනු ඇතැයි අපේක්ෂා කෙරෙනවා. මැතිවරණයෙන් කිනම් පක්ෂයක් ජයගත්තත් ජනාධිපති මැක්‍රෝන් තවදුරටත් එම ධුරයේ පසුවනු ඇති අතර ජයගන්නා පක්ෂයෙන් අගමැතිවරයා පත්වනු ඇත්තේ ද ඔහු යටතේයි. යම් හෙයකින් අන්ත දක්ෂිණාංශික පක්ෂ මෙවර මැතිවරණය ජයගතහොත්, ප්‍රංශයේ බලය අන්ත දක්ෂිණාංශික පක්ෂයක් වෙත හිමිවනු ඇත්තේ දෙවැනි ලෝක සංග්‍රාමයෙන් පසු පළමුවරටයි. ඒ අනුව මෙය ප්‍රංශ දේශපාලන සිතියම වෙනස් කරන මැතිවරණයක් වනු ඇති.

04/07/2024

මේ ඉන්නෙ ලැරී.
ලැරී ජීවත්වෙන්නෙ මහා බ්‍රිතාන්‍යයට අයත් රාජ්‍යයක් වෙන එංගලන්තේ‍.
මහා බ්‍රිතාන්‍යය තුළ ජීවත්වන ජනප්‍රියම බළල් සුරතලා මේ ලැරී කිව්වොත් ඒකෙ වරදක් නැහැ. 2011 අවුරුද්දේ ඉදලා ලැරී ජීවත්වෙන්නෙ එසේ මෙසේ තැනක නෙමෙයි. ඩවුනින් වීථියේ බ්‍රිතාන්‍ය අගමැති නිල නිවසේ. එයාට නමක් විතරක් නෙමෙයි නිල නාමයකුත් තියෙනවා. ලැරී තමයි බ්‍රිතාන්‍ය අගමැතිවරයාගෙ නිවසේ නිල මී දඩයක්කරු. එහෙම නැත්නම් Chief Mouser to the Cabinet Office. මේ තනතුරත් එසේ මෙසේ තනතුරක් නෙමෙයි. 16 වැනි සියවසේ ඉදලම බ්‍රිතාන්‍ය අගමැති නිල නිවස තුළ මේ වගේ නිල මී දඩයක්කාරයෙක් ඉදලා තියෙනවා.
මේ අතරිනුත් ලැරී හරිම විශේෂ නිල සුරතලෙක් වෙන්න අපූරු කාරණාවක් නිසා.
ලැරී මේ වනවිට බ්‍රිතාන්‍ය අගමැතිවරුන් 5 දෙනෙක්ට තම සේවය සපයලා තියෙනවා. ඒ ඩේවිඩ් කැමරන්, තෙරේසා මේ, බොරිස් ජොන්සන්, ලීස් ට්‍රස් සහ වත්මන් අගමැති රිෂී සුනක් ට. බ්‍රිතාන්‍ය මහා මැතිවරණය අද පැවැත්වෙනවා. ඉන් තේරීපත්වෙන මීලග අගමැතිවරයාගේ නිල මී දඩයක්කාරයා වෙන්නත් ලැරී දැන් ලැහැස්ති වෙලා ඉන්නෙ.
ලැරීගෙ මීලග හාම්පුතා කවුරු වේවිද?
රීෂී සුනක්? නැත්නම් ලේබර් අපේක්ෂක කියර් ස්ටාමර් ද?
ඒ ගැන හෙට කියන්නම්…

04/07/2024

බ්‍රිතාන්‍ය මහා මැතිවරණය අද 🇬🇧

හදිසි මහ මැතිවරණයක් කැඳවීමට අගමැති රිෂී සුනක් පසුගිය මැයි මාසයේදී තීරණය කිරිමේ ප්‍රතිඵලයක් විදියට බ්‍රිතාන්‍ය පාර්ලිමේන්තු මැතිවරණය අද පැවැත්වෙනවා.

බ්‍රිතාන්‍ය මැතිවරණ කොමිසමට අනුව එරට මීලඟ මහා මැතිවරණය පැවැත්වීමට නියමිතව පැවතියේ ලබන වසරේ ජනවාරි මස 28 වැනිදාට පෙර දිනයකදීයි.

කෙසේ නමුත් අගමැති සුනක්ගේ හදිසි තීන්දුව හේතුවෙන් මැතිවරණය වඩාත් ඉක්මන් වූයේ කිසිදු පක්ෂයකටවත් නිසි ප්‍රචාරණ වැඩපිලිවෙලක්වත් සැලසුම් කරගැනීමට අවස්ථාවක් නොතබමින්.

ඒ අනුව මිලියන 46කට වැඩි පිරිසක් ඡන්දය භාවිත කිරීමට සුදුසුකම් ලබා ඇති මැතිවරණය එරට වේලාවෙන් අද පෙරවරු 7 ට ආරම්භ වී එරට වේලාවෙන් අද රාත්‍රී 10 දක්වා ක්‍රියාත්මක වීමට නියමිතයි.

