17/06/2026
වර්තමාන භික්ෂුව හමුවේ ඇති අභියෝග එක්ව ජය ගමු..!
ගරුතර ස්වාමීන්වහන්සේලාටත්, දරුවන්ගේ මෙත් සිත් හදන දහම් පාසල් පද්ධතියට පහර දීලා; රටේ සංස්කෘතිය සහ සභ්යත්වය විනාශ කරලා ගොඩ නගන මොනම රටක්වත් පවතින්නට විදිහක් නොමැති බව සර්වජන බලය නායක, ව්යවසායක, නීතිඥ පා.ම. දිලිත් ජයවීර මැතිතුමා ප්රකාශ කළේය.
එතුමන් මේ බව ප්රකාශ කළේ; මීරිගම පුරාණ විහාරස්ථානයේ පැවැති 'වර්තමාන භික්ෂුව හමුවේ ඇති අභියෝග' මැයෙන් පවත්වන ලද කාලීන සංවාද වැඩසටහනට සහභාගී වෙමිනි.
මෙහිදී වැඩිදුරටත් අදහස් දැක්වූ දිලිත් ජයවීර මැතිතුමන් ප්රකාශ කළේ පන්සල, භික්ෂූන්වහන්සේලා ඈත් කර ගොඩනගන; බුදු දහමින් තොරව ශ්රී ලංකාවේ වෙසෙන අනාගත පරපුර තුළ ගුරු-දෙගුරුන්, සහෝදර-සහෝදරියන් කෙරෙහි තියෙන ගෞරවය, ආදරය සහ ගුණ ගරුක සිතවිලි පහළවීම යන කාරණා ගැන හිතාගැනීමටත් අපහසුවන තරමට පිරිහීමට ලක්විය හැකි බවයි. එසේම මේ වනවිට බොහෝ බෞද්ධයින් විසින්ම දැනුවත්ව හෝ නොදැනුවත්වම විවිධ අයුරින් බෞද්ධ සංඝ සමාජය, දහම් පාසල් පද්ධතියට සහ සම්බුද්ධ ශාසනයට නිගරු වන අන්දමින් කටයුතු කරන බවත් නව මාධ්ය මෙහෙයුම් භාවිතා කර සිදු කරන සංවිධානාත්මක, අපහාසාත්මක comments භාවිතා සමස්ත සම්බුද්ධ ශාසනය විනාශ කිරීමටත් බෞද්ධ භික්ෂූන්වහන්සේලා සහ රටට, ජාතියට සම්බුද්ධ ශාසනයට ආදරය කරන නියම බෞද්ධයින් ජාතිවාදීන් ලෙස හුවා දක්වන්නට ඇතැම් කණ්ඩායම් අඳුරු බලවේග ලෙස රට තුළ ක්රියාත්මක වන්නට පටන් ගෙන ඇති බවත් පා. ම. දිලිත් ජයවීර මැතිතුමන් විසින් තවදුරටත්
අවධාරණය කළේය.
මෙහිදී මුඛ්ය දේශනය පවත්වමින් මහාචාර්ය මැදගොඩ අභයතිස්ස ස්වාමීන්වහන්සේ සඳහන් කළේ සම්බුද්ධ ශාසනයේ පිරිහීම ආරම්භය, බුදුරජාණන්වහන්සේ ජීවමානව සිටියදීම සිදුවූ බව බුදුරජාණන්වහන්සේ ම දේශනා වදාළ බවත් දැන් තිබෙන්නේ ශාසනයේ ගැටළු වලට වඩා ශාසනය වට්ටන්න හදන අයට තියෙන හදිස්සිය වැඩිවීමට පටන් ගෙන ඇති බවත්ය.
බුදුරජාණන්වහන්සේගේ පරිනිර්වාණය සිදුවී අවුරුදු දෙදහස් හයසීයක් ඇවිල්ලත් බුදුරජාණන්වහන්සේගේ දේශනාව රැකගෙන ශාසනය රැකගෙන භික්ෂූන්වහන්සේලා හිටියා. දැනුත් ඉන්නවා. හෙටත් ඉන්නවා. බුද්ධ කාලයේ දී පවා සිදුවූ ඇතැම් විනය සම්බන්ධ ප්රශ්න වලදී අදාල සිද්ධියට මුහුණ දුන්නා මිස, සමස්තයට පහර නොගැසූ බවත්, සෑම අවස්ථාවකදී ම සමස්තය බේරාගෙන ශාසනය රැකීමට කටයුතු කර ඇති බවත් උන්වහන්සේ විසින් වැඩිදුරටත් අවධාරණය කළ සේක.
එසේම ගිහියන් විසින් සෑම විටම භික්ෂූන්වහන්සේලා ඉන්නේ කා සඳහා ද උන්වහන්සේලාගෙන් තම අධ්යාත්මික දියුණුවට උදව් වෙන්නේ කොහොමද කියන කාරණාව ගැන නිතරම සිහිකළ යුතු බවත් භික්ෂූන්වහන්සේලා වඳවී ශාසනය පිරිහී ගිය පසු එයින් වැඩිපුරම විඳ වන්නේ ගිහි සමාජය බව තේරුම් ගතයුතු බව පෙන්වා දුන් සේක.
ගිහියන් සිව්පසයෙන් කරන උපකාර වලට ප්රතිඋපකාර වශයෙන් භික්ෂූන්වහන්සේලා අර්ථයෙන් ධර්මයෙන් ගිහියන් පෝෂණය කිරීමට නිරතුරුවම කැපවී සිටින පිරිසක් බවද රටේ නීතිය අතට ගෙන බුද්ධ නීතිය යටත් කරන තැනට ගිහියන් කටයුතු නොකළ යුතු බවත් ශාසන නීතියට ගරු කළ යුතු බවත් මහාචාර්ය පූජ්ය මැදගොඩ අභයතිස්ස හිමියන් වැඩිදුරටත් සඳහන් කළ සේක.
