මචං

29/05/2023

අඳුරෙන් ආලෝකමත් වෙන ස්මරණ
====================

සිරිත් පරිදිම බටහිර අහස ගිනියම් වත්ම සියොත් සමූහයා කඩිමුඩියේ කැදලි කරා පියාසැරියේ නිරත වන්නේ ගොම්මනේ අඳුරෙන් නිශාචර සිතිවිලි විවර කරමිනි. වෙනදා සඳ දියෙන් පමණක් සැහහුන නුබ කුස අද අප්රාණික ය. අමාවක කළුවරට එක්කාසු වන සිහින් හිරිකඩ නුබ කුසට පමණක් නොව මටද ගෙන එන්නේ පාළුව කාන්සියෙන් නිමග්න වූ මූසලම හැඟීම් සමූහයකි. අපිරිමිත සුසුම් මතින් උඩු හිතින් මකාලූ නුඹේ මතක යටි සිතේ පුපුරු ගසයි. සඳ එළියට සොයා ගැනීමට නොහැකි වූ නුඹ අමාවක කළුවර සොයාගැනීම විස්මය දනවන්නකි. මෙලොව ඇති තීව්ර තම හඬ නිහඬ බව තුළ ගැබ් වන්නා සේම, අමාවක කළුවරේ අති මහත් ආලෝක ධාරාවක් ඇති බවත් ඒවා ව්සින් අතීතය විසින් වල දැමූ ස්නේහයේ නටබුන් ගොඩගන්නා බව මම මට ම කියා ගතිමි.

මේ අඳුර සොබාදහමේ කෲරතම සංසිද්ධියකි. පියවි සිහියෙන් සිටීම අපහසු ය. දුම් වැටි කීපයක් , බීර බෝතලයක් හා අමාවක කළුවර පමණක් මා අසල ඇත. බීර බිඳුවක් මුවඟින් ඇතුළුවත්ම යටි සිත අවනත නොවී ය. දෙනෙත් අඩවන් වීය. කම්මුල් තෙත බරිත විය. ස්නේහයේ පෞරාණික මතක පිළිවළින් ස්මරණය වීම සැනෙකින් ඇරඹීය.

වෙනදා මෙන්ම අදත් මසිත ට අනන්ත වූ මතක සිහි නැගේ. මා හට එය පාලනය කළ නොහැකි තරමට ඒ මතයක් තුළ මා ඇබ්බැහි වී ඇට.නමුත් විමතිය නම් සෑම අඳුරු දිනකම මා එකම එක මතකයක සිර වෙයි. එය හාදුවකි. එය හරි හැඩ ය. මිහිරි ය. සිත් කලුය. මහමෙරක් බරැති ය. ප්රථම ප්රේමය බොහෝමයක් හදවත් තුළ ශේෂ වී ඇති බව මා අසා ඇත. නමුත් ප්රථම හාදුව මෙතරම් ම මසිත කා වැදී තිබීම විමතියකි. එය නුඹටත් එසේම වග නුඹ නොකීවත් මම දනිමි. ඒ අල්පමාත්ර කාලය කල්පයක් හා සමානය. නුඹේ අඩවන් වූ නෙත්, ගෙල වටා බැඳි අත් මෙන්ම ඒ සුසුම් හඬ තවමත් සජීවී ය. ස්මරණය අවසන නෙතඟ තෙත් කළද පුන පුනා එය සිහි කිරීම මහත් ආස්වාද දනවයි. පැවතුන ද නොපැවතුනද ඕනෑම ප්රේමයක් සන්තකව මතක ගොන්නක් ඇත.එය කිසිදාක කොයිලෙක හෝ යටි සිතෙන් පුළුස්සා දැමිය නොහැකි බව මම දැන් මනාව දනිමි. එය දෙහදේම එකම ලෙස රැඳේ. වෙන් වීමෙන් පසු කොතනක සිටිය ද මනසේ ශේෂ වූ සවේධනීයම මතක අමතක වන්නේ කෙසේ ද?

