Citizen.lk, No 3/1, Austin Place, Colombo 08, Colombo (2025)

05/11/2025

🟠 පිලිපීනයේ සුළි කුණාටුවෙන් 58ක් මරුට

මධ්‍යම පිලිපීනයට බලපෑ 'කල්මේගි' සුළි කුණාටුවකින් පුද්ගලයින් 58 දෙනෙකු මිය ගොස් තිබෙනවා.

විදෙස් වාර්තා සඳහන් කළේ, මේ හේතුවෙන් ලක්ෂ සංඛ්‍යාත පිරිසක් අවතැන් වී ඇති බවයි.

කල්මේගි සුළි කුණාටුවත් සමඟ ඇතිවූ වර්ෂාපතන හේතුවෙන් ජල ගැලීම් තත්ත්වයක් වාර්තා වී ඇති අතර එහිදී තවත් පුද්ගලයින් 13 දෙනෙකු අතුරුදහන් වී ඇති බවයි සඳහන් වන්නේ.

මේ අතර සහන කටයුතු සඳහා සහාය වීම යොදා තිබූ හමුදා හෙලිකොප්ටර් යානයක් මින්ඩනාඕ දූපතට කඩා වැටීමෙන් එහි කාර්ය මණ්ඩල සාමාජිකයින් හය දෙනෙක මියගොස් ඇති බවයි විදෙස් මාධ්‍ය වැඩිදුරටත් සඳහන් කර සිටින්නේ.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

05/11/2025

🟠 ෆේස්බුක් සාදයක් වටලා 10ක් අත්අඩංගුවට ගැනේ

පානදුර ගොරකාන ප්‍රදේශයේ නිවසක පවත්වාගෙන ගිය ෆේස්බුක් සාදයක් වටලා එහි හිමිකරු, ඔහුගේ බිරිඳ ඇතුළු 10ක් අත්අඩංගුවට ගත්බව පානදුර උතුර පොලීසිය සඳහන් කරනවා.

මෙසේ අත්අඩංගුවට ගෙන ඇත්තේ පානදුර, බොරලැස්ගමුව, ගාල්ල, පස්සර සහ බදුල්ල ප්‍රදේශයේ පදිංචි 18 - 40 අතර වියේ පසුවන පිරිසක් බවයි සඳහන් වන්නේ.

අත්අඩංගුවට පත්වූවන් අතර සැකකරුවන්ට මත්ද්‍රව්‍ය සැපයූ පුද්ගලයා ද වන බව පොලීසිය සඳහන් කරනවා.

සැකකරුවන් අත්අඩංගුවට පත්වන මොහොතේ දී මත්ද්‍රව්‍ය භාවිතාකර සිට ඇති අතර, ඔවුන් සන්තකයේ කොකේන් සහ අයිස් මත්ද්‍රව්‍ය සුළු වශයෙන් තිබී ඇත.

මේ පිළිබඳ පොලිස් පරීක්ෂණ ක්‍රියාත්මකයි.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

05/11/2025

🟠 චරිත රත්වත්තේ ඇප මත මුදා හැරේ

අල්ලස් කොමිසම විසින් දූෂණ චෝදනා යටතේ අත්අඩංගුවට ගත් මුදල් අමාත්‍යංශයේ හිටපු ලේකම්වරයකු වන චරිත රත්වත්තේ ඇප මත මුදා හරින ලෙස කොළඹ මහේස්ත්‍රාත් අධිකරණය ඊයේ (04) නියම කර තිබෙනවා.

කොළඹ ප්‍රධාන මහේස්ත්‍රාත් අසංග එස්. බෝදරගම විසින් සැකකරු රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට නියෝග කළ අතර, සැකකරුගේ විදේශ ගමන් තහනම් කරන බවත්, සැකකරුගේ විදේශ ගමන් බලපත්‍රය අධිකරණයට භාරදිය යුතු බවටත් නියම කර ඇත.

ඊට අමතරව, සැකකරු විසින් සාක්ෂිකරුවන්ට බලපෑම් කිරීමෙන් වැළකිය යුතු බවට තවත් නියෝගයක් පනවනු ලැබුුණු බවයි සඳහන් වන්නේ.

ඉන් අනතුරුව පැමිණිල්ල ජනවාරි මස 23 වෙනිදා කැඳවීමට අධිකරණය නියම කර තිබෙනවා.