විශ්රාමලත් විදුහල්පති, රාජකීය පණ්ඩිත, ශාස්ත්රපති හාපිටිගම ජයසුමනාරාමාධිපති, මීරිගම ශාසනාරක්ෂක බල මණ්ඩලයේ සභාපති, මක්කානිගොඩ අස්සජි නායක ස්වාමීන්වහන්සේ විසින් මෙම උත්සවයේ මුලසුන හොබවන ලදී.
'වර්තමාන භික්ෂුව හමුවේ ඇති අභියෝග' කාලීන සංවාදය; සමස්ත ලංකා දහම් සිසිල පදනමේ විධායක අධ්යක්ෂ, ගම්පහ මහ දිසාවේ උප ප්රධාන සංඝනායක, පූජ්ය නාරංගමුවේ විමලජෝති ස්වාමීන්ද්රයන්වහන්සේගේ මූලිකත්වයෙන් සංවිධානය කර තිබිණි. වැඩසටහනේ අරමුණ පැහැදිලි කරමින් අදහස් දැක්වූ උන්වහන්සේ සඳහන් කළේ වර්තමානයේ භික්ෂූන්වහන්සේලා මුහුණ දී සිටින ගැටළු ජයගන්න අපට සහයෝගයක් දෙනවා නම්, හයියක් වෙනවා නම්; අපේ සම්බුද්ධ ශාසනය සහ බෞද්ධකම රැකගන්න දේශපාලනික වශයෙන් හරි සිතනවා නම් එවැනි නායකයින් හට ගෞරවයක් දෙන්න; භික්ෂූන්වහන්සේලා වශයෙන් අපි එකඟ බවයි.
එදා ටිබෙට් ජාතික එස් මහින්ද හිමි සඳහන් කළ අන්දමටම වර්තමානය වන විට සිංහල බෞද්ධයින් බොහොමයක් ඇස් ගෙඩිවලට හෙන ගැසූ සිහලුන් ලෙස කටයුතු කරමින් බෞද්ධ භික්ෂූන්වහන්සේලාටත් සම්බුද්ධ ශාසනයටත් නිගරු කරමින් කටයුතු කරනවා. උතුරේත් නැගෙනහිරත් ඉතා දුෂ්කර ලෙස විහාරස්ථාන වල රැඳී සිටින බෞද්ධ භික්ෂූන්වහන්සේලා වෙත එල්ලවී ඇති අන්තවාදී තර්ජන වලට පෙනී නොසිටිමින් එම ප්රදේශවලින් බුදු දහම අතුගා දැමීමට කටයුතු කරමින් සිටීම ඉතාම කණගාටු දායකයි. බෞද්ධ විරෝධී, රාජ්ය නොවන සංවිධානවල මුදල් වලින් ක්රියාත්මක වන සංඝ විරෝධී ශාසන විරෝධී අදහස් සමාජය තුළ පැතිරවීමට සමාජ මාධ්ය හා සන්නිවේදන මාධ්යවලට දායක නොවීමට බෞද්ධ දූ දරුවන් දැනුවත් කළ යුතු බවත් මෙම සංවාදයේ අදහස් දැක්වූ නීතිවේදී ගීත්මා මෙනෙවිය සඳහන් කළාය.
මෙම අවස්ථාවට සහභාගී වෙමින් අදහස් දැක්වූ මහාචාර්ය චන්න ජයසුමන මහත්මා සඳහන් කළේ සමාර්ට් දුරකතන භාවිතා කරන විට ඒවායේ ඇති මෘදුකාංග යෙදවුම් පිළිබඳව දැඩි අවධානයෙන් සහ සංයමයෙන් භාවිත කිරීමට කටයුතු කළ යුතු බවත් එවා වැරදි ලෙස සන්නිවේදන කටයුතු සඳහා භාවිතා කළ හොත් තමාගේම විනාශයට මඟ සලසන සාක්ෂි ලෙස ඉස්මතු විය හැකි බවත්ය.
තව දුරටත් අදහස් දක්වමින් කතා කළ ආචාර්ය චන්න ජයසුමන මැතිතුමා අවධාරණය කළේ; විශේෂයෙන් ම තරුණ භික්ෂූන්වහන්සේලා AI තාක්ෂණය තුළින් ඇල්ගොරිතම් හරහා සිදුවන සමාජ මාධ්ය සන්නිවේදනයන් වලදී උගුල් වලට හසුවීමෙන් වැරදි දේවල් වලට ඇබ්බැහි වීමට ඉඩ ප්රස්තාව ඇති බැවින් හරි දේ පමණක් නැරඹීමට එම මාධ්යයන් යොදා ගැනීමට විශේෂ අවධානය යොමු කළ යුතු බවයි.
මේ විශේෂ කාලීන සංවාදය සඳහා ගම්පහ දිස්ත්රික්කයේ පිරිවෙන්, විහාරස්ථාන වල පරිවේණාධිපතිවරුන්, විහාරාධිපති ස්වාමීන්වහන්සේලා, දසසිල් මාතාවන්, දහම් පාසල් ගුරුවරුන්, දේශපාලන නායකයන් සහ බෞද්ධ ප්රජාව ඇතුළු බොහෝ දෙනෙක් සහභාගී වී සිටියහ.
