22/05/2024
ජවිපෙ අලුත් නායකයා
අර්බුදය දැන් ඉතා දරුණු අතට හැරී තිබේ. වසර හැටක් තිස්සේ අනුරාගිකව මාක්ස්වාදය ආරක්ෂා කරගෙන සිටි පැරණි ජනතා විමුක්ති පෙරමුණ සහෝදරවරුන් පරයා අමරසූරිය වලව්වේ රෝස පාට ඩේටා සයන්ටිස්ට් බූරුෂුවා ප්‍රභූ ජාතික ජන බලවේගය දැන් ජනප්‍රියවාදයේ ඉහළම අත්තට නැග සිටී. ජාජබයට එකතුව සිටින මධ්‍යම පාන්තික සුචරිත සූචක පැරණි වියත්මග පැනික් බයියන්ට නලින් හේවගේ වැන්නවුන් පෙනෙන්නේ පහළ කුණු ගොඩේ සිටින ශිෂ්ටාචාරවත් නොවුණු වාචාල නරපණුවන් ලෙසට ය.
88-89 ජවිපෙ විසින් ඝාතනය කළේ ස්ත්‍රී දූෂකයන්, කසිප්පුකාරයන්, හොරුන් යනුවෙන් ජවිපෙ අභ්‍යන්තරයේ නිර්මාණය කරගෙත තිබූ ඔවුන්ගේම ආත්ම වංචාව ප්‍රසිද්ධ මාධ්‍යයේ කටින් පිට වූ වරදට හේවගේ සහෝදරයා ජාතික ජන බලවේගයේ මැයි දින රැස්වීම් හතරෙන්ම අනුකම්පා විරහිතව කපා දැම්මේ ය. වෙනදාට ජවිපෙ මැයි රැළියේ අනිවාර්යෙන් ඉන්නා මාක්ස් සහෝදරයා, එංගල්ස් සහෝදරයා, ලෙනින් සහෝදරයා සහ විජේවීර සහෝදරයා පවා මෙවර වේදිකාවෙන් අහෝසි වී යද්දී ඔබ වැනි පොඩි එකෙකුගේ පස්සා පැත්තට ධනේශ්වර බූට් පහර සැරට වැදීම පුදුමයක් නොවෙයි, නලින් සහෝදරයා!
ඊයේ දෙරණට ලොකු නයෙක් ඇවිත් ය කියා ජනයා බෙරිහන් දෙනු ඇසුණෙන් ගොස් බැලූ කල උන්නේ යෞවනයේ පොපියන චමත්කාරය NPP රෝස කැකුළ අනුර කුමාර දිසානායක මැතිතුමා ය. ඔහු ඊයේ එම වැඩසටහන තුළ JVP සහෝදරයන්ව අමු අමුවේ පාවා දුන්නේ ය. අනුර ඔයා 360 ට ගියාට වැඩිය හොඳයි නොගිහින් හිටියා නම්. හිරු බලයේ නලින් හේවගේට වඩා සිය ගුණයක මෝඩකමක් ඊයේ අනුර කරගත්තේ ය.
අනුර එන තෙක් පැයක් කතා කරන්න බලාගෙන හිටිය ලාල්ට තරු පෙනුණේ මහින්දගේ අධිවේගයේ මාතර සිට කොළඹට පැයෙන් පැමිණි අනුර දුටු විටය. කෙසේ වෙතත් මැයි රැළියේ ලාල් කාන්ත ඉතා බරපතල ප්‍රකාශයක් කළේ ය. එනම් ඔවුන් බලයට පැමිණි විට ලංකාවේ ප්‍රභූන්ට විශේෂත්වයක් දක්වන වත්මන් අධිකරණ පද්ධතිය වෙනුවට යුක්තිය පසිඳලීම සඳහා අධිකරණ බලය ගමේ වැසියන්ට දෙන බවට ඔහු යටි ගිරියෙන් කෑ ගසා පොරොන්දු විය. දිලිත්ගේ දෙරණේ ගෝලයා ඒ නාඩිය හරියටම අල්ලා අනුරගෙන් ඒ ගැන ඇසුවේ ය. අනුර කළේ මහා කැත වැඩකි. ඔහු ලාල් කාන්ත මෝඩයෙකුට දාන්න හැදුවේ ය. පළමුව ඔහු සුපුරුදු පරිදි ඒ කියන්නේ “සමථ මණ්ඩලය” ගැනය කියමින් නිවේදකයා ගොනාට අන්දන්නට හැදුවේ ය. නමුත් චතුර අල්විස්ට වඩා තාර්කික අලුත් නිවේදකයා “සමථ මණ්ඩලයට අධිකරණ බලයක් නැහැනේ මන්ත්‍රීතුමා” යැයි කියා කී විට අනුර අනුකම්පා සහගත ලෙස අසරණ විය. බොක්ක දොට්ට පනින්න මෙන් ඔහු පුටුවේ ඒ මේ අත ඇඹරෙන ආකාරය දුටු විට මට හිතුණේ සැබැවින්ම ඔහුට වඩා ලාල් කාන්ත ශක්තිමත් නායකයෙකු බවයි.
