27/06/2024
ගුරුවරු නෙවෙයි මුන්.... ගුරුහොරු ........
ආන් අම්මෙ අපේ ටීච
ටීවි එකේ පෙන්නනවා
කඳුළු ගෑස් ඇහේ වැදිල
එයා අඬනවා ........
ඔක්කොම ගුරුවරු ගුරුහොරු
මුන්ව මරන්නයි තියෙන්නෙ
කැමරාවට මූණ දාපු
මාම කියව්වා ......
ඇත්ත තමයි මාම කිව්වෙ
අපේ ටීච හොරෙක් තමයි
මට පොත් ටික ගෙනත් දුන්නෙ
ඔක්කොටම හොරෙන් ....
තඩි මල්ලක් කරේ දමන්
යන්න බැරුව පැටලෙනකොට
අනිත් අයට නොපෙනෙන්නට
ගෙනිච්චෙත් හොරෙන් ...
කැලේ පැන්න අයියලාට
වේවැල් කෝටුවෙන් ගහල
හොරෙන් අඩනවා දැක්කා
මුල්ලකට වෙලා ...
කලාප තරඟෙට යන්නට
කිරි සුදු ගවුමක් මහලා
හොරෙන්ම දුන්නා කියලා
නිපුනිත් කිව්වා ....
එගොඩ නැන්දලගෙ ඉඳුවර
බත් ගෙනැල්ලා නෑ කියලා
ටීචගෙ බත් මුල දුන්නෙත්
හැමෝටම හොරෙන් ....
අයියල විහිලුවක් කරල
සයුරි අක්ක අඬපු වෙලේ
හොරෙන් හොරෙන් මොන මොනවද
කුටු කුටු ගෑවා....
හවස පන්ති ඉන්න වෙලේ
ටීචගේ නංගිය අඬලා
මේ දැන් එනවා කියලා
හොරටයි කිව්වේ .....
ලොකු සර්ගෙ ඔපීසියෙන්
කඳුළු පුරෝගෙන ඇවිදින්
හොරට ඔලුව තියන් හිටිය
ඇඬුවද මන්දා .....
අනේ අම්මෙ තේරෙන් නෑ
මාම කිව්ව දේ හරිනේ
හෙට ඉඳලා මගෙ ටීචට
හොරා කියන්නම් ....
- ශ්‍යාමලී ගුණසේකර,
එස්.ඩබ්ලිව්.ආර්.ඩී. බණ්ඩාරනායක ජාතික පාසල
කුණ්ඩසාලේ,
මහනුවර.
2024.06.26