එකම මතකයක මා ජීවත් වූවද බීර බෝතලය නම් එසේ නොවේ. මතකයන් සෙමින් සෙමින් මෙනෙහි වූව ද පියවි සිහියෙන් මිදීමේ වේගය නම් වැඩි වේ. මම අවසාන දුම් වැටිය දැල්වුයෙමි. දීර්ඝ හුස්මකින් පසු සුසුමක් පිට විය. දුම් වළලු සිහින් සුළගේ ඔහේ පා වෙයි. එය හුදෙක්ම මා මේ මොහොතේ මතකයන් තුළ නුඹ සමග කාලය ගෙවන්නාක් මෙනි. සුළගින් දුම විසිර යන්නාක් සේ පියවි සිහිය මේ මතකයන් යට ගසනා බව මම හොඳින් දනිමි. මේ සීතල හිරිකඩ, ගොම්මන් අඳුර මොනයම්ම පපු තුරුළක උනුහුමට ගුලි වී උන්නත් ඔබට දැනෙනු නොඅනුමාන ය. වෙන් වීම ක්ෂණයකින් සිදු විය . නමුත් අප ස්නේහය සාංසාරික බව නුඹ මනා ව දනී. ඒ ප්රේමය කිකලක හෝ වල දැමිය නොහැක. වියෝ වීමට හේතු මම නොසොයමි. එය හුදු ඕනෑම මනුශ්යකු සතු අයිතියකි. නමුත් කල්පයක් හා විශාල පෙමක මා උරුමක්කාරයකු කරලීම වෙනුවෙන් මා නුඹට තුති පුදමි. හිමි වීම අහිමි වීම හෞතිකයකි. නමුත් ආදරය යනු හුදෙක්ම ආධ්යාත්මයම අත්පත් කරගන්නකි. ඉතින් සොදුර මේ ඔබෙත් මගෙත් විතැන් වූ පෙම ඒකාලෝක කරන්නා වු අමාවකයි. සඳලුතලයෙන් ඉවතට පැමිණ ආධ්යාත්මයට සවන් දෙන්න. මා මෙන්ම නුඹ ද අතීතයේ දුර්භික්ෂ අභිමුව කාලතරණය කළ අප ස්නේහය ගිනි පුපුරු මෙන් දළුලනු පෙනෙනු නොඅනුමාන ය.

✍️ ජනිත් මධුසංක

24/05/2023

23/05/2023

මග හැරුණු බස් රිය
============

" අතිශය යාන්ත්‍රික හදවතක් දරා සිටිම කෙතරම් අපහසුදැයි මම දැන් දැන් හොඳින් දනිමි. කලකට ඉහතදී ඔබ තෝරා ගත යුත්තෙ කුමන මාර්ගයද එසේ තෝරා ගනු ලබන මාර්ගයෙ ගමන් කරනවාද නැතහොත් මේ මොහොතෙ ගමන් කළ යුතුව ඇති මාර්ගයෙ ගමන් අරඹනවාද යන්න මා තැවූ පැනයයි. අවසනට තෝරා ගත යුතුව ඇති මාර්ගය පසෙකලා ගමන් ඇරඹිය යුතු මාර්ගයෙ ගමන් කරන්නට වූයෙන් මා කෙතරම් මානසික ව්‍යාධියකට ගොදුරු වී ඇත්දැයි සිතාගැනිමට ද දැන් අපහසුය . " මා දිනපොත වැසුවෙමි.

ඈත කෘතිමත්වයෙන් සරු සාර කොන්ක්‍රීට් බිල්ඩින් අතරින් පතර⁣ එබිකම් කරන හිරු කිරණ දෙස බලමින් ගෙවා දැමීමට ඇති වෙහෙසකර දවස පිළිබඳ කල්පනා කළෙමි. අවසානයෙ සුසුමක් පිට කර දෛනික ඒකාකරි ජීවන රටාවෙ පළමු අංගය වූ ආහාරයක් සකසා ගැනීම මා ආරම්භ කළේමි.

" වේලාව උදෑසන 5 පසු වී මිනිත්තු 40යි. ඔබ මේ සවන් දෙන්නෙ යං එප් එම් හී උදෑසන අභිප්‍රේරක හෝරාවටයි. ඉතිං , මහාචාර්යතුමනි අප පාලක මැදිරිය වෙත යොමු වීමට ප්‍රථම කතාබහ අවසාන කළේ The pursuit of happiness සිනමා කෘතිය පිළිබඳ වයි ...."