2015 වසරේ අග්‍රාමාත්‍ය උපදේශකවරයා වශයෙන් කටයුතු කරමින් සිටියදී, අවශ්‍යතාවයක් නොමැතිව, වී ගබඩා කිරීම සඳහා යොදාගන්නා කොකුන් උපකරණ 50 ක් විධිමත් භාණ්ඩ මිලදී ගැනීමේ පටිපාටිය අනුගමනය කිරීමකින් තොරව, තමන් විසින් හඳුන්වාදුන් සමාගමකින් මිලදී ගැනීම සඳහා රාජ්‍ය වාණිජ විවිධ නීතිගත සංස්ථා නිලධාරීන්ට බලපෑම් කර තිබෙන බවට සැකකාර චරිත රත්වත්තේ වෙත චෝදනා එල්ල වී තිබෙනවා.

එම ක්‍රියාව තුළින් සැකකරු විසින් රුපියල් 99,679,799.70 ක පාඩුවක් රජයට සිදුකිරීම සහ බාහිර පාර්ශ්වයක් වෙත වාසියක් සලසාදීම යන චෝදනා මත සැකපිට චරිත රත්වත්තේ අත්අඩංගුවට ගෙන අල්ලස් කොමිසම විසින් අධිකරණයට ඉදිරිපත් කර තිබුණා.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

05/11/2025

🟠 ශ්‍රී ලංකාවේ ප්‍රකාශන හිමිකම් නීතිය ශක්තිමත් කිරීම සඳහා කමිටුවක් පත් කෙරේ

ශ්‍රී ලංකාවේ ප්‍රකාශනය හිමිකම් නීතිය ශක්තිමත් කිරීම සඳහා වූ සාකච්ඡාවක් වෙළෙඳ,වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහගේ ප්‍රධානත්වයෙන් ඊයේ (04) දින වෙළෙඳ අමාත්‍යාංශයේදී පවත්වා තිබෙනවා.

ඒ අනුව, ශ්‍රී ලංකවේ බුද්ධිමය දේපළ නීතිය යටතේ ප්‍රකාශන අයිතිය සම්බන්ධයෙන් වන නීති තත්ත්වයන්, ජාත්‍යන්තර නීති ප්‍රවනතාවයන්ට අනුව ශක්තිමත් කිරීම සඳහා අමාත්‍යවරයාගේ උපදෙස් මත, බුද්ධිමය දේපළ විෂය, නීති ක්ෂෙත්‍රය සහ මීට අදාළ අනෙකුත් අමාත්‍යාංශ නියෝජනය වන පරිදි නිලධාරීන් සහ විෂය පිළිබඳ විද්වතුන්ගෙන් සමන්විත කමිටුවක් පත් කර ඇත.

සංගීත ක්ෂේත්‍රයේ ප්‍රකාශන අයිතිය සම්බන්ධයෙන් උද්ගතව ඇති ගැටලුකාරී තත්ත්වයන් සලකා බලා සාධනීය විසඳුම් ලබාදීම පිණිස නිර්දේශ ඉදිරිපත් කිරීම මෙහි අරමුණ වනවා.

ඒ පිළිබඳව සාකච්ඡා කිරීම සඳහා අමාත්‍යවරයාගේ ප්‍රධානත්වයෙන් කමිටු සාමාජිකයින් රැස් වූ අතර එම කමිටුව සඳහා බුද්ධිමය දේපළ නීති ක්ෂේත්‍රයේ ප්‍රවීණයෙකු වන ආචාර්ය ඩී.එම්. කරුණාරත්න, ශ්‍රී ලංකාවේ ජාතික බුද්ධිමය දේපළ කාර්යාලයේ අධ්‍යක්ෂ ජනරාල් හිමාලි හෙට්ටිහෙලගෙ, සහකාර අධ්‍යක්ෂ (නීති) ආචාර්ය අමාලි මුණසිංහ, ශ්‍රී ලංකා විදුලි සංදේශ නියාමන කොමිෂන් සභාවේ සහකාර අධ්‍යක්ෂ (නීති) එම්.ජී.එන්. නදීෂානි, බුද්ධ ශාසන, ආගමික හා සංස්කෘතික කටයුතු අමාත්‍යාංශයේ ජ්‍යෙෂ්ඨ සහකාර ලේකම් ඩබ්.එච්.ඩී. ශ්‍යාමලී මහත්මිය සහ වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍යාංශයේ නීති නිලධාරී අමානි පිංගමගේ සහභාගී වී සිටියා.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

