09/09/2026
සරිෆා බිම ඇන තියා ගෙන ඉන්නවා. රිදී මුදුවලින් බර වුණ එයාගෙ මහත ඇඟිලි, ඉස්තරම් වර්ගයේ ඕමානි මස්කට් දාපු පුංචි පෙට්ටි වටේ ඔතපු පටි ගලවන අතරෙ, එයාගෙ අතිවිශාල පියයුරු එයාගෙ ඔඩොක්කුවට වැගිරෙනවා. එයා ආමන්ඩ්වලින් කරලා තියෙන සැරසුමටයි, තද දුඹුරු පාට පෘෂ්ඨයටයි යාන්තමට තට්ටු කරනවා. එතකොට ඒක හෙලවෙනවා. බලන්නකො කොච්චර නං ලස්සණ දර්ශනයක්ද කියලා! මේ තරම් රස ගොඩක්, ඒ වුණාට ඒගොල්ලො මට කියනවා ඕවා කන්න එපා, උඹට දියවැඩියාව තියෙනවා කියලා මතකයි නේද, ඕවා තනිකරම සීනි. පාඩුවෙ තියෙන්න ඇරපං කියලා. කමක් නෑ, සීනි ඇතා හෝ නැතා, කනගාටුයි, සරිෆා පැණි රස කෑමවලට පාඩුවෙ තියෙන්න අරින්නෙ නෑ. තනිකරම සීනි කියලා ඒගොල්ලො නාහෙන් අඬනවා. කමක් නෑ, හාහ්! සරිෆා ලොකු කුට්ටියක් අරගෙන, එයාගෙ ඇඟිලි සේරමත් එක්ක ඒක කට ඇතුළෙ ඔබා ගන්නවා. ඒ අතරෙ ඕනකමින්ම ඒවා ලෙවකනවා. හරියට මගේ තාත්තා එයාව සල්ලිවලට ගන්න කලින්, ෂෙයික් සායිද්ගෙ ගෙදරදි බඩගින්නෙන් පෙළි පෙළි හිටිය අවුරුදු ගණනාවෙ පළිය දැන්, මේ මොහොතෙ ගන්නවා වගේ.
උඹේ සිනිඳු, උණුසුම් පපුව ඇතුළෙ මාව හංගගනිං, සරිෆා - මට බයයි. මගේ ඔළුව අල්ලගනිං, ඒක උඹේ ඔඩොක්කුවයි, පියයුරුයි අතර කොහේහරි තැනක සතපවා ගනිං. මට උඹේ දාඩිය ආශ්වාස කරන්න දීපං, උඹ ගාවින් හැමදාමත් එන සුප් සුවඳ ආඝ්රාණය කරන්න දීපං, ඊට පස්සෙ මට නිදාගන්න දීපං. මට බයයි, සරිෆා. උඹේ මරණය වෙනුවෙන් තාත්තා මට සමාව දෙන එකක් නෑ. එයා කවදාවත් මට අනුකම්පා කරන එකක් නෑ. එයා මොනවා කරයිද කියලා මට බය හිතෙනවා. උඹ ගැන මගෙන් ප්රශ්න කරන්න, එයා ආයෙ ආයෙමත්, එයාගෙ මිනීවළෙන් එළියට ඇවිල්ලා තියෙනවා. එයා රට ඉදි ගහේ කෙඳිවලින් වියපු ලණුවෙන් මාව බැන්දා. උඹට මතකද, ඊට පස්සෙ එයා මාව උඩු යටිකුරුව හිටින්න ළිඳ ඇතුළට විසි කෙරුවා.
ළිං පතුලෙ ඉඳගෙන මං කෑගැහුවා. එයා සාමකාමීව මැරුණා, දෙවියො එයාව අරන් ගියා. ඔයගොල්ලො වෙන් වෙලා හුඟ කාලෙකට පස්සෙ. එතකොට ඔයා මැරිලා අවුරුදු ගාණක් ගතවෙලා ඉවරයි.
ඒත් එයා මාව ළිඳෙන් උඩට ඉස්සුවෙ නෑ.
