19/09/2025
“මම.. මම හිතුවේ නෑ ඩොක්ටර් එහෙම කෙනෙක් කියලා.. ඇයි ඇත්තටම එහෙම වුණේ..?”
ඇගේ සිතුවිලි නිවැරදිවම කියවාගෙන සිටීම ගැන අකේන්ට දැනුණේ සතුටකි.
“කොහොම වුණේ ද..?”
“කොල්ලන්ට කැමැති කෙනෙක් වුණේ..?”
අකේන් සිනා සී සුප් බඳුන අවසන් කර පහසුවෙන් වාඩි වූයේය.
“ඇත්තටම ඩොක්ටර්, ඔයා එහෙම වෙන්න ඕනේ නෑ..මට හිතෙන්නේ ඔයා ඩොක්ටර් කෙනෙක් හම්බවෙලා බෙහෙත් ගන්න..”
“ඉතින් මමත් ඩොක්ටර්නේ..”
“නියුරෝ සර්ජන් කෙනෙක්ට වෙනස් කරන්න පුළුවන්ද ඒක..? මම දන්න විදියට මානසික ප්‍රශ්නයක්.. ගේ මනුස්සයෙක් වෙන එක හොඳ නෑ..” ඇය හිස ගස්සමින් පැවසුවාය.
අකේන් උස් හඬින් සිනාසෙන්නට වූයේ ඇය කෝප ගන්වමිනි. ඇය හිස ගස්සා අසුනෙන් නැඟී සිටින්නට උත්සාහ කළත්, අකේන් ඇගේ සුරතින් ඇද යළිත් අසුන් ගැන්වූයේය.
“දහරා..” මොහොතකට පසු සිනාව නැවැත්වූ ඔහු බැරෑරුම්ව ඇය ඇමතුවේය.
“පළවෙනිම දේ, කෙනෙකුගේ සෙක්ෂුවල් ඔරියන්ටේෂන් එක එහෙම නැත්නම් ලිංගික දිශානතිය වෙනසක් තියෙනවා කියන්නේ මානසික ප්‍රශ්නයක් නෙමෙයි.. අනික ඒක කෙනෙකුට තෝරා ගන්න පුළුවන් දේකුත් නෙමෙයි. ලෝකේ හැදිලා තියෙන්නේ මිනිහෙකුට ගෑනියෙක් විදියට වුණාට, බොඩි එක ඇතුළේ හෝර්මෝන් එක්ක හැඟීම් වෙනස් වෙන්න පුළුවන්.. සෙක්ෂුවල් ඔරියන්ටේෂන් එක කායික, මානසික වගේම පරිසර තත්ත්ව උඩ වෙනස් වෙනවා.. ඒකට කිසිම ඩොක්ටර් කෙනෙකුට කරන්න පුළුවන් බෙහෙතක් නෑ..”
ඇය අයා ගත් දෑසින් ඔහු දෙස බලා සිටියාය.
“එතකොට ඔයා කියන්නේ, සමලිංගික වෙන එක හිතලා කරන දෙයක් නෙමෙයි කියලද? ඒක ලෙඩක් නෙමෙයි කියල ද..?”
“යෙප්.. එක්සැක්ට්ලි.. ඔයා මම කියන දේවල්ම විශ්වාස නොකර ගූගල් සර්ච් කරලා බලන්න ඒ ගැන..”
“මම ආස නෑ ඒ වගේ මිනිස්සුන්ට.. මට අප්පිරියයි..”
“ඇයි..?”
“ඇයි අහන්නේ.. බලන්නකෝ සමහර කොල්ලෝ හැසිරෙන්නේ කෙල්ලෝ වගේ.. සමහර කෙල්ලෝ කොල්ලෝ වගේ.. ඒ මදිවට ගෑනු ගෑනු එක්කයි, පිරිමි පිරිමි එක්කයි ඉන්නවා දැක්කම ඒක හරි අමුතුයි.. ඒ වගේ මිනිස්සු නම් ඉපදෙන්න හොඳ නෑ..”