05/11/2025

🟠 ලෝක ආහාර වැඩසටහනේ මෙරට නියෝජිත සහ මෙරට අධ්‍යක්ෂ පිලිප් වෝඩ් සහ සෞඛ්‍ය හා ජනමාධ්‍ය අමාත්‍යවරයා අතර හමුවක්

ලෝක ආහාර වැඩසටහනේ (world Food Programe – Sri Lanka) මෙරට නියෝජිත සහ මෙරට අධ්‍යක්ෂ ලෙස පත් වූ පිලිප් වෝඩ් (Philip Ward) සහ රජයේ හවුල්කාර නිලධාරී (government partnership officer) මුස්තාෆා නිහ්මත් (Musthafa Nihmath) ඊයේ (04) පස්වරුවේ සෞඛ්‍ය අමාත්‍යාංශයේ දී සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස හමු ව තිබෙනවා.

මෙහිදී 2023- 2027 දක්වා ලෝක ආහාර වැඩසටහනේ (World Food Programme - WFP) උපායමාර්ගික සැලැස්ම සහ ඉදිරි ක්‍රියාමාර්ග පිළිබඳ අවධානය යොමු වූ අතර විශේෂයෙන් ආහාර සුරක්ෂිතතාව සහ පෝෂණ සුරක්ෂිතතාව වෙනුවෙන් රජයේ ඉදිරි වැඩ පිළිවෙල අනුව ලෝක ආහාර වැඩසටහන (WFP) සමග ඉදිරි කටයුතු සිදු කිරීම පිළිබඳව සාකච්ඡා කෙරුණා.

මෙරට මව්වරුන්ගේ සහ ළමුන්ගේ පෝෂණ තත්ත්වය ඉහළ නැංවීම සහ මන්ද පෝෂණ තත්ත්වයන් තුරන් කරමින් නියමිත පෝෂණයෙන් යුත් සෞඛ්‍ය සම්පන්න ජනතාවක් බිහි කිරීම උදෙසා ලෝක ආහාර වැඩසටහන ඉදිරියටත් දායකත්වය ලබාදෙන බවත්, මෙරට නිෂ්පාදනය කරනු ලබන ආහාරවලට නිසි වෙ‌ළෙදපොලක් ඇති කිරීම සම්බන්ධව ද මෙහිදී සාකච්ඡා කෙරුණා.

ආහාර සුරක්ෂිතතාව වැඩි දියුණු කිරීම, මන්දපෝෂණය අඩු කිරීම සහ දේශගුණික හා ආර්ථික කම්පන හමුවේ අවදානමට ලක්විය හැකි ප්‍රජාවන්ගේ ඔරොත්තු දීමේ හැකියාව ශක්තිමත් කිරීම සඳහා වන ජාතික ප්‍රයත්නයන්ට සහාය වෙමින් ලෝක ආහාර වැඩසටහන ශ්‍රී ලංකාවේ දේශීය උපායමාර්ගික සැලැස්ම (2023-2027) ක්‍රියාත්මක කිරීමට නායකත්වය දීම සම්බන්ධයෙන් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මෙහිදී සිය කෘතඥතාව මෙහිදී ලෝක ආහාර වැඩසටහනේ මෙරට නියෝජිත ලෙස පත් වූ පිලිප් වෝඩ්ට පුද කරන ලදි.

එමෙන්ම මෙරට ආර්ථික අර්බුදයෙන් යථා තත්ත්වයට පත්වන අවස්ථාවේ ආහාර පද්ධති නැවත ගොඩනැගීමට සහ සැමට ආහාර සහ පෝෂණ සුරක්ෂිතතාව ඇති කිරිමට දක්වන දායකත්වය වෙනුවෙන් ද අමාත්‍යවරයා මෙහිදී සිය කෘතඥතාව පළ කර ඇත.

1968 සිට ශ්‍රී ලංකාවේ ක්‍රියාත්මක වන ලෝක ආහාර වැඩසටහන මගින් ශ්‍රි ලංකාවේ ආහාර සුරක්ෂිතතාව, පෝෂණ සුරක්ෂිතතාව, ආර්ථික හා දේශගුණික අභියෝගයන්ට මුහුණ දෙන ප්‍රජාවන්ගේ ඔරොත්තු දීමේ හැකියාව ශක්තිමත් කිරීම කෙරෙහි සහාය ලබා දීම සිදු කෙරෙනවා.

