04/02/2024
Cover Song එකක් කියන්නේ මොකක්ද?
එතකොට Mashup, Remake, Remix, Medleys කියන්නේ මොනවද?
සිංදු අහන, සිංදු කියන, සිංදු හදන, සිංදු හදන්න හිතන් ඉන්න හැමෝටම වැදගත් කියලා හිතන දේවල් ටිකක් මේ පෝස්ට් එකෙන් කියන්න හිතුනා...
ඇත්තටම Cover Song එකක් (සිංහලෙන් කිව්වොත් ආවරණ ගීතයක්) කියන්නේ මොකක්ද?
සරලවම Cover Song එකක් කියන්නේ දැනට තියෙන ගීතයක් (Original Song එකක්), එම ගීතයේ මුල් නිර්මාණකරු හෝ ගායකයා නොවන වෙනත් අයෙකු විසින් ප්‍රතිනිර්මාණය කිරීමයි.
බොහෝ වෙලාවට මෙහෙම Cover song එකක් කරනකොට නව නිර්මාණකරු මුල් ගීතයේ Music Arrangement (සංගීත සංයෝජනය), Vocal Delivery (ගායන විලාසය), Genre and Style (සංගීත ආර සහ ශෛලිය), Tempo (ලය හා තාල වේගය), Instrumentation (සංගීත භාණ්ඩ යොදා ගන්නා ආකාරය) විවිධ අයුරින් වෙනස් කිරීම මඟින් එම ගීතයට නව කියවීමක්, නව අර්ථකථනයක්, එහෙමත් නැත්නම් නව පෙනුමක් ලබා දීමට උත්සාහ කරනවා.
ඒ කියන්නේ Original Artist ට තමන්ගේම ගීතයක Cover Song එකක් කරන්න බැරිද?
අපෝ පුලුවන්... එහෙම කරන අවස්ථා කීපයක්ම තියෙනවා. හිතන්නකෝ මෙහෙම..
ගායකයෙක්ට තමන්ගේ සෑහෙන කාලයකට කලින් එලිදක්වපු ගීතයක් නව තාක්ෂණය එක්ක High Quality එකකින් ප්‍රතිනිර්මාණය කරන්න අවශ්‍ය නම්, එහෙමත් නැත්නම් තමන්ගේ ගීතයක් නව ශෛලියකින් එලිදක්වන්න අවශ්‍ය නම් (උදා: Reggae version/ Acoustic Version/ Orchestral Version) තමන්ගේම ගීතයක Cover එකක් කරන්න පුලුවන්.
හැබැයි මේ විදිහට Original Song එකේ ගායකයා/ නිර්මාණකරු සම්බන්ධ වී නිර්මාණය කරන නව Version එකකට කියන නිවැරැදිම නම තමයි Remake Song කියන්නේ.
ඒකත් එකතරා විදිහක Cover Song වලම උපකුලකයක් තමයි.
එතකොට Remix Song එකක් කියන්නේ මොකක්ද?
Remix එකක් කියන්නේ පැරණි ගිතයක තියෙන Recordings/ Stems/ Tracks වල සියල්ල හෝ බහුතරයක් යොදාගනිමින් නැවත සිදු කරන අලුත් Mix එකක්. මෙතනදි නව Stems/ Recordings පරණ ගීතයට එකතු කරන්නත් නිර්මාණකරුට පුලුවන්.
බොහෝවිට මේ වැඩේ කරන්නේ ලංකාවේ නම් DJ artist ලා තමයි (පැරණි ගීත වලට අලුතින් Beat එකක් එකතු කරලා). සමහර Rappers ලාත් පැරණි ගීත කොටස් Sample විදිහට යොදා ගනිමින් සිදු කරන නිර්මාණ දකින්න පුලුවන්.
Remix වගේම වර්තමානය වෙද්දි Remastered Versions කියලත් ගීත වර්ගයක් තියෙනවා. එතනදි පැරණි ගීතයට අලුතින් දේවල් එකතු නොකර එහි අවසාන Sound Quality එකට පමණක් වෙනස් කම් සිදු කිරීම දක්නට ලැබෙනවා. (උදා: Slowed and Reverbed version)
එතකොට මොනවද මේ Mashup කියන්නේ?
Mashup එකක් කියන්නේ ගීත දෙකක් හෝ ඊට වැඩි ගනනක් එකට සම්මිශ්‍රණය කර නිර්මාණය කරන තනි නිර්මාණයක්. මේ සඳහා නිර්මාණකරු විසින් යොදා ගන්නේ හොඳින් Musically එකිනෙක match වෙන ගීත. ඒ යොදා ගන්නා ගීත වල කොටස් විටින් විට නිර්මාණය පුරා ඇහෙන විදිහට තමයි මේ Mashups නිර්මාණය කරන්නේ.
හැබැයි එක ගීතයකට පසු ඊලඟ ගීතය එන විදිහට පිලිවෙලින් පෙල ගැස්වූ නිර්මාණ වලටත් වර්තමානයේ සමහරු Mashups කියලා වැරදියට හඳුන්වනවා. ඒවාට වැඩියෙන්ම ගැලපෙන වචනය තමයි Medleys කියන්නේ. Medleys වල Mashups වල වගේ ගිතවල කොටස් කොටස් සම්මිශ්‍රණය වී නිර්මාණය පුරා යෙදීමක් දකින්න ලැබෙන්නේ නෑ. Medleys වල ගීතයෙන් ගීතය පිලිවෙලට ගලාගෙන යාමක් තමයි සිදුවෙන්නේ.
ඉතින් අවසාන වශයෙන් මේ සියලු යෙදුම් Cover Songs වල උපකුලක විදිහට අපිට හඳුනාගන්න පුලුවන්. ඒ නමුත් යම් නිර්මාණයක් හඳුන්වාදීමට සුදුසුම වචනය කුමක්ද යැයි කියා අපිට අවබෝධයක් ලබා ගැනීමට මේ ලිපිය උදව් වේවි කියා අපි සිතනවා...