ඇය නොරිස්සුම් සහගතව කියාගෙන ගියාය.
“දැන් මම හැසිරෙන්නෙත් ගෑනු කෙනෙක් වගේ ද..?”
ඇය තිගැස්සී ඔහු දෙස වුවමනාවෙන් බැලුවාය. ඇගේ හිස ඉබේටම දෙපසට සැලිණි.
“නෑ.. ඒකයි මට තේරුම් ගන්න බැරි.. ඩොක්ටර් එක්ක හිටපු කෙනත් එහෙම පේන්නේ නෑ..”
“හ්ම්ම්.. යෙප්.. එහෙම පේන්නේ එයාලගේ ඇඟේ හෝමෝනවල වෙනස්වීම් නිසා. පිරිමි ගේ වුණු පළියට එයාලගේ ගෑනු ලක්ෂණත් නෑ..ගෑනු අය ලෙස්බියන් වුණ පළියට එයාලගේ පිරිමි ලක්ෂණත් නෑ.. එයාලා ඉපදෙන්න හොඳ නැතුව ඇති සමහර විට.. හැබැයි ඉපදිලා ඉන්න අය පිළිකුල් කරන එක හොඳයිද දහරා.. ස්පේෂලි ඔයා නර්ස් කෙනෙක් විදියට ඒ වගේ ලක්ෂණ තියෙන කෙනෙක් ආවොත් ඊයා මට අප්පිරියයි කියලා එයාට ටී්‍රට් නොකර ඉන්නවද.,?”
ඔහු විමසුවේ ඇය අසරණ කරන අන්දමේ පැනයකි. කුමන ගැටලුවක් තිබුණත් තමන් එසේ රෝගියෙකු නොසලකා නොහරින වග මොහොතක් කල්පනා කර ඇය වටහා ගත්තාය. ඇය නැතැයි පැවසුවේ හිසෙනි.
“හ්ම්ම්.. එයාලට සාමාන්‍ය විදියට ටී්‍රට් කරන්න දහරා.. ලෝකේ කිසිම මනුස්සයෙක් සර්ව සම්පූර්ණ නෑ.. ඔයාලට සමහර විට එයලාව අප්පිරියා හිතෙන්න මොනවම හරි සිද්ධියක් වෙලා ඇති.. ඒත් එක සිද්ධියක්, එක මනුස්සයෙක් නිසා අපි සේරම මිනිස්සු ගැන වැරදියට, පිළිකුල් සහගතව හිතන එක හොඳ නෑ.. සෙක්ෂුවල් ඔරියන්ටේෂන් එක මොකක් වුණත් අපි හැමෝම මිනිස්සු.. අනිත් දේ තමයි, මනුස්සයෙක්ගේ එක හැසිරීමකින්, එයා ගැන ප්‍රතිරූපයක් මවා ගන්න එපා.. කව්රු හරි මනුස්සයෙක් අපි අකැමැති දෙයක් කළා කියලා එයා නරක හෝ වැරදි කෙනෙක් වෙන්නේ නෑ.. ”
ඇය සුසුමක් හෙලුවාය. ඔහුගේ වදන් සැබෑවක් වුවත්, අකේන් ගැන එසේ සිතා , සිත සාදා ගැනීම ඇයට අසීරු විණි.
“දෙවෙනි කාරණාව.. මම ගේ නෙමෙයි..”
ඇය සැණින් හිස එසෙව්වාය.
“එහෙනම් ඔයා අරයව කිස් කළේ..?”
සම්පූර්ණ කතාව කියවන්න දේවදාරා පොත මිලට ගන්න.
තැපැල් හෝ කුරියර් මඟින් ගෙන්වා ගන්න කතා කරන්න. 0719375028
පොත් ප්‍රදර්ශනයේ දී සී 8 ඇතුළු කුටිවලින් මිලදී ගැනීමට හැකිය.