ලෝක ආහාර වැඩසටහනේ කටයුතු මෙරට රජය සමග සහයෝගයෙන් පවත්වාගෙන යාමට අවශ්‍ය සහයෝගය ලබාදීම සම්බන්ධයෙන් මෙරට රජයට සහ සෞඛ්‍ය අමාත්‍යවරයාට ලෝක ආහාර වැඩසටහනේ මෙරට නියෝජිත පිලිප් වෝඩ් මහතා සිය ප්‍රසාදය ද මෙහිදී පළ කර සිටියා.

මෙම අවස්ථාවට සෞඛ්‍ය නියෝජ්‍ය අමාත්‍ය වෛද්‍ය හංසක වි‌ඡේමුණි, සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ එක්ව සිටියා.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

05/11/2025

🟠 අබලන් වතු මාර්ග සංවර්ධනයට රුපියල් මිලියන 500ක්

මලයගම් ප්‍රජාව සිටින වතුකරය තුළ ඇති අබලන් වූ මාර්ග අලුත්වැඩියා කොට සංවර්ධනය කිරීමට රුපියල් මිලියන 500 ක මුදලක් වෙන් කිරීමට කැබිනට් අනුමැතිය ලැබුණු බවත් ඒ අනුව තම අමාත්‍යාංශය හරහා මෙම රුපියල් මිලියන 500ක මුදල වැය කර වතු ආශ්‍රිත මාර්ග විශාල ප්‍රමාණයක් සංවර්ධනය කරන බවත් වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න සඳහන් කර සිටියා.

වැවිලි සහ ප්‍රජා යටිතල පහසුකම් අමාත්‍යාංශයේදී අද (04) පැවති විශේෂ මාධ්‍ය සාකච්ඡාවේදී අමාත්‍යවරයා මේ බව අනාවරණය කර ඇත.

ඒ අනුව, ඇතැම් මාර්ග කොන්ක්‍රීට් කිරීමටත් තවත් මාර්ග කාපට් කිරීමටත් කටයුතු කරන බවත් කඳුකර ජනතාවට මාර්ග අබලන්ව පැවතීම ද ප්‍රශ්නයක් බවත් සඳහන් කල අමාත්‍යවරයා එම ජනතාවට ඇති එම ප්‍රශ්න මේ ආකාරයෙන් එකින් එක විසඳීමට වත්මන් රජය කටයුතු කරන බවත් සඳහන් කර සිටියා.

මේ ආකාරයට වතු මාර්ග අබලන්ව පැවතීම රටේ නිෂ්පාදනයට, කර්මාන්තයේ දියුණුවට සෘජුවම බලපාන බවත් අනෙක් අතට එම ප්‍රජාවගේ අවශ්‍යතාවයන් වලටත් එය බලපාන බවත් සඳහන් කල අමාත්‍යවරයා ඉදිරියේදී මේ වතු ආශ්‍රිතව සංචාරක ව්‍යාපාරය දියුණු කිරීම මූලික අරමුණක් නිසා මෙම වතු ආශ්‍රිත මාර්ග සංවර්ධනය කිරීම අත්‍යාවශ්‍යම කාරණයක් බවත් සඳහන් කර සිටියා.

මෙම වතු ආශ්‍රිතව ඇති මාර්ග එක් පැත්තකින් මාර්ග සංවර්ධන අධිකාරියට අයත් නැති අතර අනෙක් අතට පළාත් සභාවලට අයිති නැති බවත්, එමෙන්ම පළාත් පාලන ආයතනවලට අයිති නැති බවත්, පැවසූ අමාත්‍යවරයා මෙම වතු මාර්ග වලට පසුගිය කාලයේ අයිතිකාරයෙක් නොසිටි නිසා මේවා සංවර්ධනය නොවුනු බවත් සඳහන් කර සිටියා.

සමාගම් යටතේ තිබුණු වතු මාර්ග ඔවුන් නඩත්තු නොකලේ ආර්ථික ශක්තියක් නොමැති නිසා යැයි කියමින් ඔවුන්ද අත පිසදා ගත් නිසා රජය මෙම සියළු මාර්ග සංවර්ධනය කිරීමට තීරණය කල බවත් අමාත්‍යවරයා සඳහන් කර සිටියා.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

05/11/2025

🟠 දැදුරු ඔයේ ගිලී 4 දෙනෙකු අතුරුදන්

දැදුරු ඔයේ දියනෑමට ගොස් අද (5) පස්වරුවේ පුද්ගලයින් සිව්දෙනෙකු අතුරුදන් වී තිබෙනවා.