එයා කට්ට කළුවර පතල් ළිඳ ඇතුළෙ මාව ඔළුවෙන් එල්ලෙන්න තියලා තිබ්බා.
උදාර දෙවියන්ගෙ නාමයෙන්, තාත්තෙ, මං දැනගෙන හිටියෙ නෑ! ඒ වෙද්දි මං මස්කට්වල පදිංචියට ගිහින් හිටියා. හැම මොහොතක්ම ව්යාපාර වැඩවලට ගතවුණා. මං අල්-අවාෆිවලට ගියේ උත්සව දවස්වලට විතරයි. එයා කුවේට් ඉඳලා ආපහු ඇවිත් ඉන්නවා කියලා මට ආරංචි වුණා. එයාට ෂන්නා එක්ක ජීවත් වෙන එක ඉවසගෙන ඉන්න බැරි වුණා කියලා මිනිස්සු කිව්වා. ෂන්නා එයාව ගෙදරින් දොට්ට දැම්මා කියලා කවුදෝ කිව්වා. සරිෆා පිස්සු ගෑනියෙක්ය කියලා එයා සරිෆව කොටු කරලා තියාගන්න හැදුවා, එතකොට සරිෆා පැනලා ගියා කියලා තව කවුදෝ කිව්වා. සරිෆට අල්-අවාෆි නැතුව හරිම පාළුයි, ඒ නිසා එහෙන් පිට වෙලා ඉන්න එක දරාගන්න බැරුව ගියා කියලා තවත් අය කිව්වා. එයා හීනෙන් එයාගෙ අම්මා අන්කබුතාව දැක්කලු, එයාට අඬ ගගහා ඉන්නවා. ඉතින් එයා ආපහු ආවලු. එයා නෑදෑයොත් එක්ක පදිංචියට ගිහින් තිබුණා.
තාත්තෙ, මට හරියට වැඩ තිබුණා. එතකොට අපේ කොටස් වෙළෙඳපොළ කඩා වැටිලා ටික කාලයයි. අබු සලිහුයි, මමයි අපේ ව්යාපාරය ගොඩ නගන්න උත්සාහ කරමින් ලොකු සටනක යෙදිලා හිටියා. තාත්තේ, මං මුළු වෙලාවෙම හුගක් කාර්යබහුල වෙලයි හිටියෙ. මං මස්කට්වල හිටියා, ඊට පස්සෙ අල්-ඛ්වේර්වල, අල් ඝුබ්රාවල හිටියා, අල්-හෙයිල්වල, සිබ්වල හිටියා. මං මස්කට් අවට තියෙන හැම නගරයකටම, හැම ප්රදේශයකටම ගිහින් හිටියා. මං ඉඩම් කෑල්ලක්, ගෙයක්, විලාවක්, කොන්ත්රාත්කාරයො, මුහම්මද්ගෙ ඔටිසම් තත්ත්වය සම්බන්ධව අපිට උදව් කරන්න පුළුවන් සායනයක්, ඉංග්රීසි භාෂාව උගන්නන ආයතන, ගිණුම්කරණය පන්ති, ඔයාගෙ පරණ මර්සිඩිස් එකට වඩා ලොකු කාර් එකක්, ප්රයෝජනවත් ව්යාපාර ගනුදෙනු මොනවහරි, වැදගත් සංචාරක නියෝජිතවරයෙක්, විශ්වාස කරන්න පුළුවන් ගෘහ සේවකයො - ෆිලිපීන මිනිස්සු, ඉන්දුනීසියානු මිනිස්සු - ළමයින්ට ඉස්කෝල, ටියුෂන් ගුරුවරු, ඩ්රයිවර් කෙනෙනක්, හැන්දෑව ගත කරන්න තැන්, යාළුවො - හොය හොයා හිටියා . . .
මගේ තාත්තා මාව ළිඳෙන් උඩට ඉස්සුවෙ නෑ.
