24/03/2026
பாரசீக வளைகுடாவின் ஆழமான நீல நிற அலைகளுக்கு அடியில் உலகின் மிகப்பெரிய இயற்கை எரிவாயு புதையல் ஒன்று மறைந்துள்ளது.
இது ஒரே ஒரு எரிவாயு வயல்தான், ஆனால் அரசியல் ரீதியாக இது இரண்டு நாடுகளுக்கு இடையே பிரிக்கப்பட்டுள்ளது:
1. ஈரான் பகுதி: South Pars
2. கத்தார் பகுதி: North Dome
இந்த எரிவாயு வயல் சுமார் 9,700 சதுர கிலோமீட்டர் பரப்பளவைக் கொண்டது. இதில் ஈரான் வசம் 3,700 சதுர கிலோமீட்டரும், கத்தார் வசம் 6,000 சதுர கிலோமீட்டரும் உள்ளன. மொத்தமாக இதில் 1,800 டிரில்லியன் கன அடி எரிவாயு இருப்பதாக மதிப்பிடப்பட்டுள்ளது.
இது ஒரு 'Shared Reservoir' என்பதால், ஒரு நாடு வேகமாக எரிவாயுவை உறிஞ்சினால், அழுத்தம் குறைந்து மற்றொரு பக்கத்தில் இருக்கும் எரிவாயுவும் அந்தப் பக்கமே நகரத் தொடங்கும்.
கதை இங்கேதான் தொடங்குகிறது. கத்தார் தனது பகுதியை (North Dome) மிக வேகமாகவும் நவீன தொழில்நுட்பத்துடனும் மேம்படுத்தியது. இன்று கத்தார் உலகின் இரண்டாவது பெரிய திரவ இயற்கை எரிவாயு (LNG) ஏற்றுமதியாளராக இருப்பதற்கு இதுவே காரணம்.
மறுபுறம், ஈரான் தனது பகுதியை (South Pars) மேம்படுத்த முயன்றபோது, அமெரிக்கா மற்றும் மேற்கத்திய நாடுகளின் கடும் பொருளாதாரத் தடைகளை (Sanctions) எதிர்கொண்டது.
அதன் விளைவு ஈரானால் நவீன இயந்திரங்களை வாங்க முடியவில்லை, வெளிநாட்டு முதலீடுகள் கிடைக்கவில்லை.
ஆனால் கத்தார் அதிநவீன வசதிகளுடன் எரிவாயுவை உறிஞ்சி எடுக்கும்போது, ஈரான் தனது பழைய தொழில்நுட்பத்தால் தடுமாறியது. இதனால், பூமிக்கு அடியில் இருக்கும் எரிவாயு அழுத்தம் காரணமாக கத்தார் இருக்கும் பகுதியை நோக்கி நகரத் தொடங்கியது. "கத்தார் அனைத்து எரிவாயுவையும் உறிஞ்சி எடுத்துக்கொண்டது, ஈரான் வேடிக்கை பார்க்க வேண்டிய சூழல் உருவானது.
சமீபத்திய சூழலில், இந்த எரிவாயு வயல் ஒரு போர்க்களமாக மாறியுள்ளது.
மார்ச் 18, 2026 அன்று இஸ்ரேல் விமானப்படை ஈரானின் சவுத் பார்ஸ் பகுதியில் உள்ள எரிவாயு சுத்திகரிப்பு நிலையங்கள் மற்றும் 'அசலுயே' (Asaluyeh) என்ற முக்கிய மையத்தின் மீது தாக்குதல் நடத்தியது.
ஈரானின் மொத்த எரிவாயு உற்பத்தியில் 12% இந்தத் தாக்குதலால் பாதிக்கப்பட்டது. இது ஈரானின் மின்சார உற்பத்தி மற்றும் வீட்டுத் தேவைகளை முடக்கும் அபாயத்தை ஏற்படுத்தியது.
ஈரான் சும்மா இருக்கவில்லை. இதற்குப் பதிலடியாக கத்தாரில் உள்ள Ras Laffan என்ற எரிவாயு மையத்தின் மீது தாக்குதல் நடத்தியது.
உலகிற்குத் தேவையான மொத்த LNG-யில் 20% கத்தாரின் இந்த ஒரு இடத்திலிருந்துதான் செல்கிறது. இங்கே ஏற்படும் ஒரு சிறிய பாதிப்பு கூட உலக அளவில் எரிவாயு விலையை கிடுகிடுவென உயர்த்தும்.
இப்போது இந்த மோதல் என்பது வெறும் ராணுவ வீரர்களுக்கு இடையிலான போர் மட்டுமல்ல, இது ஒரு பொருளாதாரப் போராக வடிவம் பெற்றுள்ளது.
ஒரு நாட்டின் முதுகெலும்பாக இருக்கும் எரிசக்தி கட்டமைப்பைத் தகர்ப்பதன் மூலம் அந்த நாட்டை நிலைகுலையச் செய்வதே இதன் நோக்கம்.
South pars என்பது வெறும் எரிவாயு வயல் அல்லஅது ஈரானின் பொருளாதாரம் மற்றும் உலக எரிசக்தி சந்தையின் இதயம் போன்றது.
ஈரானின் 36% எரிவாயு இருப்பு இங்கேயே உள்ளது.