එක්වරම මගේ කල්පනා ලෝකය සුනු විසුණු කරණු ලැබුවේ දෛනිකව හඬ සුසර වී ඇති කබල් රේඩීයො හඬයි. කාත් කවුරුත් නැති මේ බෝඩින් කාමරයේ මගෙ කාන්සිය මකන එකදු හෝ දෙයක් වේ නම් ඒ එයම පමණයි. නමුත් බොහෝ විට එයද කන්කරච්චලයක්ව වද දෙන මොහොතවල් ඇති බැව් සිහිකරත්ම මා මුව අගින් සිනාවක් පෑවේ The pursuit of happiness සිනාම පටය මීට අවුරුදු හතරකට කලින් උසස්පෙළ අවසන්ව ගිය රැකියාවේ පුහුණු කාලය තුළ එය පෙන්වූ නමුත් එදා පටන් සිනමා පටයේ වූ චරිතයට පණ දෙන්නා සේ අපිත් ඒ තරමට , ඊට එහාට මහන්සි වූවද ඇත්තෙන්ම මේ ජීවිතේ සතුටක් තියනවාද යන්න ය එසේ නම් මහන්සි වීමෙන් සතුට සොයා යා හැක්කෙ සිනමා පටවල පමණක්ද.

සිනාම පටය වූ චරිතව තම බිරිඳ තමාව හැරයාමේ කනස්සල්ලෙන් පසුවෙමින් තම පුත්‍රයාද රැගෙන ගොස් විවිධ දුක් වේදනාවන් ද දරා ගනිමින් අතිශය පීඩාකාරී රැකියාවක නිරත වීම සහ තම තනතුර ස්ථිර කරගරනීමට වෙන වෙහෙස දෙස මා ඔනෑකමින් බලා සිටියෙය. ඒ මොහොතෙ ඇඟලුම් කාර්මාන්තයක සේවයට බැඳීමට අපෙක්ෂාවෙන් සිටි මා සිනමාපටය තුළ සිනමාරූපිව ගොඩනැඟී තිබු ඒ දුක්ඛිත ආශ්වාදය හෙට දවසෙදි සුසුමක් ගන්නටවත් ඉඩක් නොමැතිව මා හටද ගත කරන්නට සිදු වේයැයි මා නොසිතුවෙමි.

අවසානයේ ඔහු සිනමා පටය තුළ තම රැකියාව ස්තිර කර ගතහ. එවිට ඔහුට ඔහු වෙහෙසන අතර තම සුවපහසු කාලාපයට වී සිටි රැකියාවේ ඉහළ ස්ථාන වල සිටිවලුන් ඔහුව පසසන ලදි . ඔහුද එවිට දිනෙක තමාද ඔවුන් මෙන් සුවපහසුව තම අධුනිකයන් වේඳාවෙන් වෙහෙසෙන දෙස බලා ඉන්නට පෙරුම් පුරන ලද්දැයි ද මා එවිට සිතුවෙමි.

" මල්ලී ඔහොමනම් බෑ අපේ ලයින් ටාර්ගට් එක 15000යි අපේ තාම කෑලි කීයද. " එවිට මා කලබලෙන් මසයි. නැවත සුපවයිසර් ගේ හඬ විවර වේ. " ඒ ඒ මනුස්සයො ඔය ⁣එක ඇදුමක් ලක්ෂ ගානක් වටිනවා. ඩැමෙජ් එකක් වුණොත් කී ගාණක පාඩුවක්ද පරිස්සමින් " එවිට මා සිතන්නට වූයේ දිනකට ලක්ෂ ගණනක් වටින ඇදුම් දහස් ගණනක් මහන අපේ අතට මසේ අන්තිමට එන්නෙ එක ඇඳුමක වටිනාකමින් හතරෙන් පංගුවකටත් අඩු මුදලක් නේද කියා. මා මිතුරෙකු සමඟ මේ බව කතා කළෙමි. මා ඔහු හා කතාවේ උච්චතම අවස්තාවෙදි පැවසූයේ එම කෝටි ගාණක ආසාධාරණ ලාබය යන්නෙ පැක්ටරියේ අයිති කරු වූ තනි පුද්ගයෙකුට නේද යන්න.
අහෝ , අවසානාවක තරම එය මගෙත් ඔහුගෙත් සතරකන්මන්ත්‍රණය ඒ අසල හුන් මානව සම්පත් කළමණාකරණ ගිරා පො⁣තකයෙකුගේද සවන්ද ස්පර්ශ කොට තිබුනි.
අවසානෙදි ඒ තත්ත්පර කීපයක කතා බහ දේශපාලනික මුහුණුවරකින් අභ්‍යන්තර සේවකයන්ගෙ මානසික සමතුලිතාවයට බලපෑම් කරන බැව් හංවඩු ගැසිමකින් පසු අප දෙදෙනා අස්වීම් සහතික දෙකද අතැතිව ෆැක්ට්රියෙ ගෙට්ටුවෙන් එළියට දෑමිමය.