පස් දෙනෙකුගෙන් යුත් කණ්ඩායමක් මෙලෙස දියනෑමට ගොස් ඇති අතර, එහිදී එක් අයෙකු පමණක් බේරාගෙන ඇත.

අතුරුදන් වූවන් සොයා මේ වනවිට මෙහෙයුමක් ආරම්භ කර ඇත.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.05 | 𝘾𝙞𝙩𝙞𝙯𝙚𝙣.𝙡𝙠

04/11/2025

🟠 ආර්ථික ස්ථාවරත්වය සහ ජාතික සමගිය වෙනුවෙන් ශ්‍රී ලංකා රජය ගන්නා උත්සාහය වතිකානුවේ පැසසුමට

04/11/2025

🟠 ආර්ථික ස්ථාවරත්වය සහ ජාතික සමගිය වෙනුවෙන් ශ්‍රී ලංකා රජය ගන්නා උත්සාහය වතිකානුවේ පැසසුමට

රට තුළ ආර්ථික සහ දේශපාලන ස්ථාවරත්වය ඇති කරමින් ශ්‍රී ලංකාව යළි යථා තත්ත්වයට ගෙන ඒමට ජනාධිපතිවරයා ප්‍රමුඛ රජය ගන්නා උත්සාහය බෙහෙවින් අගය කරන බවත්, ආර්ථික ස්ථායීකරණයට මෙන්ම ජාතික සමගිය වර්ධනය කිරීමට ශ්‍රී ලංකාව දරන උත්සාහයන්ට වතිකානුවේ සහාය හිමි වන බවත් වතිකානුවේ රාජ්‍ය සහ ජාත්‍යන්තර සංවිධාන සබඳතා පිළිබඳ ලේකම්, අගරදගුරු පෝල් රිචඩ් ගැලගර් හිමිපාණෝ ප්‍රකාශ කර තිබෙනවා.

නිල සංචාරයක් සඳහා මෙරටට පැමිණි වතිකානුවේ රාජ්‍ය සහ ජාත්‍යන්තර සංවිධාන සබඳතා පිළිබඳ ලේකම්, අගරදගුරු පෝල් රිචඩ් ගැලගර් හිමිපාණෝ ජනාධිපති ලේකම් කාර්යාලයේදී අද (04) පෙරවරුවේ ජනාධිපති අනුර කුමාර දිසානායක හමු වූ අවස්ථාවේදී මේ බව සඳහන් කර සිටියා.

එහිදී ජනාධිපති අනුර කුමාර දිසානායක විසින් අගරදගුරු ගැලගර් හිමිපාණන් උණුසුම් ලෙස පිළිගන්නා ලද අතර, මෙරටෙහි වත්මන් තත්ත්වය සහ වත්මන් රජය යටතේ අත්කර ගෙන ඇති ආර්ථික ප්‍රගතිය පිළිබඳව දැනුවත් කර සිටියා.

අගරදගුරු හිමිපාණන්ගේ සංචාරය ශ්‍රී ලංකාවට ආශිර්වාදයක් බව සඳහන් කළ ජනාධිපතිවරයා, වතිකානුව සහ ශ්‍රී ලංකාව අතර අඩ සියවසක රාජ්‍යතාන්ත්‍රික සබඳතා මෙරටට බොහෝ ප්‍රතිලාභ අත්කර දී ඇති බවත්, එය අධ්‍යාත්මික වශයෙන් පමණක් නොව, රට තුළ මානව ගරුත්වය ප්‍රවර්ධනය කිරීමෙහිදීද ඉතා වැදගත් වූ බවත් සඳහන් කර සිටියා.

ශ්‍රී ලංකාවේ අධ්‍යාපන ක්ෂේත්‍රයට දුන් සහාය මෙන්ම, සුනාමි ව්‍යසනයෙන් පසු රට යළි යථා තත්වයට ගෙන ඒම සඳහා වතිකානුව ලබා දුන් සහායද මෙහිදී විශේෂයෙන් සිහිපත් කළ ජනාධිපතිවරයා, පසුගිය වසර 50 පුරා වතිකානුව දැක් වූ සහයෝගය සහ මිත්‍රත්වය වෙනුවෙන් සිය කෘතඥතාව පළ කළ සිටියා.