අනුරට කියන්න තිබුණේ එක්කෝ “ඔව්, අපි දෙනවා තමයි” කියා ය. ජවිපෙ ප්‍රතිපත්තිය එයයි. බලය ලද සැනින් කිසිදු අවස්ථාවක් නොදී ප්‍රතිවාදියා සමුලඝාතනය කිරීම මාක්ස්වාදී න්‍යායයි. ලාල් කාන්ත එළිපිටම බය නැතුව “ඔව් අපි මැරුවා තමයි. අපිට බලය ලැබුනම අපි බලය පාවිච්චි කරනවා තමයි. බලය තියෙන්නේ ඒකට තමයි” කියා අවංකව ජේවීපීකාරයෙකු මෙන් කතා කරයි. නමුත් දැන් කාලයක් තිස්සේ මිලෙන් අධිකම බ්‍රෑන්ඩඩ් කලිසම් ෂර්ට් සූට් බූට් ඇඳ ෆස්ට් ක්ලාස් එකේ රට රටවල සංචාරය කර ආතල් ගන්නා අනුරට එසේ කිව නොහැකි ය. ලාල් කාන්ත තවමත් උඩ බොත්තම නැති පරණ චෙක් කමිසයක් ඇඳගෙන කාන්තාවන් ඉදිරියේ හරිනි බේබිව විළියෙන් කුපිත කරවන ස්ත්‍රීවාදී විහිළු කළාට අනුරට දැන් එසේ කළ නොහැකි ය. අනුර දැන් ප්‍රභූ පන්තියේ මහත්තයෙකි. රට රටවල සුදු තානාපතිවරුන් සමග හැඳි ගෑරුප්පුවෙන් කන බොන වැදගත් ලොක්කෙකි. එබැවින් ලාල් සහෝදරයාගේ කතාව අනුමත කිරීමට අනුරට ලැජ්ජාවක් ඇති වීම සාධාරණය.
නොඑසේ නම් කෙලින්ම කියන්න තිබුණේ “නැහැ, ලාල් කාන්ත සහෝදරයා වැරදියි.” කියා ය. අඩුම ගානේ එහෙම කීවා නම් අනුරගේ නායකත්වය පීචං වෙන්නේ නැත. නමුත් ඔහු හත්පොළේ ගාගෙන අවසානයේ “ලාල් සහෝදරයා කියපු වචනයෙන් ගම්‍ය වන දෙය නෙවෙයි අදහස් කළේ…” කියා රට්ටු හිනස්සවන ජාතියේ බ්ලාවක් කීවේ ය. ඉතින් බම් අනුර ඒකට තමයි “බොරු කියනවා” කියන්නේ කියා බුකියේ කොල්ලො කියන්නට විය… මෙය අනිවාර්යෙන්ම මීම් එකක් වෙනු ඇත. ඊළඟට ඔබ කියූ දෙයක් වැරදුණොත් ඔබට අනුරගේ විහිළු කතාව කිව හැකිය: “මම කියූ වචනයෙන් ගම්‍ය වෙන දෙය නෙවෙයි මා අදහස් කළේ…” බුහාහාහා.
නමුත් ඒ සියල්ලට වඩා කැතම වැඩේ අනුර තමන්ගේ දේශපාලන මණ්ඩලයම එකට තියා පාවා දී නෝන්ඩි කිරීමයි. “අපි මේවා එකට වාඩි වෙලා කතා කරලා ගන්න තීරණ” කියා ටිල්වින්, හඳුන්, ලාල්, නලින්ද ඇතුළු ජවිපෙ දේශපාලන මණ්ඩලය දෙකේ කොළයට දැම්මේ “එහෙම කතා කරලා මේවට ඇවිල්ලා උන් අපේ රෙදි ගලවනවා” කියා නොකියා කියමිනි. එය තනිකරම තමන් ගැලවීමකි. ඉහත සියල්ලටම වඩා ජවිපෙ අර්බුදය පෙන්වන අවස්ථාව එයයි. අනුර යනු දැන් ජාජබ නායකයා ය. ජවිපෙ අලුත් නායකයා ලාල් කාන්ත ය. දිස් ඉස් පොලිටික්ස්.