පසු කෙටි කලකින් ප්‍රථිපල නිකුත්විය. Z.score කඩුල්ලෙන් පැනීම දශමයකින් පමණ සීරු මාරු වී මා හට සරසවි වරම් අහිමි වීමෙන් පසු අද දවසෙ කරන රැකියාව මාගේ ජීවිතයෙ ඉරණම් කාරණාව විය.

" වේලාව උදෑසන 6 පසු වී මිනිත්තු 53යි " කල්පනාවෙන් කල්පනාවෙන් මා අද දවසෙ වෙහෙසකර සංග්‍රාමයට අවිද , යුද ඇදුම්ද සහිතව සූදානම් වී තිබුනි. දැන් යුහුසුළුව යුධ පාවහන්ද පැලද මා බස් රථ තුරඟා මත නැගිය යුතුය.

" දඩස් "
සපත්තු යුගලය අතට ගනිද්දි එක් වරම හදවත බිඳදමමින් ඒ මතට කඩන් වැටුනෙ මහා ග්ලැසියර කඳුළකි. ඒ කාලයකට ඉහත සියල්ල පසෙක තබා මා මාව සොයා ගෙන ගිය ගමනේ මගේ ගමන් සගයා වූ ගිටායර ය. ටොන් ගණනක් බර සුසුමක් පිට කළ මා සංගීතවේදීයෙකු වීමට ආශාකර ඒ අතීතය තුළ අතරමං විය. සුසුම් පිට කීරිම ඇරෙන්නට මා සතු වෙනයම් සැනසීමක් නොමැති බැවින් සපත්තු පැලඳ මා ජීවිතය පිළිබඳ දෙගිඩියාවකින් මෙන් නිවසින් පිටමන් විය.

නමුදු සිත ඇත්තෙ තවත් ඒ බිම වැටුනු ගිටාරය අද්දරය. සුසුම් එක පිට එක පිටකරමින් මතක ලෝකයක තනි වී සිටි මා එක් වරම තිගස්සා මිහිබටට කැන්දූවේ විශ්‍රාම සුවයෙන් පසු වන මගෙ අසල්වැසි ලියන මහත්තයාය. ශ්‍රාවේත අද පරක්කුද වෙනදා මීට කලින් හන්දියට ගිහින් නේද. නෑ මහත්තයා මම වෙනදා වෙලාවටමයි. ඔහු වැඩිය දොඩමළු වීමට කැමැත්තක් දක්වන්නෙක් නොව. සැමදා උදෑසන පත්තරය ගෙන ඒමට බාගෙට කුදු ගෑහී කඩයට යන ඔහු නැවත එන ගමනේදී හමු වූ මා වෙත යන්නම් කීමට ඔහුගෙ වෙව්ලුම් කන අතඟිලි සහිත අත වැනුවේය. ඒවා වෙව්ලුම් කන්නෙ අමුතු රිද්මයකටය. බොහෝ අයගෙ මතය වූයේ ලියන මහතා තරුණ හා මැදි විය දෙකේදිම දෛනිකව ගත්තු ඇල්කොහොල් නිසා එහෙම වෙන විත්තිය වුවත් මා දුටුවෙ එයින් ඊට එහා යමකි. කාලයක් ඒ සුපුරුදුයැයි දැනුනු වෙව්ලුම් රිද්මය ග්‍රහණය කර ගත්තෙ මහෙස්ත්‍රාත් උසාවිය ළඟ පරණ ටයිප් රයිටරයක් තබාගෙන එයින් ටයිපින් කරන මනුස්සයාගේ ඇගිලි දිවෙන රිද්මය දැකීමෙනි. ඔව් ලියන මහතා ජීවිතය පුරා සිදු කෙරු කාර්යය වන්නෙ ඒ යකඩ අකුරු පතුරු තම දැඟිලිවලින් සෙලවීමය ටයිප් රයිටරය අද ඔහු ඉදිරියෙ නැති බැව් ඔහු දන්නවා වුවද ඔහුගේ ස්නායුමය දුර්වල ඇඟිලි දන්නෙ නැත.

