09/04/2026
මතකයේ සුවඳ රැඳි සිරිසුනන්දයේ "ගුරු උපහාර" සැඳෑව ....
කාලය කොතරම් වේගයෙන් ගලා ගියත්, ඇතැම් මතකයන් කිසිදා මිය යන්නේ නැත. සිරිසුනන්ද විද්යාලය නැමති ජය භූමියේ මුදිතා ශාලාව පසුගිය දිනෙක පිරී ගියේ හුදෙක් සිනහවෙන් පමණක් නොව, දශක ගණනාවක අතීත මතකයන්ගෙන් පිරී ගිය කෘතවේදීත්වයේ කඳුළු බිඳු වලිනි.
අප විද්යාලයේ හිටපු ගෞරවණීය විදුහල්පති ආරියදාස ගොඩගම මහතාණන් වෙනුවෙන් ආදි ශිෂ්ය සහෝදරයන් කිහිප දෙනෙකු සංවිධානය කළ "ගුරු උපහාර" උළෙල අති උත්කර්ෂවත් ලෙස පැවැත්වුණි.
එහි තිබූ සුවිශේෂීම අවස්ථාව වූයේ, එකල අපට අකුරු කරවූ, අපේ ජීවිත හැඩගැස්වූ පැරණි ගුරු මෑණිවරුන් සහ පියවරුන් විශාල පිරිසක් නැවතත් තම පැරණි විදුහල් භූමියට පියමැනීමයි.
ගුරු සිත් සුවඳයි... මතකයන් ලස්සනයි...
එදා අපට දඬුවම් කළ, අවවාද කළ, ආදරය දුන් ඒ ගුරු පියවරුන්ගේ සහ මෑණිවරුන්ගේ හිස කෙස් අද පැහී තිබෙන්නට පුළුවන. ඔවුන්ගේ දෑත් වෙනදාට වඩා මඳක් වෙව්ලන්නට පුළුවන. නමුත් අප දෙස බලන ඒ කරුණාවන්ත දෑස්වල තිබූ "අපේ දරුවන්" යන හැඟීම අදටත් එදා මෙන්ම නැවුම්ය.
එදා දඟකාර සිසුන් වූ අපව අද සමාජයේ වැදගත් පුද්ගලයන් ලෙස දැකීමෙන් ඔවුන්ගේ දෑස්වල නැගුණු ඒ සතුටු කඳුළු, අපට ලැබුණු ලොකුම සම්මානයයි. ආරියදාස ගොඩගම නම් ඒ අපූර්ව ගුරු උතුමන් ගේ දූරදර්ශී නායකත්වය යටතේ අප ලැබූ ඒ අත්දැකීම් අදටත් අපේ ජීවිතවලට ආලෝකයක් බව මේ මොහොතේ සිහිපත් කරමු.
"ගුරු දෙවිඳුන්ගේ පා සෙවණේ ලැබූ ඒ අගනා ශිල්පයත්, විනයත් අප ජීවිතයේ සදාකාලික උරුමයයි."
මෙම උත්සවය සංවිධානය කිරීමට වෙහෙස වූ සියලුම ආදි ශිෂ්ය සහෝදර සහෝදරියන්ටත්, ආරාධනාව පිළිගෙන පැමිණි ගෞරවණීය ගුරු මෑණිවරුන් පියවරුන්ටත් අපගේ හෘදයාංගම ස්තූතිය පුද කර සිටිමු.
අපේ ගුරු පියවරුන්ට සහ මෑණිවරුන්ට නිදුක් නිරෝගී දීර්ඝායුෂ ප්රාර්ථනා කරමු! 🙏✨
සටහන : අසංක ගොඩකන්ද.