මෙහිදී පාර්ලිමේන්තුවේ පහළ මන්ත්‍රී මණ්ඩලයේ නියෝජිතයින් 650ක් තෝරා ගැනීමට නියමිතව පවතිනවා.

එහිදී එක්සත් රාජධානියට අයත් ප්‍රධාන රටවල් හතරට පාර්ලිමේන්තුවේ ආසන බෙදී යනවා.

ඒ අනුව එංගලන්තයට මෙවර ආසන 543ක් හිමිව ඇති අතර 2019 මහා මැතිවරණයේදී එංගලන්තයට හිමිව තිබූ ආසන ගණන 533ක්.

එමෙන්ම වේල්සයට මෙවර ආසන 32ක් හිමිව ඇත්තේ පසුගිය මැතිවරණයේදී ඊට හිමිවී තිබූ ආසන ගණනින් 8ක් ඉවත් කරමින්.

මේ අතර ස්කොට්ලන්තයට ආසන 57ක් සහ උතුරු අයර්ලන්තයට ආසන 18ක් හිමිව තිබෙනවා.

යම් පක්ෂයකට මැතිවරණය ජයගැනීමට නම් මෙම සමස්ත ආසනවලින් 326ක් හෝ දිනාගත යුතුයි.

අවුරුදු 18ට වැඩි ඕනෑම බ්‍රිතාන්‍ය ජාතිකයෙකුට මෙවර මැතිවරණයේදී ඡන්දය භාවිත කිරීමේ අවස්ථාව පවතින අතර ඊට අමතරව බ්‍රිතාන්‍ය ඡන්ද අයිතිය හිමි පොදුරාජ්‍ය මණ්ඩලීය රටක පුරවැසියෙකුට හෝ අයර්ලන්ත වැසියෙකුට ද මීට ඡන්දය භාවිතා කළ හැකියි.

මීට අමතරව 2022 නව මැතිවරණ ප්‍රතිසංස්කරණවලට අනුව වසර 15කට වැඩි කාලයක් විදෙස්ගතව සිටින බ්‍රිතාන්‍ය පුරවැසියන් මිලියන 2ක් මෙවර මැතිවරණයට සුදුසුකම් ලබා සිටීම විශේෂත්වයක්.

එමෙන්ම ඡායාරූපයක් සහිත හැඳුනුම්පතක් භාවිත කරමින් ඡන්දය ලබාදීමට බ්‍රිතාන්‍ය පුරවැසියන්ට මෙහිදී අවස්ථාව හිමිවන්නේ ඉතිහාසයේ පළමුවරටයි.

එමෙන්ම ජූනි මස 18 වැනිදාට එනම් මැතිවරණයට ලියාපදිංචි වීමේ අවසන් දිනයට පසු සිය වලංගු හැඳුනුම්පත නැති වූ හෝ සොරාගැනීමට ලක්වූ අයෙකුට ද ඡන්දය භාවිතා කිරීමේ අවස්ථාව ලබාදී තිබෙනවා.

එහිදි අද එරට වේලාවෙන් සවස 5ට පෙර තමන්ට ඡන්දය භාවිත කිරීමට අවශ්‍ය බවට ඉල්ලුම්පතක් ලබාදිය යුතු වනවා.

ඉන් අනතුරුව වලංගු ඡන්ද දායකයෙකු සමඟ පැමිණ තමන් වෙනුවට අදාළ පුද්ගලයා මාර්ගයෙන් ඡන්දය භාවිතා කිරීමේ අවස්ථාව ලබාගැනීම මෙහිදී සිදුවනවා.

මෙම ක්‍රමය නම් වන්නේ පෙරකලාසි ක්‍රමය ලෙසයි.

කෙසේ නමුත් මේ පෙරකලාසි එනම් PROXY ක්‍රමය භාවිත වන්නේ එංගලන්තය, ස්කොට්ලන්තය සහ වේල්සය තුළ පමණයි.

අගමැති රිෂී සුනක් හදිසියේ මෙම මැතිවරණයක් කැඳවූ නමුත් එය සුනක්ගේ පාලක කන්සවේටිව් පක්ෂයට ඉතාමත් තීරණාත්මක මැතිවරණයක්.

ඒ පාලක පක්ෂයේ ජනප්‍රියත්වය බිඳවැටී විපක්ෂයේ කම්කරු පක්ෂය පිළිබඳ වැඩි මහජන ප්‍රසාදයක් නිර්මාණය වී තිබීම හේතුවෙන්.

මේ අනුව විපක්ෂයේ අගමැති අපේක්ෂකයා වන කියර් ස්ටාමර් මීලඟ බ්‍රිතාන්‍ය අගමැතිවරයා වීමේ වැඩි අවස්ථාවක් පවතිනවා.