මා සුසුමක් පිට කළේය නැවත. ඒ ලියන මහතා ගැන වූ කනස්සල්ලටත් වාඩා මේ මොහොතේ දී මා රැකියාව විදිහට කරන ගණකාධිකරණ කාර්යයෙදි මා දබර ඇඟිල්ල යොදා කරන කැල්කියුලේටරය ක්‍රියා කරවීම මාද වියපත් වූ දිනෙක සිදු කරවිද යන සැකයෙනි. මා ගමන නවතා වමතෙ දබර ඇගිල්ල සොලවා එලෙස බැලුවෙමි.

" මචං , උබ අද එන් නැද්ද . බස් එක උබලැ හන්දිය පහු කරා. " මා ක්ෂණයෙන් දුවන්නට විනි. නමුදු බස් රිය මා යා යුතුව තිබු හන්දිය පසු කර බොහෝ ඈතට ගොස් සැඟව ගියහ. යා යුතුව ඇති එකම බස් රථය වන්නෙ එයය. ඉන් ටවුමට ගොස් කාර්යාලයේ වෑන් රථයට ගොඩ විය යුතුය. මා කේසෙ හෝ ටවුමට ගියද එහිදි ද අතරමං වනු නිසැකයය.

ටයි ගැටය ලිහිල් කරමින් මා නැවත හැරී ගෙදරට සේන්දු විය. කලින් දැනුම් දීමකින් තොරව කරන නිවාඩු දැමීමකදි අඩුවන පඩිය ගැන මා කනස්සලු වනවාද නැතිනම් ඉඳලාම එළඹි මේ අවස්ථාවෙ මට මඟ හැරුනු මා නැවත සොයා යනවද කියා මා සිතුවෙමි. ඉතිං මා තීරණයක් ගතිමි.

ගිටාරයෙහි දූවිලි පිස එහි කම්බියක් සුසර කර බැලුවෙමි.

✍️ බුද්ධික ලක්ෂාන් හේරත්

20/05/2023

ඒහි පස්සිකෝ..
========

පළමු වස් කාලයෙන් අනතුරුව සැට එක් නමකගෙන් ආරම්භ වූ බෞද්ධ දර්ශනය ප්‍රචාරය කිරීම, ඉතා වේගයෙන් දඹදිව පුරාද, ඉන් ඔබ්බටද පැතිරීමට හේතුව ඔබ යම් දිනයක කල්පනා කලාද?

පැවති සමාජ ක්‍රමයට, විශ්වාසයන්ට සහ ඇදැහිලි වලට අභියෝග කරමින් ගෞතම බුදුන්, සුනීත සෝපාකගේ සිට සුද්දෝධන බිම්බිසාර කොසොල් රජ දක්වා විවිධ සමාජ ස්ථරයන්හී සැමට වදාලේ 'එව, බලව' නැතහොත් "ඒහි පස්සික" ලෙසයි..

ගැඹුරු එහෙත් ප්‍රායෝගික ජීවන දර්ශනයකට පසුකාලීනව සාහිත්‍යමය සහ සංස්කෘතික ලක්ෂණ එකතු වීමෙන් වර්ථමානය වන විට බෞද්ධ දර්ශනය අභිබවා බෞද්ධ සංස්කෘතිය සහ බෞද්ධ සාහිත්‍යය ඉස්මතු වී ඇති බව පෙනේ.

සාහිත්‍යය මගින් වඩාත් විචිත්‍රව සහ උත්කර්ෂවත් ලෙස රචිත ලේඛන සහ බෞද්ධ සංස්කෘතිය මගින් එක් කල වන්දනා සහ ඇදහිලි වතාවත් බෞද්ධ දර්ශනය ලෙස වටහා ගන්නා අන්‍යාගමිකයන් පමණක් නොව නාමික බෞද්ධයන්ද සිටින බව මෑත කාලීන සිදුවීම් වලින් කැපී පෙනේ.

පවතින ජන පීඩක ආර්ථික ක්‍රමය මිනිසුන්ගේ විවේක බුද්ධිය සහ විචාර බුද්ධිය හීන කර දමා සියලු සංවේදනයන් මොට කර තිබීමද මෙහි මූලයක් ලෙස හඳුනා ගත හැක.