අදින්න, තාත්තෙ! ලණුව උඩට අදින්න. මට උඩට එන්න පුළුවන් වෙන විදියට ලණුවෙ අනිත් කෙළවර මගේ ඉණ වටේ තද වෙනකං, ඔයා අල්ලගෙන ඉන්න කෙළවර හයියෙන් අදින්න. ළිඳ ඇතුළෙ කළුවරයි, තාත්තේ, මෙතන සර්පයො ඉන්නවා. මාව උඩට උස්සන්න. මං ඔයාගෙ රයිෆලේ හොරකම් කරන්නෙ නෑ, කොහොමටත් මං මාරහුනුයි, සන්ජාරුයි එක්ක කොහේවත් යන්නෙ නෑ. සන්ජාර් දැන් සුක් එකේ බඩු අදින්නෙක් විදියට වැඩ කරනවා, තාත්තේ. එතකොට ෂන්නා ඉස්කෝලෙක පිරිසිදු කරන්නියක් විදියට වැඩ කරනවා. ඉතුරු වෙලා ඉන්නෙ සරිෆා විතරයි. එයා ඒගොල්ලන්ව දාලා අවා. එයාට කුවේට්වල ජීවිතේ ඉවසගන්න බැරි වුණා.
මාව මේ ළිඳෙන් එළියට ගන්න, තාත්තේ. මං අර පොල්කිච්චන්ට ආස වෙන්න යන්නෙ නෑ. මං කොල්ලො එක්ක බෝල ගහන්න යන්නෙත් නෑ. සුවේද්ගෙ ඌඩයෙ වශී කරන තාලවලට ඇහුම්කන් දීගෙන රෑ වෙනකං ඇහැරිලා ඉන්නෙත් නෑ. ඔයාගෙ මූණට කෑගහන්නෙත් නෑ. ඔයා දැන් ඉන්නෙ කෝමාවක. සන්ජාරුත් එයාගෙ තාත්තා හබීබ් වගේ පැනලා ගියා. මං විතරයි පැනලා නොගිය එකම එක්කෙනා. මාව මෙතනින් උඩට ගන්න, මං ඔයාගෙ ප්රේමවන්තිය, ඔයාගෙ අම්මා, ඔයාගෙ දුව, ඔයාගෙ වහලිය, ඔයාගෙ නෝනා සරිෆව දාලා යන්නෙ නෑ. කොහේදෝ කාටවත් අමතක වුණ ඉස්පිරිතාලෙක තනියම මැරිලා යන්න මං එයාව දාලා යන්නෙ නෑ.
දියවැඩියාව හුඟාක් අසාධ්ය තත්ත්වෙට හැරුණා, තාත්තේ. ඒක මහ දරුණු එකක් බවට පත් වුණා. ඒකෙ තේරුම ඔයා දන්නවද, සුක්කිරි කියන එකේ? ඒක එයාගෙ මුළු ශරීරය පුරාම පැතිරිලා ගියා, හරිම බිහිසුණුයි. ඒගොල්ලො එයාගෙ කකුල කැපුවා. අබ්බගාත ගෑනියෙකුට අපි දිගටම උදව් කරන්න යන්නෙ නෑ කියලා එයාගෙ නෑදෑයො කිව්වා. ඊට පස්සෙ ඒගොල්ලො එයාගෙ අනිත් කකුලත් කැපුවා. එයාව පොදු නාන ගෙට අරන් යන්නෙ කවුද කියලා අසල්වැසියො කිව්වා. කකුල් දෙක නැති මේ දැවැන්ත ශරීරය එහාට ඇදගෙන යන්නෙ කවුද? රෝහල් අධ්යක්ෂකවරයා කරුණාවන්තයි, එයා සදහටම සරිෆට එහෙ නැවතිලා ඉන්න ඉඩ දුන්නා. සාත්තුකාරියො එයාව බලාගත්තා.
මාව උඩට උස්සන්න, තාත්තේ.
සරිෆා, මාව මේ ළිඳෙන් ගොඩගනිං.
මට බයයි.
මට හරිම හරි බයයි.
- ආකාශ වස්තු -