බ්‍රිතාන්‍යය පාදක කරගත් යූ ගව් (YOU GOV) වෙබ් අඩවිය පසුගියදා කළ සමීක්ෂණයකින් අනාවරණය වූයේ විපක්ෂයේ කම්කරු පක්ෂය මෙවර මැතිවරණය කැපී පෙනෙන බහුතර බලයකින් ජයගනු ඇති බවයි.

ඔවුන්ගේ පුරෝකතනවලට අනුව ලේබර් පක්ෂය සියයට 39ක ඡන්ද ප්‍රතිශතයක් දිනාගන්නා අතර, පාලක කන්සවේටිව් පක්ෂය දිනාගනු ඇත්තේ සියයට 22ක ඡන්ද ප්‍රතිශතයක් පමණයි.

ලිබරල් ප්‍රජාතන්ත්‍රවාදී පක්ෂය සියයට 12ක ඡන්ද ප්‍රතිශතයක් සහ හරිත පක්ෂයට 7%ක ප්‍රතිශතයක් හිමිවෙනු ඇතැයි අපේක්ෂා කෙරෙනවා.

එසේ වුවහොත් කම්කරු පක්ෂයට ආසන 431ක්, කන්සවේටිව් පක්ෂයට ආසන 102ක්, ලිබරල් ඩිමොක්‍රටික් පක්ෂයට ආසන 72ක් හිමිවෙතැයි අපේක්ෂිතයි.

යූ ගව් වාර්තාව යටතේ ස්කොට්ලන්තයේ වඩාත් ජනප්‍රිය SNP පක්ෂයට එහි ආසන 18ක් හිමිවෙතැයි ගණන් බලා ඇති අතර, වේල්සයේ ප්‍රකට ප්ලයිඩ් කැම්රේ පක්ෂය දිනගනු ඇතැයි පැවසෙන ආසන ගණන 3ක්.

බොහෝ පුරෝකථන මගින් ප්‍රකාශවන ආකාරයට කම්කරු පක්ෂය මෙවර මැතිවරණය ජයගතහොත් ඔවුන් එරට පාලන බලයට පත්වන්නේ වසර 14කින් පසු පළමුවරටයි.

මේ අතර බ්‍රිතාන්‍ය යේ ජනප්‍රිය 'ද සන්' (THE SUN) පුවත්පත සිය සහාය කම්කරු පක්ෂයට ලබාදීමට තීරණය කර තිබෙනවා.

පුවත්පත මෙම තීරණය අනාවරණ කර තිබුණේ වෙනස්වීමට නිසි කාලය එලඹී ඇති බවට පවසමින්.

2010 වසරේ සිට පැවති සියලු මැතිවරණවලදී ද සන් පුවත්පතේ සහාය හිමිව තිබුණේ කන්සවේටිව් පක්ෂය වෙතයි.

පුවත්පත් කලාවේ දැවැන්තයා වන රූපට් මර්ඩොක්ට අයත්ව තිබූ ද සන් පුවත්පත දැන් පාලනය වන්නේ ඔහුගේ පුතු වන ලක්ලන් මර්ඩොක්ගේ නිවුස් කෝප් සමාගම යටතේයි.

මේ අතර මැතිවරණය ජයගත්තත් කම්කරු පක්ෂයේ අපේක්ෂක කියර් ස්ටාමර් අභියෝග රැසකට මුහුණදීමට සිදුවනවා.

කම්කරු පක්ෂයේ ප්‍රධාන මැතිවරණය පාඨය වූ වෙනස කෙසේ හෝ සිදුකිරීමට ඔවුන් මුහුණදෙන විශාලතම අභියෝගය වනු ඇති.

එමෙන්ම ස්ටාමර් පාලනය යටතේ රට තුළ බදු ඉහළ නැංවෙනු ඇතැයි පැවසෙනවා.

කෙසේ නමුත් රට පත්ව ඇති තත්ත්වයෙන් එය ගොඩනැගීම පහසුවෙන් සිදුකළ නොහැකි බවත් ඊට කාලයක් අවශ්‍ය බවත් ස්ටාමර් දැනටමත් පවසා අවසන්.

මැතිවරණ ප්‍රතිඵල අද රාත්‍රියේ සිට නිකුත් වන අතර එහි නිල ප්‍රතිඵල හෙට හෝ ඉදිරි දිනක ප්‍රකාශයට පත් කිරීමට නියමිතව පවතිනවා.

එහිදී පත්වන මන්ත්‍රීවරුන් ලබන ජූලි මස 9 වැනිදා රැස්වීමට නියමිත අතර එහිදී පාර්ලිමේන්තුවේ නව කතානායකවරයා පත්කරගනු ඇති.

අභිනව බ්‍රිතාන්‍ය පාර්ලිමේන්තුව රැස්වීමට නියමිතව ඇත්තේ ජූලි මස 17 වැනිදායි.

එදිනම චාල්ස් රජු සිය රාජාසන කතාව පවත්වනු ඇති.

- හංසි අමරසිරි

Insight News by Hansi

15/07/2024

07/07/2024

04/07/2024

04/07/2024

Address

Website

Alerts

Shortcuts

Share

Category