කෙසේ උවද, අන්‍යාගමිකයෙකු ඔහු දකින අයුරින් බුදුන් පිළිබඳ හෝ බුදු දහම පිලිබඳ කරන අදහස් දැක්වීම් වලින් බුදු දහමට හානියක් වන්නේද යන්න ගැඹුරින් සලකා බැලිය යුතුව ඇත.

ඊට වඩා හානියක් බෞද්ධ දර්ශනයට අනුගත නොවූ ආර්ථික ක්‍රමයක් නඩත්තු කරන සහ ජීවන රටාවක් පවත්වාගෙන යන "සිංහ ලේ සහිත බෞද්ධයා" සිදු කරන බව නම් ලියා තැබිය යුතුම වේ.

බුදුන් එදා දෙසූ පරිදි අද අපට අන්‍යයන්ට පැමිණ බලන්නට ආරාධනා කල හැකිදැයි සහ එසේ අන්‍යන්ට බෞද්ධයන් ලෙස අපට පෙන්විය හැක්කේ කුමක්දැයි විවේක සහ විචාර බුද්ධිය පෙර දැරිව කල්පනා කල යුතු වන අතර බුදුන් දෙසූ දර්ශනය මැතිවරණයක් ලං වන විට අනතුරේ වැටෙන වර්ගයේ එකක් නොවන පමණක් තරයේ සිහියේ තබා ගැනීම යහපති..

✍️ ප්‍රනීත් කෝසල

17/05/2023

ඔබත් ඇදට ගමන් ගන්නා පැටැව්න්ට සිනාසෙන කෙලින් ගමන් කරනා කකුළුවෙක්ද ?
=============================================

වර්ථමානයෙදි බොහෝ සමාජමාධ්‍ය කතා බස් තුළ නව පරපුරේ ක්‍රියාකාරකම් බොහෝ සෙයින් විවේචනයට ලක් වෙමින් පවතී. ඇතැම් විට ප්‍රවෘත්ති නාළිකා තුළත් පත්තර පිටු අතරත් ඊට සහසම්බන්ධ සිදුවීම් බොහොමයක් වර්ථා වන්නෙය. පසුගිය කාලයේ තම ගුරුවරියකගේ සැමියා දුන් අවවාදයක් නොරිස්සූ සිසුන් පිරිසක් තම අත වූ යතුරු පැදි හිස් වැසුම් වලින් පහර දී ඔහුව ඝාතනය කළ සිදුවීම ඔබට මතක ඇති. තවද නිකවැරටිය සහන් , සෙල්ලක්කාර මලියා නම් පතාල අන්වර්ථ නාමයන්ට සමාන නාමතහඩු තම කර එල්ලන් ප්‍රසිද්ධියෙ සමාජයක් ඉදිරියේ පිළිකුලට පත් වූ නව පරපුරෙ පුරක් දැක ගැනීමට හැකි විය. තවද තම පෙම්වතියට කෙරූ විහිළුවකට උරණ වූ සිසුවෙකු තවත් සිසුවෙකුව මාතරදි පිහියකින් කපා කළ ඝාතනය ඔබට මතකයැයි මා සිතමි. එසේම ඉතා ආසන්න සිදුවීම් මලාව වනුයේ කළුතර ප්‍රදේශය මූලික කරගනිමින් ගලා ආ සිදුවීම් සමුච්චයය.

මා ඔබෙන් අසමි එවැනි සිදුවීම් වලට භාජනය වූ නව පරපුර විතරක්මද ඊට වැරදි බීජයක් ප්‍රරෝහණය වන්නට නම් ඊට සමගාමීව අර්ද්‍රතාවය , ජලය , හිරුඑළිය සහ උෂ්ණත්වය යන සාධකයන් බලපානු ඇත. ඉතිං මේ සමාජය තුළත ප්‍රරෝහණය වන්නා වූ බීජයන් වන්නෙ මේ නව පරම්පරාවායි. ඔවුන් ප්‍රරෝහණය විය යුතු සහ පසු ස්ථාපිත විය යුතු ක්ෂෙත්‍රය වන්නෙ මේ සමාජයයි. එැබැවින් සමාජය විසින් ලබාදෙන්නා වූ ප්‍රරෝහිණික සාධක කරණ කොට ඒවා ප්‍රරෝහණය වනවා හැර ඊට ස්වාධීන නිවැරදි මාර්ගයක් තෝරා ගන්නට හැකි වේ දැයි ඔබ හොඳින් සිතා බැලිය යුතු වෙයි.