මෙහිදී ජනාධිපතිවරයා XIV වන ලියෝ පාප් වහන්සේගේද සුවදුක් විමසා උන්වහන්සේට නිදුක් නිරෝගී සුවය සහ ශක්තිය ප්‍රාර්ථනා කරමින් සිය සුබපැතුම් එක් කර සිටියා.

ශ්‍රී ලංකාවේ වත්මන් ප්‍රගතිය තමා මෙන්ම ශුද්ධෝත්තම පාප් වහන්සේද බොහෝ අගයන බව පැවසූ අගරදගුරු ගැලගර් හිමිපාණෝ, ඒ අනුව, XIV වන ලියෝ පාප් වහන්සේ නුදුරු අනාගතයේදී ශ්‍රී ලංකාවේ සංචාරයක නිරත වීම පිළිබඳව සලකා බලනු ඇති බවද වැඩිදුරටත් සඳහන් කර සිටියා.

වතිකානුව සහ ශ්‍රී ලංකාව අතර රාජ්‍යතාන්ත්‍රික සබඳතාවල 50 වන සංවත්සරය වෙනුවෙන් මෙරටට පැමිණි අගරදගුරු ගැලගර් හිමිපාණන් මෙරට සියලු ජන ප්‍රජාවන් අතර සාමය, සහයෝගීතාව සහ අන්‍යෝන්‍ය අවබෝධය වැඩිවර්ධනය කිරීම සඳහා දෙරටෙහි කැපවීම ශක්තිමත් කිරීමේ අරමුණෙන් නොවැම්බර් 8 වන දා දක්වා ශ්‍රී ලංකාවේ රැඳී සි‌ටින අතර, එම කාලය තුළ මෙරට වැදගත් ස්ථාන කිහිපයක සංචාරයේ නිරත වීමට නියමිතයි.

1975 සැප්තැම්බර් 6 වන දින දෙරට අතර රාජ්‍යතාන්ත්‍රික සබඳතා ඇරඹීම නිමිත්තෙන් ‘වතිකානුවේ ඉදිරි දර්ශනය, සංවාදය සහ සාමය සඳහා කැපවීම’ යන මාතෘකාව යටතේ පැවැත්වෙන සම්මන්ත්‍රණයට අගරදගුරු පෝල් රිචඩ් ගැලගර් හිමිපාණන් සහභාගි වනු ඇත.

වතිකානුව රජය නියෝජනය කරමින් රොබර්ටෝ ලුකිනි සහ ටොමිස්ලව් සුබැත් යන පියතුමන්ලා මෙම අවස්ථාවට සහභාගි වූ අතර, ජනාධිපති ලේකම් ආචාර්ය නන්දික සනත් කුමානායක සහ ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ ඊට එක්ව සිටියා.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.04 | 𝘾𝙞𝙩𝙞𝙯𝙚𝙣.𝙡𝙠

04/11/2025

🟠 මාර්ග ආරක්ෂණ ක්‍රියාකාරි සැලැස්ම 2025-2026 ක්‍රියාත්මක කිරීම සඳහා කැබිනට් අනුමැතිය

මාර්ග ආරක්ෂණ ක්‍රියාකාරි සැලැස්ම 2025-2026 ක්‍රියාත්මක කිරීම සඳහා කැබිනට් අනුමැතිය ලැබී තිබෙනවා.

ඒ ප්‍රවාහන, මහාමාර්ග සහ නාගරික සංවර්ධන අමාත්‍යවරයා විසින් ඉදිරිපත් කර ඇති කැබිනට් යෝජනාවක් අනුවය.

ශ්‍රී ලංකාව තුළ මාර්ග අනතුරු හා ජීවිත හානි පිළිබඳව ගැඹුරු හා නිරන්තර ගැටලුවකට මුහුණ දෙමින් සිටින අතර මාර්ග අනතුරු හේතුවෙන් පසුගිය වසර තුනක කාලය තුළ මෙරට සාමාන්‍ය වාර්ශික මරණ අනුපාතය පුද්ගලයින් 10,000කට 11.2ක් ලෙස වාර්තා වී ඇත.

පොලිස් දෙපාර්තමේන්තුවේ දත්ත වාර්තා අනුව 2020 - 2024 කාලසීමාව තුළ මෙරට රිය අනතුරු 118,697ක් වාර්තා වී ඇති අතර එම අනතුරු හේතුවෙන් මෙරට පුද්ගලයින් 12,322ක් මිය ගොස් ඇත.