ஈரான் தனது ராணுவத்திற்கும், அதன் நட்பு அமைப்புகளுக்கும் (Hezbollah, Hamas போன்றவை) செலவிடும் பணத்தை முடக்க வேண்டுமானால், அதன் வருமான ஆதாரமான எரிசக்தித் துறையைத் தகர்க்க வேண்டும் என்பது இஸ்ரேலின் திட்டம்.
ஈரானின் எரிவாயு உற்பத்தி, சுத்திகரிப்பு மற்றும் ஏற்றுமதி ஆகிய அனைத்தும் 'அசலுயே' என்ற ஒரே இடத்தில் குவிந்துள்ளன.
ஒரே ஒரு மையத்தை (Single point of failure) தாக்குவதன் மூலம், ஈரானின் ஒட்டுமொத்த உற்பத்திச் சங்கிலியையும் முடக்கி விடலாம். இது ஈரானின் உள்நாட்டு மின்சாரத் தேவையையும், தொழில்துறையையும் பாதிக்கும், இதனால் அந்நாட்டு அரசாங்கத்திற்கு எதிராக மக்கள் அதிருப்தி ஏற்படும் என இஸ்ரேல் திட்டமிட்டு தாக்குதல் நடத்தியது.
அமெரிக்கா ஏற்கனவே ஈரான் மீது பல தடைகளை விதித்துள்ளது. இதனால் ஈரானால் தனது எரிவாயு கட்டமைப்புகளை நவீனப்படுத்தவோ அல்லது எளிதாகப் பழுதுபார்க்கவோ முடியாது.
தாக்குதலுக்குப் பிறகு ஈரானால் பழையபடி உற்பத்தியைத் தொடங்க நீண்ட காலம் எடுக்கும். இந்த இடைவெளியைப் பயன்படுத்தி ஈரானை நிரந்தரப் பொருளாதார வீழ்ச்சிக்குள் தள்ளுவது ஒரு முக்கிய நோக்கம்.
ஈரான் தனது எரிவாயுவை ஈராக் மற்றும் பிற நாடுகளுக்கு ஏற்றுமதி செய்கிறது.
நோக்கம் ஈரானின் ஏற்றுமதியைத் தடுப்பதன் மூலம், மற்ற நாடுகள் ஈரானைச் சார்ந்து இருப்பதை நிறுத்தச் செய்வது. குறிப்பாக ஈராக் போன்ற நாடுகள் இப்போது ஈரான் எரிவாயு இல்லாமல் தவிக்கின்றன,
இதன் மூலம் ஈராக்கில் இருந்து கிடைக்கும் டாலர்களை தடுக்க முடியும்.
இஸ்ரேலின் நோக்கம் வெறும் ராணுவ வெற்றி மட்டுமல்ல, ஈரானை ஒரு 'ஆற்றல் மிக்க நாடு' (Energy Power) என்ற நிலையிலிருந்து வீழ்த்தி, அதன் பொருளாதாரத்தை பல தசாப்தங்கள் பின்னோக்கித் தள்ளுவதே ஆகும்.
எரிசக்தி உள்கட்டமைப்புகள் இலக்காக்கப்படுவது ஒரு தேசத்தின் உயிர்நாடியைத் துண்டிப்பதற்குச் சமம்.
கத்தார் போன்ற நாடுகள் உலகிற்கு வழங்கும் எரிவாயு விநியோகம் பாதிக்கப்பட்டால், அதன் தாக்கம் ஐரோப்பா முதல் ஆசியா வரை பல நாடுகளில் மின்சார முடக்கம் மற்றும் விலை ஏற்றத்தை உடனடியாக உருவாக்குகிறது.
இது தற்செயலானது அல்ல; ஒரு உலகளாவிய அமைப்பை பலவீனப்படுத்த வேண்டுமென்றால் அதன் ராணுவத்தைத் தாக்க வேண்டியதில்லை, அந்த ராணுவம் எதை நம்பி இயங்குகிறதோ அந்த எரிசக்தி ஆதாரத்தைத் தாக்கினால் போதும் என்ற 'பொருளாதார அழிப்பு' (Economic Attrition) கொள்கையே இங்குச் செயல்படுத்தப்படுகிறது.
South pars மீதான தாக்குதல் என்பது ஒரு பிராந்திய மோதலிலிருந்து உலகளாவிய பொருளாதாரப் போராக (Economic Warfare) மாறியுள்ளது. ஒரு காலத்தில் புதையலாகப் பார்க்கப்பட்ட இந்த எரிவாயு வயல், இன்று உலகப் பொருளாதாரத்தைச் சிதைக்கும் ஒரு வெடிகுண்டாக மாறியுள்ளது.
எரிசக்தி அமைப்புகள் இலக்குகளாக மாறும் வரை, உலக சந்தை நிலையற்ற தன்மையிலேயே இருக்கும்.
எரிசக்தி சந்தையின் மாற்றங்களையும், நாடுகளின் எதிர்வினைகளையும் கூர்ந்து கவனித்தால் மட்டுமே உலகம் எங்கே செல்கிறது என்பதைப் புரிந்துகொள்ள முடியும்.
இந்த மாற்றங்களை முன்கூட்டியே உணர்ந்து கொள்பவர்கள் மட்டுமே, வரவிருக்கும் ஒரு மாபெரும் பொருளாதார மற்றும் அரசியல் புயலை எதிர்கொள்ளத் தயாராக இருக்க முடியும்.
Colombo TV Network