අද ලෝකයේ බොහොමයක් රටවල අධ්‍යපන ක්‍රමයන් තුළ පරිඝණය විද්‍යාව , ඉංජීනේරු විද්‍යාව වැනි නව තාක්ෂණික සියවසට ඔබින විශය පථයන් අනිවාර්‍ය කොට අධ්‍යනයට ඉඩ සලස්වා තිබියදී අපේ රටේ තවමත් අතීත පෞරාණික නෂ්ඨාවශේෂ හප කරමින් අතීත ශ්‍රී විභූතිය පිළිබඳ පුරසාරම් දොඩන තවත් පරපුරක් නිර්මාණය කීරිමට හැකි පදනම අධ්‍යපනය විසින් සකස් කරයි.

එදිරිවීර සරච්චන්ද්‍රයන්ගෙ , මාර්ටින් වික්‍රමසිංහයන්ගෙ නිර්මාණ කියවා රසවිඳිය හැකි සහ ඒ අනුසාරයෙන් තම සාහිත්‍යකාමීත්වය , කලාකාමීත්වය , කවීත්වය , විචාරික මනස සහ රංග ප්‍රතිභාව පුබුදුවාලීමට හැකි පරපුරක් නිර්මාණය කරනවා වෙනුවට එම නිර්මාණයන්ගෙ පරිච්ඡේද පිටින් කටපාඩම් කොට විබාගයේදී ඒවා අකුරක් නෑර නිවැරදිව වෑමැරිය හැකි පරපුරක් අද නිර්මාණය කරමින් සිටියි.

රවණාගේ දඩුමොණරය පිළිබඳ අපේ ළමයි වචන සිය ගණනක රචනයන් ලියද්දී අනෙක් රට වල දරුවන් යාන්ත්‍රික ඉංජීනේරු විද්‍යාව , රොකට් තාක්ෂණය , නූතන අති දියුණු වාහන ගැන පිළිබඳ අධ්‍යනය කරයි.

නීතිය අනිවාර්යයෙන් දැනගතු යුතුව ඇති රටක කුමන පාසල් විශය නිර්දෙශයේද නීතිය පිළිබඳ අඩංගු වන්නෙද යන්න අප විමසිය යුතුව ඇත. හතේ අපේ පොත තහනම් කරමින් ළමුන් සඳහා ලැබිය යුතු අනිවාර්‍ය ලිංගික අධ්‍යයාපනය ආගමට පවරන්නටැයි පැවසු භික්ෂුන් අද සිද්ධ වන ලිංගික අපහරණ සිදුවීම් ඉදිරියේ නිහඬ තපස් වෘත්‍ර අනුගමනය කරන්නෙ ඇයි දැයි ප්‍රෂ්ණාර්තයකි.

එසේ නම් දෙදාහෙන් පසු පරම්පරාවක් විවේචනය කරන නමසිය ගණන් වල දයාබර වැඩිහිටියනි නුබලාගේ පසු පරම්පරා බීජයන් ප්‍රරෝහණය වන්නාවු සමාජීය ක්ෂෙත්‍රය දෙස ඔබ ඕනෑකමින් කවරදාක හෝ බලාදැයි ඔබ ඔබෙන් විමසා බැලිය යුතුය. එසේනම් ඔබ සිනාසිමට ප්‍රථමව ඔවුනට සැබෑ මිනිසුන් ලෙස හැදී වැඩීමට සමත් සමාජීය පරිසරයක් නිර්මාණය කීරිම ඔබේ වගකීමක්යැයි මම ඔබට මතක් කරමි.

ඉතිං තවත් වසර ගණනාවකින් පසු ඉඳලාම මතුවන දේශපාලනික රැළිවලට නතු වී තම දේශපාලන මන්ද මානසිකත්වයෙන් පීඩා විඳිමින් පාලකායට සිතූ සිතූ පරිදි තම සමාජය අපහරණය කීරිමට ඉඩ සලස්වමින් තම වරද සඟවාගෙන පසු පරම්පරාවේ මෝඩ වැඩ වලට සිනාසෙන යුගයක් මේ රටේ මින් මතු නිර්මාණය විය යුතු නැති බව මා අවදාරනය කරමි.

✍️ බුද්ධික ලක්ෂාන් හේරත්.