එමෙන්ම, දුම්රිය හරස් මාර්ගවල පවතින අනාරක්ෂිතභාවය හේතුවෙන් අනතුරු 400ක් පමණ වාර්ශිකව සිදුවන බවත් වාර්තා වී ඇති අතර මේ අනුව මාර්ග අනතුරු හේතුවෙන් අඛණ්ඩව ඉහළ යන මරණ හා හානි අවම කරමින් සියලු මාර්ග භාවිත කරන්නන් සඳහා ආරක්ෂිත හා සැමට සමාන මාර්ග පරිසරයක් ඇති කිරීම පිණිස මාර්ග යටිතල පහසුකම්වල ගුණාත්මකභාවය වැඩිදියුණු කිරීම‍, ආරක්ෂිත වාහන භාවිත කෙරෙන බවට තහවුරු කිරීම හා එම වාහන නියාමනය කිරීම අත්‍යාවශ්‍ය බවට හඳුනාගෙන ඇත.

ඒ අනුව, එකී අරමුණු සහිතව සකස් කර ඇති මාර්ග ආරක්ෂණ ක්‍රියාකාරි සැලැස්ම 2025-2026 ක්‍රියාත්මක කිරීම සඳහා එම අමාත්‍යවරයා ඉදිරිපත් කළ යෝජනාව සඳහා කැබිනට් අනුමැතිය හිමිව ඇත.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.04 | 𝘾𝙞𝙩𝙞𝙯𝙚𝙣.𝙡𝙠

04/11/2025

🟠 විපක්ෂ නායක සජිත් ප්‍රේමදාස මහතා නවදිල්ලියේ දී ඉන්දීය කර්මාන්ත සම්මේලනය හමුවෙයි

ඉන්දියාවේ නිල සංචාරයක නිරත වන විපක්ෂ නායක සජිත් ප්‍රේමදාස නවදිල්ලියේ දී ඉන්දීය කර්මාන්ත සම්මේලනයේ (CII) ජ්‍යෙෂ්ඨ නියෝජිතයින් පිරිසක් හමුවූ අතර, එහිදී වෙළෙඳාම, ආයෝජන සහ තාක්ෂණය යන ක්ෂේත්‍රවල ද්විපාර්ශ්වික සහයෝගීතාව ශක්තිමත් කිරීම සඳහා පුළුල් කථිකාවතක් ගොඩනැංවීමට ඊයේ (3) සමත් වි තිබෙනවා.

වෙළෙඳාම සහ ආයෝජන ප්‍රවාහයන් ඉහළ නැංවීම සඳහා ඉන්දියා-ශ්‍රී ලංකා ඒකාබද්ධ ආර්ථික කොමිසම යටතේ වෙළෙඳ පහසුකම් සැපයීමේ ක්‍රියාකාරී කණ්ඩායමක් පිහිටුවීමට විපක්ෂ නායක සජිත් ප්‍රේමදාස මෙහිදී යෝජනා කළ අතර, ඉන්දියානු කර්මාන්ත සඳහා කැප වූ ඉන්දියා-ශ්‍රී ලංකා ඒකාබද්ධ කාර්මික හා තාක්ෂණ වෙළෙඳ කලාපයක් ශ්‍රී ලංකාවේ නිර්මාණය කිරීමට ද ඔහු යෝජනා කර ඇත.

එසේම පුනර්ජනනීය බලශක්තිය, කෘෂි සැකසුම්, සැපයුම්, සංචාරක සහ අර්ධ සන්නායක වැනි ප්‍රමුඛතා අංශ හඳුනා ගැනීම සඳහා ශ්‍රී ලංකා-CII ව්‍යාපාරික සංසදයක් පිහිටුවීමට ද විපක්ෂ නායකවරයා යෝජනා කර සිටියා.

