17/01/2026
බෙඩ්ෂීට් තුන හතරක් අස්සෙ ගුලි වෙලා නැගිටගන්න හිත හදාගන්නම බැරි උන සීතලම සීතල උදේක; නැගිටගන්න පුලුවන් උන වෙලාවක ඇඩිෂම් බලන්න යමු කියන තීරණේ ගත්ත අපි ගමනට ලෑස්ති වෙද්දි උදේ 9 පහු වෙලා තිබ්බා..දවස් ගානක් තිස්සෙ ඉස්පාසුවක් නැතුව අඬාවැළපුන අහසට කඳුලු ඉවරවෙලාදෝ කියලා හිතෙන තරමට එකම එක සුදු වලාකුළක්වත් නැතුව නිල් පාටට දිලිසුන අහස අපේ ගමනට පෙරමං කිව්වා..
ඒ නිල් අහස සිඹගන්න මඟ බලන ෆයිනස් ගස් යායක් මැදින් වැටුන වැලිමඩ - බොරලන්ද පාර සුපුරුදු මායාකාරී හැඟීමෙන්ම අපිව පිළිගත්තා..සීතල උදේක විතරක් නෙවෙයි, ගිනිගන්න මද්දහනක උනත් ඉර එළියට බිමට වැටෙන්න පොඩිවත් ඉඩක් නොදෙන; සීතල අරක්ගත්ත ඒ ෆයිනස් යාය හිත සනසන කඳුකර සුවද හාත්පස විසිරුවාගෙන හිටියා..හරියටම චිත්රපටිවල අපි දකින ගුප්ත මායා ලෝකෙක කොටසක් වගේ..
ගමනේ අවසාන භාගෙදි මුණගැහුන Glenenore වතුයාය උඩරට කඳුකරේ සිරියාව ලෝකෙටම කියාපාමින් හිටියා..තමන්ට අයිති උන සීතල පිණි බිංදු නොකියම උදුරගෙන ගිය අහස දිහා බලාගෙන ලා තේ දලු හුළඟ එක්ක නෝක්කාඩු කිව්වා..නිල් අහසත්, තේ යායත් එකිනෙකට යා වෙලා පේන දෘශ්ය මායාවෙන් ඇස් මුසපත් වෙලා තිබුනා..
තංගමලේ අභය භූමිය මැදින් ඇඩිෂම් බංගලාව වෙනකන් යන ගමන හිරිගඬු පිපෙන සීතලක අත්දැකීම නොඅඩුවම අපිට ගෙනත් දුන්නා..ටිකට් අරගෙන ගේට්ටුවෙන් ඇතුළට ගියපු අපිට මල් වලින් ගැවසීගත්ත සුන්දර පාරකට එපිටින් විරාජමාන ඇඩිෂම් බංගලාව දකින්න ලැබුනා..
මූලාශ්ර වලට අනුව 1927 වර්ෂයේ ඉදිකිරීම් ආරම්භ කරලා තියෙන මේ බංගලාව 1931 වර්ෂයේ ඉදිකිරීම් නිම කරලා තියෙනවා..1887 කාල වකවානුවේදී ලංකාවට පැමිණි තෝමස් ලෙස්ටර් විලර්ස් මහතා විසින් මෙම බංගලාව ඉදි කරල තියෙනවා වගේම මේකෙ සැලසුම්කරුවන් වෙන්නෙ R.Booth සහ F.Webster යන අය.
එංගලන්තයේ සිට අනවසරයෙන් ලංකාවට පැමිණි තෝමස් මහතා සතුව මුලින් පවුම් 10ක මුදලක් පමණක් පැවති බව කියැවෙනවා.. ඔහු මුල් කාලයේදී වතු වැවිලි කරුවෙකු ලෙස පුහුණුව ලබලා පසු කාලෙ වතු හිමිකරුවකු වූ බවත් සඳහන්..
ඔහු ජෝර්ජ් ස්ටුවර්ට් ආයතනයේ සභාපති ලෙස කටයුතු කරන අතරතුරදී මෙම බංගලාව ටියුඩර් රාජ වංශයේ ගොඩනැගිලි වල ආභාසයට අනුව ගොඩනගන ලද බවත්, මේ ගොඩනැගිල්ල ඉදිකිරීමට අවශ්ය සියළුම ද්රව්ය එංගලන්තයෙන් ආනයනය කරන ලද බවත්, මෙම බංගලාව නිදන කාමර, කියවීම් ශාලා, පුස්තකාල, කෑම කාමර, සඳළු තල ආදී පහසුකම් වලින් සමන්විත බවත් දැනගන්නට ලැබෙනවා..
ඒ වගේම 1961 වර්ෂයේදී මෙම බංගලාව රෝමානු කතෝලික පල්ලියක් මගින් මිලදී ගනු ලදුව වර්තමානය වන විට බංගලාවේ ඉදිරි කොටස සංචාරකයන් සඳහා විවෘත කර ඇති අතර පසුපස කොටසෙහි ආරාමයක් පවත්වාගෙන යන බවත් සඳහන්..
හපුතලේ නගරයට කිලෝමීටර් දෙකක් විතර දුරින් තියෙන මේ මනස්කාන්ත සංචාරක ස්ථානය ඔබටත් නරඹන්න පුලුවන්..
ඉතිං..එන්න,
හැබැයි මතක් කරලා අඩි සටහන් විතරක් ඉතුරු කරලා යන්න වගබලාගන්න👣🩵🌸