තවද ශ්‍රී ලංකාවේ ව්‍යාපාර මෙහෙයුම් පුළුල් කිරීමට ඉන්දියානු ව්‍යාපා⁣රිකයන්ට ආරාධනා කළ විපක්ෂ නායක සජිත් ප්‍රේමදාස වැඩිදුරටත් පවසා සිටියේ, විදේශ සෘජු ආයෝජනවලට බාධා කරන ඕනෑම බාධාවන් ඉවත් කිරීමට සහ බහු-පාර්ශ්වික ව්‍යවස්ථාදායක සහාය හරහා පූර්ණ පහසුකම් සැපයීමට කටයුතු කරන බවයි. අනුපූරක නිෂ්පාදන සහ සැකසුම් මධ්‍යස්ථානයක් වීමට ශ්‍රී ලංකාවේ ඇති කැමැත්ත ගෙන හැර දක්වමින් ඉන්දියාවේ අර්ධ සන්නායක මෙහෙයුම් යටතේ සහයෝගීතාවයක් ද හෙතෙම යෝජනා කර සිටියා.

සියලුදෙනා ඇතුළත් කර ගත් සහ තාක්ෂණය මෙහෙයවන වර්ධනයේ වැදගත්කම අවධාරණය කරමින්, සංවර්ධනය ජනතාව කේන්ද්‍ර කරගත් සහ ජනතාව මෙහෙයවන මට්ටමක පැවතිය යුතු බවත්, ප්‍රගතියේ ප්‍රතිලාභ සමාජයේ සියලු කොටස් වෙත ළඟා වන බව සහතික කළ යුතු බවත් ඔහු සඳහන් කර සිටියා.

එමෙන්ම නිෂ්පාදනය සහ තාක්ෂණය සම්බන්ධයෙන් ඉන්දියාවේ නැගීම ශ්‍රී ලංකාවට අභියෝගයක් නොවන නිසා ඉදිරියේදී සහයෝගයෙන් කටයුතු කිරීමට ආරාධනා කරන බවත් විපක්ෂ නායක සජිත් ප්‍රේමදාස වැඩිදුරටත් සඳහන් කර සිටියා.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.04 | 𝘾𝙞𝙩𝙞𝙯𝙚𝙣.𝙡𝙠

04/11/2025

🟠 විශේෂ කාර්ය බලකායට යතුරුපැදි 100ක් හා ත්‍රී රෝද රථ 50ක්

විශේෂ කාර්ය බලකාය සඳහා එන්ජින් ධාරිතාව 125cc ප්‍රමාණයේ යතුරුපැදි 100ක් සහ ත්‍රිරෝද රථ 50ක් මිලදී ගැනීමට අමාත්‍ය මණ්ඩලයේ අනුමැතිය හිමිව තිබෙනවා.

විශේෂ කාර්ය බලකාය යටතේ මුළු දිවයිනම ආවරණය වන පරිදි ප්‍රධාන කඳවුරු 76ක්, උප කඳවුරු 23ක් සහ විශේෂ ඒකක 14ක් ක්‍රියාත්මක වනවා.

එම බලකාය වෙත පැවරී ඇති රාජකාරි ඉටු කිරීම සඳහා දැනට පවතින යතුරු පැදි 314න් 90%ක් පමණ වසර 10කට වඩා පැරණි වීම හේතුවෙන් නිරන්තර කාර්මික දෝෂයන්ට ලක් වන අතර එම තත්ත්වය විශේෂ කාර්ය බලකාය විසින් ක්‍රියාත්මක කරනු ලබන විශේෂ වැටලීම් ක්‍රමානුකූලව හා ප්‍රශස්ත මට්ටමින් ඉටු කිරීමට බාධාවක් වී තිබෙනවා.

ඒ අනුව, මත් උවදුර මැඩලීම සහ සංවිධානාත්මක පාතාල කණ්ඩායම් මර්දනය කිරීම වැනි රාජකාරීන් කාර්යක්ෂමව සහ ඵලදායී ලෙස ඉටු කිරීමට හැකිවන පරිදි මෙම තීරණය ගෙන ඇත.

තහවුරු කරන ලද නවතම ප්‍රවෘත්ති දැනගැනීමට පහතින් අපගේ Whatsapp Channel එකට දැන්ම සම්බන්ධ වන්න.
https://whatsapp.com/channel/0029Va6pHaKLI8YSGVy3ZQ2W

2025.11.04 | 𝘾𝙞𝙩𝙞𝙯𝙚𝙣.𝙡𝙠

Citizen.lk

05/11/2025

05/11/2025

05/11/2025

05/11/2025

05/11/2025

05/11/2025

05/11/2025

04/11/2025

04/11/2025

04/11/2025

04/11/2025

04/11/2025

Address

Telephone

Website

Alerts

Contact The Business

Shortcuts

Share

Category

Our Story